Apj 13
13
Barnabas un Saulus aufjeschekjt
1Doa wieren oba en Antiochia en de Jemeent Profeeten un Lierasch: Barnabas un Simon, dee de Näaja jenant wort, un Luzius von Kiereen un Manaen, dee met Herodes, dän Tetrarch toop, oppjewossen wia, un Saulus. Apj 11:27; 1Kor 12:28 2Aus see oba däm Harn deenden un fausten, säd de Heilja Jeist: Sondat Mie Barnabas un Saulus auf fa daut Woakj, wuatoo ekj äant beroopen hab. Apj 9:15 3Un aus see jefaust un jebät hauden un äant de Henj oppjelajcht, schekjten see äant auf. Apj 6:6
Barnabas un Saulus en Ziepern
4Un see nu, vom Heiljen Jeist rutjeschekjt, jinjen no Seleuzia, un von doa säajelden see no Ziepern. 5Aus see en Salamis kjeemen, prädijden see Gott sien Wuat en de Synagogen von de Juden. See hauden oba uk Johanes toom Deena. Apj 12:12,25 6Un aus see de Insel bat Pafos derchjereist wieren, fungen see eenen jewessen judischen Zaubra, een faulscha Profeet, met Nomen Bar-Jesus. 7Hee wia bie Sergius Paulus, däm Stautsfiera, eenen vestendjen Maun. Disa roopt Barnabas un Saulus un velangd, Gott sien Wuat to hieren. 8Oba Eliemas, de Zaubra (wiels soo woat sien Nomen utjelajcht), stunt äant jäajenaun un vesocht dän Stautsfiera vom Gloowen wajch to dreien. 9Oba Saulus, dee uk Paulus heet, voll vom Heiljen Jeist, kjikjt am stia aun 10un säd: Oo voll von aule Lest un von aul daut Beese, Diewels Kjint, een Fient von aule Jerajchtichkjeit! West du nich opphieren, däm Harn siene jlikje Wäaj to vedreien? 11Un nu kjikj, de Haunt vom Harn kjemt äwa die, un du woascht blint sennen un de Sonn fa eene Tiet nich seenen. Un fuaz foll Dunkelheit un Diestanis opp am, un hee jinkj rom un socht no wäm, om am aun de Haunt to leiden. 12Aus de Stautsfiera sach, waut passieet wia, jleewd hee un wia vewundat äwa de Lia vom Harn.
Bie Antiochia en Pisidien
13Aus oba Paulus un siene Bejleita von Pafos wajchfuaren, kjeemen see no Perge en Pamfielien. Johanes oba veleet äant un jinkj trigj no Jerusalem. Apj 15:38 14See oba reisden von Perge un kjeemen no Antiochia en Pisidien un jinjen aum Sabatdach en de Synagoge un saden sikj dol. 15Un no daut Jesaz un de Profeeten Väaläsen, schekjten de Synagogen-Väastona no äant un säden: Mana un Breeda, wan jie irjent een Moot brinjendet Wuat haben, dan rät. Apj 15:21
Paulus siene Prädicht
16Dan stunt Paulus opp un wonk no äant met de Haunt un säd: Mana von Israel un dee jie Gott ferchten, horcht! 17De Gott von dit Volkj Israel wäld onse Vodasch un erhoof daut Volkj, aus see Framdlinja wieren en daut Launt Ägipten, un met eenem oppjehownen Oarm fieed Hee äant von doa rut. 2Mo 12:37-41; 14:8 18Un Hee vedruach äa Vehoolen bie vieetich Joa en de Wiltnis, Ps 106:13-33 19un nodäm Hee säwen Nazionen en daut Launt Kanaan venicht haud, deeld Hee äant derch Loss äa Launt en. 5Mo 7:1 20Un dan jeef Hee äant Rechta vea-hundat-un-feftich Joa, bat Samuel, dän Profeet. Rech 2:16 21Un von doa aun prachaden see no eenem Kjennich, un Gott jeef äant Saul, Kisch sien Sän, een Maun vom Staum Benjamin, vieetich Joa lang. 1Sa 8:5 22Un aus Hee am wajchjenomen haud, wakjt Hee äant David toom Kjennich opp, von däm Hee uk Zeichnis jeef un säd: “Ekj hab David jefungen, Isai sien Sän, aus een Maun no mien Hoat, dee mienen gaunzen Wellen doonen woat.” 1Sa 13:5
23Von disem sien Nokomen haft Gott no de Vespräakjunk no, Israel dän Rada Jesus erwakjt. Jes 11:1 24Ver sien Engank prädijd Johanes to daut gaunze Volkj Israel de Doop von de Busse. Luk 3:3 25Un aus Johanes sienen Reess erfeld, säd hee: Wäa meen jie, daut ekj sie? Ekj sie nich dee; oba kjikj, Hee kjemt no mie, däm ekj nich wieet sie, de Schoo aun siene Feet op to leesen. Mrk 1:7; Luk 3:16; Joh 1:20
26Mana un Breeda, Kjinja vom Staum Abraham, un dee mank junt Gott ferchten, junt es dit Wuat von de Radunk jeschekjt. 27Wiels dee, waut en Jerusalem wonen, un äare Bowaschte, wäajens see disen nich kjanden uk nich de Stemmen von de Profeeten, dee aule Sabat jeläst woaren, haben see dee derch äa Uadeelen erfelt. Joh 16:3 28Un wan see uk kjeene Uasoak toom Doot fungen, prachaden see Pilatus, daut Am omjebrocht wort. Mat 27:22-23 29Un aus see aules vollbrocht hauden, waut von Am jeschräwen es, neemen see Am vom Holt rauf un läden Am en een Grauf. Mat 27:59-60 30Oba Gott haft Am von de Doodje opperwakjt. Apj 3:15 31Un Hee es äwa miere Doag deejanje erschienen, dee met Am ut Galiläa noppjereist wieren no Jerusalem, dee nu siene Zeijen sent ver daut Volkj. Apj 1:3 32Un wie vekjindjen junt de goode Norecht von de Vespräakjunk, waut aun de Vodasch jemoakt wort, 33dee dis Gott fa ons, äare Kjinja, erfelt haft, en däm Hee Jesus oppjewakjt haft, soo aus en däm tweeden Psalm jeschräwen steit: “Du best mien Sän, vondoag hab Ekj Die jebuaren.” Ps 2:7 34Daut Hee Am oba von de Doodje oppjewakjt haft, soo daut Hee nich mea saul en de Vewäsunk trigjgonen, haft Hee soo utjesproaken: “Ekj woa junt de true Boarmherzichkjeit von David jäwen.” Jes 55:3 35Doawäajen sajcht Hee noch opp eene aundre Städ: “Du woascht daut nich tooloten, daut dien Heilja daut Vewäsen seenen woat.” 36Wiels David, nodäm hee to siene Tiet no Gott sien Wellen jedeent haud, es enjeschlopen un wort bie siene Vodasch biejedonen un haft de Vewäsunk jeseenen. 37Dee oba, wäm Gott opperwakjt haft, haft de Vewäsunk nich jeseenen.
38Doawäajen, jie Mana un Breeda, sell jie weeten, daut junt derch disen Sinden-Vejäwunk vekjindicht woat; Ree 8:3-4 39un een jiedra dee doa jleeft, woat derch disen von aules jerajchtfoadicht, wuavon jie derch Moses sien Jesaz nich kunnen jerajchtfoadicht woaren. Ree 10:4 40Seet junt väa, daut nich äwa junt kjemt, waut en de Profeeten jesajcht es: Hab 1:5 41“Kjikj, jie Ve-achta, un vewundat junt un veschwinjt; wiels Ekj schauf een Woakj en june Doag, een Woakj, daut jie nich jleewen woaren, wan junt daut wäa vetalen wudd!”
De Heiden wellen noch mea weeten
42Aus oba de Juden ut de Synagoge rutjegonen wieren, prachaden de Heiden, daut dise Wieed to äant aum näakjsten Sabat jerät worden. 43Nodäm oba de Vesaumlunk vonenaunda jegonen wia, foljden väle Juden un gottesferchtje Judenjenossen Paulus un Barnabas, woone to äant räden un äant Moot muaken, en Gott siene Jnod to bliewen. 44Aum foljenden Sabat kjeem faust de gaunze Staut toop, om Gott sien Wuat to hieren. 45Aus oba de Juden de Volkjshäad sagen, worden see voll Aufgonst un wadaspruaken daut, waut Paulus säd, räden doajäajen un lastaden. 46Oba Paulus un Barnabas säden friemootich: Daut wia needich daut Gott sien Wuat junt sull daut ieeschte jesajcht woaren; oba wiels jie daut von junt steeten un junt selfst daut eewje Läwen nich wirdich achten, kjikj, wie dreien ons no de Heiden. Apj 3:25-26; Mat 10:5-6 47Wiels soo haft de Har ons befolen: “Ekj hab Die fa de Heiden toom Licht jesat, daut Du de Radunk best bat aun daut Enj von de Ieed.” Jes 42:1,6; 49:6; 60:3
48Aus oba de Heiden daut hieeden, freiden see sikj un lowden däm Harn sien Wuat, un doa jleewden, sooväl aus von äant fa daut eewje Läwen bestemt wieren. 49Un däm Harn sien Wuat wort derch de gaunze Jäajent utjespreet. Ree 8:29-30 50Oba de Juden reizten de aunbädende un aunjeseene Frues opp un dee väanämste Mana von de Staut un rechten eene Vefoljunk opp jäajen Paulus un Barnabas un dreewen äant ut äare Jäajent rut. 51See oba scheddaden sikj dän Stoff von äare Feet auf jäajen äant un kjeemen no Ikonion. Mat 10:14; Apj 18:6 52De Jinja oba worden jefelt met Freid un Heiljen Jeist.
Aposteljeschicht
Currently Selected:
Apj 13: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft