TITUS 1
1
1Paulus, omupiya waKalunga nomuyapostoli waJesus Kristus, omolweitavelo lovahoololwa vaKalunga neshiivo loshili lopatilokalunga, 2opateelelo lomwenyo waalushe, ou wa udanekwa kuKalunga iha fufya, nalenale efimbo manga inali hovela, 3ndelenee efimbo eshi la fika, okwa holola ondjovo yaye meudifo, nde i pewa pamhangela yaKalunga, Omukulili wetu, 4okuTitus, omona wange shili paitavelo letu limwe, efilonghenda nombili kuKalunga Tate nokuKristus Jesus, Omukulili wetu.
Ovakulunhu nhumbi ve nokudikwa meongalo
5Eshi nde ku fiya muKreta, ou yukife, eshi ame nda fiya po inashi yukifwa, ove u nangeke moshilando keshe ovakulunhu, ngaashi ame nde shi ku lombwela; 6omukulunhu ou na kale ehe noshipo, omulumenhu womukainhu umwe aeke, e novana ovaitaveli, ihava popiwa ve hole oipala, vo kave fi ovo ihava dulika. 7Osheshi omufitaongalo oku nokukala ehe noshipo ngaashi sha wapalela elenga laKalunga, hanakulihola mwene, hamuhandunhu, hangholwe, hamukolokoshi, hamukongi weliko loulunde, 8ndelenee e shi okuyakula ovaenda, e hole ouwa, omunambili, omuyuki nomuyapuki nomulidiliki, 9e nokudama mondjovo ei i shii okulineekelwa yopalongo, opo a dule ngaha okukumaida nelongo la pama nokutomha ava tava tu eemhata.
10Osheshi ope na vahapu ve neenyamukudi, tava popyaana ongaho novapukifi, unene mokati kovapiti vetanda. 11Omakanya avo e nokuumikwa. Vo ohava dongakanifa omaumbo nokuli mokulonga eshi inashi wapala okulongwa, molweliko longaho. 12Umwe womokati kavo, omuxunganeki wavo vene, okwa tile: “Ovakreta alushe ovanaipupulu, vo oilyani novafukenhu.” 13Ehepaululo olo oloshili, onghee hano va hanyena shili neenghono, vo va veluke meitavelo, 14ndele vaha shikule eengano dOvajuda noipango yovanhu, ava va pilamena oshili. 15Kovakoshoki oinima aishe ya koshoka: ndele kwaava va nyata ndele vehe neitavelo, kave na sha sha koshoka, osheshi eendunge neliudo lavo ola nyata. 16Vo otava ti ova shiiva Kalunga, ndelenee moilonga yavo otave mu likale, osheshi ovo oikungifa yongaho, ihava dulika, inava wana okulonga oshilonga nande shimwe shiwa.
Currently Selected:
TITUS 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.