Ree 16
16
Gruss aun de Christen en Rom
1Ekj low junt oba onse Sesta Feebe väa, eene Deenarin en de Jemeent en Kenchreä, 2daut jie ar en däm Harn oppnämen, soo aus Heilje daut tookjemt un daut jie ar biestonen, en wautemma ar von junt fält; wiels uk see es väle een Biestaunt jewast, uk mie selfst.
3Jreest Priscilla un Aquila, miene Metoabeida en Christus Jesus, Apj 18:2,18,26 4woone fa mien Läwen äa ieejnet Jenekj hanjelajcht haben, woone nich bloos ekj dank, oba uk aul de Jemeenten von de Heiden. 5Jreest uk de Jemeent en äa Hus. Jreest Epänetus, mienen Jeleewden, dee von Achaja de ieeschte Frucht es fa Christus. 6Jreest Maria, dee sea väl fa ons jeoabeit haft. 7Jreest Andronikus un Junias, mien Frintschoft un miene Met-Jefangne, woone beriemde mank de Apostel sent, woone uk ver mie en Christus wieren. 8Jreest Amplias, mienen Jeleewden em Harn. 9Jreest Urbanus, onsen Metoabeida en Christus, un Stachies, mienen Jeleewden. 10Jreest Apelles, dee bewäsen es en Christus. Jreest uk dee von Aristobulus. 11Jreest Herodion, mienen Vewaunten. Jreest uk dee von Narzissus, dee en däm Harn sent. 12Jreest Trifäna un Trifosa, dee en däm Harn oabeiden. Jreest Persis, de Jeleewde, dee väl jeoabeit haft en däm Harn. 13Jreest Rufus, dän Uterwälden em Harn un siene un miene Mutta. Mrk 15:21 14Jreest Asinkritus, Flegon, Hermas, Patrobas, Hermes un de Breeda bie äant. 15Jreest Filologus un Julia, Nereus un siene Sesta un Oliempas un aul de Heilje bie äant. 16Jreest junt unjarenaunda met eenem heiljen Kuss. Doa jreessen junt aul Christus siene Jemeenten. 1Kor 16:20
Latste Unjarechten un Jriss
17Ekj bedd junt, Breeda, daut jie junt soone moakjen, dee doa Spoolungen un Aunstoos ve-uasoaken jäajen de Lia, dee jie jelieet haben; dreit junt wajch von dee. Mat 7:15; 2Tess 3:6; Tit 3:10 18Wiels soone deenen nich onsem Harn Jesus Christus, oba äarem ieejnen Buck, un derch glaute Wieed un scheene Räd vefieren see de Hoaten von de Oschuldje. Flp 3:19; Kol 2:4 19Wiels jun Jehuarsom es vespreet mank aule. Doawäajens frei ekj mie om junt-haulwen. Oba ekj mucht, daut jie weis wieren fa daut Goode un eenfach fa daut Beese. Ree 1:8; 1Kor 14:20 20Oba de Gott von Fräd woat Soton em Korten unja june Feet veklunjen. De Jnod von ons Har Jesus Christus sie met junt! Amen.
21Doa jreessen junt Timotäus, mien Metoabeida, un Luzius un Jason un Sosipater, miene Vewaunte. Apj 16:1-3; 17:6; 19:22; 20:4; Flp 2:19-22 22Ekj, Tertius, dee disen Breef schreef, jrees junt em Harn. 23Doa jreest junt Gajus, dee mie un de gaunze Vesaumlunk oppneem. Doa jreest junt Erastus, de Stauts-Vewaulta un Kwartus, de Brooda. 1Kor 1:14 24De Jnod von ons Har Jesus Christus sie met junt aula! Amen.
Säajen un Dankjebäd
25To däm dan, dee junt no mien Evangelium no un de Prädicht von Jesus Christus faustmoaken kaun, no de Openboarunk von daut Jeheemnis, daut von eewje Tieden häa stell-jehoolen wia, 1Kor 2:7; Efs 1:9; 3:4-9 26oba nu jeopenboat un derch de profeetische Schreften, no däm Befäl von däm eewjen Gott, to de Gloowens-Jehuarsomkjeit aun aule Heiden bekaunt jemoakt worden es. Ree 1:5 27To Am, däm auleen weisen Gott, derch Jesus Christus, de Iea en Eewichkjeit! Amen.
Currently Selected:
Ree 16: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft