Mat 9
9
1Kəni ka, rɨvɨn lə niko ɨsuas ker mevkafugɨn lə tehe mɨva iman ikɨn.
2Kəni ka, airo ru, kamaros lə rɨpɨrɨp marva iərəmim ker takrɨ nɨpəlakɨn rɨmɨmɨs. Nian Iesu ramap natətean thɨnilar, ramɨni to iərəm takrɨ nɨpəlakɨn rɨmɨmɨs məma, “Nərɨk, ɨsəgɨnan, təvhaga tat taham kɨnositha.”
3Kəni huaihue am nətɨkun nɨvin taha Noua kəmani lə nɨkinilar məma, “Wus ɨk ramol am tanɨpɨn lə Ughin lə nakharan tahan.”
4Mɨro Iesu rhinatin nɨkinilar, mamɨni məma, “?Rɨtol nɨkimiar rakamho nar rɨtat lə nouanənauimiar?
5“?Mɨro-in-ka rɨmərɨk ɨpɨk to kɨni məma, ‘Təvhaga tat taham kɨnositha’, o to kɨni məma, ‘Ərmig maliwək’?
6“Mɨro iəma tɨnakarhinatin məma Nərɨ Iərəmim ramos nɨsanənan lə tən ɨk to nosithean təvhaga tat.” Kəni makhar kəm iərəm takrɨn rɨmɨmɨs mɨni məma, “Ərmig, mos nɨmhaua taham, mɨvɨn imam ikɨn.”
7Kəni ramərmig mamiər mɨvɨn iman ikɨn.
8Nian nahuto kamaip nar ɨk kamaiwɨr, mɨmanivivi Ughin iərəm rɨnofən nɨsanənan mealan kəm nərəmim.
Iesu ramaunin Matiu məma tɨroatisɨgin
(Mak 2:13-17; Luk 5:27-32)
9Nian Iesu ramiər ikɨn an mɨvɨn, ramap iərəmim ker nətɨgɨn Matiu rakawota ikɨn kamos takɨs ikɨn. Kəni ramɨni ton məma, “Oatisɨgin Io.” Kəni ramərmig mamoatisɨgin.
10 #
Luk 15:1,2 Kəni ka, nian Iesu ramawota to naugɨnan ima Matiu, airo ru, nərəmim ripɨr taha nosan takɨs ne nolɨtat pɨsɨn min ripɨr kamarva maiwota-uas ilar min Iesu ne nərəmim min tahan.
11Kəni nian Farɨsi min kamaip, kəmani to nərəmim min tahan məma, “?Rɨtol Iətɨkun thəmiar ramaugɨn-uas ilar min nərəmim min taha nosan takɨs ne nolɨtat#9:11 Farɨsi min kamailkut ɨpɨk məma takarhiapatin taktakrɨn min pətɨm lə Noua taha Moses, kəni ilar kəmani nolɨtat lə nərəm kamarol tanɨpɨn am mɨsailkutan kəma ilar. pɨsɨn min?”
12Mɨro nian Iesu ramɨro, ramɨni to ilar məma, “Nərəm kameisanən am kɨsarolkeikean tokta, mɨro nərəm nɨmɨsan ramol ilar kamarolkeike.
13 #
Mat 12:7;
Hos 6:6
“Mɨro pəs kamiar tɨnakarɨn marhinatin nɨpəlakɨ nakharan ɨk taha Ughin, iərəm rɨni məma, ‘Nar iərəm Io iakolkeike in nasakinan, rɨsolan məma nuhuasɨgan.’ Mɨro-in-ka Io iɨsvean məma sakaunin nərəm kameituatu, mɨro iɨva məma sakaunin nolɨtat min məma takarvhin nɨkinilar to təvhaga tat thɨnilar.”
Kamɨrhapɨk to Iesu, məma rɨtol rɨsəpəsan naugɨnan məma tɨrəhuak
(Mak 2:18-22; Luk 5:33-39)
14Kəni ka nərəmim min taha Jon kamarva ton mɨmani məma, “?Rɨtol kamar min ne Farɨsi min iakamaipəs naugɨnan nian min ripɨr məma sakeihuak, mɨro taham nərəmim min kɨsarolan məkləlan?”
15Mɨro Iesu ramɨni to ilar məma, “?Nian iəroue ramarɨk əna ilar thaniel min, rɨtol ilar takairo rɨtat? Mɨro nian tɨrɨpva əna məma tɨpositha iəroue to ilar, kəni ka tɨpaipəs naugɨnan.
16“To iərəmim ker rɨsləsan takrɨ napən vi ker mɨtilpən lə napən oas, mɨro-in-ka takrɨn vi tɨriər mɨn mamhapu akɨn napən oas.
17 “Kəni ne to nərəmim kɨsarvipənan waen vi lə nɨvigɨnar#9:17 Lə nian an nərəmim kamarol potəl lə nɨvigɨ nəni o sipsip. oas. Mɨro-in-ka to kɨparol, nɨvigɨnar min takarmɨte marɨtat, ne waen tɨraihiatɨv. Mɨro waen vi takvipən lə nɨvigɨnar vi, kəni ilau kɨtən takuɨmɨl ɨvt.”
