Mabwəlan 28
28
Pɔ̂lə bá dyɛ́ á Málta
1Ngə sî m məní ɛ paʼ á nsaŋ ŋ madí ɛ́yə́ yǔm ɛ́ bî ká ɛ́fɔ́ ɛ si bwəlán mɔʼ ká nfɔ́, yɔ̂ sí sɔ́ntání nána nkí ámə́ madí má kámbúní á fə́ sí díní mɔ́ bá bəŋní nána Málta. 2Baʼ ábə́ bá bílí á wə́ bá lúfú sɛ́ wulɔʼ wú nlə́m jǐta. Mbfú ɛ butí ɛ yúwə, na ɛfiʼ ɛ́ bílí pə́, áfánikə̌, bá búndí mwǐ nána sí físi nyǔ ti bá kási sə́. 3Pɔ̂lə a látí mayuwi á mbá. Ngə a bílíní ɛ fá mɔ́ á mwî, yɔ̂ pí-nyɔ̌ ɛ falúní á mbá máyuwi ngə, wufyáfyá wú náníní yɔ́ ti ɛ kfwakí mɔ́ á ɛkɛ́ ti ɛ́ tíkí á wə́. 4Ngə baʼ bá báŋní nkí mû bá míníní ngə pí-nyɔ̌ʼ ɛni ɛ́ tfúlání á ɛkɛ́ ɛ́ Pɔ̂lə, yɔ̂ bá pɔ́ŋíní mɔʼ na mɔtɛ́ nána, “Mɔʼ anín a dí mɔʼ awə̌ ǎ búlú baʼ. A pundí liwá á madí kánâwə̌, likáyísi lí Dyu lí mə́ wɔ̂ mɔ́ ɛ kúʼ.” 5Ti Pɔ̌lə a pápú ɛkɛ́ nyɔ̌ ɛni ɛ kfúndí á mwǐ ɛ́yə́ ɛ́ bwəliyǎní mɔ́ ká yǔm. 6Bá bílí ɛ sinj nána a búti ɛ ful tɔ̌ álí kfún áshí mulimlim m púndá a wá. Ndé á mbís ɛ púndá bá sínj kə́ŋ kə́ŋ bá miniyǎ yǔm ɛ́ bí ɛ́yə́ ɛ́ bwə́lání mɔ́, bá pə́lání milə́m mí bɔ ti bá byábí nána, “Mɔʼ anín a dí dyǔ.”
7Ndfukú ɛ bílí bɛbɛ áfə́ sí bílíní. Mɔʼ awə̌ a n wɔ́ŋ ndfukú ɛni, bá bílí mɔ́ ɛ bə̌ŋ Pɔ́bliyusə. Mɔ́ a bílí janiya a nə̂n á pɛsi ɛni áfə́ madí mâ n kámbúní. A n kasí sɛ́ ti a dísí sə́ bwǎm. 8Sáŋ mú Pɔ́blyusə a bílí á wuti wú nyambɛ̂, nkfulu m bílí mɔ́ á nyǔ na libí-li-tfwɛ́tfwɛ́. Pɔ̂lə a kwilí á tfúŋ ɛ́ mɔ, a káni, a bándí makɛ́ má mɔ á nlú m mɔ, ti a pwisí mɔ́. 9Ngə ɛ́yín ɛ́ bwə́lání, baʼ bá nyámbɛ̂ básə́sə̌n áfâ á nkí ámə́ madí má kámbúní bá Pɔ̂lə á pwisí bɔ́. 10Bá bə́kí sə́ majabeya jǐta. Á púndá ɛli kə̌, bá fílí byə̌m jǐta á stíma ábə́ sí bwəlaní á nji.
