Mateus 6
6
Lo abaŋoi
1Dab anau, nami nauknauk tamolpain denasinenoi noadinnen so anau mon. Dab so anaumap aŋnami didnen Temami izinnen naon teaboi. 2Mewoi o lo abaŋ unauwoimap o naonen tauz so uwi mon, malabiabgaz medaeŋablon dallak mai denaudime egin, tamolpain biŋadin dibisa menen, Malik, ŋa aŋ ŋepaiaŋ, i nadin naon deŋalelak. 3Tea, o lo abaŋ unaumap oina nima ŋas oina nima waŋ abaŋ inauime so iloŋoi.#Mat 25:37–40; Rom 12:8 4Meginpe oina lo abaŋ kukumlon unauwoi. Oina Tama kukumlon nasiime i naon panowoi.
Godoanekoi
5Aŋ ogodoanimap aŋ malabiabgaz egin so anauwoi, me i medaeŋablon dal sedageklon ditiuzpa dogodoaniwoi dimatdime, tamolpain diloi mewoi. Malik ŋa aŋ ŋepaiaŋ, i mug nadin naon deŋalelak. 6Tea, o godoanimap, galuŋ ilonnen udulap funatip, oina Tama kukumlon madoime i maip godoani. Oina Tama kukumlon nasiime i o naon panowoi.#Kiŋ II 4:33
7Godoaneklon aua so belabol mon, gobgaz denaudime egin. I ladin ibolime azu gauz dibolmap auadin dab panip niŋon deŋalewoi.#Jes 1:15 8Mewoi aŋ i egin so anauwoi, nami Temami tinimi inan abaŋ idusanen aŋalewoi aŋ so ogodoanimap i mug iloŋime.#Mat 6:32 9Mewoi aŋ egin egodoaniwoi: Amnama Mam, o didlon madoume, oina nea gun inauwoi.#Luk 11:2–4 10Oina kagin idu isowoi. Oina aua mon uzi paniwoi, didlon egin, megin tanlak mai.#Mat 7:21; Luk 22:42 11Amnama anaŋ nalnen gazomnen o am penamape. 12Amnama aupasek paze idupe, am me nadin maip lama padalime, i am donoama alan. 13Am kibianeklon so duzuma mon, ge abaŋ salanlon titiziama ŋiliama. 14Aŋ tamolpain nadin pezebedanek apaze idumap, nami didnen Temami aŋnami mai paze iduwoi. 15Ge aŋ tamolpain nadin pezebedanek so apaze idutap nami Temami nami pezebedanek mai so paze iduwoi.#Mar 11:25, 26
Udek madonen
16Aŋ udimap aŋ malabiabgaz egin so anauwoi, i noadin mimio, i dudig demadodime me tamolpain dab depaniwoi noadin buliime. Malik ŋepaiaŋ, i nadin naon mug deŋale.#Jes 58:5–9 17Ge o, o udip mademap oina gate gazeŋlon bubunip nao flanip, 18o udig madoume me tamolpain so denasiwoi. Tea, Tama melabublon madoime i nasiwoi, meginpe oina Tama me melabublon nasiime i niŋon o panowoi.
Tan abaŋoi
19Aŋ tanlak jes bageunen so anau mon, aben kelelamud abaŋ janiime, ponauoi mai abaŋ debeleaep ponau diabidime. 20Tea, didlon jes bageunen anau, men kelelamud abaŋ so janiime, ponauoi mai abaŋ so debeleaep ponau diabidime.#Mat 19:21; Luk 12:33, 34; Kol 3:1, 2 21Aben oina jes ienime, melak oina bube mai ienoi.
22Tinin inan sul me malan. Mewoi oina mala gauaimap tini daŋan lelaman fuamoi.#Luk 11:34–36 23Ge oina mala salantap oina tini daŋan mafuz fuamoi. Mewoi sul o ilolon ienime me mafuz panimap, mafuz me ujan, tabolnen tea.
24Tata gaten azugen biadin palunen so iloŋ. I ta zezeŋanimap ta ilon paniwoi, teatap i tawoi imatoi, ta meselaniwoi. Aŋ Anut tan biauŋ mai biadin apalunen tea.#Luk 16:9, 13
Tannen abaŋoi jaeŋ so sufutanadoi
25Mewoi ŋa aŋ ŋepaiaŋ, aŋ nami madoknenoi jaeŋ so sufutanaŋoi, abaŋte aniwoi, abaŋte miliwoi, tinimioi mai aŋ abaŋte unulawoi. Tinin inan bas me anaŋ so beleŋaniime tat, tinin mai jamel so beleŋaniime?#Fil 4:6; Pet I 5:7; Tim I 6:6; Heb 13:5 26Ma did paenlon adeleŋanape, i abaŋ so depaedime, so dezabedime, badlon so didizdime, ge nami didnen Temami futuaime. Aŋ i kin gauz so abeleŋanaame?#Mat 10:29–31 27It aŋ leŋamilon jaeŋ sufutaneklon siben inan madoknen tanlak niman sukusuk taimon batenen iloŋime? 28Aitoige nulaknenoi jaeŋ sufutanaŋge amadoame? Fatulon gog adeleŋanape, i disa gauai. Uzat wagai so denaudime, so delelanidime. 29Ge me ŋa aŋ ŋepaiaŋ, Solomon inan kubel daŋanlon enen tata egin jamel so izalelak.#Kiŋ I 10:4–7 30Ge Anut i fatu inan biab me gazomnen diendime, ge boŋanip saplon detanidime, megin nule panimap, i me nenazip aŋ mai jamel nula panaŋoi, o gadon, lamilon maliknen mitin aŋ. 31Mewoi jaeŋ so sufutanaŋpa abol mon, Abaŋte taniwoi, abaŋte timiliwoi, abaŋte tipilawoi. 32Abaŋ e daŋanoi gobgaz jaeŋ ifuime, nami didnen Temami iloŋ aŋ abaŋ me aŋalemap mon amadonen aloŋ. 33Malanmalan aŋ Anut kaginoi, inan taoz niŋon mai mon jaeŋ sufutanaŋpa atozoi, meginpe aŋ abaŋ aenta mai aŋalewoi.#Rom 14:17; Kiŋ I 3:13, 14 34Mewoi boŋanipoi jaeŋ so sufutanaŋpa amade mon, boŋanip i siben inan jaeŋ sufutanek ŋalewoi. Nal ta inan salan idumap me nal mewoi iduse.#Kan 37:4, 25; Mat 6:11; Ekso 16:19
Currently Selected:
Mateus 6: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
Mateus 6
6
Lo abaŋoi
1Dab anau, nami nauknauk tamolpain denasinenoi noadinnen so anau mon. Dab so anaumap aŋnami didnen Temami izinnen naon teaboi. 2Mewoi o lo abaŋ unauwoimap o naonen tauz so uwi mon, malabiabgaz medaeŋablon dallak mai denaudime egin, tamolpain biŋadin dibisa menen, Malik, ŋa aŋ ŋepaiaŋ, i nadin naon deŋalelak. 3Tea, o lo abaŋ unaumap oina nima ŋas oina nima waŋ abaŋ inauime so iloŋoi.#Mat 25:37–40; Rom 12:8 4Meginpe oina lo abaŋ kukumlon unauwoi. Oina Tama kukumlon nasiime i naon panowoi.
Godoanekoi
5Aŋ ogodoanimap aŋ malabiabgaz egin so anauwoi, me i medaeŋablon dal sedageklon ditiuzpa dogodoaniwoi dimatdime, tamolpain diloi mewoi. Malik ŋa aŋ ŋepaiaŋ, i mug nadin naon deŋalelak. 6Tea, o godoanimap, galuŋ ilonnen udulap funatip, oina Tama kukumlon madoime i maip godoani. Oina Tama kukumlon nasiime i o naon panowoi.#Kiŋ II 4:33
7Godoaneklon aua so belabol mon, gobgaz denaudime egin. I ladin ibolime azu gauz dibolmap auadin dab panip niŋon deŋalewoi.#Jes 1:15 8Mewoi aŋ i egin so anauwoi, nami Temami tinimi inan abaŋ idusanen aŋalewoi aŋ so ogodoanimap i mug iloŋime.#Mat 6:32 9Mewoi aŋ egin egodoaniwoi: Amnama Mam, o didlon madoume, oina nea gun inauwoi.#Luk 11:2–4 10Oina kagin idu isowoi. Oina aua mon uzi paniwoi, didlon egin, megin tanlak mai.#Mat 7:21; Luk 22:42 11Amnama anaŋ nalnen gazomnen o am penamape. 12Amnama aupasek paze idupe, am me nadin maip lama padalime, i am donoama alan. 13Am kibianeklon so duzuma mon, ge abaŋ salanlon titiziama ŋiliama. 14Aŋ tamolpain nadin pezebedanek apaze idumap, nami didnen Temami aŋnami mai paze iduwoi. 15Ge aŋ tamolpain nadin pezebedanek so apaze idutap nami Temami nami pezebedanek mai so paze iduwoi.#Mar 11:25, 26
Udek madonen
16Aŋ udimap aŋ malabiabgaz egin so anauwoi, i noadin mimio, i dudig demadodime me tamolpain dab depaniwoi noadin buliime. Malik ŋepaiaŋ, i nadin naon mug deŋale.#Jes 58:5–9 17Ge o, o udip mademap oina gate gazeŋlon bubunip nao flanip, 18o udig madoume me tamolpain so denasiwoi. Tea, Tama melabublon madoime i nasiwoi, meginpe oina Tama me melabublon nasiime i niŋon o panowoi.
Tan abaŋoi
19Aŋ tanlak jes bageunen so anau mon, aben kelelamud abaŋ janiime, ponauoi mai abaŋ debeleaep ponau diabidime. 20Tea, didlon jes bageunen anau, men kelelamud abaŋ so janiime, ponauoi mai abaŋ so debeleaep ponau diabidime.#Mat 19:21; Luk 12:33, 34; Kol 3:1, 2 21Aben oina jes ienime, melak oina bube mai ienoi.
22Tinin inan sul me malan. Mewoi oina mala gauaimap tini daŋan lelaman fuamoi.#Luk 11:34–36 23Ge oina mala salantap oina tini daŋan mafuz fuamoi. Mewoi sul o ilolon ienime me mafuz panimap, mafuz me ujan, tabolnen tea.
24Tata gaten azugen biadin palunen so iloŋ. I ta zezeŋanimap ta ilon paniwoi, teatap i tawoi imatoi, ta meselaniwoi. Aŋ Anut tan biauŋ mai biadin apalunen tea.#Luk 16:9, 13
Tannen abaŋoi jaeŋ so sufutanadoi
25Mewoi ŋa aŋ ŋepaiaŋ, aŋ nami madoknenoi jaeŋ so sufutanaŋoi, abaŋte aniwoi, abaŋte miliwoi, tinimioi mai aŋ abaŋte unulawoi. Tinin inan bas me anaŋ so beleŋaniime tat, tinin mai jamel so beleŋaniime?#Fil 4:6; Pet I 5:7; Tim I 6:6; Heb 13:5 26Ma did paenlon adeleŋanape, i abaŋ so depaedime, so dezabedime, badlon so didizdime, ge nami didnen Temami futuaime. Aŋ i kin gauz so abeleŋanaame?#Mat 10:29–31 27It aŋ leŋamilon jaeŋ sufutaneklon siben inan madoknen tanlak niman sukusuk taimon batenen iloŋime? 28Aitoige nulaknenoi jaeŋ sufutanaŋge amadoame? Fatulon gog adeleŋanape, i disa gauai. Uzat wagai so denaudime, so delelanidime. 29Ge me ŋa aŋ ŋepaiaŋ, Solomon inan kubel daŋanlon enen tata egin jamel so izalelak.#Kiŋ I 10:4–7 30Ge Anut i fatu inan biab me gazomnen diendime, ge boŋanip saplon detanidime, megin nule panimap, i me nenazip aŋ mai jamel nula panaŋoi, o gadon, lamilon maliknen mitin aŋ. 31Mewoi jaeŋ so sufutanaŋpa abol mon, Abaŋte taniwoi, abaŋte timiliwoi, abaŋte tipilawoi. 32Abaŋ e daŋanoi gobgaz jaeŋ ifuime, nami didnen Temami iloŋ aŋ abaŋ me aŋalemap mon amadonen aloŋ. 33Malanmalan aŋ Anut kaginoi, inan taoz niŋon mai mon jaeŋ sufutanaŋpa atozoi, meginpe aŋ abaŋ aenta mai aŋalewoi.#Rom 14:17; Kiŋ I 3:13, 14 34Mewoi boŋanipoi jaeŋ so sufutanaŋpa amade mon, boŋanip i siben inan jaeŋ sufutanek ŋalewoi. Nal ta inan salan idumap me nal mewoi iduse.#Kan 37:4, 25; Mat 6:11; Ekso 16:19
New Testament published by the British and Foreign Bible Society in 1960. Genesis published by the Australian Bible Society in 1971.