Mabwəlan 4
4
Bá káyísí Píta na Jɔnə́ á ɛ́yə́ŋgə́
1Ngə Píta na Jɔnə́ bá bílíní wɔ̂ ɛ́ pɔ̌ŋ bâ misam, yɔ̂ dungu lí bá Prísə na mɔʼ a nə̂n m bapolîs á Tɛ́mpɛl, na dungu lí baʼ bá ɛpipá ɛ́ Sádusî bá pílí áfə́ bá bílíní. 2Bâ n kfwí jǐta á ɛ́tútú nána Píta na Jɔnə́ bá bílí ɛ lɛ́fú bâ nána Yésuwə a púmu á líwá ɛ́yə́ ɛ́ lúfú nána wə́ti baʼ ábə́ bá mə́ ɛ wá, bá pumu pə́ lungɛ́. 3Bâ kúʼ Píta na Jɔnə́ bá fá bɔ́ á bibuwa. Ngə ɛ bílíní nkwinkwin, bá dyɛ́ á bibuwa kə́ŋ ta bǔn búní. 4Ká ngə bâ n kúní Píta na Jɔnə́, baʼ jǐta ábə́ bá wúkí ndúm ɛni bá dúbɛ́. Nsɔngí m bâ ábə́ bá dúbɛ́ m púlú bɛbɛ bikúlí bítân.
5Ngə bǔn bú yílíní, bajaniya bá Júda, batína na balɛ̂ bá mbéndá bá shwínjání á Jerúsálɛmə. 6Ánasə, awə̌ á bílí prísə a nə̂n a nə̂n mɔ́ pə́ a bílí a wə. Káyífasə, Jɔnə́, Alɛsánda, ná baʼ bápə́pə̂ ábə́ bá dí á tfúmbá lí prísə a nə̂n a nə̂n bɔ́ pə́ bá bílí á wə́ʼ. 7Bâ n tyəsí Píta na Jɔnə́ a wúsú wú bɔ́, ti bá bútí bɔ́ ɛ kɔndɛ nána, “Yán nyí bwə́líní álí pwisí mɔʼ anín awə̌ a bílí libyə́ŋ? Njá ngínya na á njá dínə́ nyí bwə́lání álí pwisí mɔ a libyə́ŋ anín”? 8Píta awə̌ a n lwínj na Mudî ámə́ n Sáŋí a pushú bɔ́ nána “Bajaniya na batína bá nkí, 9nyí mə́ sə́ ɛ bəŋ á fán wúyə́ álí káyísí sə́ á ɛ́tútú ɛ́ wulɔ́ʼ ábə́ sí bwə́líní mɔ libyə́ŋ anín na ngə a pwíní. 10nyə́ na baʼ básə́sə̌n bá Ísrɛl nyí bî nána, mɔʼ anín awə̌ a tyə́bí nyə́ á wúsú, awə̌ a mə́ ɛ pwí bwǎm bwǎm, a pwǐ wɔ̂ á ngínya ɛ dǐn lí Yésu Krísto a Názárɛtə. Nyí búmí mɔ́ á mbásá ndé Dyǔ lî n pumu mɔ́ á liwá. 11Yésuwə mɔ́ á dí awə̌ ɛ́ tílání á kâti ɛ Dyǔ tɛ́ŋgɛnɛ mɔ́ nána,
‘Lilɛ́ álə́ nyə́ balúŋ bá ndáʼ nyí yɔ́bíní
lí tímbí ɛ bá lilɛ́ lí mbím mbí.’
12Líshuŋgɛ lí shiyǎ á mɔʼ ampə́pə̂ ɛ́sitúm Yésuwə, á ɛ́tútú nána dǐn lí pə́pə̌ lí shiyǎ á nkínshíyə̌ mún álə́ Dyǔ lí mə́ní ɛ bə á bǎnyûŋ álə́ lí tíŋgání sə́ ɛ shuŋgɛ.”
