Mabwəlan 23

1Pɔ̂lə a tátí baʼ bá ɛyə́ŋgə́ jǔŋ ti á byábí nána, “Bǎn bá nyǎ bá myə bá Ísrɛl, kə́ŋ ta bǔn bú yə́, nlə́m m myə n sáŋí á libum jǐta á nyə ɛyə̌ lungɛ́ lí myə lí díní á wusú wú Dyǔ.” 2Ngə Pɔ̂lə a m byání nâ, Ananíyasə Prísə a nə̂n, a m pɔ̌ŋ baʼ ábə́ bá tyə́bí a nsaŋ nyǔ m Pɔ̂lə nána bá bə̂ mɔ́ libɛ́n á nsu. 3Ti Pɔ̂lə a byábí á mɔ́ nána, “Dyǔ pə́ lí bə wə̂ libɛ́n. Ɛtushí ɛ́ yúm ngə wə. Ɛ shumání á fâ ɛ̌ bwəláníyá mambéndá álí káyísí mî, ndé kánâwə̌, wɔmə̌n ɛ̌ kfún mbéndá ngə ɛ byábíní nána bá bə̂ mi libɛ́n.”

4Baʼ ábə́ bá bílí bɛbɛ na Pɔ̂lə bá byábí á mɔ́ nána, “Ɛ̌ lwí Prísə a n nə̂n a n nə̂n ɛ Dyǔ.”

5Pɔ̂lə a pushú nána, “Bǎn bá nyǎ bá myə bá Ísrɛl, mi mi sî m bíyǎ nána a dí Prísə a n nə̂n a n nə̂n. Ɛyala ɛ́ Dyǔ ɛ́ byábí nána, ‘Ɛ si byá wubî á janiya lí baʼ bá wə.’”

6Á púndá ɛyə̌ Pɔ̂lə a yə́mbíní nána á límuti lî, dungu lí bílí á ɛ́pipá ɛ́ Sádusî na lípə́pə̂ lí bílí baʼ ɛ́pipá ɛ́ bá Fárisî, a byábí á mǐn á ɛyə́ŋgə́ nána, “Bǎn bá nyǎ bá myə bá Ísrɛl! Mi n dí mɔʼ a ɛpipá ɛ́ Fárisî, na n dí mwǎn a mɔʼ a ɛpipá ɛ́ Fárisî. Bá káyísí mî fán á ɛ́tútú nána m bándí nlə́m nána baʼ ábə́ bá mə́ ɛ́ wá bá pumu pə́.” 7Ngə Pɔ̂lə a m byání nâ, Bafárisî na Sádusî bá bútí ɛ táŋ ɛbámí. Ndíngí m bâ ábə́ m bílí á wə́ n kábání. 8(Yándá lí ɛ́bámí ɛ́yín lí bílí nána, ɛpipá ɛ́ Basádusî ɛ̂ n dúbɛ́ nána wə̌ti mɔʼ a wúlí a sə pə́ ɛ pumu á líwá na bá dúbɛ́ nána ba áŋgɛl bá shiyǎ na bá dúbɛ́ nána midî mí shiyǎ. Ndé Bafárisî bá dúbɛ́ nána misám mínán mísə́sə̌n mí dí.) 9Ntɔkɔku mû m púlú á mǐn na ngínya, ti dungu lí balɛ̂ bá mbéndá ábə́ bá bílí á ɛ́pipá ɛ́ Fárisî bâ n tyə́ á mǐn, bá bútí ɛ bún na ngínya nána, “Sí nan míníyá ká yúm ɛ́ bî tɛ́ŋgɛnɛ mɔʼ anín. Ɛbwəlafâ áŋgɛl tɔ̌ mudî m pɔ́ŋí mɔ́ yǔm tyɛ̌tyɛ̌!” 10Ɛbámí ɛ́ yî ɛ̂ n tim ɛ́ kpú kə́ŋ kə́ŋ mɔʼ a sója a n nə̂n a n kani nána bá tíŋgání ɛ nyati Pɔ̂lə. Áfánikə̌, a m pɔ̌ŋ sója ɛ́ mɔ nána bá kə̂ á límuti lî, bá fúl Pɔ̂lə á makɛ́ má baʼ á bâ, bá kánan mɔ́ á ndáʼ ɛ malɛ́.

