Mat 24
24
De Tempel woat doljebroaken woaren
Mrk 13:1-2; Luk 21:5-6
1Un Jesus jinkj rut un jinkj vom Tempel wajch, un siene Jinja kjeemen, om Am de Tempel-Jebieda to wiesen. 2Jesus oba säd to äant: See jie dit nich aula? Ekj saj junt woarhauftich: Hia woat kjeen Steen opp däm aundren jeloten woaren, dee nich woat doljebroaken woaren. Luk 19:44
De Tiet-Tieekjens un daut Enj
Mrk 13:3-13; Luk 21:7-19
3Un aus Hee opp däm Oliewen-Boajch saut, kjeemen de Jinja oppoat no Am un säden: Saj ons, wanea woat daut aula passieren? Un waut woat daut Tieekjen von dien Komen sennen un daut Welt-Enj? Apj 1:6-8
4Un Jesus auntwuad un säd to äant: Seet junt väa, daut junt kjeena veleiden woat. 5Wiels doa woaren väle en mienem Nomen komen un sajen: Ekj sie de Christus, un dee woaren väle veleiden. Joh 5:43; 1Joh 2:18 6Un jie woaren von Kjriej un Kjriejes-Jeschrechs hieren; seet too, veschrakjt nich; wiels aul dit mott passieren; oba daut Enj es noch nich. 7Wiels doa woat Nazion jäajen Nazion oppstonen un Kjennichrikj jäajen Kjennichrikj; un doa woaren Hungasch-Nooten un Pestilenzen#24:7 Ooda: Ploagen. un Ieedbäben sennen opp veschiedne Städen. 8Dit aula es de Aunfank von daut Lieden.
9Dan woaren see junt en de Triebsaul äwajäwen un junt dootmoaken; un jie woaren jehaust woaren von aul de Nazionen om mien Nomens haulwen. Mat 10:21-22; Joh 16:2 10Un dan woaren väle ve-oajat sennen un sikj unjarenaunda veroden un sikj unjarenaunda haussen. 11Un doa woaren väle faulsche Profeeten oppstonen un väle veleiden. 2Pe 2:1; 1Joh 4:1 12Un wiels de Jesazloosichkjeit woat äwahaunt nämen, woat de Leew von väle kolt woaren; 2Tim 3:1-5 13Wäa oba bat aum Enj uthelt, dee woat jerat woaren. Mat 10:22; Opb 13:10 14Un dit Evangelium vom Rikj woat en de gaunze Welt jeprädicht woaren, fa een Zeichnis to aul de Nazionen, un dan woat daut Enj komen. Mat 28:19
Daut schrakjelje Älent
Mrk 13:14-23; Luk 21:20-24
15Wan jie nu daut Jreiel vom Vedoawen em Heilichtum stonen seenen, waut derch dän Profeet Daniel jerät worden es, (wäa dit last, saul doaropp moakjen), Dan 9:27 16dan flicht en de Boaj, wäa en Judäa es; 17wäa opp daut Dak es, saul nich raufstieen, waut ut sien Hus to holen; Luk 17:31 18un wäa opp de Stap es, saul nich trigjkomen, siene Kjleeda to holen. 19Wee oba de Schwangere un dee, waut de Brost jäwen en dee Doag! Luk 23:29 20Bät oba, daut june Flucht nich em Winta ooda aum Sabat kjemt. 21Wiels dan woat eene groote Triebsaul sennen, soo aus daut von Aunfangs Welt bat nu noch niemols jewast es un uk niemols mea sennen woat. Dan 12:1 22Un wan dise Doag nich vekjartat worden, dan wudd kjeen Fleesch jerat woaren; oba om de Uterwälde äat-haulwen sellen dise Doag vekjartat woaren.
23Wan dan irjentwäa to junt sajen woat: Kjikj, hia es de Christus! ooda: Doa! dan jleeft daut nich. 24Wiels doa woaren faulsche Christussen un faulsche Profeeten oppstonen un groote Tieekjens un Wunda doonen, om, wan mäajlich, uk de Uterwälde to veleiden. 5Mo 13:2-4; 2Tess 2:8-9; Opb 13:13 25Kjikj, Ekj hab junt daut verhäa jesajcht. 26Wan see nu to junt sajen: Kjikj, hee es en de Wiltnis! got doa nich han; Kjikj, hee es en de Bennastow! soo jleeft daut nich. Luk 17:23-24 27Wiels soo aus de Blitz vom Oosten rutfoat un bat däm Wasten schient, soo woat uk daut Komen vom Menschensän sennen. 28Wua daut Os es, doa woaren de Odlasch#24:28 Ooda: Os-Odla. sikj saumlen. Luk 17:37; Opb 19:17-18
Jesus vetalt von sien Wadakomen
Mrk 13:24-27; Luk 21:25-28
29Fuaz no de Triebsaul von jane Doag woat de Sonn vedunkelt woaren, un de Mon woat äaren Schien nich jäwen, un de Stierns woaren vom Himmel faulen, un de Himmels-Kjraften woaren jescheddat woaren. Jes 13:10; 2Pe 3:10; Opb 6:12-13 30Un dan woat daut Tieekjen von däm Menschensän aum Himmel to seenen sennen, un dan woaren aule Stam von de Ieed jaumarieren, un see woaren dän Menschensän opp de Himmels-Wolkjen komen seenen met groote Krauft un Harlichkjeit. Dan 7:13-14; Mat 26:64; Opb 1:7; 19:11-13 31Un Hee woat siene Enjel schekjen met däm luden Trompeeten-Schaul, un dee woaren siene Uterwälde ut de vea Wintrechtungen saumlen, von een Enj Himmel bat daut aundre Enj. 1Kor 15:52; Opb 8:2
De Lia aum Fiejenboom
Mrk 13:28-31; Luk 21:28-33
32Aun däm Fiejenboom lieet een Jlikjnis: Wan sien Aust ieescht sauftich woat un de Bläda rutkomen, dan weet jie, daut de Somma dichtbie es. 33Jrod soo uk jie, wan jie dit aules seenen, dan weet, daut et dicht aun de Däaren es. 34Ekj saj junt woarhauftich: Dise Jennerazion woat nich vegonen, bat dit aula passieet es. 35Himmel un Ieed woaren vegonen, oba miene Wieed woaren nich vegonen. Jes 51:6; Mat 5:18
De Tiet weet kjeena
Mrk 13:32-37; Luk 17:26-30; 17:34-36
36Oba von däm Dach un von de Stund weet kjeena, uk nich de Enjel em Himmel, oba bloos mien Voda auleen. Apj 1:7 37Oba soo aus daut en Noah siene Doag wia, soo woat daut uk bie daut Wadakomen von däm Menschensän sennen. Luk 17:26-27; 1Mo 6:9-7:23 38Soo aus see en de Doag ver de Sintflut eeten un drunken, frieden un leeten sikj frieen, bat aun dän Dach, aus Noah en de Arche nenjinkj, 39un see erkjanden daut nich, bat de Sintflut kjeem un äant aula metreet, soo woat uk daut Komen von däm Menschensän sennen. 40Dan woaren twee opp de Stap sennen; eena woat jenomen woaren un de aundra woat trigj-jeloten woaren. 41Twee woaren bie de Mäl molen, eene woat jenomen un de aundre woat jeloten. Luk 17:35 42Doawäajen woakt; wiels jie weeten nich, to woone Stund jun Har kjemt. Mat 25:13 43Dit oba sell jie weeten: Wan de Hushar jewist haud, to woone Woakstund de Deef komen wudd, wudd hee jewoakt haben un nich en sien Hus enbräakjen loten. 1Tess 5:2 44Doawäajen siet jie uk reed! Wiels de Menschensän kjemt to eene Stund, wua jie nich met räakjnen.
De trua un ontrua Kjnajcht
Luk 12:41-48
45Wäa es nu de trua un kluaka Kjnajcht, dän sien Har äwa sien Hushault jesat haft, äant daut Äten to rajchte Tiet to jäwen? 46Seelich es dee Kjnajcht, dän sien Har, wan hee kjemt, am finjen woat soo doonen. 47Ekj saj junt woarhauftich: Dän woat hee äwa aul siene Jieta saten. Mat 25:21,23 48Wan oba dee beesa Kjnajcht en sien Hoat sajen woat: Mien Har vetrakjt to komen, 2Pe 3:4 49un fangt aun, siene Metkjnajchts to schlonen un met aundre Drinkja toop to äten un to drinkjen, 50dan woat däm Kjnajcht sien Har aun eenem Dach komen, wua hee nich opp räakjent un en eene Stund, woone hee nich weet, 51un woat am twei-schnieden un am sien Deel met de Heichla jäwen; doa woat daut Hielen un daut Tänen-Kjnirschen sennen.
Matäus
Currently Selected:
Mat 24: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft