Do-dadi 1
1
Ma Jou'ongu Madutu sidadi dungia re ma dara mo-moini
1Ma mulaingi, Ma Jou'ongu Madutu 'o sidadi diwanga re dungia re ma dara mo-moini. 2Dungia 'i tuhu nyangu re 'i batolo, re 'i romanga reo ḇanyo ga'a 'o hafu-hafu ya damunu. Mada'a Ma Jou'ongu Madutu 'ai Roh 'i lai-lairi toma ḇanyo ma re'u.
3Ma Jou'ongu Madutu 'o soma'a tarangi 'i waiti. Ḏua tarangi 'i dadi.#2Kor. 4:6 4Ma Jou'ongu Madutu 'a oḏi'i i'a rousu. Re Unanga 'a siwo-wola tarangi reo hafu-hafu.
5Tarangi gena-ge 'i silomanga, <<Wangere>> re hafu-hafu gena-ge 'a silomanga <<Lobi'i.>> Lobi'i palisi'i, wangere 'i ngadolo. Gena-ge wangere ma mulaingi.
6-7Gena ḏua, Ma Jou'ongu Madutu 'o kanau, <<Dadi da-daku rimoi toma ḇanyo mo-moini ma golona, la 'i dadi balangu ḏiḏi, re 'i sitahana ḇanyo ma balangu ḏiḏi gena-ge.>> Ḏua gena-ge 'i dadi. So'o gena-ge, Ma Jou'ongu Madutu 'o siwo-wola ḇanyo toma da-daku ma 'aḏu, re ḇanyo toma da-daku ma re'u.#2Pet. 3:5 8Da-daku gena-ge 'i silomanga <<Diwanga.>> Lobi'i 'i palisi'i, wangere 'i ngadolo. Gena-ge wangere ma soi ḏiḏi.
9Gena ḏua, Ma Jou'ongu Madutu 'o soma'a ḇanyo toma diwanga ma 'aḏu enanga 'i 'uisi ngi'i rimoi, la du-dudungu enanga 'i supu. Ḏua, enanga 'i dadi. 10Ma Jou'ongu Madutu 'a silomanga du-dudungu gena-ge <<Tana'a,>> re ḇanyo ga'a 'i lomu toma ngi'i moi gena-ge Unanga 'a silomanga <<Ngoloto.>> Re Ma Jou'ongu Madutu 'a oḏi'i i'a mo-moini 'i rousu.
11Gena ḏua, Ma Jou'ongu Madutu 'o soma'a tana'a 'i sikonyo go-gahu mo-moini, ate re gumi ga'a rema moi'i, re 'age ḏi'i rema sowo'o. Ḏua, go-gahu gena-ge enanga 'i dadi. 12Tana'a 'i sisupu go-gahu, re ate re gumi. Re Ma Jou'ongu Madutu 'a oḏi'i i'a mo-moini 'i rousu. 13Lobi'i 'i palisi'i, wangere 'i ngadolo. Gena-ge wangere ma soi ro'ange.
14-15Gena ḏua, Ma Jou'ongu Madutu 'o soma'a 'ori i'a rimoi toma diwanga di'a sisupu ma tarangi la siwo-wola lobi'i reo wangere. Gena-ge 'i dadi nana'o wangere ma mulaingi, musungu ma mulaingi, re 'agama ma laya.>>#1:14-15 'orasa re 'orasa Bolo 'agama ma laya ma wangere ma mulaingi. Ḏua enanga gena-ge 'i dadi. 16Dadi so'o gena-ge, Ma Jou'ongu Madutu 'o sidadi 'ori i'a tarangi la-lamo'o fara ḏiḏi, gena-ge wangere ma la'o ga'a 'i sitarangi toma 'orasa wangere, re ngara toma 'orasa lobi'i, re Unanga 'o sidadi ḏi'i mumuḏungu toma diwanga.
17Ma Jou'ongu Madutu 'a siḏe-ḏegoro wangere ma la'o, ngara re mumuḏungu toma diwanga di'a sitarangi dungia. 18Re si'aturu lobi'i re wangere re Unanga 'a siwo-wola tarangi gena-ge re hafu-hafu. Re Ma Jou'ongu Madutu 'a oḏi'i i'a mo-moini 'i rousu. 19Lobi'i 'i palisi'i wangere 'i ngadolo. Gena-ge wangere ma soi rata.
20Gena ḏua, Ma Jou'ongu Madutu 'o kanau, <<Toma ḇanyo ma dara 'i 'ahu mahluk ma repe ga'a 'i 'ahu toma ḇanyo, re namo ga'a 'i 'ahu toma ngawa-ngawa 'i matai soloro i'a re ino.>>
21Dadi, Ma Jou'ongu Madutu 'o sidadi nyao'o la-lamo'o toma ngoloto re nyao'o mo-moini ga'a 'i 'ahu toma ḇanyo ma dara, re namo solo-soloro mo-moini toma ngawa-ngawa. Re Ma Jou'ongu Madutu 'a oḏi'i i'a mo-moini 'i rousu. 22Gena ḏua, Ma Jou'ongu Madutu 'a sibarakati gena-ge mo-moini re 'A soma'a enanga 'i rera ri walata, bae nyao'o toma ngoloto, bae namo toma ngawa-ngawa. Dadi ngoloto 'i romanga reo nyao'o, re namo ganapu repe. 23Lobi'i 'i palisi'i, wangere 'i ngadolo. Gena-ge wangere ma soi romotoa.
24Gena ḏua, Ma Jou'ongu Madutu 'o soma'a dungia 'i sisupu enanga ma hasili haiwani-haiwani nga-ngaro mo-moini, re haiwani-haiwani nga-ngabala toma tana'a du-dudungu, haiwani la-lamo'o re haiwani ce-ceka'a. Ḏua enanga 'i dadi. 25Ma Jou'ongu Madutu ra sidadi mo-moini gena-ge. Re Ma Jou'ongu Madutu 'a oḏi'i i'a mo-moini 'i rousu.
26Gena ḏua, Ma Jou'ongu Madutu 'o kanau, <<Nange-ne, ngene wo tuhu manusia, ma rupa re jamani sa'olo ngene, la ananga ya kuasa nyao'o toma ngoloto, namo toma ngawa-ngawa, re haiwani ma lelegu, bae nga-ngaro, bae nga-ngabala, bae la-lamo'o bolo ce-ceka'a.>>#1Kor. 11:7 27So'o gena-ge Ma Jou'ongu Madutu 'o sidadi manusia, 'A tuhu ma tero sa'olo 'Ai diri masiretene. Unanga 'o sidadi manusia, na-nau'u re we-were'a.#Mat. 19:4; Mrk. 10:6 #Do. 5:1-2 28Gena ḏua, Unanga 'a sibarakati ananga re 'o kanau, <<Ni rera reni walata, la ninga ju'uda ya ḏegoro dungia sitabi donga re na kuasa. Ngoi tini siwatasa ngini di'a ni kaḏiarata 'o nyao'o toma ngoloto re namo toma nga-ngawa re haiwani nga-ngabala ma lelegu. 29Ngoi to pula'a ra ngini go-gahu mo-moini, ate re gumi ma sowo'o, bae rema moi'i bae ma moi'i cua di'a ninga ngo-ngoromo. 30Mada'a toma namo re haiwani nga-ngabala mo-moini, Ngoi to pula'a enanga ma ngo-ngoromo, rurubu re ate re gumi ma so'a.>> Ḏua mo-moini gena-ge 'i dadi. 31Ma Jou'ongu Madutu 'a oḏi'i i'a mo-moini ga'a Unanga ra sidadi, re enanga gena-ge 'i rousu masala. Lobi'i 'i palisi'i, wangere 'i ngadolo. Gena-ge wangere ma soi rarama.
Currently Selected:
Do-dadi 1: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)