11Wudû bû, Sáŋgúwə́ a tyə́bí á nsaŋ n nyǔ m Pɔ̂lə a pɔ̂ŋ mɔ́ nána, “Ɛ si báŋ, ngə ɛ mə́ní mi tyə́ mbúŋ á fánán á Jerúsálɛmə, áfánikə̌, ɛ lɔ́lí pə́ mi tyə́ mbúŋ á Rómə.”

Mwanu álí búlú Pɔ̂lə

12Mushú múní, dungu lí baʼ bá Júda bá tánání ti bá wíkí mwanu, bâ n mwí nguʼ nána bá sî dyá tɔ bá mwá ká yǔm kə́ŋ ta bá búlú Pɔ̂lə. 13Baʼ ábə́ bâ n wikí mwanu mún bâ n túm mûm mánîn. 14Bâ n kə á baprîsə bá nə̂n na bá nkúmə́ bá nkí ti bá pɔŋí bɔ́ nána, “Sí mwí ngu ɛ ngínya nána, si sî dyá ká yǔm kə́ŋ kə́ŋ sí búlú Pɔ̂lə. 15Sɔnsɔ́nǎn nyə́ na ɛyə́ŋgə́ nyí lûm wubyá á mɔʼ a n nə̂n a sója a Rómə nána a pánan nyə́ Pɔ̂lə. Nyí bwə̂ ɛlangá nána nyí sa ɛ́ wɔ́ŋ ndúm ɛ mbímbí tɛ́ŋgɛnɛ mɔ́. Ndé sí bunsan álí búlú mɔ́ byáná bá panan mɔ́ á fán.” 16Ndé mwǎn a mumân m mwǎn n nyǎ a mwalân m Pɔ̂lə a n wú mwanu mún ámə́ bâ m bwəní álí búlú Pɔ̂lə. Áfánikə̌, a kǐ á ndáʼ ɛ malɛ́ álí pɔ̌ŋ Pɔ̂lə. 17Pɔ̂lə a m bə̌ŋ mɔʼ a sója nfɔ́ ti a pɔŋí mɔ́ nána, “Nǔŋ kɔlímɔʼ ɛnín ɛ kánan mɔ́ á mɔʼ a sója a nə̂n, a wɔ́ŋí nsam álí pɔŋ mɔ́.” 18Áfánikə̌, mɔʼ a sója a n kanán kɔ́limɔʼ ani á mɔʼ a sója a nə̂n. Ti a byábí á mɔʼ a sója a nə̂n nána, “Pɔ̂lə mɔʼ a bibuwa a bəŋí mi ti a pɔŋí mi nána m panan wə kɔ́limɔʼ anín á ɛ́tútú nána a wɔ́ŋí nsam mú lí pɔŋ wə.” 19Mɔʼ a sója a nə̂n a wálí kɔ́limɔʼ ani ɛkɛ́, a kánán mɔ́ á nsaŋ ti a kɔndɛ́ mɔ́ nána, “Yə̌ ɛ wɔ́ŋíní álí pɔ̌ŋ mî?” 20Kɔ́limɔʼ ani a pushú mɔ́ nána, “Dungu lí bajaniya bá baʼ bá Júda bá mə́ ɛ məsi nána, bá pɔŋ wə̂ nána ɛ pánan Pɔ̂lə á ɛ́yə́ŋgə́ yǎn. Bá bwə̂ ɛ́laŋgá nána bá sǎ ɛ́ kwisí ndúm ɛ mbímbí tɛ́ŋgɛnɛ Pɔ̂lə. 21Ndé ɛ si wúkán bɔ́ á ɛ́tútú náná baʼ litúm mûm mánîn bá sɔmɔnə bá sinjá mɔ́. Baʼ á bán bá mə́ ɛ mwá nguʼ nána bá sî dyá tɔ̌ lí mwá ká yǔm kə́ŋ bá búlú Pɔ̂lə. Sɔnsɔ́nǎn bá mə́ ɛ bunsan álí búlú mɔ́. Na bá sǐn wɔ̂ yə̌ ɛ̌ byání.” 22Ti mɔʼ a nə̂n a sója ani a pɔŋí mɔ́ nána, “Ɛ si pɔ̌ŋ mɔʼ ká nfɔ́ nána ɛ mə́ mi ɛ pɔ̌ŋ nsam mún.” Ngə a mə́ní ɛ byá nâ, yɔ̂ a pɔŋíní kɔ́limɔʼ ani nána a kə̌.

