LUKE 20

Jisu Kenkieng ha Keteu kecu

1Tingnai ge pa Kerecaki ga mina de ledeu nah Samlia keyi ranglia kebam dau, cingkume nah laisiu kecime nah hangkiame peda gwang, 2“Nang depai kenkieng teu aidung de teila bi anui dage ranglia lo, mede cau ne kenkieng aide peu no,” dedi.

3Pa penui dade, “I de nnui dade mage keteu zie; acu ranglia lo. 4Johan duipum keteibe de tinggim gade mi mina dade gwang no?” dedi.

5Ge penui hang ge gede mpau eh cu, “Anui ma gade ‘Tinggim de’ decai pa ‘Daitei nnui pecu nlum lu meno?’ de zie. 6Dede anui ‘Mina dade’ decai mina pelane anui de ntsu le saam zie; kedanemene penui Johan de caihakecime ge lie lalu” dedi. 7Cine penui cide dai gade gwang bi ci melie di.

8Ge Jisu penui dade, “I de daipai kenkieng teu aidung de teila bi nnui dage rang lak,” dedi.

Kubetsi Luh ga Kenlienme Samgwa

(Mat. 21:33-46; Mrk. 12:1-2)

9 # Isa. 5:1. Ge pa samgwa aide mina dung dage ranglia eh cu: “Mige kubetsi luhpak ge talu, delü cide pwa heta ketaame de peu delü kak ge renam keda gega gwang di. 10Peting cang dige pa kilame gede langpwa heta ketaame dage kai eh penui de pecu kubetsi lu gade peu lo kie dede heta ketaame pecu dap eh mta langgi di. 11Ge pa kila keda gede lang gai dai; ge penui pecu de dap nah tei hengam tei süt gai eh pecu mta langgi dai di. 12Dede pa pekecum bede lang gai dai; penui aipau dede tei rezam di eh pwa kelien gidi. 13Ge kube luh mpaube cu, ‘I depai tei zie ah? I a na a kube de lang gai zieda; penui pecu au rüt zie ha.’ 14Dede heta ketaame pecu ngau luge, penui katei resiu eh, ‘Aide pe mapwabe da, anui pecu daptset di go, delü pema anui gu di kera’ dedi. 15Ciciu eh penui pecu lu gwale teumie daptset di.

“Ciciu cai kube luh mpaube penui de pwa depai tei zie ah? 16Pa gwang delü heta ketaa deu dung de nkap dizie, delü kube luh cide kedame de peu dizie” dedi.

Penui aide siu luge cu, “He, ciciu siabi” dedi.

17 # Lei. 118:22. Dede pa penui de pie eh cu,

“He rauteu kela aide ai daino?

‘Ntsu ta keteime gikedibe tsuqang de cide pe kimiak ga kedibe tei bam dida?’ de kecu de.

18Keheibe de ntsu cide reu cak kemieme de rüt kecai dizie; nah ntsu cide keheibe reu cak mie de cide pecu tei pang kecai niak dizie.”

Heraha Keha ha Keteu kecu

(Mat. 22:15-22; Mrk. 12:13-17)

19Cipau ting siak dau laisiu kecime nah cingkume pecu tuih lu neu cu, dede penui mina dung de hing di; kedanemene penui pa samgwa aide penui ziemne rang zeu lie cet kelu ne. 20Cine penui pecu kwa bam di, nah reketme de lang gai eh peu penui de makesangme rehi tei eh pe sam tuih lü pecu hezaibe nah renam reu hegwang tei kebambe ba gage tui gai beulu kerane. 21Penui peda de keteu eh, “Keledeubo, nang kesangbe teu mi dage rang ledeu kela anui ci, nah keneu kerüt tei lama, dede Tinggwang lampui kesangbe mide ledeu lala. 22Caesar ha ha kecu petau mi meno?” dedi.

23Dede Jisu penui ciem ci lü penui dade, 24“Acu rangkang goi ge keulia lo. Cika ge cau mie nah cau zi raupwa lano?” dedi.

Ge penui, “Caesar mie” dedi.

25Ge pa penui dade, “Ciciu cai Caesar gube pwa Caesar de peudi lu, nah Tinggwang gube pwa Tinggwang de peudi lu” debeu.

26Ciciu eh pa kerang sam de ziemne penui mina kebam gade pecu tui gailak di; dede pe sam siupwa penui sui gah eh nlei tadi.

Ketsaime Ringkecuh ha Keheteu

(Mat. 22:23-33; Mrk. 12:18-27)

27 # Bat. 23:8. Cika Sadduceeme ketsaime ring nli cu la melie de kela dungge peda gwang, 28#Hez. 25:5.ge penui sam ge pecu keteu eh, “Keledeubo, Mosa anui dage hezai rau kebeu ma gade mige pe swacingbe pe nau tei lü pe na lungh mene tsaidi cai pa pe nau de ngngwa lungh lü pe swacingbe leu mteu lu maisia lie beu. 29Ciciu ge caireiswacing hang sena lage; cingtu be pe nau tei lü pe na lungh mene tsaidi; 30ge pe caibe mipui cide de pe nau lu, 31nah pekecum bede cipau pui de luu lu, nah ciciu eh hang sena bau de pelane pecu luu eh pe na tei mene tsaikap dida. 32Pecai cii paupui dede tsaidi. 33Cine ketsaime ring nli cu kecu benai cipau pui de cau be nau zie no? Kedanemene mi hang sena bau de pecu pe nau kap de kecune” dedi.

34Jisu penui dade, “Cudau name hemeu tei bam la; 35dede cau ketsai gade ring nli cu lu kebuime bi nah lube teilung ga lungh lu kebuime bi penui henau tei hemeu meu mede meunui de tei lama, 36kedanemene penui tsai daulak ta, kedanemene penui ring nli cu dai kecube name nah Tinggwang nam tinggimgwame nzwa dizie kecune. 37#Tet. 3:6.Dede ketsaime de qwakcuh kelu ha Mosa nede keulia da, tsinghum ha de gade, cika de pa Rampaube Abraham Tinggwang nah Isaac Tinggwang nah Jakob Tinggwang de qu. 38Ciciu eh pa au ketsaime Tinggwang ma, dede keringme Tinggwang; kedanemene peda de pelane ring kebam ziemne” debeu.

39Ge laisiu kecime kangge pe sam keli eh, “Keledeubo, nang rangdau da” dedi. 40Kedanemene penui sam keda gede pecu keteu ngngi kedine.

Messiah ha Keheteu

(Mat. 22:41-46; Mrk. 12:35-37)

41Dede pa penui dade, “Dainzwa penui Khrista David na lie rang lulai?

42 # Lei. 110:1. Kedanemene David pekatei de Lei. Laisiukwak gage rang kecu,

‘Rampaube a Rampaube dade:

A ba zetle bam lu

43I n ngauraume de pwa n pidauh tei di kemaktane.’

44Ciciu eh David pecu le pe ‘Rampaube’ qu; cine dainzwa pa pe na ah?” debeu.

Jisu Hezai kecime daze Mriak lulo kecu

(Mat. 23:1-36; Mrk. 12:38-40)

45Pa mina pelane kesiu gade pe caisuime dade cu, 46“Laisiu kecime dade mriak lulo, penui penui pai ketie dung bah lü rwapwa lala, nah liitak ni dung gade mide peu penui de kelum neu lala, nah synagogue dung gade hebahm yitu dung ga bam neu lala. 47Penui hemipui gu süttyei lala nah hezaitei eh kekie tei tie süt lala. Penui mau ziehi au diki zie.”

Currently Selected:

LUKE 20: ZemeNB

Highlight

Copy