Mátyo 4
4
Sátan a kiksɛ́ Yésuwə
1Á mbís ɛ púndá Mudî n Dyǔ m bwə́lí Yésuwə a kǐ á ɛ́sínj álí bwə nána Dɛ́vəl a kíksɛ mɔ́. 2Ngə Yésuwə a m məní ɛ dyɛ̌ njɛ-á-mákáni átin madû mûm mánîn, lisín na wudû, njɛ ɛ bílí mɔ́ ɛ wa jǐta. 3Ti Dɛ́vəl a pilí á mɔ́ a byábí nána, “Njí wə ɛ dí Mwǎn a Dyǔ, pɔ̌ŋ malɛ́ mánán má tîm blɛ̂t.” 4Ndé Yésuwə a pushú mɔ́ nána, “Ɛ́ tílání á kâti ɛ Dyǔ nána,
‘Suká blɛ̂t bɔ́ ná bɔ́, bɔ́ bú bwə mɔ̂ʼ a bá lúŋgɛ́. Ndé ɛyala tɛ́ ɛ́yə́ Dyǔ lí byábíní yɔ̂ ɛ́ bwə mɔ̂ʼ a bá lúŋgɛ́.’”
5Ti Dɛ́vəl a kanání Yésuwə á Jerúsálɛmə, Nkí ámə́ n Sáŋí. Ti a tyə́sí mɔ́ á fǔm ábə́ wú yábí á mǐn litúm mábú másə́sə̌n á Tɛ́mpɛl. 6Ti a byábí á mɔ́ nána, “Njí wə ɛ dí Mwǎn a Dyǔ, pyə́m áshí ɛ shwá nyǔ ɛ́ wə áshí. Ɛ́ tílání á kâti ɛ Dyǔ nána,
‘Dyǔ lí pɔ̌ŋ áŋgɛl ɛ́ mɔ álí nyaŋ wə̂ álí bwə nána ɛ sî lábán ɛ́kwi á lílɛ́.’”
7Yésuwə a pushú mɔ́ nána, “Kâti ɛ Dyǔ ɛ byábí nána, ‘Ɛ si kiksɛ́ Sáŋgúwə́, Dyǔ lí wə.’” 8Ti Dɛ́vəl a kanání Yésuwə á wúkul wú nə̂n ábə́ wú yábí á mǐn ti a lúfú mɔ́ bajaniya básə́sə̌n bá nkínshíyə na wulɔʼ wú bɔ wúsə́sə̌n. 9Ti Sátan a pɔŋí Yésuwə nána, “M bə wə̂ byə̌m bínán bísə́sə̌n njí ɛ shumí mabɔ́ŋ áshí á wusú wú myə álí bə mî ɛdúbɛ́.” 10Yɔ̂ Yésuwə a pushúní mɔ́ nána, “Falú mî á wúsú Sátan! Ɛ́ tílání nána,
‘Shǔm mábɔ́ŋ áshí á Sáŋgúwə́ Dyǔ lí wə, ti ɛ bə̂ mɔ́ ɛdúbɛ́
Lɔ́ na lɔ́ ɛ lɔlíní ɛ bwəli.’”
11Ti Sátan a makú Yésuwə a kǐ ti ba áŋgɛl bá pílí mɔ́ ɛ wúnjan.
Yésuwə a butí ɛbulú ɛ́ mɔ á Gálilî
12Á púndá ɛni, bá fílí Jɔnə́ á bíbuwa. Ngə Yésuwə a wúkíní nâ, á timbí á Gálilî. 13Yésuwə a falú á nkí n Názárɛtə, ti a kǐ ɛ dyɛ á nkí m Kapɛ́nahûmə. Nkí mû m bílí álí wútán mbô ɛ Gálilî á pɛsi ɛ mbú ɛ matúmbá má Zɛ́búlun na Náftáli. 14Yésuwə a kǐ ɛ dyɛ á Kapɛ́nahûmə álí lwínjí yə̌ ɛ́yə́ nlakuwa-a-mudî, Ayzáya, a byábíní nána,
15“Á pɛsi ɛ mbú ɛ Zɛ́búlun na pɛsi ɛ mbú ɛ Náftáli, álí kə á pɛsi ɛ mbô ɛ nə̂n,
á pɛsi ɛníní ɛ madí má Jódan, Gálilî pɛsi ɛ mbú ɛ baʼ ábə́ bá shiyǎ baʼ bá Júda.
