Mátyo 24
24
Li butí lí mútaka
1Á mbís ɛ púndá, Yésuwə a falú á Tɛ́mpɛl, ti bawútú bá mɔ bá pílí mɔ́ ɛ tán, ti bá pɔ́ŋí mɔ́ nána a táti nyai ɛyə̌ bá lúŋíní ndáʼ ɛ Dyǔ. 2Ti Yésuwə a pushú bɔ́ nána, “Á mbálɛ nǎn pɔ̌ŋ nyə́ nána, ngə nyí mín ní byə̌m bínán bísə́sə̌n, púndá ɛ̌ paʼ ɛyə̌ lilɛ́ ká lífɔ́ lí sî bukɛ́ní ámǐn. Bá páŋtí másə́sə̌n.”
3Ngə Yésuwə a shumaní á wúkul wú nə̂n wú Ólifə, bawútú bá mɔ bá pílí mɔ́ ɛ tán á fǔm ábə́ bá bílíní bɔ́ na bɔ́. Bá kɔ́ndɛ́ mɔ́ nána “Pɔ̌ŋ sə́ njá púndá misam mî mísə́sə̌n mí bwəlaní. Ɛyəmblan ɛ́fə́ ɛ́ lúfú li paʼ lí wə na lishúkán lí púndá?” 4Yésuwə a pushú bɔ́ nána, Nyí nǔŋ púndá mɔ ká nfɔ́ a si səŋ nyə́. 5Baʼ jǐta bá paʼ nána bɔ́ bá dí Ani Awə̌ bá Wɔ́kílíní. Bá səŋ bâʼ jǐta. 6Nyí wú ngə bá waní njum, nyí wú ndúm ɛ njum. Ndé nyí si báŋ. Misam mínán mísə́sə̌n mí lɔ́lí ɛ bwəlan, ndé suká mɔ́ mí lúfú nána lishúkán lí mə́ ɛ paʼ. 7Ɛkumbu ɛ́ tyə́bán ɛ́kumbu ɛ́pə́pə̌ á njum. Janiya lí tyə́bán jániya lípə́pə̂ á njum. Njɛ ɛ́ bá, ndɔʼ ɛ́ sáʼ á mábú. 8Misam mínán mísə́sə̌n mí bá ngə wuwa wú wúsúsúwə ábə́ mwalân ǎ wúní wə̌ti ǎ sa ɛ́ yɛ́. 9Á púndá ɛni bá kú nyə́, bá bə nyə́ á makɛ́ má baʼ ábə́ bá kɔ́ksɛ́ nyə́, ti bá búlú nyə́. Bikumbu bísə́sə̌n bí kfwɛ nyə́ á ɛ́tútú ɛ́ dǐn lí myə.
10Á púndá ɛni, baʼ jǐta bá sî wɔ́ŋá pə́ dúbɛ. Bá bə mɔ na mɔtɛ́ á makɛ́ má baʼ ábə́ bá kfwɛ́ bɔ́. Ti bɔ́mə̌n bá kfwɛ́ nyǔ ɛ́ bɔ. 11Ndé balakuwa bá mudî bá mátúm bá paʼ ti bá səŋí baʼ jǐta. 12Ndé wubî wú nlə́m wú pulu, áfánikə̌, ɛniŋgán ɛ́ bâʼ jǐta ɛ́ shul. 13Ndé ká njá mɔ́lə́ awə̌ á tfúl nlə́m á mútaka kə́ŋ ta á shúʼ, á kwisí líshuŋgɛ. 14Ndúm ɛ mbâ ɛnín tɛ́ŋgɛnɛ wudya wú Dyǔ ɛ́ byábán á nkínshíyə nsə́sə̌n álí bwə nána bikumbu bísə́sə̌n bí wú. Á púndá ɛni yɔ̂ lishú lí paʼní.
