Mátyo 11
11
Jɔnə́ a Dumsɛ a lúmí bawútú bá mɔ á Yésuwə
1Á púndá ɛyə̌ Yésuwə a málíní álí pɔ̌ŋ bawútú bá mɔ dyǔm na bábɛ̂ yə̌ ɛ́yə́ bá lɔ́líní ɛ bwə, a makú fǔm bû ti a kǐ álí lɛ́fú na álí pɔ̌ŋ ɛ́yala ɛ́ Dyǔ á mikí ámə́ mí wútání áfâ.
2Ngə Jɔnə́ a Dumsɛ a wúkíní á bíbuwa misam ámə́ Krísto a bílíní ɛ bwə, a lúmí bawútú bá mɔ bafɔ́ á mɔ́. Bawútú bâ bá byábí á Krísto nána, 3Pɔ̌ŋ sə́ njí ɛ dí ani awə̌ Dyǔ lí byábíní nána lí lúm tɔ̌ njí bá lɔ́lí ɛ sínj mɔʼ ampə́pə̂? 4Yésuwə a pushú bɔ́ nána, “Nyí tîm mbís nyí pɔ̂ŋ Jɔnə́ yə̌ ɛ́yə́ nyí wúkíní na ɛ́yə́ nyí míníní. 5Nyí pɔ̌ŋ mɔ́ nána, baʼ ábə́ bá bílí bidímtí bá mín, ábə́ bá bíliyǎ ɛ́ púl ɛ́ kə bwǎm bá kə bwǎm, baʼ ábə́ bâ ŋ wɔ́ŋ ákúnyə bá mə́ ɛ sáŋ. Baʼ ábə́ bá bíliyǎ ɛ́ wú wǔm, bá wú wǔm, ábə́ bâ m mə̌ ɛ́ wá bá tímbí á luŋgɛ́, ti bá lɛ́fú ndúm ɛ mbâ á baʼ bá líban. 6Wunam na baʼ ábə́ bá sə̌ shǔm pénda tɛ́ŋgɛnɛ mi.”
Yésuwə a byábí tɛ́ŋgɛnɛ Jɔnə́ a Dumsɛ
7Ngə bawútú bá Jɔnə́ bá bílíní ɛ tim, Yésuwə a butí ɛ pɔ̌ŋ misam tɛ́ŋgɛnɛ Jɔnə́ á limuti álə́ lí bílí á wə́. A kɔndɛ́ bɔ́ nána, “Á púndá ɛyə̌ nyí kǐní ɛ tán Jɔnə́ á ɛ́sínj, yə̌ nyí bílíní ɛ kani nána nyí mín? Ɛpan ɛ́ jyɛ́ ɛ́yə́ ɛfi ɛ́ sákíní? 8Yə̌ nyí kúkíní álí kə ɛ́ mín? Mɔʼ awə̌ a fílí mabaʼ má mpesa? Baʼ ábə́ bá fá ɛ́bú ɛ́ mabaʼ mâ, bá dyɛ wɔ̂ á mandaʼ má kə̂ŋ! 9Nyí pɔ̂ŋ mi, yə̌ nyí kǐní ɛ mín wû? Nlakuwa-a-mudî mɔ́ nyí kǐní ɛ mín? Iŋ nâ ɛ́ díní. Á mbálɛ nǎn pɔ̌ŋ nyə́ nána nyí míní mɔʼ awə̌ a túmbí nlakuwa-a-mudî. 10Jɔnə́ mɔ́ a bílí mɔʼ awə̌ bá bílíní ɛ byá á púndá ɛyə̌ bá tílíní biyala ábə́ Dyǔ lí byábíní nána, ‘Tátí, n lúm nkə̌-a-ndúm m myə álí kə wə̌ á wúsú, álí kə̌ ɛ́ bunsán nji.’ 11Á mbálɛ nǎn pɔ̌ŋ nyə́ nána, mɔʼ ká nfɔ́ awə̌ a nyítí á libum lí mwalân a túmbiyǎ Jɔnə́ a Dumsɛ. Ndé awə̌ a dí a ntə́kə̂n á baʼ ábə́ bá dí á Janiya lí Dyǔ a dí a mbímbí litúm Jɔnə́. 12Butya á púndá ɛyə̌ Jɔnə́ a Dumsɛ a bútíní ɛ byá ndúm ɛ Dyǔ kə́ŋ ta wúyə́, wudya wú mínyə́ wú mə́ ɛ kwisí mútaka jǐta á makɛ́ má bǎnyûŋ, biwaŋgi bí kú janiya lî á njum. 13Kə́ŋ ta á púndá ɛ Jɔnə́ a Dumsɛ, balakuwa-bá-mudî na mbéndá ɛ́ Mósisə bá byábí tɛ́ŋgɛnɛ wudya wú Dyǔ. 14Njí nyí búnsání álí dúbɛ́ ndúm ɛ́ bɔ, ní Jɔnə́ a dí Ɛláyíja awə̌ bá bílíní ɛ byá nána ǎ paʼ. 15Ká njá awə̌ a wɔ́ŋí matwî a wú.
16Ndé, na yə̌ n tiŋgání ɛ nǔŋ ɛláŋsán na nyɔnyi ɛ́tɛ̂n? Bá dí ngə bǎn ábə́ bá shúmání á nkí átin, ti mɔtɛ́ á lɛbá nsún m mɔ nána,
17Sí fúŋí nyə́ tɔ̂ŋ ɛ́ nyaʼ,
ndé nyí sə̌ ɛ́ sáʼ.
Sî kɔ́n nyə́ mikɔ́ni mí ɛ́gvú,
ndé kánâwə̌, nyí sə̌ ɛ́ lɛbɛ.
18Á púndá ɛyə̌ Jɔnə́ a Dumsɛ a pilíní a bílí ɛ dyɛ̌ njɛ-á-makáni átin, a si mwáká pə́ mǐm. Ndé bá bílí ɛ byá nána, ‘Mudî m bî n dí mɔ́ átin.’ 19Mwǎn a Mɔnyuŋ a pilí, ǎ dyá lídyá, ǎ mwá pə́ mǐm, ti bá byá nána, ‘Tátíyáni mɔʼ anínán, a dí ŋguŋgú ɛ lidyá, a bá pə́ mwá-a-mǐm, a dí lisún na baku-bá-táks na baʼ bábî.’ Ndé álí shú, misam ámə́ mí bwəlan mí lúfú nána, libyɛ́ lí Dyǔ lí tɛ́ŋgɛ́ní.”
Mikí mí bâʼ ábə́ mí sî n dúbɛ́ Yésuwə
(Lûk 10:13-15)
20Baʼ bá míkí áfə́ Yésuwə a bwəlíní misam mí mányáká mí mɔ jǐta bá mákuwǎ wubî wú bɔ. Áfánikə̌, Yésuwə a butí bɔ́ ɛ kili, 21“Á baʼ bá Kórásînə, ɛbúmán ɛ́ bá na nyə́! Á baʼ bá Bɛ́tsáyda, ɛbúmán ɛ́ bá na nyə́! Njí misam mí mányáká ámə́ Dyǔ lí bwə́líní á nyə́, lî m bwə mɔ́ á Táya na Sídon, ní bá fílí malɛbu ɛtfûm ɛ́ púndá, bá pɛ́njíyá pə́ mbumbû á nyǔ ɛ́ bɔ álí lúfú nána bá pə́lání bilɛm bí bɔ bíbî. 22Á mbálɛ nǎn pɔ̌ŋ nyə́ nána, Dyǔ lí lúfú likini lí nlə́m lí nə̂n á baʼ bá Táya na baʼ bá Sídon á bǔn bú líkáyisi litúm nyə́! 23Na nyə́ pə́ baʼ bá Kapɛ́nahûmə, nyí kani nána nyí mə́ ɛ pa á wúdya wú Dyǔ, ndé bá shulí nyə́ áshí á mwǐ ámə́ n sə̌ ɛ́ dím. Njí misam mí mányáká ámə́ Dyǔ lí bwə́líní á mikí mí nyə, lî m bwə mɔ́ á nkí n Sódom, ní nkí n Sódom n dí wə̌ ti ɛ́tɛ̂n. 24Ndé á mbálɛ nǎn pɔ̌ŋ nyə́ nána, Dyǔ lí lúfú likini lí nlə́m lí nə̂n á Sódom a bǔn bú líkáyisi litúm nyə́.”
Yésuwə a ləbí baʼ nána bá paʼ á mɔ́
(Lûk 10:21-22)
25Á púndá ɛni Yésuwə a byábí nána, “A Sísə́, Sáŋgúwə́ a wudya wú Dyǔ na nkínshíyə n sákání wə á ɛ́tútú nána ɛ shwɛlí misam á baʼ bá libyɛ́ na á baʼ ábə́ bá sɔ́ntan, ɛ lúfú mɔ́ á bǎnbándəm. 26Iŋ Sísə́, nâ ɛ̌ sakíní nána ɛ́ bwə́lan.” 27Ti a bándí álí byá nána, “Nǎn pɔŋ nyə́ nána Sáŋ m myə a bəkí misam mísə́sə̌n á makɛ́ má myə. Mɔʼ ká nfɔ́ a bíyǎ ngə Mwǎn a díní ɛ́sitúm Sáŋ, nâ pə́ mɔʼ ká nfɔ́ a bíyaní ngə Sáŋ a díní ɛ́sitúm Mwǎn na baʼ ábə́ Mwǎn a pwɛsíní álí lúfú mɔ́ á bɔ́.
28Nyí pâ nyə́ básə́sə̌n ábə́ bá mə́ ɛ́ kɔ́m álí pə́m múná ámə́ n dílí, m bə nyə likɔ́mbɛ. 29Nyí púshu álí nǎn makwi má myə, na nyí wúku yə̌ ɛ́yə́ nǎn lɛ́fúní, á ɛ́tútú nána n dí ndəmbu, na nlə́m ámə́ n pyə́tí á libum. Nyí paʼ nyí kwisí likɔ́mbɛ. 30Á ɛ́tútú nána lilɛ́fu lí myə lí kpútiyǎ, múná n myə pə́ n díliyǎ.”
Currently Selected:
Mátyo 11: bwt
Highlight
Copy
Compare
Share
Want to have your highlights saved across all your devices? Sign up or sign in
