JOHAN 4

Jisu nah Samariame Pui

1Jisu au Johan swade ledeukelume de ngau kiee lu nah duipum tei kiee lu bam kedi Phariseeme siu lu. 2(Kesangbe, Jisu au mige dede duipum tei ma; pa ledeukelume rünne.) 3Cine marang kebam Jisu siu luge, pa Judah püt ti delü Galilee ga caili gwang di; 4pe lampui cika de pa Samaria tet kah gwang kerabe di.

5 # Ken. 33:19; Jos. 24:32. Samaria ga pa renam Sychar ga gwang lu, cide luh ge Jakob ne pe na Joseph de kepeu de gade dei ma. 6Jakob tekwa cika bam, nah Jisu hebeuh tei eh leeu di, tekwa tai ga ntum lu. Cide tingna tingding dau ge.

7Samariame puige dui twak kera gwang, ge Jisu peda ge rang gai, “Dui sak kera acu peu lo.” (8Pa ledeukelume ketyeipuk lui kerane renam ga miedi.)

9 # Ezr. 4:1-5; Neh. 4:1,2. Mipui keli gai. “Nang au Judahme ge, nah I au Samariame ge cine nang dainzwa ada de sak kera kie lu laino?” (Judahme au Samariame kwak piak pwa lama.)#4:9. Judahme au Samariame kwak piak pwa lama; mede Judahme au Samariame de ngngwa magede tei kera gah.

10Jisu keli gai “Nang Tinggwang peu kelabe ci nah nda de sak kera kie kebam be cau bi kecu ci lie cai, nang peda de kiede, pa ncu kering peu kela dui peu zie nage.”

11Mipuibe rang, “Kedihbo, nang duibung bam ma, nah tekwabe au cuk. Nang daiga de kering peu kela dui de ngau lu laino? 12Anui pao Jakob ne tekwa aide anui de peu; pa nah pe name nah pe kauhau pelane cika de sak lie. Nang Jakob swa dihki lie rang mahai, nang ciciu lani?”

13Jisu keli gai, “Cau dung dui aide sakbi hereu dai dizie, 14dede I dui peu lai eh kebam de kesakme leune madaude hereu dai dilak. I dui pecu peu lai eh kebam de pecu kering peu kela dui ge tei eh pelung gade duipwak ge tei dizie nah pecu kelungta kering peu zie.”

15Mipuibe rang di “Kedihbo, acu dui cide peu lo! Ciciu de I madaude hereu dai dilak, mede dui twak kerane aika gwang lak.”

16Jisu peda ge rang gai, “Mie n naapei de qulu delü caili gwang lu.”

17Pa keli gai, “I a naapei bam ma,” Jisu keli gai, “Nang n napei bam melie rang kegai petau da. 18Nang mi hang mengei dage meu gaida, nah nang cu pecu ngngwa lungh kebambe au n naapei kesang ma. Nang ada ge kesangbe rang gaida.”

19Mipuibe rang di, “Nang au caihakecime ge kecu I ngau da, kedihbo. 20Samariame a paome lamlwatuh aika de Tinggwang ze reca, dede nnui Judahme Jerusalem au Tinggwang ze kereca ni lie rang la.”

21Jisu peda ge rang gai, “Acu nlum lu, mipui, mina dung lamlwatuh aika de mede Jerusalem gade Peibe de reca kelak ting gwang zieda. 22Nnui Samariame cau de reca kesang labi ci lama; dede anui Judahme anui reca kelabe de ci bam, kedanemene Judahme dade kelikelu gwang kecune. 23Dede peting gwang lada nah aika gwang bam dida, Tinggwang Rabe gade mina dung Peibe de pa kesang kecu gade reca kera, pa luu neu kela reca kesangbe pecu peu kera. 24Tinggwang au rabe, nah pe Rabe kenkieng gade rünne mina dung pa kesangsiak kecu nzwa pecu reca lubui.”

25Mipuibe peda ge rang gai, “I Messiah gwang kera ci bam, nah pa gwang de, pa maleune anui dage ranglia zie.”

26Jisu keli gai, “I au pa da, I ncu ngngwa mpau kebambe de.”

27Cidau ting siak Jisu ledeukelume caili gwang, nah pa mipui gede ngngwa mpau kebam ngau eh penui swaga süt ti. Dede penui migede peda ge rang ma, “Nang daipai luu neu lano” mede pecu, “Nang daitei cipau pui de mpau bam no?” de kecu keteu ma.