Bá kánání Pɔ̂lə á gɔvɔnɔ Fɛ́liksə

23Ti mɔʼ a sója a nə̂n a bə́ŋí basója bá mɔ bábɛ̂ bá nə̂n bápə́pə̂ ti a pɔŋí bɔ́ nána, “Nyí bunsán mbúki ɛ́ sója ɛ́bɛ̂ álí kə á Kayísaríya. Nyí bán sója mûm shyǎmbɛ ábə́ bá kanán nyaʼ ɛ mukálâ na mbúki ɛ́ sója ɛ́bɛ̂ ábə́ bá wan na bilɔ̂ʼ. Nyíyabɔ̂ nyí búnsán nyí búku bɛbɛ ngɛ̌ŋ libu ɛ́ wudû. 24Nyí búnsan nyaʼ ɛ mukálâ á Pɔ̂lə ɛyə̌ ɛ́ kanán mɔ́. Nyí díki mɔ́ nyí kánan mɔ́ á gɔvɔnɔ Fɛ́liksə, yǔm ɛ́ bî ká ɛfɔ́ ɛ́ si bwəlán mɔ́.” 25Mɔʼ a sója a nə̂n a n tǐl kâti á gɔvɔnɔ Fɛ́liksə ɛyə̌ ɛ bílí ɛ byá nána,

26“Mi Kláwúdiyusə Lisíyasə miyə́ n tilí kâti ɛnín. Nǎn til á wə, wə awə̌ ɛ wɔ́ŋí ɛdúbɛ́ ɛ́nə̂n Gɔvɔnɔ Fɛ́liksə. N sambání wə. 27Baʼ bá Júda bâ n kú mɔʼ anín ti bâ n pə́pə́ mɔ́ ɛ búlú. Mi mi sɔ́ntán nána a dí mɔʼ a Rómə áfánikə̌, mi mi kə̌ na basója bá myə álí shuŋgɛ́ mɔ́. 28M pɛpɛ ɛ bí yə̌ ɛ́yə́ bá bándíní mɔ́ mbaʼ á nyǔ. Áfánikə̌, mi mi kanán mɔ́ á ɛ́yə́ŋgə́ ɛ́ bɔ. 29M mə́ ɛ wasi ti n yəmbí nána a bwə́liyǎ ká yúm ɛ́yə́ ɛ́ lúfú nána a lɔlí ɛ́ wá tɔ a kwíli á bibuwa. Misam mísə́sə̌n ámə́ bá byábíní nána a bwəlí mí dí misam ámə́ mí mindi mambéndá má bɔ. 30Ngə bá pɔ́ŋíní mi nána mwanu mpə́pə̂ n dí álí búlú mɔ́, áfâ áshí áshí m məsí álí lúm mɔ́ á wə. M mə́ ɛ pɔ̌ŋ baʼ ábə́ bá tɛ́ŋgɛ́n mɔ́ nána, bá pâʼ bá pɔ̌ŋ wə́ yǔm ɛ́yə́ bá byábíní nána a mə́ ɛ bwə.”

31Basója á bâ bá m bwə̌ ngə bâ m pɔŋní bɔ́ nána bá bwə̂. Wudû bû, bâ n kanán Pɔ̂lə kfwáŋ kə́ŋ ta á nkí m Antípátrisə. 32Bǔn búní, basója ábə́ bá kǐ na makwi, bá tímbí mbǐ á ndáʼ ɛ malɛ́, bá mákú basója ábə́ bá bílí ɛ kə na nyaʼ ɛ mukálâ álí kə ɛ́ díkí Pɔ̂lə. 33Bâ n kanán Pɔ̂lə á Kayísaríya. Ngə bá pílíní, bá bə́kí kâti ɛni á gɔ́vɔ́nɔ ti bá mwísání mɔ́ Pɔ̂lə á mákɛ́. 34Gɔ́vɔ́nɔ a n láŋ kâti ɛni ti a kɔndɛ́ Pɔ̂lə a pɛsi ɛ fə́ a fíní. Ngə a yə́mbíní nána Pɔ̂lə a fí á pɛsi ɛ Sɛlísiya, 35a pɔŋí mɔ́ nána, “M wú yə̌ ɛ́yə́ ɛ̌ byání wə̌ti baʼ ábə́ bá bándí wə mbaʼ á nyǔ bá pílí á fán. Ti a pɔŋí basója nána bá kánan Pɔ̂lə á ndáʼ ɛ kə̂ŋ ɛyə̌ Hɛ́rɔdə a n lúŋní. Na nána bá bán mǐs á nyǔ á mɔ.”

Currently Selected:

Mabwəlan 23: bwt

Highlight

Copy

Compare