LUKE 8

Jisu de Ngngwa kela Mipui dung

1Pecai pa zette renam kedi nah keceuna dung ga mide ledeu nah Tinggwang hegwang Samlia keyibe rangrwa ladi, nah kereikena bau pecu ngngwa la, 2#Mat. 27:55,56; Mrk. 15:40,41; Luk. 23:49.nah mipui penui dade herakesiabe gwa kedi nah penui mateei tei myi kebeu dungge de pecu ngngwa la: Mary, Magdalene lie qu kela peda de herakesiabe sena mpet kedibe pui, 3nah Herod kikwabe Chuza nau Joanna, nah Susanna, nah penui katei penui gu le penui de telei kela mina kekiee de si.

Heleuh Kegibe Samgwa

(Mat. 13:1-9; Mrk. 4:1-9)

4Mina maadi ge renam pelane gade gwang nkwa luge pa samgwa ge teu rang eh cu:

5“Heleuh kegime ge pe leuh gi zie lie miedi; nah pa gi gaige kesa lampui kuung ga cak mie ge pidauh tei di, nah tinggim ruine dung ne cide pa tyei lu. 6Nah kesa tsura reu ga cak miedi; nah cide lungh cu luge kihdi, kedanemene cide pe kehwah kegane. 7Nah kesa cak hetuupui kak ga lüt di; nah hetuu cide de ngngwa lungh cu lü cide de zin cet di. 8Nah kesa nnya keyi ga cak mie lü lungh cu lu, ciciu eh ket tsi haihai buih lu.” Nah pa cide rang cang dige sabaq eh, “Kingnei kera pe kwen kebamme de peu kingnei lulo,” debeu.

Samgwa Kieh

(Mat. 13:10-17; Mrk. 4:10-12)

9Pa ne ledeukelume samgwa aide pekieh depai bi peda de keteu, 10#Isa. 6:9.ge pa cu, “Nnui de au Tinggwang hegwangram kebai teu kela dung de ci lu kera peu dida; dede kedame dung ziemne au samgwa dung gade, cine penui ngau bam de ngau luma, nah siu bam de penui ci lu tadi kerane.

Heleuh Kegibe Samgwa Kieh

(Mat. 13:18-32; Mrk. 4:13-20)

11“Samgwa de au ainzwa: heleuh cide Tinggwang sam da. 12Lampui kuung ga kebam dung de siu kelume dung; ciciu eh peu penui de nlum lü keli lu melu kerane Satan penui da gwang eh sambe penui lung gade keuteu dila. 13Tsura reu ga kebam bedung decai sambe siu luge penui suiyi eh luu lu kelame, dede aidung de pemah ga, penui kak ge nlum lu nah mdakkepie gwang ge kau dila. 14Hetuupui dung kak ga cak mie kedi dung cai, penui siu kelume, dede penui lungh si hang ge penui de kideu aika teilung zai dung ne nah mahei nah kideu aika nlwang dung ne zin cet di kelame ciciu eh penui tsi cih cang lu lama. 15Nah nnya keyi ga kebamme cai, penui sambe siu lü cide teu masang nah penui lungh keyi gage kaiteu eh penui lungh tie eh petsi buih lu kelame.

Mitaubung gade Keledeu

(Mrk. 4:21-25)

16 # Mat. 5:15; Luk. 11:33. “Migede mibung ntau lü li gage pwa gum di lama mede cide jeu kang gage kai lama dede pe bahm gage kaila, ciciu eh mi tet kelütme de kebaabe gimbaa kerane.

17 # Mat. 10:26; Luk. 12:2. “Kedanemene magede peu ngau laklie kebai pwa kela gah lu, mede peu ci laklie mede hegole teupet laklie kenkim gede gah lu.

18 # Mat. 10:26; Luk. 12:2. “Nnui dainzwa kingnei zeu bi, cet siakte lulo; kedanemene kebambe de peu kiee si zie nah kegabe dade pa kecet gade bam ha kebam na dede keuteu si dizie.”

Jisu Pui nah Siname

(Mat. 12:46-50; Mrk. 3:31-35)

19Cipau cai pe pui nah pe siname peda gwang dede mina maabe ziemne penui peda lüt paah di. 20Ge mi peda ge rang eh, “N pui nah n siname ncu ngau neu eh peei lalie,” debeu.

21Dede pa penui dage rang eh, “Cau dung Tinggwang sam kingnei lu eh cide tei mzai labi, cipaume a pui nah a siname delie,” debeu.

Jisu Tingkai de Kekesei

(Mat. 8:23-27; Mrk. 4:35-41)

22Pa tingnai ge ledeukelume de lim gega ngngwa nlüt lu, delü penui dade, “Anui rejaai lule gim kah pet lugo,” debeu. 23Cine penui tet mpet nah penui mpet lage pa zip di. Nah rejaai ga tingkai gui süt di, cine penui de duile puih di, nah penui kengngi ga ladi. 24Ge penui peda gwang pecu nkia eh cu, “Keledeubo, keledeubo, anui kap di lauda!” dedi.

Ge pa mrak lü tingkai nah dui nswak de kesei; ge penui mtak di nah zing dedi. Nah pa penui dage rang eh, “Nnui kenlum daiga bam no?” dedi. 25Nah penui ngngi di, nah penui sui gah eh ketket dade, “Aide ai cau no, tingkai nah dui dage de sam rang gaige pe sam mzai kecu,” dedi.

Jisu Herakesia Ngngwa kela gede Teimmi kebeu

(Mat. 8:28-34; Mrk. 5:1-20)

26Cipau cai penui Gerasa#8:26. Gerasa (Mat. 8.28 ga pielu); kedabe dung bam Gergesa. nam ga gwanglü Galilee de kenco ga bam. 27Nah pa kemduu ga tet mpet ge renam gade herakesiabe ngngwa kelame ge pecu redau lu; nah peting ketie ge paiheni teu ma, nah kilung gade lungh mene herau dung kak ga ladi. 28Dede pa Jisu de ngau luge sabaq eh pedwa ga mie zeudi nah sam rang baq eh, “Nang acu teu depai tei kera bam no; Jisu Tinggwang Hutube Napei? I nda de a nggia kiela, acu tei keherei helo,” dedi. 29(Kedanemene pa mci kemak rabe de mpet di lo minabe dade lang kegaine. Kedanemene ketie ge cide ne pecu keliang kedine; pecu mine kwa nah pikangle kaang, dede pa pikang cidung de pungcak lü herakesiabe ne pecu gwa renaamkang gage kai di dila kecune.)

30Ciciu ge Jisu pecu keteu eh, “N zi cau no?” dedi.

Ge pa “Legion” debeu; kedanemene herakesiabe kekiee peda lüt kedine. 31Nah peda de penui nggia kie eh penui de langpwa kecuk#8:31. kecuk: Herakesia bedung de kideu kecuk gage penui de saja peu kemak kecang baang nzeu lalie cet la. gage kai di helo di.

32Cidau hebak maadi ge kideutuh ga manuii tyei la; nah penui peda de penui nggia kie eh peu cipau maga lüt di lodi. Cine pa cidung dede gwang di lo beu. 33Ge herakesiabe minabe dade mpet lü hebak dung ga lüt di, nah hebak maabe pak rejaai kuung hetiatuh ga hungh eh rejaaibe ga lüt di, ciciu eh penui de kegak cet di.

34Hebak kekwame cide ngau eh pak di, nah cide renam ga nah luh ga gede rang gai. 35Ciciu ge mina dung tei kedi dung de pie zie lie mie eh Jisu da gwang lu, nah mina peda de herakesiabe mpet kedibe de pelung de petau di nah pe pai pe ni de teu lü Jisu da bam eh ngau lu; ciciu eh penui ngngi di. 36Nah cide kengaume dainzwa herakesiabe ne ngngwa kelabe de tei myi lu bi kecu penui dage ranglia. 37Ciciu ge Gerasa nam togwapung kebam mina pelane pecu penui dade tetti lo kie di; kedanemene penui ngngi süt kedine; cine pa lim lung ga lüt lü tet caili di. 38Mina peda de herakesiabe mpet kedibe de pecu ngngwa lazie lie pe nggia kie; 39dede pa pecu langgi eh cu “N ki ga gwang dai cu, nah Tinggwang dai kenzwa ge n ziemne tei gai bi mi dage lia lo,” debeu. Nah pa Jisu dai kenzwa ge peda ge tei gai bi cide renam pelane ga sa rang gwang di.

Jairus Napui nah Jisu Pairi kedeu Mipui

(Mat. 9:18-26; Mrk. 5:21-43)

40Jisu nli gwang ge mina maabe penui suiyi eh pecu ngngwa lu, kedanemene penui pelane pecu kwa kebam ne. 41Nah cika mige pezi Jairus peda gwang, pa synagogue ga hangkiame ge; ge pa Jisu pi ga keumie eh pecu pe ki ga gwang lo peda de pe nggia kie, 42kedanemene pa pe napui mmi kereikena nage rünsangne bam ge pa tsaina süt bam kedine. Pa gwang kezeu dau mina dung pecu niah titi ladi. 43Nah mipui mmi kereikena hejai lwa la kedipui ge la; pa pe mabam pelane doctorme dage mpet ti,#8:43. Laisiu dung kesa ga bam ma pa pe mabam pelane doctorme dage mpet ti. dede migede pecu tei myi lu tadi. 44Pa pecai ga gwanglü pe pairi deu gai, ciciu ge hejai keloah de kaam zette di. 45Ge Jisu cu, “Cau acu deu ah?” dedi. Mina pelane melie dige Peter cu, “Keledeubo, mina kekiee ncu togwa la nah niah titi la!” dedi.

46Dede Jisu cu, “Mige acu deulie; kedanemene ada de kenkieng mpet kedi I ci bam di delu,” debeu. 47Nah mipuibe pecu ngau pwa kedi ngau dige, pa mbeu eh gwang pedwa ga keumie eh, mina pelane kebam gade daitei eh pa pecu deu bi nah dainzwa eh pa yi zette lu dibi kecu rang gai. 48Nah pa peda de, “A napoe, n kenlum ne ncu tei myi luda; n lung nciep eh gwang lu,” debeu.

49Pa marang kesap dau mige hangkia be ki gade gwang eh cu, “N napui tsai dida, Keledeube de tei keherei si talu,” debeu.

50Dede Jisu aide siu eh pe sam keli eh cu, “Ngngi so, nlum kelu gwale, nah pa yi luzie,” debeu.

51Nah pa cipau ki ga gwang luge Peter, Johan nah Jakob nah hena nabe pui penai pe pei de gwale peu mi keda de kilung lüt ma. 52Nah mina pelane hap nah pecu heei bam; dede pa rang eh cu, “Hap so; kedanemene pa au tsai ma, dede zip bam lu,” debeu.

53Nah penui pa cai kedi ci kebam ne pecu nuih di. 54Dede pa pe ba teu lü qu eh cu, “Releipoe, cu lu,” degai. 55Ge pe rabe nli gwang lu, delü pa zette cu lu; nah pa penui de peu pecu matyei kera peu lo rang beu. 56Nah pe pui pe pei penai sui gah di; dede tei kedi dung de mina dage rang helo pa penui de kaam di.

Currently Selected:

LUKE 8: ZemeNB

Highlight

Copy