16Baʼ ábə́ bá dyɛ á ɛ́fínjan, bá mín mwɛ́nɛ n ngínya.
Baʼ ábə́ bá kə́lí ɛ́ wá, bá kwisí líshuŋgɛ.”
17Butya á púndá ɛyə̌ Yésuwə a kîní á Gálilî, a butí ɛ byá ndúm ɛ Dyǔ nána, “Nyí máku wubî wú nyə á ɛ́tútú nána Janiya lí Dyǔ lí dí bɛbɛ.”
Yésuwə a pwɛsí bawútú bá mɔ bá wúsúsúwə
18Ngə Yésuwə a bílíní ɛ bambú á nsaŋ m mbô ɛ Gálilî, a míní bǎn bá nyǎ bábɛ̂ ábə́ bá bílí balúwa-bá-shwî, Sáymɔnə awə̌ bá bə́ŋákíní Píta, bû mǎ nyǎ m mɔ, Ándruwə. Bá bílí ɛ lú shwî na mbúnjá. 19Yɔ́ Yésuwə a pɔŋíní bɔ́ nána, “Nyí pɔ̂ŋ mi á mbís. Ngə nyí lúní shwî sɔnsɔ́nǎn, n lɛ́fú nyə́ ngə nyí pəlání baʼ milə́m álí pɔŋ mî á mbís.” 20Áfâ áshí áshí, bá mákú mbúnjá ɛ́ bɔ bá kí na Yésuwə. 21A kǐ mǎ yǔm á wusú, ti a míní bǎn-bá-nyǎ bábɛ̂ bápə́pə̂, Jémsə na Jɔnə́, bǎn bá Zɛ́bɛdíyə. Bá bílí á bwálu wú bɔ na sáŋ m bɔ, Zɛ́bɛdíyə, bá tambúwá mbúnjá ɛ́ bɔ. Ti Yésuwə a bəŋí bɔ́ bábɛ̂ nána bá pɔ̂ŋ mɔ́ á mbís. 22Áfâ áshí áshí, bá mákú bwálu wú bɔ na sáŋ m bɔ, bá pɔ̂ŋ Yésuwə á mbís.
Yésuwə a lɛ́fú, á pwisíyá pə́ baʼ
23Yésuwə a kǐ á míkí mísə́sə̌n á ɛ́kumbu ɛ́ Gálilî, á lɛ́fúwá ɛ́yala ɛ́ Dyǔ á mandáʼ má mákáni má baʼ bá Ísrɛl, á pɔŋá ndúm ɛ mbâ tɛ́ŋgɛnɛ Janiya lí Dyǔ. A bílí ɛ pwisí baʼ básə́sə̌n ábə́ bá wɔ́ŋí banyambɛ̂ na mikfulu nyai na nyai. 24Áfánikə̌, misam ámə́ Yésuwə a bílíní ɛ bwə mí wúkání á ɛ́kumbu ɛ́ Síriya ɛ́sə́sə̌n. Ɛ́yî ɛ́ bwə́lí baʼ bá pánání baʼ básə́sə̌n ábə́ bá bílí ɛ́ kfulu, ábə́ bá bílí ɛ́ taʼ na banyambɛ̂ nyai na nyai, na wuwa, baʼ ábə́ bá wɔ́ŋí midî mí bî, baʼ ábə́ bá bílí ɛ kfún ɛ́titi na ábə́ bá wɔ́ŋí libyə́ŋ. Yésuwə a pwisí bɔ́ básə́sə̌n. 25Ɛ́yî ɛ́ bwə́lí limuti lí baʼ jǐta bá pɔŋɔ́ Yésuwə á mbís. Baʼ bá bílí ɛ fí á bíkumbu bí Gálilî na á pɛsi ɛ mbú ɛ Mikí Dyǔm, á Jerúsálɛmə, á Judéya na á pɛsi ɛnínání ɛ madí má Jódan.
Currently Selected:
Mátyo 4: bwt
Highlight
Copy
Compare
Share
Want to have your highlights saved across all your devices? Sign up or sign in
