Ree 11
11
Gott siene Jnod met Israel
1Ekj saj nu: Haft Gott sien Volkj vestat? Sea lang nich! Wiels ekj sie uk een Israelit, von Abraham sien Nokomen, ut Benjamin sien Staum. Ps 94:14; Jer 31:37; Flp 3:5 2Gott haft sien Volkj nich vestat, daut Hee verhäa-kjand. Oba weet jie nich, waut de Schreft sajcht von Elia, woo hee Gott prachad jäajen Israel un sajcht: 1Kje 19:10 3“Har, see haben diene Profeeten dootjemoakt un haben diene Aultoaren doljebroaken, un ekj auleen sie äwajebläwen, un see sieekjen no mien Läwen”. 4Oba waut sajcht am de jettliche Auntwuat? “Ekj hab Mie säwen-dusent Mana äwabliewen loten, dee nich haben de Kjnee jeboagen ver Baal.” 1Kje 19:18 5Jrod soo es nu uk en dise Tiet een Äwa-Rest, no de Uterwälunk von Jnod. Ree 9:27 6Wan oba derch Jnod, dan es et nich mea derch Woakjen; sest es Jnod nich mea Jnod. Wan oba derch Woakjen, dan es et nich mea ut Jnod; sest es daut Woakj nich mea Woakj. 7Waut dan? Waut Israel sieekjt, daut haft et nich erlangt, oba de Uterwälde haben daut erlangt, un de Äwaje sent vehoat, Ree 9:31 8soo aus jeschräwen steit: “Gott jeef äant eenen Schlop-Jeist, Uagen, daut see nich seenen, Uaren, daut see nich hieren, bat dän vondoagschen Dach.” 5Mo 29:4; Jes 29:10 9Un David sajcht: “Lot äa Desch äant to eene Schlenj woaren un to eene Faul un to eenem Aunstoos un to eene Vejeltunk. 10Äare Uagen lot diesta woaren, daut see nich seenen, un bieej äaren Rigjen emma dol.” Ps 69:22-23
11Ekj saj dan: Haben see sikj vestaupt, om daut see faulen sullen? Sea lang nich! Oba derch äaren Faul wort de Heiden de Radunk jebrocht, om äant toom Iewa to reizen. Apj 13:46; Ree 10:19 12Un wan äa Faul de Welt äa Rikjtum es un äa Velust de Heiden äa Rikjtum, wooväl mea äare Vollzol?
De Heiden jleewen daut Evangelium
13Wiels to junt Heiden räd ekj; wiels ekj de Heiden äa Apostel sie, low ekj mienen Deenst, 14om daut ekj irjentwoo mucht dee von mien Fleesch toom Iewa reizen un atelje von äant raden. 1Kor 9:20-22; 1Tim 4:16 15Wiels wan äa Vesteeten de Veseenunk fa de Welt es, waut wudd äa Aunnämen sest sennen, aus Läwen von de Doodje? 16Wan oba de ieeschte Frucht heilich es, dan es uk de Dieech, un wan de Wartel heilich es, dan sent uk de Asta. 4Mo 15:20 17Wan oba atelje von de Asta rutjebroaken sent un du, dee du een willa Oliewenboom wieescht, best mank äant nenjepropt un best een Deelnäma aun de Wartel un aun daut Fat vom Oliewenboom jeworden, Efs 2:11-14 18dan riem die nich jäajen de Asta. Oba wan du die jäajen de Asta riemst, denkj, du drajchst nich de Wartel, oba de Wartel drajcht die. Joh 4:22 19Du sajchst dan: De Asta sent rutjebroaken, soo daut ekj nenjepropt wort. 20Goot; wäajens äaren Ongloowen worden see rutjebroaken, un du steist derch dän Gloowen. Sie nich stolt, oba fercht die; 1Kor 10:12 21wiels wan Gott de naturale Asta nich veschoond, wudd Hee die uk nich veschoonen.
22Doawäajen kjikj no Gott siene Leeftolichkjeit un sienen Iernst: Aun de Jefolne, dän Iernst, oba aun die, de Leeftolichkjeit, wan du en de Leeftolichkjeit blifst; sest woascht du uk aufjehakt woaren. Joh 15:2,4; Heb 3:14 23Un jane uk, wan dee nich em Ongloowen bliewen, woaren trigj nenjepropt woaren; wiels Gott kaun äant wada nenproppen. 24Wiels wan du von däm von Natua willen Oliewenboom rutjeschnäden wortst un jäajen de Natua en dän gooden Oliewenboom nenjepropt wortst, wooväl mea woaren dise Asta, woone von de Natua sent, en äaren ieejnen Oliewenboom nenjepropt woaren!
Daut Jeheemnis von Israel äare Radunk
25Wiels ekj well nich, Breeda, daut jie äwa dit Jeheemnis onweetent sent, om daut jie junt nich selfst fa kluak hoolen: Daut Israel es toom Deel Blintheit passieet, bat de Vollzol von de Heiden nenjekomen es; Joh 10:16 26un soo woat gaunz Israel jerat woaren, soo aus jeschräwen steit: “Von Zion woat de Radenda komen un woat de Gottloosichkjeit von Jakob wajchdoonen”; Ps 14:7; Jes 27:9; 59:20-21; Jer 31:33; Mat 23:39 27un: “Dit es mien Bunt met äant, wan Ekj äare Sinden wajchnämen woa.” Jer 31:33-34
28No daut Evangelium no sent see Fiend om junt-haulwen, oba no de Uterwälunk no, sent see Jeleewde om de Vodasch äat-haulwen. 29Wiels de Gowen un Roop von Gott gonen nich trigj to nämen. 4Mo 23:19 30Wiels jrod soo aus jie Gott eene Tiet nich jleewden, nu oba Boarmherzichkjeit erlangt haben derch äaren Ongloowen, 31jrod soo haben uk jane nu nich jejleeft, soo daut derch june Boarmherzichkjeit uk see Boarmherzichkjeit kjrieen. 32Wiels Gott haft äant aulatoop unja dän Ongloowen beschloten, soo daut Hee sikj äwa aule erboarmen kunn. Gal 3:22; 1Tim 2:4
33Oo waut fa Deepheit von Rikjtum, beides, Weisheit un Erkjantnis von Gott! Woo onbejrieplich sent siene Uadeelen un onutforschlich siene Wäaj! Jes 45:15; 55:8-9 34Wiels wäa haft däm Harn sien Senn erkjant, ooda wäa es sien Rotjäwa jewast? Jes 40:13; Jer 23:18; 1Kor 2:16 35Ooda wäa haft Am ieescht jejäft, un daut am daut wada trigj-jetolt saul? Hiob 41:3 36Wiels von Am un derch Am un to Am sent aule Dinja; to Am de Iea fa aule Eewichkjeit! Amen.
Reema
Currently Selected:
Ree 11: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft