Mabwəlan 9
9
Sɔ̂lə a timbí ɛ dúbɛ Yésuwə
1Sɔ̂lə a bílí wɔ̂ álí wikí miyanu míbî álí búlú bawútú bá Sáŋgúwə́. A n kə á Prísə a nə̂n a nə̂n 2ti a kɔndɛ́ mɔ́ kâti ɛ wunja álí kanán á baʼ bánə̂n bá mandáʼ má mákáni má baʼ bá Júda á nkí m Damáskɔsə. A m bwə nâni á ɛ́tútú nána, a wɔ́ŋ wúnja ɛyə̌ wə́ti a míní baʼ ábə́ bá nǎn Nji ɛ Sáŋgúwə́ á wə́, a púl bɔ́ ɛ kúʼ, ká bá dí bumân tɔ̌ balân ti a kánán bɔ́ á Jerúsálɛmə. 3Ti Sɔ̂lə a nyítí ti a kǐ. Á nji ngə Sɔ̂lə a bílíní bɛbɛ na nkí m Damáskɔsə, áfâ áshí áshí ɛməmə ɛ́ fí á líbubɛ ɛ́ nwáŋí á nyǔ ɛ́ mɔ ɛ́sə́sə̌n. 4A kfúndí áshí. Yɔ̂ a wúkíní ngɔli ɛ́ byábáníyá mɔ́ nána, “Sɔ̂lə, Sɔ̂lə, Yə̌ ɛ̌ taʼkíní mi?” 5Sɔ̂lə a kɔndɛ́ nána, “Sáŋgúwə́, wə ɛ dí njá?” Ngɔli ɛni ɛ pushú mɔ́ nána, “Miyə́ n dí Yésuwə, awə̌ ɛ̌ taʼkíní.” 6“Falú áshí, ɛ kə̂ á nkí átin, ti á wə́ bá pɔŋ wə̂ yə̌ ɛ́yə́ ɛ lɔlíní ɛ bwə.” 7Baʼ ábə́ bá bílí á ndíngí na Sɔ̂lə, bá tyə́ áfâ mbyá n túm bɔ́ átin. Bá bílí ɛ wú ngɔli, ndé bá sî n púl álí mín mɔʼ ká nfɔ́. 8Sɔ̂lə a fálú áshí, a pú mǐs, ndé a púliyǎ álí mín wǔm. Áfánikə̌, bá wálí mɔ́ ɛkɛ́ bá kwísí mɔ́ á nkí n Damáskɔsə. 9Á n dyɛ madû málán ɛ́yə́ a n sî n púl álí mín wǔm. Á púndá ɛni, a díliyǎ tɔ mwíliyǎ ká yúm.
10Mɔʼ nfɔ́ a bílí á Damáskɔsə awə̌ a n dúbɛ́ Yésuwə, awə̌ bá bílíní ɛ bə̌ŋ Ananíyasə. A n kfún biyúŋgu. Á biyúŋgu bî, Sáŋgúwə́ Yésuwə a n bə̌ŋ mɔ́ nána, “Ananíyasə.” Ananíyasə a pushú nána, “Sáŋgúwə́ miyə́ nín.” 11Sáŋgúwə́ a byábí á mɔ́ nána, “Bunsán ɛ kə̂ á ndáʼ ɛ́ Júdasə ɛyə̌ ɛ dí á mbukaʼ ámə́ bá bəŋní nána N Tyə́bí. Wə̌ti ɛ pilí á wə́, kɔndɛ́ mɔ̂ʼ awə̌ a fí á nkí n Tásɔsə, awə̌ dǐn lí mɔ lí dí Sɔ̂lə. A dí á wə́ sɔnsɔ́nǎn ǎ káni, 12na ǎ kfún biyúŋgu. Á biyúŋgu bî a mə́ ɛ mín mɔʼ awə̌ dǐn lí mɔ lí dí Ananíyasə a pilí, a bándí makɛ́ á nlú m mɔ álí bwə nána a mín pə́.” 13Ananíyasə a pushú nána, “Sáŋgúwə́ m mə́ ɛ wú misam jǐta tɛ́ŋgɛnɛ mɔʼ ani na misam míbî misəsə̌n ámə́ a mə́ní ɛ bwə á baʼ bá wə á Jerúsálɛmə. 14A mə́ ɛ paʼ á fán á Damáskɔsə na kâti ɛ wunja ɛyə̌ ɛ fí á baprîsə bá nə̂n álí kúʼ bâ básə́sə̌n ábə́ bá káni á dǐn lí wə.” 15Sáŋgúwə́ a n byá á Ananíyasə nána, “Kə̌ á ɛ́tútú nána m mə́ mɔʼ anín ɛ pwɛ álí bwəlí mî. M pwɛsí mɔ́ á ɛ́tútú nána, mɔ́ á bwə baʼ ábə́ bá shiyǎ baʼ bá Júda, bakə̂ŋ na baʼ bá Ísrɛl, álí bí mi. 16Na n lúfú mɔ́ mutakaʼ ámə́ á kwisíní á ɛ́tútú dǐn lí myə.” 17Áfánikə̌, Ananíyasə a n kə̌, a kwílí á ndáʼ ɛyə̌ Sɔ̂lə a bílíní, a bán mákɛ́ á nlú m mɔ. A byábí á mɔ́ nána, “Mwǎn-n-nyǎ m myə a Krísto Sɔ̂lə, Sáŋgúwə́ mɔ́ a lúmí mî, nâni ɛ dí Sáŋgúwə́ Yésuwə mɔ́mə̌n, awə̌ a pílí tə́lí á wə á mbuka ngə ɛ bílíní ɛ paʼ wún. A lúmí mi álí bwə nána ɛ́ púl pə́ ɛ mín wǔm na álí bwə nána ɛ lwínj na Mudî ámə́ ŋ Sáŋí.” 18Áfâ áshí áshí, yǔm ɛ́yə́ ɛ́ dí ngə bifá bí shwî bí nyítí Sɔ̂lə á mǐs ti a butí ɛ mín pə́. A n tyə́ á mǐn ti Ananíyasə a dumsɛ́ mɔ́. 19A dílí lidyá, ngə a mə́ní wɔ̌ ɛ́ dyá lídyá, nyǔ ɛ timbí mɔ́ mbǐ.
Sɔ̂lə a pɔŋí ɛyala ɛ́ Dyǔ á Damáskɔsə
Sɔ̂lə a dyɛ̌ ngushu ɛ́ mádû na baʼ ábə́ bá dúbɛ́ Yésuwə. 20Áfâ áshí áshí, a kǐ á ndáʼ ɛ makáni ti a butí ɛ pɔ̌ŋ bâ tɛ́ŋgɛnɛ Yésuwə nána mɔ́ a dí Mwǎn a Dyǔ. 21Baʼ básə́sə̌n ábə́ bâ n wú mɔ́ bá bílí manyáká. Bá kɔndɛ́ nána, “Suká mɔ̂ʼ anín awə̌ a bílí ɛ́ búlu bâ ábə́ bá bílí ɛ bwəlí mɔʼ ani Yésuwə á Jerúsálɛmə? Nga a pílí á fán álí bwə mulimlim nsam álí kú bâ na álí kanán bɔ́ á baprîsə bá nə̂n?” 22Ndé Sɔ̂lə a bílí wɔ̂ ɛ́ pɔ̌ŋ ndúm ɛni ǎ kə wúsú wɔ̂. Matɔti ámə́ a bílíní ɛ byá álí lúfú nána Yésuwə mɔ́ a dí Ani Awə̌ bá Wɔ́kílíní, má tɛ́ŋgɛ́ní á nyay ɛyə̌ baʼ bá Júda ábə́ bá bílí á Damáskɔsə bá sî n wɔ́ŋ ká yúm álí byá.
23Á mbís ɛ madû jǐta, baʼ bá Júda bâ n tánán álí wíkí mwánu ngə bá búlúní Sɔ̂lə. 24Ndé Sɔ̂lə a n wú myanu mí bɔ. Bá bílí ɛ mindi ɛkuʼ ɛ́ wúkâʼ wú nkí lisín na wudû álí bwə nána bá búlu mɔ́. 25Ndé wudû wufɔ́, bawútú bá Sɔ̂lə bá núŋí mɔ́, bá fá mɔ́ á ɛdfúŋ átin, bá túmbí mɔ́ á ɛpɔn ɛ́yə́ ɛ́ bílí á libə́n lí wúkâʼ ábə́ wû n kámbú nkí nsə́sə̌n, ti bá shúlí mɔ́ á ɛ́bú.
Sɔ̂lə a timbí mbís á Jerúsálɛmə
26Sɔ̂lə a n kə á Jerúsálɛmə. Ngə a pílíní á wə́, a wanání álí laʼ na baʼ ábə́ bá dúbɛ́ Yésuwə. Ndé bɔ́ básə́sə̌n bá bílí mɔ́ ɛ báŋ á ɛ́tútú nána bá sî n dúbɛ́ nána mɔ́ pə́ a dí mɔʼ awə̌ a dúbɛ́ Yésuwə. 27Ti Banábasə a wálí mɔ́ ɛkɛ́ ti a kánání mɔ́ á bawútú bálí-lúm. A pɔŋí bɔ́ ngə Sɔ̂lə a míníní Sáŋgúwə́ á biyúŋgu átin á mbuka-nji na yǔm ɛ́yə́ Sáŋgúwə́ a pɔŋíní mɔ́. Banábasə a m pɔŋ pə́ bɔ́ ngə Sɔ̂lə a bílíní ɛ pɔ̌ŋ bâ misam tɛ́ŋgɛnɛ Yésuwə á Damáskɔsə a si wúká bɔ̂ŋ. 28Áfánikə̌, Sɔ̂lə a dyɛ́ na bɔ́ na a bílí ɛ yə́ŋ á mabú másəsə̌n á Jerúsálɛmə á lakúwá ndúm ɛ mbâ á dǐn lí Sáŋgúwə́ a si wúká bɔ̂ŋ. 29A bílí pə́ ɛ byá na baʼ bá Júda ábə́ bá bílí ɛ byá mbyá n Grîkə na a bílí ɛ shǔm pénda na bɔ́. Ti bá bútí ɛ sǎʼ nji álí búlú mɔ́. 30Ngə badúbedi bá yə́mbíní nána bá sǎʼ álí búlú Sɔ̂lə, bá núŋí mɔ́ bá kánán mɔ́ á nkí n Kayísaríya ti bá lúmí mɔ́ á nkí n Tásɔsə.
31Áfánikə̌, á púndá ɛni ɛ́sə́sə̌n, baʼ ábə́ bâ n dúbɛ́ Yésuwə á pɛsi ɛ Judéya ɛ́sə́sə̌n á Gálilî na Samáríya bá bílí musaŋgu, bâ n wɔ́ŋ bɔ̂ŋ wú Dyǔ átinə́ m bɔ álə́ lî n bwə bɔ́ bá kpúʼ ti Mudî ámə́ n Sáŋí m bílí bɔ́ ɛ wúnjan.
Píta a kǐ á míkí mí Lída na Jóppa
32Ngə Píta a bílíní ɛ kə a wǔm na wǔm, ɛtî ɛfɔ́ a kǐ ɛ sambán baʼ bá Dyǔ ábə́ bá bílí á nkí n Lída. 33Ngə a n paʼ ní á wə́ a n tán mɔ̂ʼ awə̌ bá bəŋní Ániyasə. Mɔʼ anín a bílí líbyə́ŋ, na á mibú wam a n sî mə̌ ɛ́ falu á wúti. 34Píta a byábí á mɔ́ nána, “Ániyasə, Yésu Krísto a pwísi wə fán sɔnsɔ́nǎn. Áfâ áshí áshí, ɛ támbu wuti wú wə.” Áfâ áshí áshí, Ániyasə a falú áshí. 35Baʼ básə́sə̌n ábə́ bá bílí ɛ dyɛ á Lída na Shárɔnə ngə bá míníní Ániyasə ngə a mə́ní ɛ pwí, bá bútí álí dúbɛ́ Sáŋgúwə́ Yésuwə.
36Á nkí n Jóppa, mwalân nfɔ́ a bílí awə̌ bá bílí ɛ bə̌ŋ Tabíta, a n dúbɛ́ Yésuwə. (Á mbyá n Grîkə dǐn lí Tabíta lí dí Dɔ́kasə ɛyə̌ ɛ́ dí yándá nána wushə́ʼ). Mwalân anín a bwəlání púndá ɛ́ mɔ ɛsə́sə̌n álí bwə wúlɔ́kɔ́ na álí wúnján baʼ bá líban. 37Á púndá ɛyə̌ Píta a bílíní á Lída, mwalân ani a n kfún nyámbɛ̂ ti a wúlí. Bá wɔ́kí ngvúʼ m mɔ madí ti bá nánjí mɔ́ á tfǔŋ á mǐn á ndáʼ ɛ ndɛ́ki. 38Nkí n Jóppa m bílí bɛbɛ na Lída. Ngə baʼ ábə́ bá dúbɛ́ Yésuwə bâ n wúní nána Píta a bílí á Lída, bâ n lúm baʼ bábɛ̂ na ndúm nána, “Sûn, fə́ŋí mákwi ɛ pâʼ á sə́ shám shám.” 39Áfánikə̌, Píta a búnsání ti a kǐ na bɔ́. Ngə a pilíní, bá kánání mɔ́ á tfǔŋ á ndɛ́ki á mǐn. Ngə Píta a n kwiliní, bakfwís básə́sə̌n bá kámbú mɔ́, bá jiya bá lúfúwá mɔ́ mabaʼ na shɛ́ti na kúti ɛ́yə́ Dɔ́kasə a m məní ɛ jum á bɔ́ á púndá ɛyə̌ a bílíní luŋgɛ́. 40Píta a n lúm bɔ́ básə́sə̌n á ɛ́bú, a shumí mabɔ́ŋ áshí ti a butí ɛ bə̌ makáni. Ngə a malíní álí bə̌ mákáni á Sáŋgúwə́, a wə́sí nyǔ á míndíyá ngvúʼ ti a byábí nána, “Tabíta, falú áshí!” Tabíta a pú mǐ má mɔ. Ngə a m mínní Píta, a n falú áshí. 41Píta a sámbí ɛkɛ́ a wúnjání mɔ́ álí tyə́ á mǐn. Yɔ̂ a bəŋíní baʼ ábə́ bá dúbɛ́ Yésuwə Krísto na bakfwís ábə́ bá bílí á wə́ ti a lúfú bɔ́ Tabíta ngə a dí lungɛ́. 42Nkala tɛ́ŋgɛnɛ nsam mún, n kǐ á nkí n Jóppa nsəsə̌n. Ɛ́yínán ɛ̂ m bwə baʼ jǐta álí dúbɛ́ Sáŋgúwə́. 43Píta a n dyɛ madû jǐta á Jóppa. A bílí ɛ dyɛ na mɔʼ awə̌ a bílí ɛ bwə ɛbulú ɛ́ nguʼ ɛ́ nyâm awə̌ dǐn lí mɔ́ lí bílí Sáyímɔnə.
Currently Selected:
Mabwəlan 9: bwt
Highlight
Copy
Compare
Share
Want to have your highlights saved across all your devices? Sign up or sign in