28Pecai mipui de pe duibung püt ti eh renam ga caili gwang di, delü cika mina dung dage rang beu, 29“Gwang eh pielo I tei kedibe leune ada ge rang keliabe de. Pa Messiah lubui deni?” 30Cine penui renam be püt ti delü Jisu da miedi.

31Cidau ledeukelume Jisu dage kie gai, “Keledeubo, matyei lulo.”

32Dede Jisu keli gai, “I nnui ci kemak ketyeipuk tyei kera bam lie.”

33Cine ledeukelume penui kak gade keteu cuh di, “Mige pecu ketyeipuk teugwang beu deni?”

34Jisu penui dage ranglia, “A taktyei, au acu langkegaibe samlia kemzai deda nah pa acu tei lo kebeu de teicang kelu de delie.” 35Nnui sam ge rang la, kei mdai si lude luhlüt zieda, dede I nnui dage rang la, luh dung de pie sünne gailo; cu au mei dung meuh bam dida nah luhlüt kera ting dida! 36Luhlüt eh rum kelabe de hezieh lui teu la dida nah kelungta kering ziemne meitsiu pwa hekwa la dida; cine heleuh gi kelabe nah rum kelabe ngngwa penai suiyi luzie. 37Rang kela sam de kesang, ‘Mige heleuh gi la, kedame rum la.’ 38I nnui de nnui heta tei kemak luh ge gage luhlüt lulo lang gai; kedanemene cika heta tei gai, nah nnui penui ta gade mmyi lu.”

39Renam ga Samariame kekiee ge Jisu ze nlum lu kedanemene mipuibe, “I tei kedi leune pa ada ge ranglia,” de rang kegaine. 40Cine Samariame peda gwang luge, penui pecu penui de ngngwa bam lo kie di, nah Jisu lang nane cika bam di.

41Pe sam de ziemne mina kekiee ge si eh nlum lu, 42nah penui mipuibe dage rang gai, “Anui cu au nlum luda, nang kerang de ziemne ma, dede anui katei pe sam siu kelu ne, nah pa au kideube de kelikelube kesang kecu anui ci luda.”

Jisu Kedihme Napei ze Tei nkeih kebeu

43Lang nane cika bam kelu cai, Jisu Galilee ga miedi. 44#Mat. 13:57; Mrk. 6:4; Luk. 4:24.Pa pekatei de rang kegaine, “Caihakecime gede au pekatei pe deudi ga rüt lama.” 45#Jhn. 2:23.Pa Galilee ga gwang luge, cika mina dung pecu ngngwa lu, kedanemene penui Jerusalem ga Kahkegwang ngyi ga mie eh hengyi dau pa tei kegai leune ngau kecune.

46 # Jhn. 2:1-11. Pecai Jisu Galilee ga Cana nam ga caili gwang di, pa duile zau tei kegai de ga. Sorkari ta keteime ge cika pe napei Capernaum ga mateei eh bam. 47Jisu au Judah gade Galilee ga gwang bam lie pa siu luge, pa peda mie pecu Capernaum ga mie pe napei tsai di lai kezeube de tei myi beu lo peda de kie di. 48Jisu peda ge rang gai, “Nnui migede miswa kega nah mimakecang dung ngau maige nlum lama.”

49Kedibe rang gai, “Kedihbo, a na tsai kedi dwa acu ngngwa gwang lo.”

50Jisu peda ge rang gai, “Tet cu, n na ring luzie!” Minabe Jisu sam nlum lu delü tetti. 51Pe lampui gade pe kilabe samlia teu eh redau lu, “N na au ring lu buida!”

52Pe na nkei kedi tingde daidau ge bi pa keteu gai, ge penui rang gai, “Cide nziene tingna cai bam ge tingdau kenra de peda de gah dida.” 53Pecai pe pei cipau bamdapkak siak dau Jisu peda ge, “N na ring luzie” de rang kebeu nsung lu. Cine pa nah pe kelak pelane nlum lu.

54Aide Jisu Judah gade Galilee ga gwang kelu cai tei kegai miswa kega bata pekenabe.

Currently Selected:

JOHAN 4: ZemeNB

Highlight

Copy