Mat 12
12
1 #
Dut 23:25
Loanian an Iesu ramaliwək apa lə nasumən min lənki wit lə Sapat. Kəni tahan nərəmim min kamaimek, mamairuouɨn mamarɨlh əkmakɨm noua wit mamarkɨn.
2Mɨro nian Farɨsi min kamaip, kəmani ton məma, “Ap ru, nərəmim min taham kamarol nolan iərəm rɨsmatuan to nolan lə Sapat.”
3 #
1 Saml 21:1-6
Kəni ka Iesu ramɨni to ilar məma, “?Tɨrol tat nɨsaivhinan əna nar ka Tevɨt rɨmamol lə nian ramɨmek, ilar nərəm kɨmamairoupən in?
4 #
Lev 24:9
“Məma rɨvɨn ima lə nima taha Ughin mamkɨn pret iərəm kɨnofənitha kəm Ughin, iərəm rɨsmatuan məma in tɨrkɨn, rɨsmatuan mɨn məma nərəmim min kamairoupən in takarkɨn, mɨro in nɨkɨn am nərəmim min taha nuhuasɨgɨnan nar.
5 #
Nam 28:9-10
“?O tɨrol tat nɨsaivhinan əna lə Noua məma lə Sapat min nərəmim min taha nuhuasɨgan ima lə nima taha Ughin kamairkɨlh Sapat, mɨro kɨsarolan nar rɨtat ker?
6“Mɨro iakamɨni to kamiar məma Iərəmim ker ramarɨk ikɨn ɨk iərəm ramapitha nima an taha Ughin.
7 #
Mat 9:13;
Hos 6:6
“Mɨro to nɨparhinatin nɨpəlakɨ nakharan ɨk, ‘Nar iərəm Io iakolkeike in nasakinan, rɨsolan məma nuhuasɨgɨnan’, nɨpɨsarhuapreian nərəmim min iərəm kɨsarolan nar rɨtat ker.
8“Mɨro-in-ka Io Nərɨ Iərəmim, Io iakərəmɨra mɨn lə Sapat.”
Iesu ramol ɨvt nəlɨmɨ iərəmim ker lə Sapat
(Mak 3:1-6; Luk 6:6-11)
9Nian rɨniəritha ikɨn an, rɨvɨn ima lə nimeihuak thɨnilar.
10Kəni ka, airo ru, iərəmim ker a ikɨn nəlɨmɨn rɨmɨmɨs. Kəni kameirhapɨk ton mani məma, “?Rɨmatu məma takol ɨvt til lə Sapat?” Mɨro-in-ka kamarolkeike məma takaros nɨpəg nɨmrɨn ker məma takeitat In ton.
11 #
Luk 14:5
Kəni ramɨni to ilar məma, “?Iərəmim pehe lə kamiar, takəma ramos sipsip ker tahan, kəni ramhavpən lə nouakɨmɨl ker lə Sapat, to rɨshiapatinan mɨləsit?
12“Mɨro iərəmim ramapitha mapitha sipsip. To nar ka, rɨmatu to nolan nar ɨvt lə Sapat.”
13Kəni ka ramɨni to iərəmim ka məma, “Huatuin nəlɨmɨm.” Kəni ramhuatuin, ne nəlɨmɨn rɨnɨvɨt ravkɨr-pənin nɨvtain.
14Mɨro Farɨsi min kamariər marɨn mameikhar-uasin, məma takɨtuarhuapnin.
Iesu In Iolatkokɨn iərəm Ughin rɨmɨni məma tɨrhalipa
15Mɨro nian Iesu rɨnhinatin, ramiər ikɨn an. Kəni nahuto asul min kamairoupən In, kəni ramol ɨvt ilar min pətɨm.
16Kəni ramənhiau ilar məma tɨsaniatɨvan In,
17məma nakharan iəni taha Ughin Aesaea rɨnɨni tɨrva in nɨpəlakɨn, iərəm ramɨni məma,
18 #
Aes 42:1-4
“Aip ru, Iolatkokɨn tahak iərəm Io iamamhpən,
Iərəm keike tahak iərəm nɨkik ragiən ɨpɨk ton.
Sakəlhau Nanɨmɨn Avsim tahak lan,
Kəni In tɨravsitoin nətuatuan tahak lə nɨmrɨ napinəp min.
19 To rɨsətkaugean, to rɨsaun-əpomhan,
To iərəmim ker rɨsɨroan nouian lə suatu min.
