Ester 4
4
Mordekhai 'o golo'o ngo Ester mo riono unanga
1Wakutu 'a Mordekhai 'o 'isene habari 'oru ga'a 'i dadi, unanga 'a 'acingi 'ai pakeanga sababu 'ai 'akala re sinyingara 'i kangela madutu. Ḏua unanga 'o mapake pakeanga kaḏu re 'o masidu-durono reo korou'u tai sae'e re 'o tagi toma limau, re 'a rerese ma gaḏi, 'ai iḏingi garura madutu. 2Toma kadato ma ngalana lamo'o ma biono, unanga 'o matogumu, sababu 'aguna ḇato ga'a 'o pake pakeanga kaḏu, unanga gena-ge sanga simaha ua osama kadato ma dara. 3So'o gena ḏi'i, ngowa'a-ngowa'a Yahudi toma provinsi mo-moini ananga 'aḏi ma gaḏi-gaḏi, wakutu ya 'isene ma 'olana 'ai parenta gena-ge. Ananga 'aḏi puasa, re ya rerese ma gaḏi. Re ra ananga manga sigolona, manga repe 'aḏi mapake pakeanga kaḏu re 'aḏi otu toma korou'u ma re'u.
4'Age rema mosolese-mosolese re ngowa'a la-lamo'o ga'a ma 'olana ya'u ngaku, ananga mo-moini gena-ge 'aḏi de-de'oso ma 'olana 'ai were'a, ngo Ester. Wakutu ananga 'aḏi singadolo habari gena-ge ra munanga mangale Mordekhai 'ai ga'a, ngo Ester 'ami 'akala re sinyingara 'i kangela madutu. Dadi munanga mo siḏingoto pakeanga di'a Mordekhai, la unanga 'a ngali 'ai pakeanga ga'a si'a'a reo kaḏu, mada'a Mordekhai 'a dawongo 'o oḏu'u. 5Togumu i'a ngo Ester mo 'aro'o 'a Hatah, unanga gena-ge ḏi'i ngowa'a la-lamo'o ga'a ngowa'a 'u kabiri. Unanga ma 'olana 'o soma'a 'o de-de'oso ngo Ester. Ngo Ester mo soma'a unanga 'o sano ra Mordekhai, 'oru ga'a ri dadi, re i'a sa'olo unanga 'o 'a'a so'o gena-ge. 6Ḏua, 'a Hatah 'o tagi ra Mordekhai, toma limau ma tana'a lapanga, toma kadato ma ngalana lamo'o ma biono. 7Wakutu ananga 'aḏi ma'u sanga, 'a Mordekhai 'a sijarita ra Hatah 'oru ga'a ri dadi, mangale 'a Haman 'o sijaji pipisi salaka ma repe di'a 'a singosama ra ma 'olana 'ai burua, toma 'orasa singi-ngiranga ngowa'a Yahudi mo-moini. 8Mordekhai ḏi'i 'o pula'a ma 'olana 'ai surata parenta ra Hatah ga'a sisupu toma limau Susan. Toma dara 'i silefo balasu singi-ngiranga ngowa'a Yahudi. Mordekhai 'o soma'a 'a Hatah 'o pula'a surata gena-ge ra ngo Ester, re 'a sitarangi surata ma maksudu gena-ge ra ngo Ester. Re ḏi'i unanga 'o singadolo 'ai go-golo'o ra ngo Ester di'a mo talaḏi ma 'olana remo golo'o mode-mode'e toma 'olana di'a unanga 'o sijumu 'ai 'akala re sinyingara ma la-la tami bangsa, la ngowa'a Yahudi sanga singi-ngiranga awa. 9Ḏua, 'a Hatah 'o tagi ra ngo Ester, re 'a singadolo 'a Mordekhai 'ai bererongo. 10Mada'a, ngo Ester dadunu mo soma'a 'a Hatah 'o maḏibo i'a ra Mordekhai remo bererongo so'o ne, 11<<'Aguna ḇato, bae na-nau'u bolo we-were'a ga'a sanga 'aro'o ua, 'aḏi talaḏi ma 'olana toma kadato ma dara, ananga gena-ge balasu sanga hukumu sengene. Gena-ge 'i dadi 'atoranga rimoi ga'a bae ngowa'a ga'a pula'a duga re domolo rama 'olana singadolo ngowa'a kawasa toma daeraha-daeraha 'aḏi waro hali gena-ge. Pa'i ngo'omo rimoi ḇato nyengara sanga salamata toma 'atoranga gena-ge, na'o ma 'olana 'a sitoa'a i'a 'ai didiki guraci toma ngowa'a gena-ge. Na'o so'o gena-ge, ngowa'a matengo gena-ge 'o 'ahu. Mada'a rei ngara moi ḏua, ngoi to sanga 'aro'o ua ra ma 'olana.>>
12Ḏua Hatah 'o singadolo ngo Ester 'ami bererongo ra Mordekhai 13'A Mordekhai ḏi'i 'o siḏingoto 'ai sa-sangoro ra ngo Ester so'o ne, <<Na'o ngowa'a Yahudi mo-moini 'aḏi sanga sengene, awa ngana no ta'ajiri ngana no salamata sababu no tegoro ra ma 'olana 'ai kadato ma dara. 14Tantu ḏua rema ngo'omo lelegu, ngowa'a Yahudi, 'aḏi sanga ri-riono, singadolo ananga 'aḏi sanga salamata. Mada'a na'o ngana no masiogoro ḇato toma 'orasa nena-ne, ngana masiretene ḏuanga i'a no sengene 'ani ḇaḇa 'ai rera moi mai 'aḏi moini. 'Aguna waro, ḏa ngana no dadi 'olana 'ai were'a di'a 'orasa nena-ne!>>
15Ḏua ngo Ester mo siḏingoto, 'ami sa-sangoro so'o ne, ra Mordekhai. 16<<Lomu ngowa'a Yahudi mo-moini toma Susan, la 'aḏi puasa di'a ngoi. Awa ni 'oromo bolo ni ka'e, ma di'ara wangere ro'ange re utu ro'ange. Ngoi re mosolese-mosolese ga'a 'aḏi de-de'oso ngoi mai mi puasa ḏi'i. Gena ḏua, ngoi to tagi talaḏi ma 'olana kalaha ta sito-to'u 'atoranga gena-ge. Na'o ngoi to sengene, sieanga i'a ḇato ngoi to sengene!>>
17Ḏua, 'a Mordekhai 'o tagi re 'o si'a'a mo-moini, 'oru ga'a ngo Ester mo bererongo ra unanga.
Currently Selected:
Ester 4: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)