Pɔ̂lə bá fálú á Málta bá pílí á Rómə
11Sí dyɛ́ á pɛsi ɛ Málta ngɔn ɛ́lán ti sí kwílí á stíma ɛyə̌ ɛ fí á Alɛsánda bá bílí ɛ bə̌ŋ stíma ɛni nána madyǔ má Mafɛ̂. Sí lâ ɛ falú na stíma ɛni, ɛ̂ m mə̌ ɛ́ bá á fǔm bú á púndá ɛsə́sə̌n ɛyə̌ ɛfi ɛ́ ngínya ɛ bílíní. 12Sî n kə sí pâ á nkí n Sirákusə. Sí dyɛ́ á wə́ madû málán. 13Butya á fâ yɔ̂ sí kíní ti sí pá á nkí n nə̂n Rɛ́kyumə. Bǔn bú yílíní, ɛfi ɛ́ bútí ɛ wan á pɛsi ɛ shíyə̌. Á mbís ɛ madû mábɛ̂ sí pílí á nkí m Pútyɔ́li. 14Sí díbí baʼ ábə́ bǎ n dúbɛ́ Krísto á wə́. Bâ m pɔŋ sə́ nána sí dyɛ́ na bɔ́ sɔ́ndi pɔ́. Ngə sí kǐní, yɔ̂ sí pílíní á Rómə. 15Badúbedi á Rómə bâ m wú nána sí paʼ, áfánikə̌, bá fálú kfwáŋ kə́ŋ ta á fǔm ábə́ bá bəŋní nána, Mákíti má Ápyusə álí sinj sə́, na dungu pə́ bá bílí sə́ ɛ sinj á Ndáʼ ɛ Bakən Bálán. Ngə Pɔ̂lə a m míníní bɔ́, a sákán Dyǔ ti nlə́m m kpúti mɔ́ á libum.
Pɔ̂lə a pílí a Rómə
16Ngə sí pílíní á Rómə bá m makú Pɔ̂lə nána a dyɛ na mɔ́mə̌n ndé bâ n dí sója nána a búti mɔ́ ɛ mindi.
17Á mbís ɛ madû málán, Pɔ̂lə a bəŋí bá bá bajaniya bá baʼ bá Júda á nkí mû á mbum. Ngə bá pílíní, a m pɔ̌ŋ bɔ́ nána, “Bǎn-bá-nyǎ bá myə bá Ísrɛl, mi mi sî m bwə baʼ bá sə yǔm ɛ́ bî ká ɛ́fɔ́, na mi mi sî m bwə yǔm ká ɛfɔ́ tɛ́ŋgɛnɛ bilɛm ábə́ basáŋ bá sə bá nyákə́ bá mwísání sə́, ndé kánâwə̌, baʼ bá sə bá kúbí mi á Jerúsálɛmə, bá bə́ mî á makɛ́ má bajaniya bá Romə, áfánikə̌, n dí fán ngə mɔ a bibuwa.” 18Bajaniya bá Romə bá mə́ní mi ɛ káyisi, bá pɛ́pɛ́ mi ɛ maku á ɛ́tútú nána bá sî n wɔ́ŋ yándá ká lífɔ́ álə́ lí lúfú nána n tiŋgání ɛ wá. 19Ndé baʼ bá Júda bá pushúwa nána bá máku mi, áfánikə̌, mi mi byá nána Káyísa mɔ́mə̌n á má mukáʼ m myə. Ká ngə mi mi sî n wɔ́ŋní ká yúm ɛ́ bî tɛ́ŋgɛnɛ baʼ bá myə. 20Á ɛ́tútú yándá lín yɔ̂ m bəŋíní nyə́ nána sí kpə̂. Á mbálɛ nǎn sa náná nyí bí nána mgbɔ́kɔbí ɛ́ dí mi á mákɛ́, ɛ́ dí wɔ̂ á ɛ́tútú ɛ mɔʼ awə̌ baʼ bá Ísrɛl bá bándíní nlə́m nána á paʼ. 21Á fâ yɔ̂ bajaniya bá Júda bâ m pɔŋní Pɔ̂lə nána, “Sí nan kwísíyá kâti ká pɔʼ ɛyə̌ ɛ fí á Judéya tɛ́ŋgɛnɛ wə. Na mɔʼ n sə ká nfɔ́ a fíyǎ á wə́ awə̌ a panání ndúm ká pɔ́ʼ tɔ̌ ká kâti ɛ́yə́ ɛ́ byá yǔm álí tɛ́ŋgɛ́n wə̂. 22Ndé sí nəŋ álí wú likani lí wə, á ɛ́tútú nána sí bí nána á fǔm tɛ́ baʼ bá byá misam míbî tɛ́ŋgɛnɛ ɛpipá ɛ́yín ɛ́yə́ nyí díní.”
23Áfánikə̌, bû Pɔ̂lə bá fílí bwǐn ábə́ bá wú muká m mɔ. Ngə bǔn bû wú pílíní, limuti lí pílí á fǔm ábə́ Pɔ̂lə a bílíní. Pɔ̂lə a butí bɔ́ ɛ pɔ̌ŋ misam mí wudya wú Dyǔ butya mushú kə́ŋ ta nkwin nkwin. A bílí ɛ wanán nána bá dúbɛ́ Yésuwə. A bílí ɛ bwəlán pɛsi ɛyə̌ ɛ́ fí á kâti ɛ mbéndá ɛ Mósisə na matilan má bá nlakuwa bá mudî álí bwə nána bá dúbɛ́ na Yésuwə mɔ́ a dí Krísto. 24Dungu lí baʼ bâ n dúbɛ́ mɔ́ ndé dungu lí sî n dúbɛ́ ná yǔm ɛ́yə́ a bílíní ɛ byá ɛ́ bílí mbálɛ. 25Áfánikə̌, bá bútí ɛ shǔm pénda na bɔ́mə̌n ngə bá kəní. Bá lâ ɛkə, Pɔ̂lə a m pɔ̌ŋ bɔ́ nána, “Mudî ámə́ n Sáŋí mû n tɛ́ŋgɛ́ní ɛtî ɛ́yə́ ɛ̂ m pɔŋní nlakuwa a mudî Ayzáya misam nána a byá á basáŋ bá nyə bá nyákə́ nána,
26‘Kə̌ʼ, pɔ̌ŋ baʼ bâ nána,
nyí wú na nyí wú pə́, ndé nyí sî sɔ́ntáníyá,
nyí táti na nyí tátí pə́, ndé nyí sî míná ká bwín.
27Nǎn byá nâ á ɛ́tútú nána baʼ bá nyə bá kpútí milə́m á mábum.
Bá mə́ ɛ kpútí na matwî má bɔ,
na bá mə́ ɛ dí mǐs má bɔ.
Njí ɛ́ sî m bá nâ ní mǐs má bɔ́ má mín,
matwî má bɔ má wú ná milə́m mí bɔ mí sɔ́ntan.
Ti bá tim á mi
ti m pwisí bɔ́.’”
28Yɔ̂ Pɔ̂lə a mɛsíní nána, “Nyí lɔ́lí ɛ bí nána, Ndúm ɛ lishuŋgɛ ɛyə̌ Dyǔ lí lúmíní, sɔnsɔ́nǎn lí mə́ yɔ́ ɛ lúm á baʼ ábə́ bá shiyǎ baʼ bá Júda, nána baʼ bá wúkán lɔ́.” 29[Á púndá ɛyə̌ Pɔ̂lə a m byání nâ, baʼ bá Júda ábə́ bá bílí áwə́ bɔ́mə̌n bá fálú á wə́ bá bútí álí shǔm penda jǐta.] 30Pɔ̂lə a dyɛ́ á wə́ mibú míbɛ̂ á ndáʼ ɛyə̌ mɔ́mə̌n a bílíní ɛ sáwu. A bílí ɛ kasí baʼ básə́sə̌n ábə́ bá bílí ɛ paʼ á mɔ́.
31A pɔŋí baʼ tɛ́ŋgɛnɛ wudya wú Dyǔ na a n lɛ́fú bâ tɛ́ŋgɛnɛ Sáŋgúwə́ Yésu Krísto, a si wúká bɔ̂ŋ, na mɔʼ ká nfɔ́ a sî ŋ káŋ mɔ́ nána a si byá.
Currently Selected:
Mabwəlan 28: bwt
Highlight
Copy
Compare
Share
Want to have your highlights saved across all your devices? Sign up or sign in
