Apj 22
22
1Mana, Breeda un Vodasch, horcht no miene Veteidjunk ver junt. 2Aus see oba hieeden, daut hee en de hebräische Sproak to äant räd, worden see noch stella. Un hee säd: Apj 21:40 3Ekj sie een judischa Maun, jebuaren en Tarsus en Zilizien, oba en dise Staut oppjetrocken, ver Gamaliel siene Feet, gaunz jeneiw no daut vodaliche Jesaz un wia een Iewaja fa Gott, jrod soo aus jie aula aun disem Dach sent. Apj 5:34 4Ekj vefoljd disen Wajch bat aum Doot, endäm ekj beides, Mana un Frues, bunk un en de Jefenkjnissen leewad, Apj 8:3 5soo aus mie uk de Huagapriesta Zeichnis jeft un de gaunze Eltestaschoft. Ekj kjrieech Breew von äant aun de Breeda un reisd no Damaskus, om uk dee, waut doa wieren, jebungen no Jerusalem to fieren, om daut see bestroft worden. 6Un mie passieed daut oba, aus ekj reisd un dichtbie Damaskus kjeem, daut om Meddach onverhofs een grootet Licht vom Himmel rom mie scheen. 7Un ekj foll opp de Ieed un hieed eene Stemm, dee to mie säd: Saul, Saul, wuarom vefolchst du Mie? 8Ekj oba auntwuad: Wäa best Du, Har? Un Hee säd to mie: Ekj sie Jesus von Nazaret, dän du vefolchst. 9Oba dee, waut met mie wieren, sagen daut Licht un wieren veschrocken; oba see hieeden nich de Stemm von däm, waut met mie räd. 10Un ekj säd: Waut saul ekj doonen, Har? De Har oba säd to mie: Sto opp un go no Damaskus; doa woat die aules jesajcht woaren, waut die aunjeordent es to doonen. 11Aus ekj oba wäajens de Harlichkjeit von daut Licht nich seenen kunn, wort ekj von dee, waut met mie wieren, aune Haunt jeleit un kjeem no Damaskus. 12Oba een jewessa Ananias, nom Jesaz no een gottesferchtja Maun, dee een goodet Zeichnis haud von aul de Juden, waut doa wonden, 13dee kjeem no mie un nodad sikj un säd to mie: Brooda Saul, woa seenent! Un en deeselwje Stund kjikjt ekj am aun. 14Hee oba säd: De Gott von onse Vodasch haft die jewält, daut du sienen Wellen erkjanen saust, dän Jerajchten to seenen un de Stemm ut sien Mul to hieren; 15wiels du saust siene Zeij sennen ver aule Menschen, von waut du jeseenen un jehieet hast. 16Un nu, wuarom wachst du? Sto opp, lot die deepen un diene Sinden aufwauschen, wäarent du dän Nomen vom Harn aunroopst.
17Un daut passieed, aus ekj trigjkjeem no Jerusalem un bäd em Tempel, kjeem ekj en eene Entzikjunk nenn. 18Un ekj sach Am, dee to mie säd: Spood die, un go bosich ut Jerusalem rut, wiels see woaren dien Zeichnis von Mie nich aunnämen. 19Un ekj säd: Har, see selfst weeten, daut ekj dee, waut aun Die jleewden, en daut Jefenkjnis brocht un schluach dee en jieda Synagoge; 20un aus daut Bloot von Diene Zeij Stefanus vegoten wort, dan stunt ekj selfst doabie un wia met sienem Doot envestonen un bewoad de Kjleeda von deejanje, dee am dootmuaken. Apj 7:58; 8:1 21Un Hee säd to mie: Go, wiels Ekj well die wietauf no de Heiden schekjen. Apj 13:2
Paulus un de reemischa Hauptmaun
22See horchten am too bat opp dit Wuat, dan hoowen see äare Stemm opp un säden: Wajch met soonem von de Ieed! Wiels daut paust nich, daut hee läwen sull. Apj 21:36 23Wäarent see oba schrieejen un äare Kjleeda aufschmeeten un Stoff en de Loft schmeeten, 24befool de bowaschta Offizia, am en daut Loaga to brinjen un befool, am unja Schläaj ut to froagen, daut hee enwoaren kunn, wäajens waut fa Uasoak see soo jäajen am schrieejen. 25Aus see am oba met Reemes bungen, säd Paulus to däm Hauptmaun, dee doabie stunt: Es daut erlaupt, eenen reemischen Maun onen Uadeel to schlonen? Apj 16:37; 23:27 26Aus de Hauptmaun daut hieed, jinkj hee no däm bowaschten Offizia un säd: Kjikj, waut west du doamet doonen? Wiels dis Mensch es een Reema. 27Dan kjeem de bowaschta Offizia un säd to am: Saj mie, best du een Reema? Hee säd: Jo. 28Un de bowaschta Offizia auntwuad: Ekj hab dit Birjarajcht met eene groote Somm jekjräajen. Paulus oba säd: Ekj sie oba uk reemisch jebuaren. 29Dan jinjen dee, waut am utfruagen, fuaz von am wajch, un uk de bowaschta Offizia fercht sikj, aus hee ieescht wist, daut hee een Reema wia un wäajens hee am jebungen haud.
30Aum näakjsten Dach, om daut jeneiwe to weeten, wuawäajen hee von de Juden beschuldicht worden wia, leesd hee am von de Benja un befool de Huagepriesta un äaren gaunzen Rot to komen; un hee brocht Paulus rauf un stald am ver äant.
Aposteljeschicht
Currently Selected:
Apj 22: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft