KENDEU 37

Joseph nah Pe Siname

1Jakob pe pei kelungh deu Canaan ga lungh si bam di, 2Nah aide Jakob kelak ha.

Joseph, rehang mmi 17 kauge, pe pei nauseupui kena Bilhah penai Zilpah napei dung, pe swacingme ze ngngwa meurün nah hemeu kwa la. Pa pe swacingme heta kesia ketei ha dung teugwang pe pei dage pau beu.

3Jakob pe na kedame de swa Joseph ze kuki la, kedanemene pe cing caine pecu nna kelu ne. Pa pe cuatie pe baki ketie#37:3,23 mcua pe baki ketie mede hezuteikelu mcua. ge pecu tei beu. 4Pe swacingme penui pei Joseph ze penui ze swa kuki kecu ngau luge, penui penui sinabe ze nkau süt kedine sam keyi de rang pecu resiu tadi.

5Zeuziu ge Joseph pe mang ge mmii, nah pa pe swacingme ze cide pau lia ge penui pecu nkauki di. 6Pa cu, “Hemang I mmii kecu de kingnei gailo. 7Anui pelane wheat buih luh gade kaang bam, nah a gu wheat buih sap nduhng bam. Nnui gu dung a gu de togwa lü cide da keumie bam” dedi.

8Pe swacingme, “N kecet nang hegwang tei lü anui reu dih kera mning lani?” de eh keteu di. Cine penui pe mang dung de nah pa kerang dung de ziemne pecu nkau di.

9Pecai Joseph pe mang keda ge mmii dai eh cu pe swacingme dade, “I hemang keda ge mmii, nah cika de I tingnaimik, hekei nah heghi 11 ada keumie bam eh ngau” dedi.

10Pa pe mang de pe pei dage de pau beu, ge pe pei pecu kesei eh: “Dai mang ah cide? Nang n pui, n swacingme nah I gwang nda de keumie kera mning lani?” dedi. 11#Bat. 7:9.Joseph swacingme pecu periak di, dede pe pei cide pelane cet ladi.

Joseph ze Kezwa nah Ngngwa Egypt ga Kegwang

12Tingnai ge Joseph swacingme penui pei kauhau mapie zie lie Shechem ga mie dige, 13Jakob Joseph dade cu, “I ncu peu n swacingme hekaune hau maa pie kela Shechem ga mie neulie” dedi.

Joseph keli eh, “I ntei luda” dedi.

14Pe pei cu, “Mie delü n swacingme kuak lami nah hekaune hau de petau lami kecu pielo; delü caili gwang ada ge pau beu lo” dedi. Cine pe pei Hebron Langkam gade pecu langpwa pe lampui lege kai di.

Joseph Shechem ga gwang lu 15delü hangdeu cika huii pwa lage mige pecu ngau lü keteu eh cu, “Nang daipai peei lano?” dedi.

16Pa cu, “I a swacingme de peei la, penui au penui kauhau de kwa la. Nang penui daiga labi acu ranglia lubui mi?” dedi.

17Minabe cu, “Penui tetti da I penui Dothan ga mie lau lie kecu siu” debeu. Cine Joseph pe swacingme cai pwamie ge penui ze Dothan gade ngau lu.

18Penui pecu kemdei gade ngau gai nah pa penui da gwang cang kemakne, penui pecu kemmau ciem peei pecu teitset ti kera tiak lu eh keresiu. 19Penui hang gege dade cu, “Aika hemang kemmii bede gwang lada. 20Ko, anui pecu teitset lü pe paau pwa tekwa kecang ge gage kai di go. Anui pecu renaam kau gene tuih di delie rang lubui. Delü anui pe mang dung dainzwa di zie bi kecu ngau luzie” dedi.

21Reuben penui koa siu eh Joseph ze keli lu kera cet di. Pa cu, “Anui pecu teitset ti mego. 22Renaamkang tekwa aika ge pecu kelien gaidi lu, dede pecu rezam diso” dedi. Pa aide rang eh penui dade pecu keli lü pe pei dage pecu lang caili gaidi kera cet ti. 23Joseph pe swacingme da gwang luge, penui pe mcua ketie batie de lwak lu. 24Delü penui pecu kelienpwa tekwa kecang de gage kai di.

25Penui matyei bam ge, penui zette Ishmaelme maa ge Gilead gade Egypt ga mbeuh mie la eh ngau lu. Penui ut dung mosala nah tsingcaa le penui püt tei pungla. 26Judah pe siname dade cu, “Anui anui sinabe ze teitset lü nkim kelu le daipai gieh lu laino? 27Anui pecu Ishmaelme aidung dage zwa beudi golie. Ciciu de anui pecu rezam lak; kesangbe, pa anui sinabe, anui teihjai” dedi. Pe siname kesuizwa lu, 28#Bat. 7:9.nah Mediame heli keteime kah gwang ge, pe siname#37:28 siname ze; Ibri penui. Joseph ze tekwa gade teumpet lü pecu rangkang goi nkai gade zwapwa Ishmaelme ze peudi, nah penui pecu ngngwa Egypt ga miedi.

29Reuben tekwa de ga caili gwang eh Joseph cika bam kemak ngau luge, pa pesui sia eh pe pai dung hiet ti. 30Pa pe siname da gwang eh cu, “Hena nabe cika gah da. I daipai tei zie no?” dedi.

31Pecai penui hemeu ge teitset lü Joseph mcua pwa cipau jai gage mpung lu. 32Penui mcua cide penui pei da teugwang eh cu, “Anui aide ngau lu. Aide n na gu mi?” dedi.

33Pa cide ci lü cu, “Yeo, cide pe gu da! Teikuu ne pecu teitset tida. A na Joseph ze teurak takcai dida!” dedi. 34Jakob pelung sia eh pe pai dung hiet ti delü roso pai bah lu. Pa peting ketie ge pe na ze heei eh hap. 35Pe name mipei mipui pelane pe lung tei nciep kera peda gwang, dede pa mide peu pe lung tei nciep laklie eh cu, “I a na ze heei hap eh ketsaime deu ga mie zieda” dedi. Cine pa pe na Joseph ze heei eh hap ladi.

36Cidau, Egypt ga Mediame Joseph ze zwapwa Potiphar, hegwangpei ki kekwa kedibe, hegwangpei kang ga kedihme gede peudi.

Currently Selected:

KENDEU 37: ZemeNB

Highlight

Copy