20 To rɨsɨrkɨlhan nuig iərəm in kɨmɨrkheik,
To rɨshalapu-ɨpɨsan nɨkəm iərəm rakhamɨna ɨsuas am,
Mɨroatɨs məma tɨrol nətuatuan tahan tɨrɨtiət.
21 Kəni napinəp min takaitəta lə nətɨgɨn.”
Nərəmim nɨvin kəmani məma Iesu ramol nar lə nɨsanənan taha Setan
(Mak 3:20-30; Luk 11:14-23)
22Kəni ka kamarir marva ton iərəmim ker nanɨmɨn tat ramalɨmɨn, in iəmnou, mɨshinatinan məma tɨrakhar. Kəni ramol ɨvt in, mol məma iəmnou an iərəm rɨmɨsakharan ramakhar mamap nar.
23Kəni nahuto min pətɨm kamaiwɨr, mɨmani məma, “?Pəh ru məma wus ɨk In Nərɨ Tevɨt apa, o?”
24 #
Mat 9:34; 10:25 Mɨro nian Farɨsi min kamairo, kəmani məma, “Wus ɨk to rɨshaliatɨvan nanɨmɨn tat min mɨro lə nɨsanən-aman taha Pielsepap,#12:24 Ap ru futnot lə Matiu 10:25. iərəmɨra taha nanɨmɨn tat min.”
25Mɨro Iesu rhinatin nɨkinilar, mamɨni to ilar məma, “Niko iərəm ramoti atu in tɨrva mɨtat akɨn, ne nəta lauanu o nima iərəm tɨroti atu in to rɨsailan.
26“Kəni takəma Setan tɨrhaliatɨv Setan, in tɨroti atu in. ?Kəni ka, niko tahan tɨrɨtuail?
27“?Kəni ne takəma Io iakamhaliatɨv nanɨmɨn tat min lə nɨsanənan taha Pielsepap, ani ru məma nərərɨmiar kamarhaliatɨv lə nɨsanənan taha fe? To nar ka ilar atu takarhuaprai kamiar.
28“Mɨro takəma iakamhaliatɨv nanɨmɨn tat min lə Nanɨmɨn taha Ughin, niko taha Ughin rɨnɨroatɨs-itha kamiar.
29“?Kəni iərəmim ker tɨrɨtuvɨn ima lə nima taha wus avsɨkavsɨk ker mamətakɨn nauta tahan, takəma rɨsaupanan mɨlis wus avsɨkavsɨk an? Oatisɨg ka mɨpətakɨn nauta min tahan.
30 #
Mak 9:40
“Iərəm rɨshuafugɨnan kamlau min in tɨkɨmɨr tahak, ne iərəm rɨsagrətin-pean nar kamlau min, in ramalakin-alakin nar.
Təvhaga tat iərəm to kɨpɨsosithean
(Luk 12:10; Luk 6:43-45)
31“To nar ka, iakamɨni to kamiar məma Ughin tɨrɨpositha təvhaga tat min pətɨm nərəmim kamarol, ne nakhar-tətan min pətɨm kəmani lan, mɨro to kɨsosithean təvhaga tat taha nərəm kameikhar tat lə Nanɨmɨn Avsim.
32 #
Luk 12:10
“Iərəm tɨrɨni nakharan tat ker lak, Io Nərɨ Iərəmim, tɨpositha təvhaga tat tahan. Mɨro iərəm tɨrakhar tat lə Nanɨmɨn Avsim, to kɨpɨsosithean təvhaga tat tahan nian ker, lə niko ɨk o lə niko vi iərəm tɨrɨpva.
33 #
Mat 7:20; Luk 6:44 “Pəs tɨnəkani nɨk ɨvt lə nɨk iərəm nouan in rəvɨt, o mɨmani nɨk tat lə nɨk iərəm nouan rɨtat. Mɨro-in-ka takhinatin nɨk lə nouan.
34 #
Mat 3:7; 23:33; Luk 3:7;
Mat 15:18; Luk 6:45 “!Kamiar nərərɨ snek min! ?Rɨtol kamiar iərəm nakarɨtat tɨnəkani nakharan ɨvt? Mɨro-in-ka nhulɨtil ramɨniatɨv am nar nɨkinilar ramət lan.
35“Iərəmim ɨvt ramosiatɨv nar ɨvt lə narɨmnar ɨvt min ramagrətin lə nɨkin ima, kəni iərəmim tat ramosiatɨv nar rɨtat lə nar rɨtat min ramagrətin lə nɨkin ima.
36“Mɨro Io iakamɨni to kamiar məma nakharan əpnapɨn min pətɨm nərəmim tɨpani, lə nian taha nuhuapreian tɨpɨrhapɨk to ilar.
