Dejla 13
13
O Varnava hem o Savle birime baši misija
1Ki crkva ki Antiohija sine akala prorokija hem učitejla: o Varnava, o Simeon soj vikimo Niger, o Lucija tari Kirina, o Manain so barilo e upraviteleja e Irodeja, hem o Savle.
2Dži kote slavinena sine e Gospodare hem postinena, o Sveti Duh vakergja lenge: “Odvinen mange e Varnava hem e Savle baši buti ki savi me vikingjum len.”
3Palo postiba hem molitva, ola čhige pumare vasta upra lende hem bičhalge len ko drumo.
O apostojla propovedinena ko Kipar
4O Savle hem o Varnava, bičhavde taro Sveti Duho, gele ki Selevkija, i adathar plovinge ko Kipar. 5Koga resle ki Salamina, propovedinge e Devleskoro lafi ko Evrejska sinagoge, a o Jovan soj vikimo Marko sine lencar sar lengoro pomošniko. 6I sar nakhena sine maškar sa o ostrovija, resle dži ko Pafos. Adathe arakhle jekh Evrejsko magjišari hem hovavne proroko, so vikinela pe sine Varisus. 7Ov sine amal e upravnikoskoro o Sergija Pavle, so sine mudro manuš. Ov vikingja ki peste e Varnava hem e Savle, adaleske so mangela sine te šunel o lafi e Devleskoro lendar. 8Ama o Elima o magjišari – agjar tano prevedimo leskoro anav – protivingja pe lenge adaleja so mangla te cidel e upravniko tari vera.
9Togaš o Savle, soj vikimo Pavle, pherdo e Sveti Duhoja, dikhla ko Elima 10hem vakergja leske: “Tu e Bengeskoro čhavo hem dušmani ko sa soj pravedno! Pherdo sijan lošnipaja hem hovajbaja! Dži koga ka bangjare o prava drumija e Gospodareskere? 11Akje akana e Gospodareskoro vas tano protiv tute: ka koroljove hem nesavo vreme ka našti te dikhe e khameskiri svetlina.”
I taro jekh puti i temnina hem o kalipe pelo upro leste, i ov počmingja te vrtinel pe ko krugo rodindor nekas te astarel taro vas.
12Koga o upravniko dikhla adava so ulo, verujngja hem sine iznenadimo taro e Gospodareskoro učibe.
O Pavle hem o Varnava ki Pisidisko Antiohija
13O Pavle hem okola so sine leja plovinge taro Pafos hem resle ki Perga ki Pamfilija. Adathe o Jovan soj vikimo Marko mukhla len hem irangja pe ko Erusalim. 14A o Pavle hem o Varnava tari Perga gele ki Pisidisko Antiohija. Ki sabota khuge ki sinagoga hem bešle.
15Palo čitiba taro Zakoni hem taro Prorokija, e sinagogakere vodačija bičhalge dži ki lende te vakeren lenge: “Phrajlalen, ako isi tumen nesavo lafi te ohrabrinen e narodo, vakeren.”
16O Pavle uštilo, vazdingja po vas hem počmingja te vakerel: “Izraelsko manušalen hem tumen so darana e Devlestar, šunen: 17o Devel akale narodoskoro e Izraeleskoro, biringja amare parapapon hem kergja amare narodo te bajrol poviše ko vreme koga sine ko Egipet, hem pe bare silaja ikalgja len tari adaja phuv. 18Paše saranda berš trpingja len ki pustina. 19I koga ko Hanan uništingja efta narodija, lengiri phuv dengja pe narodoske e Izraelconge sar nasledstvo.
20Sa adava ulo paše štaršelu pinda berš. Palo adava o Devel dengja len sudije sa dži ko vreme e prorokoskoro e Samoileskoro. 21Togaš o narodo rodinge caro hem o Devel dengja len e Saule, o čhavo e Kisoveskoro taro pleme e Venijamineskoro. A o Saul vladingja saranda berš. 22Koga o Devel cidingja e Saule, čhigja e Davide bašo caro, so korkori vakergja o Devel baši leske: ‘Arakhlum e Davide, o čhavo e Jesejeskoro, manuš taro mo srce. Ov tano adava so ka kerel sa so mangava.’
23Taro e Davideskoro seme o Devel angja ko Izrael e Spasitele e Isuse, sar so vetingja. 24Angleder o Isus te avel, o Jovan Krstitel propovedinela sine bašo celo Izraelsko narodo bašo pokajanie hem bašo krstiba. 25Dži kote o Jovan kergja adava so trebingja, pučlja len: ‘Koj mislinena deka sijum me? Me na sijum adava so tumen rodena le, nego ov avela pala mande, so me na sijum dostojno leskere sandale te phravav.’
