San Juan 10
10
Bén rniaj xiil
1Rëb tëë Jesús:
―Diidxliczi rnin lojdi, bén ad rut niz roꞌ xgurajl ree xiil, bén ru niz lood ren, laaman na̱j béngubaan. 2Per bén ru niz roꞌ xgurajl reeb, laaman na̱j bén rniaj laa reeb. 3Abiꞌ rxhial bén rajp roꞌ xgurajl reeb persi ru bén rniaj laa reeb, abiꞌ chi rbejdxaman tijbgaj reeb, rayünbee reeb chaꞌman. Zianz rbëëman laa reeb lën gurajl guin. 4Abiꞌ chi ma brii gra reeb, dxel rniedaman loj reeb, guiáad laa reeb rnal laaman, guial nünbee reeb chaꞌman. 5Per ad rnalt reeb tijb bén ad nünbeet reeb, ruxüünl reeb lojman, guial ad nünbeet reeb chaꞌman.
6Chi gulox gunee Jesús zian, ad bigniaꞌt ree bén rigaꞌ yagaj xhie rën guiëb ni guneeman.
Jesús na̱j ziꞌc bén rniaj xiil ree zagdxe
7Rëb Jesús loj reeman zatijb:
―Diidxliczi rnin, naj na̱j ziꞌc roꞌ xgurajl ree xiil, lod ru reeb. 8Gra ree bén biꞌt chi gad naj guial na̱j reeman ziꞌc béngubaan, rban reeman rusagzi tëë reeman. Per ree bén na̱j da bejnan ad bidxgaꞌt reeman laa reeman. 9Naj na̱j roꞌ port, abiꞌ bén ru roꞌ port guie zajpaman perdon, dxel ma zileꞌ chuꞌman yarii tëëman ziꞌcgajczi tijb xiil abiꞌ zian rdxejl ni rawib.
10’Béngubaan riꞌtzaman din cwanman, gugüjtaman gunijt tëëman, saꞌn naj zialan din gapidi guialnaban, gap tëëdi zroꞌ daꞌtan. 11Naj na̱j ziꞌc tijb bén rniaj xiil ree zagdxe. Abiꞌ bén rniaj xiil ree zagdxe xt xguialnabanman rudëëman por laa reeb. 12Per bén rniaj laa reeb por milia, chi ruguiaaman zëëd cuyojt, laa ruxüün gajcaman, rbëëladxaman xiil guin ree guial ad najt reeb xi xiilaman në guial ad najtaman bén rniaj ree xiil, dxel rniaaz cuyojt guin laa reeb abiꞌ rtieꞌchib laa reeb. 13Laaman rbëëladx laa reeb, din por miliazi rniajman laa reeb abiꞌ achet naladxaman por laa reeb.
14,15’Naj na̱j ziꞌc bén rniaj xiil ree zagdxe. Abiꞌ ziꞌc nünbee da Dadan naj, zian nünbeen laaman, ziangajc nünbee ree da xiilan, guiáad laa reeb nünbee naj. Abiꞌ xt da guialnabanan gudëdan por laa reeb. 16Raꞌp tëën stibcwaa ree xiil ad yuꞌt lën gurajl guie. Në laa reeb ryaadx chigxin, laa reeb guzoob da diidxan, yadxaag grop cwaa reeb gac reeb tijbzi, abiꞌ tijbzi bejn gap laa reeb.
17’Da Dadan Dios rënman naj guial naj gajc rudë naj guiëtan par yabanan stijb. 18Achut zajc gugüjt naj bal id naj gatiëëb. Naj raꞌp guialrniabee par gatiëëban guiëtan në par yabanan stijb, din laan na̱j guialrniabee ni banee da Dadan lon.
19Chi biguiejn ree bén Israel guin ni rëbaman, gojc reeman tioꞌp lalaꞌ stijb. 20Zien reeman rëb:
―¿Chexc zeel ridxgaꞌdi laaman? Awa xindxab yuꞌ luxdooman rajc tëë guijcaman.
21Per yuꞌ reeman rëb:
―Niꞌqui tijb bén yuꞌ xindxab luxdoo ad rnieet zian. ¿Wen zajc yaxhal xindxab guiaaloj ree bén ad ranit loj ya?
Jesús con xDadaman Dios na̱j reeman tijbzi
22Tiamp nayaag, chi cayüjn ree bén Israel lanij ni rüjn reeman gazobijz par yadooroꞌ Jerusalén. 23Wej Jesús lën yadoo guin. Chi cazaman niz roꞌ curdur ni rniee reeman xcurdur Salomón. 24Dxel biyaw ree bén Israel laaman, rëb reeman lojman:
―¿Xt goc nagaꞌloj cuꞌnawëëguil dunujn? Guna du lojn bal lüj na̱j Cristo.
25Badxiꞌ Jesúsan rëbaman:
―Ma rnin lojdi, per lëjt ad rliladxtidi naj. Abiꞌ ree ni rünan con xguialrniabee da Dadan Dios, laa reen rulüü chu najn. 26Per ad rliladxtidi, guial ad najtidi da bejnan. 27Bén na̱j ree da bejnan, nünbee reeman chaꞌn, guiáad naj nünbeen laa reeman, abiꞌ laa reeman rzanal naj. 28Naj rudë guialnaban tiblayaa loj reeman, ad yuꞌt dxej nit reeman. Abiꞌ achut zajc chiquied laa reeman lon. 29Din da Dadan, bén banee laa reeman lon, rajpaman mazri guialrniabee guial loj gra. Achut zajc chiquied laa reeman lojman. 30Da Dadan con naj, nayajcan tijbzi.
31Dxel cwaꞌ ree bén Israel guin guiaj din gucaaguiaj reeman Jesús. 32Per rëbaman loj reeman:
―Por xguialrniabee da Dadan, zien ni zagdxe ma benan niz lojdi. ¿Con pornin gucaaguiajdi naj?
33Badxiꞌ reeman laan rëb reeman:
―Ad por ree ni zagdxe ni beentilan yacaaguiajn lüj, yacaaguiajn lüj guial ad rajptil Dios respejt, din bénguidxliujzi lüj, abiꞌ rüjn lüj gajc ziꞌc Dios.
34Dxel rëb Jesús:
―Loj xleydi rëb: “Naj rni guial lëjt na̱j dios.” 35Dunuj ree rayagbee guial ad ni rusquieet na̱j ni ca loj xtiidx Dios. Abiꞌ laaman gulëëlaj dios bén basaꞌnnë ree xtiidxaman, bén gojp ree guialrniabee loj ree bén Israel. 36Yan, bal da Dadan Dios gulëëca naj persi guxhaalaman naj loj guidxliuj, ¿chexquiza zeel nadi ad raꞌptan laaman respejt guial rnin, xiꞌnman naj? 37Bal id cayünan ziꞌc na da Dadan, ad chililadxidi naj. 38Per bal cayünan ziꞌc naman, majsi ad zaliladxtidi naj, per gol bililadx guial por laaman zëëd ni rünan din gagbeedi guial da Dadan zaꞌnë naj, guiáad naj zaꞌnëꞌn laaman.
39Dxel guyën reeman niniaaz reeman Jesús, per gulaaman loj reeman.
40Abiꞌ zëman zatiblad roꞌ guiiw Jordán, lod baroobnijs Waj bejn ree yaloj, yagaj bayaꞌnman. 41Abiꞌ zien ree bén bidxin yagaj rëb:
―Walin, majsi achet milagr been Waj, per gra ni guneeman xcwent bén guie na̱j diidxli.
42Dád zien reeman bililadx Jesús yagaj.
Currently Selected:
San Juan 10: zas
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.