Yohane 4
4
Yesu na Samariya alʋ wʋrʋ
1Sɛ Farasitina baa nyii gʋ bakpa fɔɩ kpamɩna Yesu yela wʋ a sɔ Kpalɛnara Ɩsʋɔ sɔ kii Yohane na, 2Ŋɩ yɩɛ gasiŋteŋ takɩɛ naa Yesu tɩŋtɩŋ aaŋ sɔ bakpa Ɩsʋɔ sɔ ɔ, ama wʋ kpalɛnara baa. 3Gʋ Kpaŋjuo jiŋ ŋina na, wʋ lɩɩ Yudiya tibi dʋɔ bɔrɛ ju Galaliya tibi dʋɔ.
4Ŋɩ tiri gʋ wʋ a mʋna Samariya tibi dʋɔ. 5Sɛ wʋ gaa tala Samariya dɩɛ garɛ baa yagɛ ga sɛ Sikaa ga tirina tibi gaa Yakobu mʋ fa wʋbu Yosefu. 6Yakobu ditiribuo wɩɛ dɩmaŋ. Gʋ dɩ bɩɩ Yesu wʋ gbɩɛ ju naŋ na, wʋ ju ga cha ditiribuo gaa jaŋ. Saŋa gana yɩɛ wiita keŋkeŋ bɛ.
7Gʋ Samariya alʋ wʋrʋ kɔŋ wʋ a chie lɩŋ na, sɛ Yesu tawɩ ɩ sɛ, <<Fa maŋ lɩŋ na ma nyʋɔ?>> 8[Wʋ kpalɛnara baa ju dɩɛ naŋ na baa ga lɩɛ adiya.]
9Sɛ Samariya alʋ wʋŋ tasɛ ɩ sɛ, <<Nya yɩɛ Yuda wʋkpa bɛ sɛ maŋ dʋɔ ma yɩɛ Samariya alʋ. Sɩnɛ sɛ nyaa dɩlɛ sʋlʋ maŋ lɩŋ na nyaa nyʋɔ?>> [Akala takɩɛ Yudatina na Samariyatina baa jʋʋ dɔŋa naŋ ŋ. [Akala takɩɛ Yudatina na Samariyatina ba aa bʋga baa yɩɛ bʋrʋ ʋ.]
10Yesu lɩsɛ ɩ nʋɔ sɛ, <<Sɛ nafʋɔ n jiŋ Ɩsʋɔ gafaasa ŋii na wʋŋ wʋ a sʋlʋ nyaŋ lɩŋ na, nafʋɔ nyaa sʋlʋ ɩ na wʋ a fa nyaŋ lɩŋ ŋii ŋii fa nkpa.>>
11Sɛ alʋ wʋŋ tasɛ ɩ sɛ, <<Kpaŋjuo, nya tana bʋrʋ gaa nyaa mʋ chie lɩŋ ŋ, sɛ ditiribuo gaa wɩɛ dikiŋ. Le sɛ nyaa yu dɩmʋŋ lɩŋ ŋii ŋii fa nkpa? 12Nya kii daa duluŋ Yakobu wʋŋ wʋ fa daa ditiribuo gaa, sɛ wʋ tɩŋtɩŋ wʋ nyʋɔ ga tɩba sɛ wʋ bie na wʋ namɩɛ kpiniŋ gba nyʋɔ ga tɩba?>>
13Sɛ Yesu lɩsɛ ɩ nʋɔ sɛ, <<Wʋkʋma wʋŋ wʋ a nyʋɔ dɩmʋŋ lɩŋ ŋina na, nyʋɔlɛ aja bɔrɛ chaŋ ɩ, 14ama wʋkʋma wʋŋ wʋ a nyʋɔ lɩŋ ŋii maa fa ɩ na, nyʋɔlɛ ba aa ti chaŋ ɩ ɩ. Gasiŋteŋ, lɩŋ ŋii maa fa ɩ na aja kɩɛna bɛ takɩɛ lɩŋ ŋii ŋɩ patɩ wʋ tɩba, na ŋii fa ɩ nkpa ŋii ŋɩ taŋ gɩtɛ.>>
15Sɛ alʋ wʋŋ tawɩ ɩ sɛ, <<Kpaŋjuo, fa maŋ dɩmʋŋ lɩŋ ŋina na ganaŋkʋ nyʋɔlɛ baa ti chaŋ maŋ ŋ, na ma n baa ti ju dʋɔ kɔŋ jɩna ga chie lɩŋ.>>
16Sɛ Yesu tawɩ ɩ sɛ, <<Ju ga yagɛ n baalɛ na ɩ kɔŋ.>>
17Sɛ alʋ wʋŋ lɩsɛ ɩ nʋɔ sɛ, <<Ma tana baalɛ ɛ.>>
Sɛ Yesu tawɩ ɩ sɛ nya tawɩ gasiŋteŋ gʋ n tana baalɛ ɛ.
18Gasiŋteŋ gaa n nyina sɛ, n cha saa baala ba nʋŋ, dɩtɩɛna baalɛ wʋŋ nya wɩɛ wʋ jaŋ na gba, ba yɩɛ n baalɛ ɛ. Wɩɛ ŋii nya ta tawɩ na yɩɛ gasiŋteŋ bɛ.
19Sɛ alʋ wʋŋ tawɩ sɛ, <<Kpaŋjuo, maa dɩlɛ na gʋ nya yɩɛ Ɩsʋɔ ɔja bɛ. 20Daa duluŋ tʋm dɩmʋŋ bʋrɔŋ gana dʋɔ bɛ, ama amɩɛ Yudatina bɩrɛ ɩ tawɩ sɛ diele gaa ŋɩ tiri gʋ dɩ n tʋm na, n nyina Yerusalem.>>
21Sɛ Yesu tawɩ ɩ sɛ, <<Alʋ, lɩɛ maŋ di sɛ saŋa garɛ a kɔnɛ gʋ ɩ tʋm Juo wʋŋ naa bʋrɔŋ gana dʋɔ yaa Yerusalem m. 22Amɩɛ Samariyatina ɩɩ tʋm bʋrʋ gaa ɩ ba jiŋ na, daa bɩrɛ dɩɩ tʋm bʋrʋ gaa dɩ jiŋ na bɛ, akala takɩɛ mɔlɔgɩ lɩɩ Yudatina jaŋ. 23Ama saŋa garɛ a kɔnɛ sɛ ga taŋ kɔnɛ dɩtɩɛna gʋ gasiŋteŋ tʋmɩra aja tʋm Juo wʋŋ feliŋ naŋ na gasiŋteŋ naŋ, akala takɩɛ dɩmʋŋ tʋmɩra duluŋ sɛ Juo wʋŋ a jawʋ 24Ɩsʋɔ yɩɛ Feliŋ bɛ, ŋɩ tiri gʋ baa baa tʋm ɩ na, a tʋm ɩ feliŋ naŋ na gasiŋteŋ naŋ.>>
25Sɛ alʋ wʋŋ tawɩ ɩ sɛ, <<Ma jiŋ dɩmʋŋ Mesaya wina, [wʋŋ baa yagɛ ɩ Kirisito na] a kɔnɛ. Sɛ wʋ kɔnɛ na, wʋŋ aaŋ ja wʋ a lɩsɛ bʋrʋkʋma tie fa daa.>>
26Sɛ Yesu tawɩ tʋlʋ ɩ sɛ, <<Maŋ wʋŋ maa tawɩ maa fa nyaŋ na, n nyina ɩ.>>
27Dɩmaŋ sɛ wʋ kpalɛnara baa bɔrɛ kɔŋ sɛ dɩ yɩɛ ba doba gʋ wʋ a tawɩ alʋ wʋŋ jaŋ. Ama wʋrʋ n tasɛ ɩ sɛ, <<Be sɛ nya jawʋ?>> yaa <<Be n yɩɛ sɛ nyaŋ na ɩ, ɩɩ tawɩ?>>
28Dɩmaŋ sɛ alʋ wʋŋ yela wʋ dinyiŋkpa bɔrɛ ju dɩɛ naŋ ga tawɩ bakpa sɛ, 29<<N kɔŋ, gaa kɩɛ baalɛ wʋrʋ wʋŋ wʋ tawɩ maŋ bʋrʋkʋma gaa ma cha yɩɛ. Wʋŋ n nyina Kirisito wʋŋ?>> 30Bakpa lɩɩ dɩɛ gaa naŋ kɔŋ wʋ jaŋ.
31Gʋ ŋina tibi na wʋ kpalɛnara baa cha sʋlʋ ɩ sɛ, <<Wʋkalaasa, di bʋrʋ garɛ.>>
32Ama wʋ tawɩ ba sɛ,<<Ma wɩɛna adiya maa di yela ɩ ba jiŋ ŋɩ wɩɛ ɛ.>>
33Sɛ wʋ kpalɛnara baa tasɛ dɔŋa sɛ, <<Wʋrʋ taŋ kɔna ɩ adiya bɛ?>>
34Sɛ Yesu tawɩ ba sɛ, <<Ma adiya n nyina gʋ maa yɩɛ wʋŋ wʋ kpiri maŋ na jawʋ, na maa taŋ wʋ dɩtʋm. 35Ɩ tawɩ sɛ, <Gafɩtasɛ sɩ nara pɔɩ na karɩŋ saŋa a tala.> Maa tawɩ amɩɛ sɛ n fulu amɩɛ asa na ɩ kɩɛ fʋɔsɛ ŋii, adiya bie ŋii bɩɩ tala karɩŋ. 36Dɩtɩɛna gba karadɛ wʋŋ a yu wʋ kɩmtʋɔ, sɛ dɩtɩɛna wʋ a kara adiya bie ŋii wʋ a fa nkpa ŋii ŋɩ taŋ gɩtɛ na, ganaŋkʋ ŋmatɩrɛ wʋŋ na karadɛ wʋŋ baa bʋga di ba asa. 37Ŋina dʋɔ wɩɛ ŋii baa tawɩ sɛ, <Wʋrʋ a du sɛ wʋrʋ a karɛ> na yɩɛ gasiŋteŋ. 38Ma kpiri amɩɛ sɛ n ju ga kara bʋrʋ gaa ɩŋ yɩɛ ga dɩtʋm m. Barɛ n yɩɛ dɩtʋm doŋ-tɛ sɛ ɩ yu ba dɩtʋm dʋɔ kɩmtʋɔ.>>
39Sɛ Samariyatina fɔɩ baa ba lɩɩ dɩɛ ga naŋ na lɩɛ Yesu di, akala takɩɛ alʋ wʋŋ di seriya sɛ, <<Wʋ tawɩ maŋ bʋrʋkʋma gaa ma cha yɩɛ na.>> 40Dɩmʋŋ dʋɔ gʋ Samariyatina baa kɔŋ wʋ jaŋ na, ba sʋlʋ ɩ sɛ wʋ n cha ba jaŋ, sɛ wʋ cha baa jaŋ wɩɛ ala. 41Lɩɩna wɩɛ ŋii wʋ tawɩ na dʋɔ, bakpa fɔɩ lɩɛ ɩ di.
42Sɛ ba tawɩ alʋ wʋŋ sɛ, <<Naa ŋii nya tawɩ na dʋɔ sɛ dɩ lɩɛ di i, dɩtɩɛna daa tɩŋtɩŋ dɩ nyii, sɛ dɩ jiŋ gʋ dɩmʋŋ baalɛ wina n nyina dulunya Mɔlɔgɩrɛ gasiŋteŋ.>>
Yesu chʋɔ bɩnɛ wʋrʋ bu baalɛ jaŋ
43Wɩɩ ala ŋii wʋrʋgbɩɛ na, Yesu ju Galaliya. 44[Sɛ Yesu tɩŋtɩŋ tawɩ sɛ Ɩsʋɔ ɔja tana jilima wʋ tɩŋtɩŋ wʋ dɩɛ naŋ ŋ.] 45Gʋ Yesu tala Galaliya na, Galaliyatina lɩɛ ɩ dʋ. Ba na ŋii wʋ yɩɛ Yerusalem dɩɛ naŋ na kpiniŋ saŋa gaa baa di nyiŋi asadi adiya di, akala takɩɛ baa gba ba cha ba wɩɛ dɩmaŋ.
46Sɛ Yesu ti bɔrɛ ju kana dɩɛ gaa ga wɩɛ Galaliya tibi dʋɔ, diele gaa wʋ cha mʋ lɩŋ bɩrɩŋsɛ wayɩŋ sʋlʋŋ na. Na bɩnɛ wʋrʋ wʋŋ wʋ a tʋŋ juorigbɩɛ na cha wʋ wɩɛ dɩmaŋ wʋ bu baalɛ jaŋ a kili wʋ duwei Kapeniyum dɩɛ naŋ. 47Gʋ baalɛ wina nyii gʋ Yesu lɩɩ Yudiya kɔŋ Galaliya na, wʋ kɔŋ wʋ jaŋ gaa sʋlʋ ɩ sɛ wʋ n kɔŋ gaa chɔ wʋ bu baalɛ jaŋ wʋŋ wʋ a ja wʋ a sɩŋ na.
48Sɛ Yesu tawɩ ɩ sɛ,<<Nafʋɔ ɩŋ na adaŋgana daasɛ na mamachi na, ɩɩ lɩɛ di i.>>
49Sɛ bɩnɛ wʋŋ wʋ a tʋŋ juorigbɩɛ na tawɩ Yesu sɛ, <<Kpaŋjuo, kɔŋ na dɩɩ ju pɔɩ na mabu wʋŋ a sɩŋ.>>
50Sɛ Yesu lɩsɛ ɩ nʋɔ sɛ, <<Pala, n bu baalɛ jaŋ wʋŋ aja yu nkpa.>>
Sɛ baalɛ wʋŋ lɩɛ Yesu wɩɛ ŋii di sɛ wʋ lam.
51Gʋ baalɛ wʋŋ dɔŋ na gbɩɛ wʋ a ju na, wʋ jaŋina wʋ tʋmɩra barɛ sɛ ba tawɩ ɩ sɛ n bu wʋŋ yu alaŋfiya. 52Gʋ wʋ tasɛ ba saŋa gaa wʋ bu wʋŋ yu alaŋfiya na, sɛ ba tawɩ ɩ sɛ, <<Lʋm gaa yela ɩ daŋda wiita karafɩɛ garɛ saŋa.>>
53Sɛ wʋ juo wʋŋ jiŋ gʋ dɩmʋŋ saŋa gana naŋ sɛ Yesu tawɩ ɩ sɛ, <<N bu wʋŋ aja yu nkpa.>> Dɩmʋŋ dʋɔ wʋ na wʋ waa dʋɔtina kpiniŋ lɩɛ Yesu di.
54Gʋ Yesu lɩɩ Yudiya kɔŋ Galaliya na, ŋina n nyina adaŋgana daasɛ bʋlatɛ ŋii wʋ yɩɛ.
Currently Selected:
Yohane 4: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
Yohane 4
4
Yesu na Samariya alʋ wʋrʋ
1Sɛ Farasitina baa nyii gʋ bakpa fɔɩ kpamɩna Yesu yela wʋ a sɔ Kpalɛnara Ɩsʋɔ sɔ kii Yohane na, 2Ŋɩ yɩɛ gasiŋteŋ takɩɛ naa Yesu tɩŋtɩŋ aaŋ sɔ bakpa Ɩsʋɔ sɔ ɔ, ama wʋ kpalɛnara baa. 3Gʋ Kpaŋjuo jiŋ ŋina na, wʋ lɩɩ Yudiya tibi dʋɔ bɔrɛ ju Galaliya tibi dʋɔ.
4Ŋɩ tiri gʋ wʋ a mʋna Samariya tibi dʋɔ. 5Sɛ wʋ gaa tala Samariya dɩɛ garɛ baa yagɛ ga sɛ Sikaa ga tirina tibi gaa Yakobu mʋ fa wʋbu Yosefu. 6Yakobu ditiribuo wɩɛ dɩmaŋ. Gʋ dɩ bɩɩ Yesu wʋ gbɩɛ ju naŋ na, wʋ ju ga cha ditiribuo gaa jaŋ. Saŋa gana yɩɛ wiita keŋkeŋ bɛ.
7Gʋ Samariya alʋ wʋrʋ kɔŋ wʋ a chie lɩŋ na, sɛ Yesu tawɩ ɩ sɛ, <<Fa maŋ lɩŋ na ma nyʋɔ?>> 8[Wʋ kpalɛnara baa ju dɩɛ naŋ na baa ga lɩɛ adiya.]
9Sɛ Samariya alʋ wʋŋ tasɛ ɩ sɛ, <<Nya yɩɛ Yuda wʋkpa bɛ sɛ maŋ dʋɔ ma yɩɛ Samariya alʋ. Sɩnɛ sɛ nyaa dɩlɛ sʋlʋ maŋ lɩŋ na nyaa nyʋɔ?>> [Akala takɩɛ Yudatina na Samariyatina baa jʋʋ dɔŋa naŋ ŋ. [Akala takɩɛ Yudatina na Samariyatina ba aa bʋga baa yɩɛ bʋrʋ ʋ.]
10Yesu lɩsɛ ɩ nʋɔ sɛ, <<Sɛ nafʋɔ n jiŋ Ɩsʋɔ gafaasa ŋii na wʋŋ wʋ a sʋlʋ nyaŋ lɩŋ na, nafʋɔ nyaa sʋlʋ ɩ na wʋ a fa nyaŋ lɩŋ ŋii ŋii fa nkpa.>>
11Sɛ alʋ wʋŋ tasɛ ɩ sɛ, <<Kpaŋjuo, nya tana bʋrʋ gaa nyaa mʋ chie lɩŋ ŋ, sɛ ditiribuo gaa wɩɛ dikiŋ. Le sɛ nyaa yu dɩmʋŋ lɩŋ ŋii ŋii fa nkpa? 12Nya kii daa duluŋ Yakobu wʋŋ wʋ fa daa ditiribuo gaa, sɛ wʋ tɩŋtɩŋ wʋ nyʋɔ ga tɩba sɛ wʋ bie na wʋ namɩɛ kpiniŋ gba nyʋɔ ga tɩba?>>
13Sɛ Yesu lɩsɛ ɩ nʋɔ sɛ, <<Wʋkʋma wʋŋ wʋ a nyʋɔ dɩmʋŋ lɩŋ ŋina na, nyʋɔlɛ aja bɔrɛ chaŋ ɩ, 14ama wʋkʋma wʋŋ wʋ a nyʋɔ lɩŋ ŋii maa fa ɩ na, nyʋɔlɛ ba aa ti chaŋ ɩ ɩ. Gasiŋteŋ, lɩŋ ŋii maa fa ɩ na aja kɩɛna bɛ takɩɛ lɩŋ ŋii ŋɩ patɩ wʋ tɩba, na ŋii fa ɩ nkpa ŋii ŋɩ taŋ gɩtɛ.>>
15Sɛ alʋ wʋŋ tawɩ ɩ sɛ, <<Kpaŋjuo, fa maŋ dɩmʋŋ lɩŋ ŋina na ganaŋkʋ nyʋɔlɛ baa ti chaŋ maŋ ŋ, na ma n baa ti ju dʋɔ kɔŋ jɩna ga chie lɩŋ.>>
16Sɛ Yesu tawɩ ɩ sɛ, <<Ju ga yagɛ n baalɛ na ɩ kɔŋ.>>
17Sɛ alʋ wʋŋ lɩsɛ ɩ nʋɔ sɛ, <<Ma tana baalɛ ɛ.>>
Sɛ Yesu tawɩ ɩ sɛ nya tawɩ gasiŋteŋ gʋ n tana baalɛ ɛ.
18Gasiŋteŋ gaa n nyina sɛ, n cha saa baala ba nʋŋ, dɩtɩɛna baalɛ wʋŋ nya wɩɛ wʋ jaŋ na gba, ba yɩɛ n baalɛ ɛ. Wɩɛ ŋii nya ta tawɩ na yɩɛ gasiŋteŋ bɛ.
19Sɛ alʋ wʋŋ tawɩ sɛ, <<Kpaŋjuo, maa dɩlɛ na gʋ nya yɩɛ Ɩsʋɔ ɔja bɛ. 20Daa duluŋ tʋm dɩmʋŋ bʋrɔŋ gana dʋɔ bɛ, ama amɩɛ Yudatina bɩrɛ ɩ tawɩ sɛ diele gaa ŋɩ tiri gʋ dɩ n tʋm na, n nyina Yerusalem.>>
21Sɛ Yesu tawɩ ɩ sɛ, <<Alʋ, lɩɛ maŋ di sɛ saŋa garɛ a kɔnɛ gʋ ɩ tʋm Juo wʋŋ naa bʋrɔŋ gana dʋɔ yaa Yerusalem m. 22Amɩɛ Samariyatina ɩɩ tʋm bʋrʋ gaa ɩ ba jiŋ na, daa bɩrɛ dɩɩ tʋm bʋrʋ gaa dɩ jiŋ na bɛ, akala takɩɛ mɔlɔgɩ lɩɩ Yudatina jaŋ. 23Ama saŋa garɛ a kɔnɛ sɛ ga taŋ kɔnɛ dɩtɩɛna gʋ gasiŋteŋ tʋmɩra aja tʋm Juo wʋŋ feliŋ naŋ na gasiŋteŋ naŋ, akala takɩɛ dɩmʋŋ tʋmɩra duluŋ sɛ Juo wʋŋ a jawʋ 24Ɩsʋɔ yɩɛ Feliŋ bɛ, ŋɩ tiri gʋ baa baa tʋm ɩ na, a tʋm ɩ feliŋ naŋ na gasiŋteŋ naŋ.>>
25Sɛ alʋ wʋŋ tawɩ ɩ sɛ, <<Ma jiŋ dɩmʋŋ Mesaya wina, [wʋŋ baa yagɛ ɩ Kirisito na] a kɔnɛ. Sɛ wʋ kɔnɛ na, wʋŋ aaŋ ja wʋ a lɩsɛ bʋrʋkʋma tie fa daa.>>
26Sɛ Yesu tawɩ tʋlʋ ɩ sɛ, <<Maŋ wʋŋ maa tawɩ maa fa nyaŋ na, n nyina ɩ.>>
27Dɩmaŋ sɛ wʋ kpalɛnara baa bɔrɛ kɔŋ sɛ dɩ yɩɛ ba doba gʋ wʋ a tawɩ alʋ wʋŋ jaŋ. Ama wʋrʋ n tasɛ ɩ sɛ, <<Be sɛ nya jawʋ?>> yaa <<Be n yɩɛ sɛ nyaŋ na ɩ, ɩɩ tawɩ?>>
28Dɩmaŋ sɛ alʋ wʋŋ yela wʋ dinyiŋkpa bɔrɛ ju dɩɛ naŋ ga tawɩ bakpa sɛ, 29<<N kɔŋ, gaa kɩɛ baalɛ wʋrʋ wʋŋ wʋ tawɩ maŋ bʋrʋkʋma gaa ma cha yɩɛ. Wʋŋ n nyina Kirisito wʋŋ?>> 30Bakpa lɩɩ dɩɛ gaa naŋ kɔŋ wʋ jaŋ.
31Gʋ ŋina tibi na wʋ kpalɛnara baa cha sʋlʋ ɩ sɛ, <<Wʋkalaasa, di bʋrʋ garɛ.>>
32Ama wʋ tawɩ ba sɛ,<<Ma wɩɛna adiya maa di yela ɩ ba jiŋ ŋɩ wɩɛ ɛ.>>
33Sɛ wʋ kpalɛnara baa tasɛ dɔŋa sɛ, <<Wʋrʋ taŋ kɔna ɩ adiya bɛ?>>
34Sɛ Yesu tawɩ ba sɛ, <<Ma adiya n nyina gʋ maa yɩɛ wʋŋ wʋ kpiri maŋ na jawʋ, na maa taŋ wʋ dɩtʋm. 35Ɩ tawɩ sɛ, <Gafɩtasɛ sɩ nara pɔɩ na karɩŋ saŋa a tala.> Maa tawɩ amɩɛ sɛ n fulu amɩɛ asa na ɩ kɩɛ fʋɔsɛ ŋii, adiya bie ŋii bɩɩ tala karɩŋ. 36Dɩtɩɛna gba karadɛ wʋŋ a yu wʋ kɩmtʋɔ, sɛ dɩtɩɛna wʋ a kara adiya bie ŋii wʋ a fa nkpa ŋii ŋɩ taŋ gɩtɛ na, ganaŋkʋ ŋmatɩrɛ wʋŋ na karadɛ wʋŋ baa bʋga di ba asa. 37Ŋina dʋɔ wɩɛ ŋii baa tawɩ sɛ, <Wʋrʋ a du sɛ wʋrʋ a karɛ> na yɩɛ gasiŋteŋ. 38Ma kpiri amɩɛ sɛ n ju ga kara bʋrʋ gaa ɩŋ yɩɛ ga dɩtʋm m. Barɛ n yɩɛ dɩtʋm doŋ-tɛ sɛ ɩ yu ba dɩtʋm dʋɔ kɩmtʋɔ.>>
39Sɛ Samariyatina fɔɩ baa ba lɩɩ dɩɛ ga naŋ na lɩɛ Yesu di, akala takɩɛ alʋ wʋŋ di seriya sɛ, <<Wʋ tawɩ maŋ bʋrʋkʋma gaa ma cha yɩɛ na.>> 40Dɩmʋŋ dʋɔ gʋ Samariyatina baa kɔŋ wʋ jaŋ na, ba sʋlʋ ɩ sɛ wʋ n cha ba jaŋ, sɛ wʋ cha baa jaŋ wɩɛ ala. 41Lɩɩna wɩɛ ŋii wʋ tawɩ na dʋɔ, bakpa fɔɩ lɩɛ ɩ di.
42Sɛ ba tawɩ alʋ wʋŋ sɛ, <<Naa ŋii nya tawɩ na dʋɔ sɛ dɩ lɩɛ di i, dɩtɩɛna daa tɩŋtɩŋ dɩ nyii, sɛ dɩ jiŋ gʋ dɩmʋŋ baalɛ wina n nyina dulunya Mɔlɔgɩrɛ gasiŋteŋ.>>
Yesu chʋɔ bɩnɛ wʋrʋ bu baalɛ jaŋ
43Wɩɩ ala ŋii wʋrʋgbɩɛ na, Yesu ju Galaliya. 44[Sɛ Yesu tɩŋtɩŋ tawɩ sɛ Ɩsʋɔ ɔja tana jilima wʋ tɩŋtɩŋ wʋ dɩɛ naŋ ŋ.] 45Gʋ Yesu tala Galaliya na, Galaliyatina lɩɛ ɩ dʋ. Ba na ŋii wʋ yɩɛ Yerusalem dɩɛ naŋ na kpiniŋ saŋa gaa baa di nyiŋi asadi adiya di, akala takɩɛ baa gba ba cha ba wɩɛ dɩmaŋ.
46Sɛ Yesu ti bɔrɛ ju kana dɩɛ gaa ga wɩɛ Galaliya tibi dʋɔ, diele gaa wʋ cha mʋ lɩŋ bɩrɩŋsɛ wayɩŋ sʋlʋŋ na. Na bɩnɛ wʋrʋ wʋŋ wʋ a tʋŋ juorigbɩɛ na cha wʋ wɩɛ dɩmaŋ wʋ bu baalɛ jaŋ a kili wʋ duwei Kapeniyum dɩɛ naŋ. 47Gʋ baalɛ wina nyii gʋ Yesu lɩɩ Yudiya kɔŋ Galaliya na, wʋ kɔŋ wʋ jaŋ gaa sʋlʋ ɩ sɛ wʋ n kɔŋ gaa chɔ wʋ bu baalɛ jaŋ wʋŋ wʋ a ja wʋ a sɩŋ na.
48Sɛ Yesu tawɩ ɩ sɛ,<<Nafʋɔ ɩŋ na adaŋgana daasɛ na mamachi na, ɩɩ lɩɛ di i.>>
49Sɛ bɩnɛ wʋŋ wʋ a tʋŋ juorigbɩɛ na tawɩ Yesu sɛ, <<Kpaŋjuo, kɔŋ na dɩɩ ju pɔɩ na mabu wʋŋ a sɩŋ.>>
50Sɛ Yesu lɩsɛ ɩ nʋɔ sɛ, <<Pala, n bu baalɛ jaŋ wʋŋ aja yu nkpa.>>
Sɛ baalɛ wʋŋ lɩɛ Yesu wɩɛ ŋii di sɛ wʋ lam.
51Gʋ baalɛ wʋŋ dɔŋ na gbɩɛ wʋ a ju na, wʋ jaŋina wʋ tʋmɩra barɛ sɛ ba tawɩ ɩ sɛ n bu wʋŋ yu alaŋfiya. 52Gʋ wʋ tasɛ ba saŋa gaa wʋ bu wʋŋ yu alaŋfiya na, sɛ ba tawɩ ɩ sɛ, <<Lʋm gaa yela ɩ daŋda wiita karafɩɛ garɛ saŋa.>>
53Sɛ wʋ juo wʋŋ jiŋ gʋ dɩmʋŋ saŋa gana naŋ sɛ Yesu tawɩ ɩ sɛ, <<N bu wʋŋ aja yu nkpa.>> Dɩmʋŋ dʋɔ wʋ na wʋ waa dʋɔtina kpiniŋ lɩɛ Yesu di.
54Gʋ Yesu lɩɩ Yudiya kɔŋ Galaliya na, ŋina n nyina adaŋgana daasɛ bʋlatɛ ŋii wʋ yɩɛ.
2025 Ghana Institute of Linguistics Literacy amp Bible Translation