Mabwəlan 14
14
Pɔ̂lə bû Banábasə bá pɔ́ŋí ndúm ɛ mbâ á Ikóniyumə
1Á Ikóniyumə, Pɔ̂lə bû Banábasə bá kǐ á ndáʼ ɛ makáni ngə ɛ́ bílíní ɛləm ɛ́ bɔ. Á ndáʼ ɛ makáni ɛni, bâ n pɔ̂ŋ ndúm ɛ mbâ á nyə ɛyə̌ baʼ bá Júda jǐta na baʼ ábə́ bá shiyǎ baʼ bá Júda bá dúbɛ́ Yésuwə. 2Ndé dungu lí baʼ bá Júda ábə́ bá púshuwǎ álí dúbɛ, bá mpúngú baʼ ábə́ bá shiyǎ baʼ bá Júda milə́m ti bá fɛ́njí bɔ́ milə́m álí tɛ́ŋgɛ́n badúbedi. 3Pɔ̂lə bû Banábasə bâ n dyɛ á wə́ á ɛtfûm ɛ́ púndá, bá bílí ɛ lakú ndúm ɛ mbâ tɛ́ŋgɛnɛ nsam m mbâ ámə́ Dyǔ lí bwə́líní á baʼ bá si wúká bɔ̂ŋ. Sáŋgúwə́ Yésuwə a m bwə bá lúfú biyəmblan, na bá bwə́ pə́ misam mányáká jǐta álí lúfú nána misam ámə́ bawútú bá mɔ bá bílíní ɛ byá tɛ́ŋgɛnɛ nsimá m mɔ mí bílí mbálɛ. 4Baʼ bá nkí m mû, bâ n kaban. Dungu bá bílí na baʼ bá Júda, bání bá bá na bawútú bálí-lúm. 5Ti dungu lí baʼ bá Júda na baʼ ábə́ bá shiyǎ baʼ bá Júda na milú mí bɔ bá wíkí myanu nána bá takí Pɔ̂lə bû Banábasə na nána bá dfúm bɔ́ malɛ́. 6Ngə Pɔ̂lə bá yə́mbíní nâ, bá bfúlí ti bá kǐ á pɛsi ɛ Likóniya bá kwílí á mikí mí Lístriya na Dɛ́bɛ na mabú ámə́ má dí bɛbɛ. 7Bá kǐ á wúsú álí pɔ̂ŋ ndúm ɛ mbâ á mábú mâ másə́sə̌n.
Misam ámə́ mí bwə́lání Pɔ̂lə bû Banábasə
8Á nkí n Lístriya, mɔʼ nfɔ́ á bílí awə̌ a m bá libyə́ŋ butya á liyá. A nan kánáníyá makwi ká bwín. 9Mɔʼ ani a bílí ɛ wú ngə Pɔ̂lə a bílíní ɛ pɔ̂ŋ ndúm ɛ mbâ. Pɔ̂lə a n mín nána mɔʼ ani a wɔ́ŋ dúbɛ́ nána a tiŋgání ɛ pwî. Áfánikə̌, Pɔ̂lə a mindí mɔ́ jǔŋ, 10ti a pusí ngɔli ɛ́ mɔ nána, “Falú áshí, tyə́ á mǐn.” Mɔʼ ani a pyə́mí á mǐn a bútí ɛ́ kə. 11Ngə limuti lí míníní yə̌ ɛ́yə́ Pɔ̂lə a bwəlíní, bá bútí ɛ bún á mbyá n Likóniya nána, “Madyǔ má mə́ ɛ shul áshí á sə́ á nyə ɛ bǎnyûŋ, álí paʼ sə́ ɛ wúnjan.” 12Bâ n bə̌ŋ Banábasə nána mɔ́ a dí dyǔ álə́ bá bəŋní nána Zɛ́yusə ti bá bə́ŋí Pɔ̂lə nána mɔ́ a dí dyǔ álə́ bá bəŋní nána Hɛ́mɛsə á ɛ́tútú nána, mɔ́ a bílí mutɔpedi. 13Libún álə́ bá bílíní ɛ bwəlí dyǔ álə́ bá bəŋní Zɛ́yusə lí bílí á mbís ɛ nkí. Áfánikə̌, prísə n Zɛ́yusə a m panán nyaʼ na mbunji á ɛkuʼ ɛ́ wúkâʼ wú nkí. A m bwə nâni á ɛ́tútú nána mɔ́ na limuti lí baʼ á bâ bá bílí ɛ sa álí bə̌ Pɔ̂lə bû Banábasə jabeya. 14Ndé ngə Pɔ̂lə bû Banábasə bá wúkíní yə̌ ɛ́yə́ baʼ á bâ bá pɛ́pɛ́ní ɛ bwə, bá nyábí mikuʼ mí bɔ á nyǔ ti bá kwílí á límuti lí bâ bá búna nána, 15“Yə̌ nyí bwəní ɛbú ɛ́ mísam ngə mín? Sə́mə̌n sí dí wɔ̂ bǎnyûŋ ngə nyə́. Sí dí fán álí pɔŋ nyə́ Ndúm ɛ Mbâ ɛ́ Yésuwə álí bwə nána nyí máku mísam á mín ámə́ mí wɔ́ŋiyǎ ká yúm ɛ́ lí bwəlan, nyí nân Dyǔ lí lúngɛ́ álə́ lí wíkí nkímínyə́, nkínshíyə, na mbô ɛ nə̂n ɛ nə̂n na byə̌m bísə́sə̌n ábə́ bí dí á wə́ átin. 16Á púndá ɛ wusúwə́, Dyǔ lî n makú bâ bá kə̂ʼ á mánji má bɔ. 17Ndé kánâwə̌, lí mə́ ɛ lúfú biyəmblan nána lí dí á ɛ́tútú nána lí bwə́lí misam mí mbâ. Lí mə́ ɛ lúm mbvú ɛyə̌ ɛ fí á mǐn na lí mə́ nyə́ ɛ bə̂ mbuta á púndá ɛyə̌ ɛ tɛ́ŋgɛ́ní. Lí mə́ nyə́ ɛ bə̌ madyá na lí wúkí nyə́ munyɛŋgɛ.” 18Ká ngə Pɔ̂lə bû Banábasə bâ m byání misam mín mísə́sə̌n, ɛ̂ n kam álí káŋ bɔ́ nána bá si bə bɔ́ jabeya.
19Duŋgu lí baʼ bá Júda bâ n fí á nkí n Ántiyɔkə na Ikóniyumə á pɛsi ɛ Pisídiya, ti bá fálú á nkí n Ikóniyumə bá pá á Lístriya. Bá pə́lání milə́m mí limuti lî á líbum ti bɔ́ na limuti lî bá bútí ɛ dfúm Pɔ̂lə malɛ́, bá dfvula mɔ́ áshí, bá nyítán mɔ́ á nkí bá kaníyá nána a mə́ ɛ wá. 20Ndé á púndá ɛyə̌ baʼ ábə́ bá dúbɛ́ bá pílíní ti bá kámbú mɔ́, a n falú áshí ti a timbí á nkí átin. Bǔn búní, bû Banábasə bá kǐ á nkí n Dɛ́bɛ.
Pɔ̂lə bû Banábasə bá timbí mbís á Ántiyɔkə
21Pɔ̂lə bû Banábasə bâ n pɔ̂ŋ ndúm ɛ mbâ á nkí m mû ti bâ n bwə̂ bâ jǐta álí bá bawútú. Ti bá tímbí mbǐ á mikí mí Lístriya, Ikóniyumə na Ántiyɔkə ɛyə̌ ɛ dí á pɛsi ɛ Pɛsídiya. 22Á fǔm tɛ́ áfə́ bâ m paʼ ní, bá bílí ɛ lɛ́fú bâ ábə́ bâ n dúbɛ́ Yésuwə na bá bútí ɛ kpútí bɔ́ milə́m álí bwə nána bá tyə́ á dúbɛ lí bɔ. Bá bílí bɔ́ ɛ lɛ́fú nána, “Sí lɔ́lí ɛ kwisí mútakaʼ jǐta byáná sí kwilí á wudya wú Dyǔ.” 23Á mwembá tɛ́ ámə́ Pɔ̂lə bû Banábasə bâ m paʼní, bá bílí ɛ pwɛ̌ bâ álí dyɛ́lɛ́ mwembá mû. Wə̌ti bâ n káni na álí dyɛ njɛ-á-mákáni, bâ n bə̌ baʼ ábə́ bá dyɛ́lɛ́ mwembá á makɛ́ má Sáŋgúwə́ awə̌ bá bándíní milə́m mí bɔ á mɔ́.
24Bá mə́ní wɔ̂ ɛ́ túm á pɛsi ɛ Pɛsídiya bá pílí á pɛsi ɛ Pamfíliya. 25Bâ m pɔ̌ŋ ɛyala ɛ́ Dyǔ á nkí m Pɛ́ga ti bá shúlí á nkí n Atáliya. 26Bá fálúní á nkí n Atáliya, bá bwə́lání bwálu álí tǐm mbís á Ántiyɔkə, áfə́ bâ n bəní bɔ́ makáni nána nsimá n Dyǔ m bá na bɔ́ á ɛ́bulú ɛ́yə́ bá mə́ní ɛ ma sɔnsɔ́nǎn. 27Ngə bá pílíní á Ántiyɔkə, bâ n shwínjí baʼ bá mwémbá fǔm bufɔ́ ti bá pɔ́ŋí bɔ́ misam mísə́sə̌n ámə́ Dyǔ lí bwə́lí tombwanɛ bɔ́. Na bâ n pɔŋ bɔ́ ngə Dyǔ lí mə́ní ɛ pú nji á baʼ ábə́ bá shíyǎ baʼ bá Júda. 28Na bâ n dyɛ á wə́ na baʼ ábə́ bá dúbɛ́ Yésuwə á ɛtfûm ɛ́ púndá.
Currently Selected:
Mabwəlan 14: bwt
Highlight
Copy
Compare
Share
Want to have your highlights saved across all your devices? Sign up or sign in