13Baʼ bá nə̂n bá ɛ́yə́ŋgə́ bá nyákí ngə bá míníní nána Píta na Jɔnə́ bá byábí ɛ́yə́ bá wúkiyaní bɔ̂ŋ sipɔn ngə bâ n yəmní nána bá bílí baʼ bá ngɛ̌ŋ ngɛ̂ŋ ábə́ bá wúkuwǎ kâti ɛnə̂n. Bá yə́mbí nána baʼ bâ, bâ m mə̌ ɛ́ bá na Yésuwə ɛtî tɛ́. 14Ndé bá sî n púl álí byá yǔm ká ɛfɔ́ á ɛ́tútú nána mɔʼ awə̌ bá pwísíní a n tyə́ á fâ bû Píta na Jɔnə́. 15Áfánikə̌, bâ n pɔŋ Píta na Jɔnə́ nána bá nyít á ndáʼ ɛyə́ŋgə́. Ti baʼ bá nə̂n bá ɛyə́ŋgə́ bá shúmání á kfun ti bá bútí ɛ byá, 16bá kɔndɛ̌ nána, “Yə̌ kə́ sí bwəní na baʼ á bán? Baʼ básə́sə̌n ábə́ bá dyɛ á Jerúsálɛmə bá bí nána bá mə́ ɛ bwə nsam m mányáká n nə̂n na sí tíŋganiyǎ ɛ́ nyísan. 17Ndé álí bwə nána nsam mún n si kə pə́ á wúsú á matwî má bâ, sí bə̂ baʼ á bán ndaki nána bá sí byá pə́ á dǐn lí Yésuwə.” 18Áfánikə̌, bá bə́ŋí pə́ bɔ́ nána bá kwíli á ndáʼ ɛyə́ŋgə́ ti bá bə́kí bɔ́ ndaki nána bá si kəkí pə́ álí byá tɔ álí lɛ́fú á dǐn lí Yésuwə. 19Ndé Píta na Jɔnə́ bá tímbí bɔ́ nána, “Nyə́mə̌n nyí kási yə̌ ɛ́yə́ ɛ́ lɔ́lí á wusú wú Dyǔ. Ɛ́ lɔ́lí yə̌ á sə́ li wúkán nyə́ tɔ álí wúkán Dyǔ? 20Sí tíŋganiyǎ ɛ́ maku álí byá tɛ́ŋgɛnɛ misam ámə́ sí mə́ní ɛ wú na sí mə́ní ɛ mín.” 21Áfánikə̌, baʼ bá ɛyə́ŋgə́ bá bə́kí bɔ́ ndaki ɛ ngínya ti bá mákú bɔ́ nána bá kə̂. Bâ m mín nána bá sî ŋ wɔ́ŋ yándá álí kɔ́ksɛ́ bɔ́ á ɛ́tútú nána baʼ básə́sə̌n bá bílí ɛ kɛsí Dyǔ á yə̌ ɛ́yə́ ɛ̂ m mə̌ ɛ́ bwəlan. 22Mɔʼ awə̌ nsam mú manyáka mú lípwisi mû m bwə́lání a m mə̌ ɛ́ túm mimbvú mûm mánîn.
Baʼ ábə́ bá dúbɛ́ Dyǔ lí kpútí bɔ́ milə́m
23Ngə baʼ bánə̂n bá ɛ́yə́ŋgə́ bâ m makúní Píta na Jɔnə́, bá tímbí á badúbedi ti bá pɔ́ŋí bɔ́ yə̌ ɛ́yə́ baprîsə bánə̂n na bankúmə́ bá ɛyə́ŋgə́ bá pɔ́ŋíní bɔ́. 24Ngə badúbedi bá wúkíní ɛ́yín, bá látí ngə mɔʼ nfɔ́ á mákáni á Dyǔ.Ti bá bə́kí makáni á Dyǔ nána, “Dyǔ, wə awə̌ ɛ wikí nkímínyə́ na nkínshíyə̌, mbô na yǔm tɛ́ ɛ́yə́ ɛ́ dí á wə́, 25ɛ n lúm Mudî ámə́ n Sáŋí á sáŋ n sə ntína Devídə, á mbwɛlâ a ndutu m wə álí byá biyala bín nána,
‘Yə̌ ɛ́ bwə́lí nána baʼ ábə́ bá shíyǎ baʼ bá Júda bá kwfíní jǐta?
Yə̌ ɛ́ bwə́lí ka baʼ bá wikíní myanu mí bî?
Yə̌ baʼ bá káníní likani lí ɛ́yə́lí?
26Kə̂ŋ ɛ́ nkínshíyə̌ ɛ́ bunsán nyǔ,
na bajaniya bá mbúmán
álí tɛ́ŋgɛ́n Sáŋgúwə́ Dyǔ na Ani awə̌ bá Wɔ́kílíní.’
27Ti ɛ́ bwə́lání nâ. Á mbálɛ Hɛ́rɔdə na Pɔ́ntús Páyílɛtə bâ n wɔ́ŋ mbum á fán á nkí mún na baʼ ábə́ bá shíyǎ baʼ bá Júda na bajaniya bá baʼ bá Júda. Bá bwə́lí nâni álí wikí myánu tɛ́ŋgɛnɛ Yésuwə mbwɛlâ a ndutu n wə awə̌ a Sáŋí, awə̌ ɛ wɔkíní. 28Bâ wɔ́ŋ mbum álí bwə misam ámə́ wəmə̌n ɛ m məní ɛ tyə́si na ngínya ɛ wə á wusú wú púndá nána ɛ́ bwəlan. 29Sɔnsɔ́nǎn, Sáŋgúwə́ wəmə̌n ɛ́ mín likím lí bɔ, bə sə́ babwəla-bá-ntudu bá wə mílə́m álí pɔ̌ŋ ɛ́yala ɛ́ wə ɛ́yə́ sí si wúká bɔ̂ŋ. 30Lúfú ngínya ɛ́ wə álí pwisí bâ. Na ɛ́ bwə sí púl álí bwə biyəmblan bí mányáká á dǐn lí Yésu Krísto, mbwəlâ a ndutu n wə awə̌ a Sáŋí.” 31Á mbís ɛ púndá ngə bá málíní álí káni, áfə́ bâ n mbumní, wǔm má sákí. Bɔ́ básə́sə̌n bâ n lwínj na Mudî ámə́ n Sáŋí ti bá bútí álí pɔŋ ɛ́yala ɛ́ Dyǔ bá si wúká bɔ̂ŋ.
Badúbedi bá bílí ɛ bwə mísam ngə mɔʼ nfɔ́
32Badúbedi básə́sə̌n bâ n wɔ́ŋ nlə́m nfɔ́ na likani lifɔ́. Mɔʼ ká nfɔ́ á bɔ́ a sî byá nána litfuʼ lí mɔ lí bílí lí mɔ. Ndé bâ n kaʼ yǔm tɛ́ ɛ́yə́ bâ n wɔ́ŋní á bɔ́ básə́sə̌n. 33Na ngínya ɛnə̂n bawútú bálí-lúm bá bílí ɛ byá nána bá dí mbúŋ nána Dyǔ lí púmú Sáŋgúwə́ Yésu Krísto. Ti Dyǔ lí bándí bɔ́ nsimá na nsimá. 34Mɔʼ ká nfɔ́ a bíliyǎ á ndíngí m badúbedi awə̌ a n sî n wɔ́ŋá yǔm ɛ́yə́ ǎ saʼní. Baʼ ábə́ bâ n wɔ́ŋ ndɔʼ tɔ mandáʼ, bâ n súm byɔ́ bá pánán ngáʼ, 35ti bá mwísání yɔ́ á makɛ́ má bawútú-bálí-lúm. Bá bílí ɛ kǎʼ ngáʼ ɛni á bɔ́mə̌n ngə mɔʼ na mɔtɛ́ a bílíní ɛ sa. 36Nâ Jósɛfə, mɔʼ á túmbá lí Lɛ́vi awə̌ bá yɛ́ní á mbú ɛ Sáyíprɔsə a m bwəní. Bawútú bálí-lúm bá bílí ɛ bəŋ mɔ́ bá Banábasə, (ɛ́yə́ ɛ́ dí yándá nána mɔʼ awə̌ ǎ fá bâ makpâ.) 37A n súm ndɔʼ ɛ́ mɔ a panán ngáʼ ɛni ti a mwɛsání yɔ́ á makɛ́ má bawútú bálí-lúm.
Currently Selected:
Mabwəlan 4: bwt
Highlight
Copy
Compare
Share
Want to have your highlights saved across all your devices? Sign up or sign in
