Dejla 9
9
E Savleskoro obratiba
1A o Savle bizo ačhojbe vakerela sine deka ka mudarel sa e Gospodareskere učenikon. Adaleske gelo ko baro svešteniko 2hem rodingja o lila bašo sinagoge taro Damask kote so ka pišinel deka šaj te arakhla okolen so džana palo o drumo e Gospodareskoro, muršen ili džuvlen, te phandel len hem te anel len ko Erusalim.
3Koga alo uza ko Damask, taro jekh puti i svetlina taro nebo silno svetingja uza leste.
4I ov pelo ki phuv hem šungja glaso so vakergja leske: “Savle, Savle! Soske progonineja man?”
5A ov pučlja: “Koj sijan tu, Gospode?”
A o glaso odgovoringja leske: “Me sijum o Isus, so tu progonineja man. 6A akana ušti hem khuv ko gradi hem ka vakerel pe tuke so trebela te kere.”
7A o manuša so džana sine e Savleja ačhile bizo lafija, soske šunge o glaso, ama nikas na dikhle. 8Koga o Savle uštilo tari phuv, phravgja pe jakha, ama našti sine te dikhel, i adaleske astarge le taro vas hem legarge le ko Damask. 9Trin dive našti sine te dikhel hem ništo ni hala ni pila.
10A ko Damask sine jekh učeniko so vikinela pe sine Ananija. O Gospodari ki vizija phengja leske: “Ananija!”
A ov odgovoringja leske: “Akje sijum, Gospode.”
11O Gospodari phengja leske: “Dža ko kher e Judaskoro, ki ulica so vikinela pe Pravo, hem rode jekhe manuše taro Tars so vikinela pe Savle. Ov akana molinela pe. 12A o Savle ki vizija dikhla jekhe manuše so vikinela pe Ananija sar avela hem čhivela pe vasta upro leste te šaj te dikhel.”
13A o Ananija odgovoringja: “Gospode, šungjum butendar bašo akava manuš so kergja but lošnipe te sveto manušenge ko Erusalim. 14Hem ov alo akate hem isi le vlast taro prvosveštenikija te phandel sarinen so verujnena ko to anav.”
15Ama o Gospodari phengja e Ananijaske: “Dža, adaleske so akale manuše biringjum le preku leste te šunen mandar o manuša so na džanena e Devle hem lengere cajra hem o narodo e Izraeleskoro. 16Me ka sikavav le kozom mora te cidel bašo mo anav.”
17Togaš o Ananija gelo, khugja ko kher hem čhigja pe vasta upro leste hem vakergja leske: “Phrala Savle! O Gospodari o Isus, so sikavgja pe tuke ko drumo dži kote aveja sine akate, bičhalgja man te šaj te dikhe hem te phergjove e Sveti Duhoja.”
18I taro jekh puti taro jakha e Savleskere pele sar lušpe, i ov dikhla. Togaš uštilo hem krstingja pe. 19I koga hala, irangja pe i sila leskiri. A ov nakhla nekozom dive e učenikoncar ko Damask.
O Savle propovedinela bašo Isus
20Hem odma o Savle počmingja te propovedinel ko sinagoge bašo Isus deka ov tano o Čhavo e Devleskoro.
21I sarine so šunena le sine iznenadime, hem pučle pe: “Nane li akava o manuš so ko Erusalim mudarela sine okolen so verujnena ko Isus? Na alo li ov akate te phandel hem te legarel len ko prvosveštenikija?”
22Ama o Savle ovela sine sa posilno ko propovediba, dokažindor e Evrejenge so živinena sine ko Damask deka o Isus tano o Hristos, i ačhavela len sine bizo lafija.
23I koga nakhle but dive, o Evreja maškar peste dogovoringe pe te mudaren le, 24ama o Savle doznangja bašo lengoro plani. O Evreja dive rat adžikerena sine anglo porte e gradeskere te šaj te mudaren le, 25ama leskere učenikija jekh rat mukhle le preku o zidija e gradeskere ki bari korpa.
26Koga alo o Savle ko Erusalim, mangla te ovel zaedno e učenikoncar, ama ola sarine darana sine lestar adaleske so na verujnena sine deka ov tano čače učeniko. 27Ama o Varnava lela le hem legargja le ko apostojla, i vakergja lenge sar o Savle, koga sine ko drumo dikhla e Gospodare hem deka o Gospodari kergja leja lafi, i sar ko Damask bizi dar propovedingja ko anav e Isuseskoro. 28Agjar o Savle ačhilo lencar, i slobodno phirela sine ko Erusalim hem bizi dar propovedingja ko anav e Gospodareske. 29Vakerela sine hem debatirinena sine e Evrejencar so kerena Grčki lafi, ama ola dikhena sine te mudaren le. 30Koga šunge o vernikija bašo adava, legarge le ki Cezarija hem bičhalge le ko Tars.
31Togaš i crkva ki celo Judeja, ki Galileja hem ki Samarija sine ko mir. Ovena sine silna živindor ki dar e Gospodareskiri, hem o broj e vernikongoro bajrola sine taro ohrabriba e Sveti Duhoskoro.
O sasljariba e Enejeskoro
32Dži kote o Petar nakhela sine taro thana e gradengere, alo te dikhel e vernikon so živinena sine ki Lida. 33Adathe arakhla jekhe manuše so vikinela pe sine Enej, so sine ofto berš paralizirimo hem pašlo ki postela.
34I o Petar phengja leske: “Enej, o Isus Hristos sasljargja tut! Ušti hem namestin ti postela korkori!”
Hem ov odma uštilo. 35Koga dikhle e Eneje sarinen so živinena sine ki Lida hem ko Saron, obratinge pe ko Gospodari.
O Petar vazdela e Tavita taro mule
36Ko gradi Jopa sine jekh učenička so lakoro anav sine Tavita – so značinela “Srna”, so sekat kerela sine šukaripe hem pomožinela sine e čorolen. 37I ko adava vreme nasvalili hem muli. Nagjarge la hem čhige la ki uprini soba. 38Ama koga šunge deka o Petar tano ki Lida soj paše uza ki Jopa, bičhalge ki leste duje manuše te vakeren leske: “Molinaja tut odma te ave amende!”
39O Petar uštilo hem gelo lencar, i koga resla, legarge le ki uprini soba. Sa o udovice tergjona sine uza leste, rovindor hem sikavindor leske o šeja so i Tavita kergja len koga sine dživdi.
40Togaš o Petar sarinen ikalgja len avrijal tari soba, i pelo ko kočaka hem molingja pe.
Togaš irangja pe ko mulo telo hem vakergja: “Tavita, ušti!”
Oj phravgja pe jakha, dikhla e Petare hem bešla. 41O Petar astargja la taro vas hem vazdingja la ko pre, i vikingja e vernikon hem e udovicen, hem sikavgja la deka tani dživdi.
42Bašo adava šundilo ki celo Jopa, hem but džene verujnga ko Gospodari. 43A o Petar ačhilo ki Jopa nesavo vreme ko jekh kožari so leskoro anav sine Simon.
Currently Selected:
Dejla 9: MAR
Highlight
Copy
Compare
Share
Want to have your highlights saved across all your devices? Sign up or sign in