Башталганы 6

Јердиҥ ӱстинде улустыҥ кинчеги ажынганы

1Јер-ӱстинде улус кӧптӧп, ӧзӱп баштаган. Олордо кыс балдар чыккан. 2Кудайдыҥ уулдары улустыҥ кыстары јараш болгонын кӧрӱп, јараганын талдап, бойлорына ӱй кижи эдип алатан.

3Кайракан айткан:

– Мениҥ тыныжым кижиде ӱргӱлјиге артпас, нениҥ учун дезе ол јӱк ле эт-кан. Ол јӱс јирме ле јаш јажап турзын.

4Ол ӧйлӧрдӧ дӧ, соондо до јер-ӱстинде баатыр бӱдӱмдӱ сӱрекей јаан оборлу улус болгон, нениҥ учун дезе Кудайдыҥ уулдары улустыҥ кыстарыла конотон, кыстар олордоҥ балдар табатан. Олор јебрен ӧйлӧрдӧҥ бери ады-јолы макка чыккан баатырлар болгон.

5Јер-ӱстинде улустыҥ кинчек-јаманы ажынып, јаманды ла эдейин деп јаантайын ӱстӱгӱп јӱргендерин Кайракан кӧрӱп, 6јер-ӱстинде улусты не јайадым болбогой деп, кородоп, Оныҥ јӱреги ачула толгон. 7Кайракан:

– Јайаган улузымды ончозын јер ӱстинеҥ кыратам, олорло кожо мал-ашты да, кыймырашкан курт-коҥысты да, теҥериде куштарды да јоголторым. Мен олорды не јайадым болбогой, – деп айдынган.

8Кайраканныҥ кӧзинде јаҥыс ла Ной јарамыкту болгон.

Кудай Нойго кереп јазазын деп јакарганы

9Бу Ной ло оныҥ калдыктары керегинде куучын.

Ол ӧйдӧ јӱрген улустаҥ јӱк ле Ной ак-чек ле јек јок болгон; Ной Кудайдыҥ јолыла јӱрген. 10Ол Сим, Хам ла Яфет деп уулдарлу болгон.

11Кудайдыҥ кӧзинде јер быртып, јаман керектерле толуп калган. 12Кудай кӧрзӧ, јерде јӱргендер Оныҥ јолынаҥ астыгып, јаман керектер эдип, јер кинчекле толуп, быјарзып калтыр. 13Айдарда, Кудай Нойго айткан:

– Јердиҥ ӱстинде јӱргендердиҥ ончозын Мен јок эдип саларым: олордыҥ јаман керектериле јер толды. Олорло кожо Мен јерди де јоголторым. 14Је сен бойыҥа гофер агаштаҥ јаан кереп тудуп, оныҥ ичин кыптарга бӧлӱ, ичи-тыштын чагана-тӧгӧтлӧ сӱртӱп сал. 15Керептиҥ узуны јетен беш, тууразы он ӱч, бийиги сегис кулаш болзын. 16Керепте јабынтыныҥ алдында чаканакча кӧзнӧк эт. Келтейинде эжик эт. Керепти ӱч кат эдип тут: алдында, ортозында ла ӱстинде. 17Мен јерге чайык чыгарып, теҥери алдында кандый ла тынар-тындуны кырып койорым. Јердиҥ ӱстинде ончо не-неме кырылып калар. 18Је, сениле Мен јӧптӧжӱ тургузарым. Керепке сен бойыҥ, уулдарыҥ, ӱйиҥ ле келиндериҥ киригер. 19Керепке анайда ок тирӱ артсын деп, бойыҥла кожо ончо тынар-тындунаҥ эркектӱ-тижилӱ эдип эжерлеп аларыҥ: 20кажы ла бӱдӱм куштардаҥ, мал-аштаҥ, аҥдардаҥ, јылып ла јорголоп јӱрер тынар-тындунаҥ тирӱ артарга, эжерлӱ эдип, сениле кожо керепке кирзин. 21Јӱзӱн-башка курсактаҥ азык эдип ал: бойыҥа да, олорго до курсак болор.

22Ной ончозын Кудайдыҥ јакарганыла эткен.

Currently Selected:

Башталганы 6: АЛТ

Highlight

Copy