1 TIMOTEUS 1
1
1Paulus, omuyapostoli waKristus Jesus opamhangela yaKalunga, Omuxupifi wetu, noyaKristus Jesus, Oye eteelelo letu, 2okuTimoteus, omona wange shili meitavelo. Efilonghenda nonghenda nombili yaKalunga, Tate yetu nokuKristus Jesus, Omwene wetu!
Elondwelo kelongo loipupulu
3Hano ngaashi nde ku lombwela, eshi nda ya kuMakedonia, u kale natango muEfeso, opo u kumaide ovanhu vamwe, vo vaha longe omalongo amwe e lili, 4vo vaha diinine eengano nomapatavalulo ehe nexulilo, aa taa eta ashike eemhata, itadi pameke eleloumbo laKalunga olo lomeitavelo. 5Ndelenee efikilo lekumaido olo ohole tai di momutima wa yela nomeliudo liwa nomeitavelo lihe noihelele, 6omo ovanhu vamwe va puka mo nove liameka komapopyaano ongaho, 7eshi va hala va kale ovalongimhango, nande kave udite ko eendjovo odo noinima oyo tave i tongo ndele tava ti, oi li mondjila.
8Ndelenee otu shi shii, kutya omhango oyo iwa, ile umwe te i longifa pamhango, 9nokushiiva yo nokutya, omhango inai yandjelwa omuyuki, ndelenee ava vehe nomhango ndele ihava dulika, vehe na Kalunga, novalunde, vehe fi ovayapuki, novalinyateki, ovadipai vooxe novadipai vooina novadipai vovanhu, 10novahaeli nomashenge, ovavaki vovanhu, ovanaipupulu novaani voipupulu nakeshe eshi shi nondubo nomalongo a yuka, 11opavaengeli lefimano lelao laKalunga, eli nde li pewa mokulineekelwa.
Omuyapostoli a filwa onghenda
12Ndele ohandi pandula ou a pa nge eenghono, oKristus Jesus, Omwene wetu, eshi a tala nge ame omudiinini nokwa tula nge meyakulolonga, 13ame ou nda li nale omusheki nomutaataai nomuhepeki. Ndele onda filwa onghenda, osheshi ame nde shi ningile mokuhashiiva sha nomokuhaitavela. 14Nefilonghenda lOmwene wetu ola li linene shili pamwe neitavelo nohole i li muKristus Jesus. 15Ondjovo ei oya pama shili noya wana okutambulwa nokutya: Kristus Jesus okwe uya mounyuni okuxupifa ovalunde, mwaava aame omunene ndi va dule aveshe. 16Ndelenee ame onda filwa onghenda, Jesus Kristus opo a holole mwaame tete outalanheni waye aushe ndi ninge oshihopaelelwa shaava tave ke mu itavela va mone omwenyo waalushe. 17Ndele Ohamba yomafimbo ounyuni, ei ihe nexulilo noihe wetike, oyo Kalunga omunandunge aeke, na hambelelwe, Ye na fimanekwe alushe fiyo alushe! Amen.
18Omona wange Timoteus, omhango ei ohandi i ku pe noku ku lineekela, pamaxunganeko aa e ku xunganekelwa nale, opo u shiive okukondja olwoodi liwa mokulikwatelela muo, 19nokudiinina eitavelo neliudo liwa, olo la ekelwashi kuvamwe, noskepa yeitavelo lavo oya teka po. 20Ongaashi Himeneus naAleksander, ava nda yandja kuSatana, opo va handukilwe, vaha sheke vali.
Currently Selected:
1 TIMOTEUS 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.