Dejla 24
24
O Pavle anglo Feliks
1Palo pandž dive, resle ki Cezarija o baro svešteniko o Ananija hem nekozom starešine nesave advokateja so leskoro anav sine Tertil, i vakerge e upravnikoske o tužbe protiv o Pavle.
2Koga vikinge e Pavle te khuvel, o Tertil počmingja te vakerel i tužba anglo upravniko: “Cenimeja Feliks, tu sijan sebepi so živinaja ko baro mir hem so džaja anglale soske sekiringjan tut bašo šukaripe akale narodoske, 3hem amen adava ko sa o thana hem ko sa o načinja priznajnaja le so bari blagodarnost. 4Adaleske ma te lav tutar but vreme, ka zamolinav tut ko to šukaripe hari te šune amen.
5Doznangjem deka akava manuš tano buntovniko, so anela nemir maškar o Evreja ko celo sveto. Ov tano vodači tari sekta e Nazareteskiri. 6Dži mangla o Hrami da te ruminel, ama amen astargjem le. [Amen manglem te sudina leske spored amaro Zakoni, 7ama alo o naredniko o Lisija e bare vojskaja hem silaja lela le amendar, 8naredindor okolenge so tužinena le te aven angla tute.] Te ispitingjan le, ka šaj te doznajne korkori lestar bašo sa adava so tužinena le.”
9A o Evreja složinge pe leja, potvrdindor deka sa adava tano čače.
10Koga o upravniko dengja znako e Pavleske te kerel lafi, ov odgovoringja: “Džanava deka beršencar sijan sudija akale narodoske, adaleske mange tano šukar so ka braninav man angla tute. 11Šaj te proverine deka nane poviše taro dešuduj dive sar gelum ko Erusalim te slavinav e Devle. 12Adala so tužinge man na arakhle man deka ko Hrami nekasaja akošava man, ni deka buninava e narodo ko sinagoge ili ko gradi, 13hem ola našti te dokažinen tuke adava bašo soske akana tužinena man. 14Ama akava ka priznajnav tuke: Amare parapapongere Devleske služinava hem palo adava Drumo džava, so ola vakerena deka tano sekta. Verujnava ko sa adava soj spored o Zakoni hem ko sa soj pišimo ko lila e Prorokongere. 15Hem isi man isto nada ko Devel sar so isi akale manušen deka ka ušten taro mule hem o pravedna hem o nepravedna. 16Adaleske sekat trudinava man te ovel man čisto sovest anglo Devel hem anglo manuša.
17A palo but berša alum ko Erusalim te pomožinav me čorole narodo hem te dav žrtve e Devleske. 18I koga završingjum o adeti e čistibaskoro, ola arakhle man ko Hrami. Ama na sine khedime manuša uza mande hem na sine nisavi galama. 19Adala sine nesave Evreja tari Tikni Azija. Ola trebela te oven akate angla tute hem te vakeren pi tužba, te isi len nešto protiv mande. 20Ili, akala soj akate neka vakeren so lošnipe arakhle ki mande koga sijum sine anglo Evrejsko Sovet, 21osven te nane adava so vikingjum koga terdilum angli lende: ‘Tumen man avdive sudinena baši o uštiba taro mule.’ ”
22Togaš o Feliks, so šukar pendžarela sine o Drumo, mukhla o sudibe bašo nesavo javer dive, vakerindor: “Koga ka avel o naredniko o Lisija, ka rešinav tumaro slučaj.”
23I naredingja e kapetaneske te arakhen e Pavle o čuvajra, ama te del pe leske hari sloboda hem te dozvolinel leskere amalenge te grižinen pe leske.
24Palo nekozom dive, o Feliks alo pe romnaja e Druzilaja, so sine Evrejka, i bičhalgja te anen e Pavle hem šungja le sar kerela sine lafi baši vera ko Isus Hristos. 25Ama dži kote o Pavle kerela sine lafi baši pravednost, baši samo kontrola hem bašo sudo so avela, o Feliks darandilo hem vakergja: “Dosta tano akanaske! Šaj džaja tuke akana, a koga ka arakhav vreme, ka vikinav tut.”
26Ama uza ko adava, ov nadingja pe deka o Pavle ka del le pare. Adaleske da but puti vikinela le sine hem kerela sine leja lafi.
27I palo duj berš, e Felikse nasledingja o Porcij Fest. A o Feliks adaleske so mangla te ugodinel e Evrejenge, mukhla e Pavle ko zatvor.
Currently Selected:
Dejla 24: MAR
Highlight
Copy
Compare
Share
Want to have your highlights saved across all your devices? Sign up or sign in