San Lucas 1

Lucas icaite lridanalri inacuapanna

1Pjia cacunaite Teófilo, aima inaiki ikjaidatacape idanaca nanacu njajĩ Jesús inaitjalri acadanacutuani wainai, 2cayujĩ nacadaa capishu waajĩ njajĩ icapacapen natjishu, njajĩ Dios icadalri irsu ljia idejikjeti nacaite carru lrinacu ljiajĩ yacuti lriinita carrum lricanantaca. 3Pjia cacunaite Teofilo, nucaite pjia, cacu njua nainai njajĩ inaiki yajicapepia Jesús inai lriwiacanacu pia lricanantaca, niini nuajĩ ajadalrica njajĩ jiyapalriwa lrinacu. Cayushupa nudanautsa pirsu cayujĩ ljiyapa capishu lrinacu lriinita carrumitte. 4Nudana pirsu paperra lricu ljiajĩ, pianji carru matsia ajãdalrica ljiajĩ nacaiterri pirsu Jesús nacu.

Pada angele icaiteca Juan Bautista nacu jicuca ipjeyan

5Herodes#1:5 Ljia Herodes-ca ljiajĩ pada tsakja lriuya ljiajĩ naderripia iikjaolre Jesús ljiadaa pia deepi nainucan. caoljepia italricanata lrinacu ljiajĩ jipai lriipitana Judea, naufaacawa lricu njajĩ irraelitanai, niini pia apada sacerdote lriipitana Zacarías. Sacerdote Abías inakjuitedalrica ljiajĩ Zacarías. Njite lriinu, Elizabeth darru iipitana, rsua tsakja lrinakjuitedalricanu ljiajĩ sacerdote Aarón. 6Ljiajĩ Zacarías njite lriinu Elizabeth, naufaa matsia cayujĩ lricaite capishu ljia Dios yacu nadananda, njeepa lriacu matsia njite nanaitja cayujĩ Dios inaa capishu nanaitjaca njajĩ inaiki. 7Currim narsuca neenipe, ima rsuajĩ Elizabeth currim pia rutaita keenipecanu, njite pekipenaikena tsakja njajĩ yamadade.

8Apapia naculje, njaapucu cadanacu jimao idejĩca njajĩ sacerdotenai Zacarías idejirri inai, Zacarías inaitja nadejĩcalre njajĩ sacerdotenai Dios iipana lricu. 9Njajĩ sacerdotenai narsu pia pada nanaitjanda mana, niini naniwanaca Zacarías itupitakjetishu, ljiewacarru Dios iipana lriculje lriipitana santuario#1:9 Santuario: Lriemawa lriwawa lriculje ljiajĩ Dios iipana. Naanjerri tsakja pawalje matsiadalri. lrimjãitacarru lritaipe pumenidalri#1:9 Lritaipe pumenidalri: Lricañjataca ljiajĩ natatjanda njajĩ itatjacape Dios iinai. Nacadaa pada Sacerdote inaitja papiatsa pada año nacu. Lricaite shupa cayucani, natatanda Dios Nacadaa pada sacerdote . 10Lriwiaca lrimacao ljia pumenidalri, aima inaiki itatjacape Dios inai pantinumalje. 11Ljiadanacu pada Dios i-angẽlete imutu lriikjaolre, lriemacawa lriyekemjete ljiajĩ lrimjãita carruda nacu lritaipe pumenidalri#1:11 Namjaita ljia lritaipeti pumenidalri (incienso) altar nacu Nanaitjanda mesapa shudalri jiipadashu. . 12Zacarías icapacadanacu ljia angẽle, currim lriajĩ cuanca lriaco njite lrifiuwa pekirritsa. 13Mitsa angẽle yacu Zacarías irsu:

—Mafiutsawa, ima Dios jimica cuanca pitatjaca lriinai. Cayushupa rsua piinu Elizabeth, keenipecautsa pirsunu, njite picadaotsa lriipitana Juan.#1:13 Juan: Ljiajĩ ibautizalriutsa Jesús pekirricadanacuenani, lriinitacarru lridejĩca Dios idejĩcalrerricu. 14Lricatimatautsa shaa pekirritsa, njite catima tsakjautsa njajĩ inaiki jicucapuani, 15ima cacunaite cautsani Dios irsu. Curriutsa lritaita lrirraca jaicutjeda yaana capuanjai, currim tsakja yalrakji, njite Espíritu Santo watsa yaajĩ lrinacu atee lripjeya tua jiicucani. 16Lricadaotsa jurre irraelitanai idiaotsa yuma Dios ljiajĩ Natalricana. 17Fanirri Dios imenacanda ipjeyadacani, lrirsuatsa ljiida lricayushu pia ljiajĩ inuparrutacaita Elías. Lricadaotsa namatsietacawa neenipe yaapiya njajĩ njanirrinai. Lricadautsa mjepacaperri icapa naicawa njajĩ inaiki inaitjacape cayujĩ Dios yuma capishu. Cayuatsa lrimatsietaca njajĩ inaiki nataita carru nawapaca matsia ljiajĩ Dios imenacanda.

18Njite Zacarías yacu lrirsu ljia angele:

—¿Cuajĩ tsakja nutaita nuanjica ajãdalrica ljiajĩ picaiterri nursu? Ima pekirrina njua njite pekirruetsakja rsu nuinu warsucarruntja weenipe.

19Njite angele shepani:

—Icatsa Gabriel-ca njua,#1:19 Ljia minitsa ljia Gabriel pacapalri a: Dn 8:16; 9:21 yeemacada Dios ipjeyalje nudeejicarru lrirsu. Ljiatsa imeenaca njua cacucarru njua pirsu njite nucaite carru pirsu ljiajĩ yacuti matsiadalri. 20Niini panaya curricapua pjiepa ljiajĩ yacuti nucaiterri pirsu, maacu cautsa pjia. Kjerrekenaotsa jiicu ljia pienipe pidia tsenakjautsa cacu pjia ima ljinana yucakena ljiajĩ yacuti nucaiterri pirsu.

21Cayucadana, njajĩ inaiki pemaljeperri nawapa nacapa Zacarías idiaca imutua naikjaolre, njite natatja narsuwaca cuadaca uwiacalretsa Zacarías santuario lricu. 22Zacarías idiacadanacu imutu naikjaolre, currinatsa lritaita cacucani. Cayushupa njajĩ inaiki papienirri njajĩ lricapaca pada macapacanadalri, ima lriñjataketsa narsu lricaapishu. Cayuminiitsani. Currinatsa lritaita cacucan.

23Panjaa cayamina lrideejica Dios ipana lricu, paana jimao carru, Zacarías idiawa lripanalriculje. 24Ljiapudamjite Zacarías idiaca lriipana lriculje, rsuajĩ lriinu Elizabeth ruaajĩ kewedan canu, njite cinco keerri currica rumutua ruupana lrikjuite. 25Icamitsa rucaite mana:“Dios jita nuuya ljia ipaimanti menipecapua njua”.

Pada angele icaite María irsu Jesús nacu jicuca ipjeyan

26Elizabeth irsupia kena seis keerri ruwedan nacu, Dios imeenaca ljiajĩ angele Gabriel Nazaret riculje, pafe yacalreda jiipai Galilea ricuda, 27ruikjaolre rsuajĩ apama yempetitua mjeyapacadarrutua atsia inai ruipitana María. Rsuajĩ yempetitua rursupiakena ruinirriupe lriipitana José, lrinakjuitedalrican ljiajĩ talricanati David. 28Njite lriucawa ljia angele María yuufalri nirse, lriacu rursu:

—¡Cuampja! Catima Dios icapaca pjia. Lriuma lrinaitjaca pirsu matsia.

29Currim María yaajĩ cuancanu rsumicadanacu njajĩ yaacuti angele itjatacadanacunu currim capoa ruajĩ cuadaca lritatja cayunu. 30Niini angele yacu María irsu:

—Mafiutsawa, ima catimaca Dios icapaca pjia. 31Kewedancautsa pjia. Atsiawatsa pienipe, picadawatsa lripitanao Jesús. 32Padautsa atsia caacunaadalri, ljiajĩ njanjirriutsa Lrienipeca ljiajĩ Dios Yenunrsedalri pja pjiumi yuuya. Dios icadautsa talricanati carruni, cayujĩ talricanaticapishu pia ljiajĩ lriferrinaipemi italricana David, 33lritalricanata cautsa caidalriwetsa nanacu njajĩ irraelitanai, njite lritalricanaatacawa curriutsa lriwayacacao.

34Njite María yacu angele irsu:

—¿Cuajĩntja ljiyapacao ljiajĩ picaiterri nursu? Ima mjeyapacadarrutua atsia inai njua.

35Angele yacu María irsu:

—Espíritu Santo yurrucu cautsa pinacu, njite ljiajĩ Dios Yenunrse dalri pja pjiumi yuuya lriñampa cautsa pjia lriajĩkje kjaidádalrishu. Cayushupa ljiajĩ yempeti pirsulriutsa njajicautsani ljiajĩ Dios Yeenipe Mamatsicanadalritsa. 36Rsua tsakja rsuajĩ pikitsidua Elizabeth rsuena seis keerri ruwedan nacu pekirru cadanenanu, rsuajĩ nacaitependa menipedarrumcanu. 37Currim pacapa ljiajĩ curridalritsa Dios itaita inaitjaca.

38Niini María yacu angele irsu:

—Dios irsudarruca njua, Numinalri inaitja nuinai cayujĩ lriuma capishu.

Icamina lriaca ruuya ljia angele.

María yaa icapa Elizabeth iderse

39Cacucayami ljia angele María irsu, icamina rua rucapa Elizabeth yufalri nirse, pacua yacalre tsucue jipanalrima ricu Judea ijipaitena lriculje. 40María yuucacadanacu shewawa Zacarías ipana lriculje catima rutatjaca rsuajĩ Elizabeth. 41Elizabeth jimi cadanacu María itatjacanu, canani kjaida ljiajĩ Elizabeth yeenipe ruwawa lricu, njite Espíritu Santo yaajĩ Elizabeth nacu. 42Njite kjaida cacucanu, ruacu María irsu:

—Matsia pjaca Dios inaitjaca pirsu nauya nja paana inaitjepe, njite matsia tsakja lrinaitjaca lrirsu ljiajĩ yempeti pjipalriutsa. 43¿Midarruntsa njua runucarru rucapa nuikjaolre rsuajĩ nu-Minalri jidua? 44Ljiadanacutsa njumicadanacu pitatjaca njua, ljiajĩ yempeti nuwawa lricuda cananicani catimacapuani. 45Pjiepacapua cayucautsa ljiajĩ Dios icaiterri pirsu niini lrinaitjautsa pirsu matsia.

46Njite María yacu:

"Nua matsiadalri Dios irsu nucaolreshu;

47catimaca njua Dios inai ljiajĩ iyumjetacada njua.

48Lricapacapua njua, lrirsudarru kjenadarrutsa,

panaya nakjuite njajicautsa njua njajĩ inaiki Dios inaitjanda irsu matsia.

49Ima ljiajĩ Kjaidadalri Pja Pjiumi Yuuya, lrinaitja jurre matsiaperri nuikjaote.

¡Ljiajĩ njajirri Mamatsicanadalritsa!

50Kjenaa Dios icapa

narsu njajĩ inaiki ipeyucapen.

51Ljiida kjaidadalrishu,

lriñeeta nawaopiakje yuuya ljiajĩ naumanda nanaitjaca nja padalreperrim,

52ljitapia natalricanatacawa lrikjuite njajĩ talricanati kjaidaperri

njite lricada njamao carru njajĩ namenatanpem.

53Lricada jurre nananiwa narsu njajĩ caiwi perri irsu maawitacai,

njite njajĩ canaaniperri lrimeenaca nadiao nacaapi yaapiya tsa.

54Lrikitsindata njajĩ lrirsuperri irraelitanai,

njite kjena lricapaca narsu caidalritsa.

55Ima cayupia lricaiteca narsu njajĩ napjeyadapem pia,

Abraham irsu njite pjiumi njajĩ lridakenai tsakja".

56María yuufaa Elizabeth iinai madalripi keerri, njite ljiapudam rudia tsenakja rupana riculje.

Jiicuca Juan Bautista

57Elizabeth jinana yucakenao rsupacarru ruenipe, niini rsupaca ruenipe aatsia. 58Pjiumi njajĩ rucudapiperri yuufacao njite njajĩ rukitsiñape njemicadanacu ljiajĩ Dios inaitjalri rursu naawa nacatimacacacarrua ruinai. 59Ocho jalredauca nacu jicu cayami ljiajĩ kirraitalri, ljinirri njite ljidua nadeeni nakjenanatacarrun. Njajĩ nakitsiñape, njite njajĩ yuufacape nacudapi nauma nacadaca lriipitana ljinirri shutsa, Zacarías. 60Mitsa ruacu rsua ljidua:

Currina. Juan watsa lriipitana.

61Njite nacu rursu:

—Curricadekja pacapa pikitsiñape nakjuite irsucada iipitana cayu.

62Njite nacapi shutsa natjata njemio ljinirri cuandalrica lriuma lricadaca lriipitanao ljia kirraitalri. 63Niini Zacarías shepana lricapishu tsakja nadeecarru lrirsu jaicuita lridanacarru lrinacu, niini lridanaca: “lriipitana Juan”. Njite njajĩ inaiki maacum neemacao. 64Ljiapudamjitetsa cacuca tsenakja Zacarías, icamina lriaca matsiadalri Dios irsu. 65Pjiumi njajĩ nacudapipe yuufacao currim naajĩ cuca nacaite njite njajĩ yuufacape jiipai jipanalrima Judea ricu nacaitepe lrinacu ljiajĩ jiyapalriu. 66Pjiumi njajĩ jimicape lrinacu ljiajĩ jiyapalriwa natatjaacawa narsuwacatsa: —"¿Cucaotsapa ljiajĩ yempeti?" Ima Dios catsa lriinai lriwapa carruni.

Zacarías irsuca yacuti

67Espíritu Santo yaajĩ Zacarías inacu, icamina lrimutuetaca yacuti icaitecada lrinacu ljiajĩ inulriutsa, lriacu:

68"Waa matsiadalri Dios irsu, naalri irsu matsia njajĩ irraelitanai,

lrinu capoa waikjaolre faa lrinaikite, lriyumjetacarru faa fepundape yuuya njite wamatsicana yuuya tsakja.

69Lrimeenaca warsu apada Iyumjetacaita kjaidadalri,

lrirsudalri David inakjuite dalri.

70Icatsa ljiajĩ Dios icaitenda pia uupi

nanumalrikjuite njajĩ ljienitampe lrirsuwawa inuparrutacape:

71Lriyumjetacarru faa fepundape yuuya

njite nauya njajĩ kerruaperri icapaca warsu,

72kjenapia lricapaca narsu njajĩ waferrinaipem

njite currica lrimaudaca lriuya ljia yacuti lrinaitjalripia naapiya.

73Icatsa ljiajĩ yacuti Dios icaiterripia

lrirsu ljia waferrim Abraham:

Lricadaaca faa

74waufacarru mafiucanatsa,

teecu fepundape yuuya,

wadejicarru lrirsu

75mamatsicanaatsa cayujĩ lriuma capishu,

waofacadanacutua jalredaucalricu.

76Njite nucaite cuancautsa pinacu pjia nuenipe tsudalri tua,

njajiutsa cacudanadalrica pjia lrinakjuitedalri ljiajĩ Dios Yenunrsedalri

ima piacautsa wa-Minalri ipjeya

pimatsietacarru ljiajĩ inipu#1:76 Inipu: Lricaite shupa lrimatsieta carru nacaolre njajĩ inaiki nacuadata carru ljiajĩ inulriutsa naikjaolre. lrinuca ipjeya.

77Picada carruatsa njajĩ nja lrinaikite

lrimaudaca cautsa namatsicana yuuya

lriyumjeta carruna.

78Ima ljiajĩ Dios, wanda irsu matsiadalri, kjenaa capua lricapa warsu,

lrimeenaca warsu eenu lrikjuite lricamarrana ljiajĩ walridalri jecuapi.

79Lricanacarru nanacu njajĩ yuufacape

cadaocawerricu njajĩ mayamicalri idanapiam yapjiteperri,

lricanantacarru tsakja faa cuancarru paacao

lrirricuda ljiajĩ inipu pamawadacacawa lricu".

80Ljiajĩ yempeti lritawiñawa njite kjaida tsakja Dios yajikje nacun, njite lriufa jalrapuculrirricu kjerrekena lriinita lridejicalre catjinaadalri irraelitanai ipeculricu.

Currently Selected:

San Lucas 1: kpc

Highlight

Copy