Misam míbî ámə́ mí paʼ
15Nyí mín misam míbî ámə́ mí panán wúsɔ́n á wusú wú Dyǔ ngə mí bwəlání á Tɛ́mpɛl, á fǔm ábə́ wú sáŋí, ngə nlakuwa-a-mudî Dániyɛlə a byábíní nána mí bwəlan. (Nyə́ ábə́ nyí láŋ mísam mínán nyí sɔ́ntan mɔ́.) 16Njí nyí míní nâ baʼ ábə́ bá dí á Judéya bá bfúŋgú mifílí, bá sɔ́mɔn á wúkul ámǐn. 17Mɔʼ awə̌ a dí á nlú n ndáʼ ɛ́ mɔ ámǐn, a sî látíyá nyǔ ɛ́ mɔ álí shú áshí álí kə ɛ́ nǔŋ byə̌m bí mɔ á ndáʼ átin. 18Mɔ awə̌ a dí á ndfukú a sî látíyá nyǔ ɛ́ mɔ álí tim mbís á ndáʼ álí nǔŋ kúti ɛ́ mɔ ɛ yabíyə́. 19Ɛ́ bá wúbî á madû mâ na balân ábə́ bá dí na matû na ábə́ bá mwáŋí bǎn! 20Nyí káni nána mifílí mí pɛ́mpɛ́m mí si tán nyə́ á púndá ɛ ɛyɔ́ ɛ́yə́ ɛfiʼ ɛ́ díní jǐta tɔ̌ á Bǔn bú líkɔ́mbɛ. 21Á ɛ́tútú nána mutakaʼ ámə́ m bá á púndá ɛni m bá mutakaʼ ámə́ n na bwə́láníyá wə̂ butya áfə́ nkínshíyə m bútíní kə́ŋ ta wúyə́. Yǔm ngə ɛ́yî ɛ́ sî bwəláníyá pə́. 22Dyǔ lí mə́ ɛ lɛ́n madû mâ má mutakaʼ. Njí ɛ́ sî m bá nâ, ní mɔ ká nfɔ́ a sî kwisíyá líshuŋgɛ. Á ɛ́tútú ɛ́ baʼ bá mɔ ábə́ a pwɛ́síní, lí lɛ́n madû mâ. 23Áfánikə̌, njí mɔ a pɔŋí nyə́ nána Tátíyáni, Ani Awə̌ bá Wɔ́kílíní mɔ́ anín tɔ̂ a byábí nána, “Mɔ́ aníní,” nyí si dúbɛ́ mɔ́. 24Á ɛ́tútú nána baʼ jǐta bá dí ábə́ bá pɔ̌ŋ matúm nána, bɔ́ bá dí Ani Awə̌ Dyǔ lí Wɔ́kílíní. Balakuwa bá mudî bá mátúm bɔ́ pə́ bá paʼ. Bá bwəlákí misam mí manyáká mínə̂n, bá lúfú pə́ biyəmblan jǐta. Bá bwə nâ álí bwə nána bá sə̂ŋ ká bâʼ ábə́ Dyǔ lí pwɛ́síní, njí ɛtə́ʼ ɛ́ dí álí sə̌ŋ bɔ́. 25Tátíyáni, nǎn pɔ̌ŋ nyə́ misam mínán byáná púndá yɔ́ lipaʼ. 26“Ndé njí mɔ a pɔŋí nyə́, ‘Tátíyáni, a dí á ɛ́sínj,’ nyí si kə áwə́. Tɔ̌ njí bá pɔ́ŋí nyə́ nána, ‘Tátíyáni a sɔmɔ́ní áfán á tfuŋ átin’ nyí si dúbɛ́ bɔ́.” 27Mwǎn a Mɔnyuŋ á paʼ mulimlim ngə ngínyi-ɛ-dyǔ ɛyə̌ ɛ́ túm butya á líkwi ta á mbəŋ. 28Ká fə́ mbimba n díní áwə́ kambu ɛ́ shwinjání.
Li paʼ lí Mwǎn a Mɔnyuŋ na lishú lí nkínshíyə
29Ngə madû má mútakaʼ má mbísə má túmní, dúlu lí tim ɛ́ fínj, ngɔn ɛ sî míndíyá pə́. Títí ɛ́ fí ámǐn, ɛ kfún áshí, ti mangínya ámə́ má dí ámǐn má sákí nyǔ áfə́ má díní. 30Á púndá ɛni yɔ̂ nyí mín ní ɛyəmblan ɛ́ Mwǎn a Mɔnyuŋ ngə ɛ́ nyíní tə́lí á nkímínyə́. Áfâ matúmbá másə́sə̌n má nkínshíyə má butíní ɛ ji ná bɔŋ. Baʼ bá mín ngə Mwǎn a Mɔnyuŋ ǎ paní á libáŋ átin na ngínya na wulɔʼ wú nə̂n. 31Bá wú ntɔkɔku n nə̂n mú liwɔ̂ŋ. Á púndá ɛni á lúm áŋgɛl ɛ́ mɔ á bibə́ndí bínîn bí nkínshíyə̌, álí shwǐnj baʼ bá mɔ ábə́ Dyǔ lí pwɛsíní butya á pɛsi nkínshíyə pɔ́ kə́ŋ ta ɛníní.
Yésuwə ǎ baʼ bá nǔŋ ɛláŋsán á ɛju ɛ́ bwə̌ wú fík
32Nyí nǔŋ ɛláŋsán na bwə̌ ábə́ bá bəŋní bá fík. Njí milâ mí bútí ɛ yə́ byɛ̌ bí kɔ́nə́, nyí bí nána ɛyɔ́ʼ ɛ́ mə́ ɛ wútan. 33Mulimlim njí nyí míní misam mínán mísə́sə̌n mí bwəlan, nyí lɔ́lí ɛ bí nána Mwǎn a Mɔnyuŋ a mə̌ ɛ wútan álí paʼ, a dí bɛbɛ. 34Á mbálɛ, nǎn pɔ̌ŋ nyə́ nána, nyɔnyi ɛ baʼ bánán ɛ sî mə̌ kə́ŋ mínán mísə́sə̌n mí bwə́lan. 35Wudya wú Dyǔ na nkínshíyə n túm, ndé biyala bí myə bí sî túmbá.