37“Mɨro-in-ka lə nakharan taham tɨfhuaprai ik məma nakətuatu, o lə nakharan taham tɨfhuaprai ik məma nəktat.”
Nərəm asul min kameirhapɨk to Iesu məma tɨrol nar pɨsɨpɨs ker
(Mak 8:11-12; Luk 11:29-32)
38 #
Mat 16:1; Mak 8:11; Luk 11:16 Kəni ka nɨvin lə nətɨkun min taha Noua ne Farɨsi min kamairəm, mɨmani məma, “Iətɨkun, iamarolkeike məma tɨnakol nar pɨsɨpɨs ker sakaip.”
39 #
Mat 16:4; Mak 8:12 Mɨro In rəmarəm mamɨni to ilar məma, “Nɨpsen ɨk iərəm rɨtat ɨpɨk, mamavkɨrin iərəm ramakhlein pɨravɨn, rolkeike məma tɨrap nar pɨsɨpɨs ker. Mɨro to kɨsofənan nar ker kəm in məma tɨrap, mɨro nar pɨsɨpɨs am ɨk taha iəni taha Ughin Jona.
40 #
Jona 1:17
“Mɨro-in-ka lə nolan karena iərəm Jona rɨmarɨk lə nətɨpɨ nəm asul nian kɨsɨl lapɨn kɨsɨl, Nərɨ Iərəmim mɨn tɨrɨparɨk lənki nəmaptən nian kɨsɨl lapɨn kɨsɨl.
41 #
Jona 3:5
“Lə nian taha nuhuapreian namin Ninəvə tɨpailil mamarhuaprai nɨpsen ɨk. Mɨro-in-ka ilar kamarvhin nɨkinilar nian kamairo nɨni-atkokɨnan taha Jona, mɨro aip ru, iərəm iripɨr lə Jona ramarɨk ka tek.
42 #
1 King 10:1-10; 2 Kron 9:1-12 “Lə nian taha nuhuapreian pɨranərəmɨra lə tən pis tɨrərmig mamhuaprai nɨpsen ɨk. Mɨro-in-ka in rɨmsɨpən lə nievhievɨn tən məma tɨrɨro ninərɨkan taha Solomon, mɨro aip ru, iərəm iripɨr lə Solomon ramarɨk ka tek.
Nanɨmɨn tat iərəm ramiər mamləlɨgpa mɨn
(Luk 11:24-26)
43“Nian nanɨmɨn tat ker ramiər lə iərəmim ker, in tɨraliwək-aliwək mamvɨn ikɨn rəpia məpia min ikɨn mamegəsin ikɨn tɨramig ikɨn. Kəni nian rɨsapan,
44“tɨrɨni məma, ‘Io sakləlɨg-pən mɨn lə nima tahak ikɨn iɨmiər ikɨn.’ Kəni tɨrva map məma kɨka əna ikɨn, kɨnhapəl-ɨvtitha, rakamɨl ɨvt am.
45“Kəni tɨrvɨn mir mɨn nanɨmɨn tat kətilɨm-mɨkiu (7) mɨn karɨtat akɨn maipitha in, kəni takarva mamairɨk ikɨn. Kəni oatisɨg nəmiuhan taha iərəmim an tɨrva mɨtat akɨn mapitha kaupan. Tɨrɨpol mɨn mealan to nɨpsen tat ɨk.”
Inɨ Iesu ne pian min
(Mak 3:31-35; Luk 8:19-21)
46In rɨmamakhar əna kəm nahuto min, kəni ka, airo ru, inɨn ne pian min kamarva mamailil ilua, mamarolkeike məma takeikhar kəm In.
47Kəni ker ramɨni ton məma, “Ap ru, inɨm ne piam min kamailil ilua, mamarolkeike məma takeikhar kəm Ik.”
48Mɨro In rəmarəm mɨnipən to iərəm ramɨni ton məma, “?Pehe ɨk inok, ne nɨfe un piak min?”
49Kəni ramhuatuin nəlɨmɨn to nərəmim min tahan, mamɨni məma, “!In ɨk inok ne piak min!
50“Mɨro-in-ka iərəm ramol nar Rɨmok lə neai rolkeike, iərəm ka in piak ne nouinɨk ne inok.”
Iesu ramho nakharan lə iərəm ramɨvsɨvs uikər
(Mak 4:1-9; Luk 8:4-8)
Currently Selected:
Mat 12: Lenakel NT
Highlight
Share
Copy
Want to have your highlights saved across all your devices? Sign up or sign in
(c) 2023 Covenanter Press - Presbyterian Reformed Church of Australia
