Ni balüü Jesucrist loj San Juan 19

1Chi gulox baguian biguiejn tëën zian, dxel dád rejs biguiejnan chaꞌ zien daꞌt ree bén canee xanyabaa rëb reeman:

¡Quixtëë Dios! Por dux Dad ree Dios

zëëd perdon, respejt në guialrniabee,

2din laaman waliman abiꞌ xnejz rüjn xguialguxtisaman,

ma badëëdaman casti béngunaa dxuudx ni bazaalguiiw

bénguidxliuj ree con ree xni malaman,

ma been Dios guialguxtis con laaman persi baguijxaman ni bagüjtaman xbejnman.

3Abiꞌ biguiejnan rëb reeman stijb:

―¡Quixtëë Dios! Ad yuꞌt dxej yayüꞌ goꞌxh ni cayeꞌc ciuda guin.

4Abiꞌ guigajlbitap ree bengol con guidap ree be naban guin bazuxib reeman delant loj xyagxhil Dios par gap daꞌt reeman laaman respejt, rëb reeman:

―¡Quixtëë Dios! ¡Diidxzaꞌc guin ree na̱j par laaman!

5Abiꞌ niz lod zaꞌ yagxhil guin biguiejnan chaꞌ bén rëb:

Gradi ziꞌc bengol ziꞌc xindoo

gol gules xvalor dux Dad ree Dios,

lëjt rüjndi laaman sirv abiꞌ rajpidi laaman respejt.

Xguialruxhliaa bén na̱j ziꞌc xi xiil Dios

6Biguiejn tëën ziꞌc chi rguien chaꞌ zien daꞌt bejn, o ziꞌc xnaquieꞌ nijsroꞌ, o ziꞌc chi rbidxaꞌ daꞌt guziaaw, rebaman:

¡Quixtëë Dios! Din ma canabee dux Dad ree Dios,

bén caꞌ gra guialrniabee.

7Yan yadxeꞌ du luxdoo ree zagdxe, yabaa ree yales tëë ree xvaloraman.

Din ma bidxin dxej guxhliaa bén na̱j ziꞌc xi xiilaman

abiꞌ bén gac lacheelaman ma zaꞌchaawaman.

8Najcwaman lajd zagdxe, ni naquich, naya rulaa tëën bachaꞌ.

Din lajd naquich guin rën guiëban ni zagdxe ni been ree xbejn Dios.

9Abiꞌ na anjl guin lon:

―Bacaa: “Xiquilbaa ree bén na̱j guiꞌt loj xguialruxhliaa bén na̱j ziꞌc xi xiil Dios.”

Na tëë anjl guin:

―Ni guie ree na̱j xtiidxli Dios.

10Dxel bazuxiban loj anjl guin par gaꞌp daꞌtan laaman respejt, per naman lon:

―Ad güünl zian. Din ziꞌcgajc lüj xmandadzi Dios cayguieen, ziꞌcgajc gra ree lasaꞌl bén wali ree rüjncwent xtiidx Jesucrist. Gojp daꞌt respejt Dios.

Din por Jesús zëëd ni rniee ree bén rudëëd xtiidx Dios.

Bén dxiib tijb way naquich

11Dxel baguian zojbyal xanyabaa baguia tëën tijb way naquich. Bén dxiib laab laman: Bén ruzoob xtiidxaman në bén wali, din xnejz rüjn xguialguxtisaman në xwadijlaman, 12guiaalojman rulaan bachaꞌ ziꞌc bajl abiꞌ zien ree coron yuꞌ guijcaman, tib lajtaman ca laj tijb bejn ni achut rigniaꞌ, tijbzi laaman ragbee xhie rën guiëban, 13guidib rejnzi xabaman, abiꞌ laman Xtiidx Dios.

14Abiꞌ ree xsuldadaman bén yuꞌ xanyabaa zinal reeman laaman dxiib reeman way naquich, najcw reeman lajd zagdxe ni naquich ni naya tëë. 15Roꞌman ririi tijb espad ni nadoxh roꞌ, con espad guin gudëëdaman casti bénguidxliuj, në con var guiib nabeeman laa reeman. Ziꞌc rëꞌp bejn guijc uv par guixiin, zian gudëëdaman loj reeman casti naroob ni zëëd por Dios bén rajp gra guialrniabee. 16Loj xcajpaman con cüdaman ca ree diidx ni rëb: “Rey bén rniabee loj ree rey në Dad bén rniabee loj ree dad.”

17Dxel baguian tijb anjl zaꞌliman loj gubijdx, dád rejs rbidxaꞌman, rbejdxaman gra ree be ni rzuj xanyabaa, rëbaman:

―Gol guda, gol bachajg lasaꞌdi lod gunee Dios ni gawidi zroꞌ daꞌt, 18ziꞌc xbëël ree rey, xbëël ree capitan, xbëël ree bén achut rüjn gan, ziꞌc xbëël ree way, xbëël ree bén rbib laa reeb, xbëël gra ree bejn, ziꞌc xbëël ree bén na̱j ziꞌc bén nadoꞌ në xbëël ree bén ad najt ziꞌc bén nadoꞌ, ziꞌc xi bëël ree bengol në ree xindoo.

19Dxel baguian monstruo con ree rey yuꞌ loj guidxliuj në ree xsuldad reeman, nadxag lasaꞌ reeman par til reeman con bén dxiib way naquich guin con ree xsuldadaman. 20Per laa reeman gunaaz reeman monstruo guin con bén rusquiee rëb rudëë xtiidx Dios loj ree bejn, bén rüjn milagr niz loj monstruo guin. Abiꞌ por ree milagr guin basquieeman bén guyu ree xsen monstruo guin gojp tëë reeman respejt xfigurib. Abiꞌ monstruo guin con bén rusquiee ni rëb rudëë xtiidx Dios loj ree bejn, grop reeman guidib naban reeman bazaal reeman laa reeman loj bajl lod cayeꞌc azufre. 21Abiꞌ los demazri ree xbejn monstruo guin güjt reeman con espad ni ririi roꞌ bén dxiib way naquich guin, abiꞌ gudaw ree be ni rzuj xanyabaa laa reeman, xt gudxa lën reeb gudaw ree xbëël reeman.

Currently Selected:

Ni balüü Jesucrist loj San Juan 19: zas

Highlight

Copy

Compare