LUKE 14

Jisu Keteeibe ze Teimmi kebeu

1Sabbath nai ge pa Phariseeme hangkiame ge ki ga matyei zie lie bam kelu dau, penui pecu kwa bam. 2Nah ainie, cika pe pi pe ba mma kecume ge Jisu da gwang. 3Nah Jisu hezai kecime nah Phariseeme dade, “Sabbath nai mide tei myi kecu mau mi meno?” dedi.

4Dede penui nlei ma. Pecai mina cipau dede deu eh tei myi beu, delü peu tet di. 5#Mat. 12:11.Nah pa penui dade, “Nnui cau be gada ge mede ketumseu ge bam eh cide heko gega Sabbath nai cak lüt di eh pecu zette teu mpet kelak cau bam no?” dedi.

6Ge penui pe sam keli lu tadi.

Kehenah nah Ngau kenggia

7Cika matyei zie lie qu gai eh kebamme hebahm keyi pei eh bam kedi ngau eh pa cu, 8#Mac. 25:6,7.“Nnui de keheibe meunui ngyi gage qu kegai dau, hebahm keyi ga bam diso, kedanemene pa mi n swade hetwapungki kecu gede qu nzeu eh; 9nnai hang nana de qu kegaibe gwang nda de, ‘N bam aipau dede peu lo’ debeu cai nang ngngam eh hebahm henahtu na ga bam di zielu. 10Dede nnui de qu kegai dau gwang eh hebahm henahtu na ga bam lu, ciciu de n giabe kegwang dau pa nda de. ‘A zangbo, kecehu ga nghang lulo’ debeu zie, ciciu cai nang cika matyei zie lie ncu ngngwa kebam pelane dade hetwa punglu builu. 11#Mat. 23:12; Luk. 18:14.Kedanemene keheibe de pekatei pecu tei mdi teu kelabe de tei henah dizie, nah cau pekatei pecu tei henah teu labi, cipau dede tei mdi beuzie.”

12Pa pecu qu kegaibe dade de cu, “Nang tingna mede tingmui mide matyei zie lie qu kecu dau nang n zangme mede n siname mede n kibaume mede n kidame keheime de qu so, ciciu cai penui de ncu qu dai zie, nah n pauh kap dai dizie. 13Dede nang mide ngngwa matyei neu cai, kegame, kennoime, keswahme nah mikcietme de qu lulo, 14ciciu lu cai nang samlam pung luzie, kedanemene penui n pauh peu dai gai laklu. Makesangme ring nli dai kecu benai n ziehi tei beu dai zie.”

Hengyi kedi Samgwa

(Mat. 22:1-10)

15Matyei zie lie kebam medung hang ge sam aide siu luge Jisu dade, “Tinggwang hegwang gade hengyi kelume samlam pungtu!” dedi.

16Dede pa cipau de dade, “Mige hengyi kedi ge telei lu, nah cii kage mina kekiee de qu gai. 17Matyei kera tingbe cang gwang dige pa pe nkütme de qu kenzeume de, ‘Gwang lulo, ma pelane telei lu delie!’ delo beu. 18Dede penui hang gege eh teidau laklie kap di. Mige kilabe dade, ‘I luhpak ge lui pwabam ge, I mie cide pie maisia lie, nang acu ngaunggia eh peu mie maisia’ dedi. 19Keda ge, cu, ‘I ketumseu zura mengei lui pwabam ge, I mie cide yimi siabi pie maisia reu; peu acu mielo I nda de a nggia kiela!’ dedi. 20Nah keda ge cu, ‘I a nau tei luda, cine I mie gailak da,’ dedi. Cine kilabe caili gwang aide pe mpaube dage rang beudi. Ge kilung mpaube perata eh 21kilabe dade cu, ‘Renam puidi nah puiceu dung ga zette miecu, delü kegame de nah kennoime, nah keswahme nah mikcietme leu de qu teugwang lu,’ dedi. 22Ciciu ge kilabe cu, ‘Rampaubo, nang rang kebeu nzwa tei luda,’ dede hebahm bamreu dedi. 23Ge Rampaube kilabe dade, ‘Nang puidi nah puiceu dung ga mie eh mina dung de gwang bih lulo beu lo, delü a kibe tei puih lu kerane. 24Kedanemene I nda ge ranglia zie mrai qu kenzeume hang gede hengyi telei pwa kebam de nsi lak telu!’” dedi.

Jisu Caisui ketei Kewhung

(Mat. 10:37-38)

25Mina maadi ge pecu ngngwa kela dau, pa nreu gwang penui dade cu, 26#Mat. 10:37.“Mina keheibe de ada gwang eh pe pei, pe pui nah pe nau nah pe name nah pe caireiswacingme nah pe time nah pekatei pepum dede kumelu mai pa a caisuime tei gailak. 27#Mat. 10:38; 16:24; Mrk. 8:34; Luk. 9:23.Keheibe de pe cross pwa mene a caisui cai pa a caisuime tei gailak.

28“Kedanemene nnui cau be, renei ge tei zie lie kecu dau, keraibe pa bam lu delü pa cide teicang lu kera bam mi de kecu cet la meno? 29Ciciu mecai, pa pe bangdua lü teicang lu gailak di cai, cide kengaume leune pecu nuih eh, 30‘Aipau de pe bangdua cu, dede teicang lu gailak dida’ de dizie.

31“Mede hegwang cau be hegwang keda gede ngngwa heroi tei zie lie kecu dau, keraibe bam lu delü pa mina chang kerei de ngngwa lü ngauraume peda gwang kezeu chang nkai de redau lubui mi mebi cet kemak bam no? 32Nah ciciu mecai, lube kemdei ga kela dau ge, pa pe gwame de lang gai eh peu ngngwa yidi kera keteu la. 33Cine nnui keheibe de pe gu kebam bedung pelane püt ti kucai pa a caisuime tei gailak.

Mcai Kuumta kedibe

(Mat. 5:13; Mrk. 9:50)

34“Mcai au yi, dede mcai pekum ga di cai dainzwa eh tei nkum dai lulai? 35Cide kideube ziemne mede nyara ziemne de pe keyi ga da; mina cide kelien gi dila. Nking kera pe kwen kebamme de peu nking lulo.”

Currently Selected:

LUKE 14: ZemeNB

Highlight

Copy