26Phrajlalen, čhave e Avraameskere hem tumen taro javera nacije so darana e Devlestar, amenge i bičhavdo akava lafi bašo spasenije. 27O manuša taro Erusalim hem o vodačija lengere na pendžarge e Isuse, nego osudinge le. Agjar pherge o lafija e prorokongere so čitinena len sine ki sekoja sabota. 28Iako na arakhle nisavi krivica bašo so zaslužinela meriba, rodinge taro Pilat te mudarel le. 29A koga kergja sa so sine baši leske pišimo, hujlarge le taro krsto hem čhige le ko grobo. 30Ama o Devel vazdingja le taro mule, 31hem but dive pojavinela pe sine okolenge so gele leja tari Galileja ko Erusalim. A akana ola tane leskere svedokija anglo Izraelsko narodo. 32Amen vakergjem tumenge o evangelije: adava so o Devel vetingja amare parapaponge, 33phergja le upro amare čhave, adaleja so vazdingja e Isuse taro mule, sar soj pišimo ko dujto Psalm:
‘Tu sijan mo Čhavo,
avdive ulum to Dad.’ #Ps 2:7.
34Adaleske o Devel vazdingja le taro mule, te na kjirnol nikat leskoro telo ko grobo. Sar so vakergja o Devel:
‘Ka dav tumen o sveta hem o sigurna blagoslovija so vetingjum e Davideske.’#Isa 55:3.
35Agjar hem ko javer than vakerela:
‘Tu nane te mukhe te Svetco te kjirnol.’#Ps 16:10.
36A koga o David phergja e Devleskoro plani ko po služiba pe narodoske, mulo hem sine parumo pe parapaponcar hem leskoro telo kjirnilo ko grobo. 37Ama okole, kas so o Devel vazdingja taro mule leskoro telo na kjirnilo ko grobo.
38Adaleske, phrajlalen, džanen deka preku o Isus sikavela pe tumenge oprostiba e grevonge. Hem taro sa so našti sine te opravdinen tumen preku e Mojsijaskoro Zakoni, 39preku o Isus opravdinela pe sekoj so verujnela. 40Adaleske pazinen te na ovel tumen adava so o Devel phenge preku o prorokija:
41‘Akje tumen so asana,
čudinen tumen hem oven uništime,
soske ka kerav nešto ko tumare dive
ko so nikat nane te verujnen sine
ako nekoj vakergja le sine tumenge.’”#Avak 1:5.
42A sar o Pavle hem o Varnava iklovena sine tari sinagoga, zamolinge len nesave manuša ki okoja sabota da te vakeren bašo adava. 43Koga o khedime gele peske, but taro Evreja hem taro pobožna manuša so obratinge pe ki vera e Evrejengiri gele palo Pavle hem palo Varnava, so kerge lencar lafi hem ohrabringe len te ačhon e Devleske ki blagodat.
44A javer sabota khedinge pe paše sa o manuša taro gradi te šunen o lafi e Gospodareskoro. 45Ama koga o Evreja dikhle e khedime narodo, pherdile ljubomoraja, i počminge te džan protiv e Pavleskere lafija hem te uvredžinena le.
46A o Pavle hem o Varnava bizo dar odgovoringe lenge: “Trebela sine prvo tumenge te propovedina o lafi e Devleskoro. Ama adaleske so tumen na mangena le hem na dikhena tumen sar dostojna bašo večno životo, akana iranaja amen ko manuša taro javera nacije. 47Soske agjar zapovedingja o Gospodari amenge:
‘Čhigjum tut te ove svetlina e manušenge taro javera nacije,
te ane o spasenije ko sa o thana e phuvijakere.’”#Isa 49:6.
48Koga o manuša taro javera nacije šunge adava, počminge te radujnen pe hem te slavinen e Gospodareskoro lafi, i verujnge sarine so sine odredime bašo večno životo. 49A o lafi e Gospodareskoro širinela pe sine ko sa adava than.
50Ama o Evrejska vodačija vazdinge buna maškar o poštojme hem o dostojna romna hem vodačija e gradeskere, i počminge te progoninen e Pavle hem e Varnava hem brkinge len taro pumaro than. 51A ola tresinge i prašina taro pumare pre sar znako deka nane len ništo lencar, i gele ki Ikonija. 52A o učenikija sine pherde so radost hem e Sveti Duhoja.
Currently Selected:
Dejla 13: MAR
Highlight
Copy
Compare
Share
Want to have your highlights saved across all your devices? Sign up or sign in