Iesu ramol ɨvt pɨravɨn ker lə nɨmɨsan tahan, mamol pɨrɨsuas ker rərmig lə nɨmɨsan
(Mak 5:21-43; Luk 8:40-56)
18Nian rɨmamɨni əna nar min ɨk to ilar, airo ru, iərəm asul ker rɨva mamsin nowulɨn ton, mamɨni məma, “Nərɨk pɨrɨsuas rɨnɨmɨs am ka touek, mɨro pəs tɨnakva məlhau nəlɨmɨm lan məma tɨrɨmiuh.”
19Kəni ka Iesu ramərmig mamaiuatisɨgin, ilar tahan nərəmim min.
20Kəni ka, airo ru, pɨravɨn ker rakamɨs i nɨmɨsan taha nɨpɨravɨn mɨroatɨs nuw kətilɨm-kətilɨm-mɨkiu (12) rɨva lə nɨməta Iesu miap nihievɨn napən tahan,
21mɨro-in-ka ramɨni lə nɨkin məma, “Takəma sakiap am napən tahan, səkva mamɨsanən.”
22Mɨro Iesu rameitait, kəni nian ramap ramɨni ton məma, “Nərɨk, ɨsəgɨnan. Natətean taham rɨnol ik nakɨsanən.” Kəni huaihue am pɨravɨn rɨva mɨsanən.
23Nian Iesu rɨva ima lə nima taha iərəm asul, mamap nərəm kamahil nauvhal to iərəm rɨnɨmɨs ne nahuto min kamaisak əpomh,
24In ramɨni to ilar məma, “Ariər, mɨro-in-ka pɨrɨsuas rɨsɨmɨsan, mɨro ramapɨl am.” Mɨro ilar kamailhiapnin.
25Mɨro nian kɨnhaliatɨv nahuto, in rɨvɨn ima mos nəlɨmɨ pɨrɨsuas, kəni ka ramərmig.
26Kəni kamavsitoin nar ɨk ikɨn min pətɨm lə tən an.
Iesu ramol ɨvt iəmnou mil kiu
27Nian Iesu ramiər ikɨn makavɨn, iəmnou mil kiu kauoatisɨgin, mamuasak əpomh mamuɨni məma, “Ik Nərɨ Tevɨt, pəs tɨnəkasakin kamlau.”
28Kəni nian rɨnva ima iəmnou mil kamiəva ton. Kəni Iesu ramɨni to ilau məma, “?Kamilau nakauɨni nɨpərhienan lak məma iakɨsanən to nolan nar ɨk?” Ilau kauɨni ton məma, “Əwəh, Iərəmɨra.”
29Kəni ka ramiap nɨmrɨnilau mamɨni məma, “Pəs tɨpol kəm kamilau mɨ-in-ka-ne natətean thəmilau.”
30Kəni kamuait lə nɨmrɨnilau. Kəni Iesu ramakeike ɨpɨk kəm ilau mɨni məma, “Tɨnɨsuɨniatɨvan to iərəmim ker.”
31Mɨro nian kɨniaiər kamuavsitoin Iesu ikɨn min pətɨm lə tən an.
Iesu ramhaliatɨv nanɨmɨn tat lə iərəmim ker iərəm rɨtɨktɨk nakharan
32Kamiaiər am ka, airo ru, kamləs kɨva ton iərəmim ker iərəm rɨtɨktɨk nakharan, nanɨmɨn tat ker ramalɨmɨn in.
33Kəni nian Iesu rɨnhaliatɨv nanɨmɨn tat, iərəmim an rɨnamakhar. Kəni nahuto min kamaiwɨr, mɨmani məma, “!Kɨsapan əna nar ker məklan nian ker lə tən Isrel!”
34 #
Mat 10:25; 12:24; Mak 3:22; Luk 11:15 Mɨro Farɨsi min kəmani məma, “Ramhaliatɨv nanɨmɨn tat min lə nɨsanənan taha Iərəmɨra taha nanɨmɨn tat min.”
Nɨki Iesu ramamha to nahuto min
35 #
Mat 4:23; Mak 1:39; Luk 4:44 Kəni Iesu ramaliwək mamavɨn lə nɨmhaua min ne lauanu min, mamətɨkun lə nimeihuak min thɨnilar, mamavsitoin nakharan ɨvt lə niko taha Ughin, mamol ɨvt nərəmim lə nɨtətan min pətɨm ne nɨmɨsan min pətɨm.
36 #
Nam 27:17; 1 King 22:17; 2 Kron 18:16; Esik 34:5; Mak 6:34 Mɨro nian ramap nahuto min, nɨkin ramamha to ilar, mɨro-in-ka nətakɨnan ripɨr ramol ilar, kamaivɨn-arir, mamaivkɨrin sipsip min iərəmim to napɨvtan ilar rɨka.
37 #
Luk 10:2
Kəni ka ramɨni to tahan nərəmim məma, “Nɨpərhienan, naugɨnan ripɨr lənki nasumən, mɨro nərəmim rɨsuas am məma takarɨn maros.
38“To nar ka, pəs tɨnakeihuak kəm Iərəmɨra taha nasumən məma tɨrhalipən nərəmim ripɨr məma takarɨn maros.”
Iesu ramaunin nərəmim kətilɨm-kətilɨm-mɨkiu tahan
(Mak 3:13-19; Luk 6:12-16)
Currently Selected:
Mat 9: Lenakel NT
Highlight
Share
Copy
Want to have your highlights saved across all your devices? Sign up or sign in
(c) 2023 Covenanter Press - Presbyterian Reformed Church of Australia