Mɔ ká nfɔ́ a bíyǎ púndá ɛyə̌ Yésuwə á paní
36Mɔ ká nfɔ́ a bíyǎ bǔn, púndá ɛyə̌ misam mínán mísə́sə̌n mí bwəlání. Ká áŋgɛl ɛ́yə́ ɛ́ dí ámǐn ɛ́ bíyǎ, ká Mwǎn pə́ a bíyǎ. Sáŋ mɔ́ na mɔ́ a bí púndá ɛyə̌ misam mínán mísə́sə̌n mí bwəlání. 37Mulimlim ngə ɛ́ bílíní á madû má Nówa, nâ pə́ ɛ́ bání á púndá ɛyə̌ Mwǎn a Mɔnyuŋ á paní. 38Á ɛ́tútú nána, á púndá ɛni byáná madí má mbú má lwínj nkínshíyə nsə́sə̌n, baʼ bá bílí ɛ dyá, bá mwá, bumân na balân bá wə́laniya, kə́ŋ ti á bǔn ábə́ Nówa a kwílíní á bwálu wú nə̂n átin. 39Bá sî m bí yǔm ɛ́yə́ ɛ́ bílí ɛ́ bwəlan kə́ŋ á púndá ɛyə̌ madí má mbú má lwínjíní má kánán bɔ́. Mulimlim nâ pə́ ɛ́ bwəlání á púndá ɛyə̌ Mwǎn a Mɔnyuŋ á paní. 40Baʼ bábɛ̂ bá bwəlákí ndutu á ndfukú, Dyǔ lí nǔŋ nfɔ́, lí mákú aníní. 41Balân bábɛ̂ bá bá á fǔm ábə́ bá kɔní madyá, Dyǔ lí nǔŋ nfɔ́, lí mákú aníní. 42Áfánikə̌, nyí nǔŋ púndá á ɛ́tútú nána nyí bíyǎ bǔn ábə́ Sáŋgúwə́ n nyə á paní pə́. 43Ndé, nyí lɔ́lí ɛ bî nána, njí nwɔ́ŋ-a-ndáʼ a m mbí njá púndá ɛ wudû bajíb bá paní, ní ǎ dyɛ ɛ́pin álí bwə nána bá si gbí ndáʼ ɛ́ mɔ. 44Áfánikə̌, nyí lɔ́lí ɛ bá á mbunsan, á ɛ́tútú nána Mwǎn a Mɔnyuŋ á pá á púndá ɛyə̌ nyí bándiyaní milə́m.
Mbwəlâ a ndutu a mbâ na a mbî
45“Áfánikə̌, nyə́ mɔtɛ́ nyí bá ngə mbwəla-a-ndutu awə̌ a wɔ́ŋí libyɛ́, awə̌ ǎ bwə̌ misam ámə́ sísə́ m mɔ a pɔŋíní mɔ́ nána a bwə. Mɔ́ a dí mbwəlâ-a-ndutu awə̌ sísə́ m mɔ a shumíní álí tátí babwəla bá ndutu bápə́pə̂ na álí mín nána bá wɔ́ŋ lidyá lí bɔ́ á púndá ɛ mbâ. 46Wunam na mbwəlâ-a-ndutu ani awə̌ njí sísə́ m mɔ a pílí, á tán mɔ́ ngə ǎ bwəní ɛbulú ɛ́ mɔ ɛ́yə́ bâ m pɔŋní mɔ́ nána a bwə. 47Á mbálɛ, mi nǎn pɔ̌ŋ nyə́, sísə́ ani á janiya lísaŋ lí mɔ. 48Ndé njí mbwəlâ-a-ndutu ani a dí mbwəlâ-a-ndutu a bî, ǎ byá á nlə́m m mɔ nána, ‘Sísə́ m myə á sî timbá sɔnsɔ́nǎn.’ 49Áfánikə̌, á bútí ɛ lá babwəla bá ndutu ábání ábə́ bá dí á janiyá lí mɔ, á dyá madyá, á mwá mǐm na bamwá bá mǐm. 50Sísə́ m mbwə̂la a ndutu ani á paʼ á bǔn ábə́ a sî bání nlə́m, na á púndá ɛyə̌ a sî bíní nána á paʼ. 51Sísə́ m mbwəlâ a ndutu ani á kɔ́ksɛ́ mɔ́ mulimlim ngə a n kɔ́ksɛ́ní baʼ bá ɛlaŋgán, áfə́ ǎ jiyákíní, á dyá másuŋ á nsu.”
Currently Selected:
Mátyo 24: bwt
Highlight
Copy
Compare
Share
Want to have your highlights saved across all your devices? Sign up or sign in
