KENDEU 32

Jakob Esau ze Redau kera Ketelei

1Jakob pe beuh tet si gwang ge, tinggimgwame pecu redau lu. 2Pa penui ze ngau luge, pa cu, “Aide Tinggwang ramzeuki” dedi; cine pa heni cide de Mahanaim#32:2 Ibri led gade pekieh “Ramzeuki kena” lie qulu.

3Jakob samgwame ze lang nswa pwa Edom deudi ga pe swacingbe Esau dage kai. 4Pa penui ze sam aide pau beu lo rang beu: “I Jakob, n sam kemzai n kilabe, a mpaube Esau dage I Laban da cu kecang lungh la eh I caili gwang rii kedi sam kaila. 5I a tum, gada, meurün, hemeu nah hebaangme la. I nda ge sam kaila kedihbo, n suiyi ngau lu kera regui eh” dedi.

6Samgwame Jakob da caili gwang dai luge penui cu, “Anui n swacingbe Esau da mieda, nah pa au ncu redau kera pe lampui ga tetpet dida. Pa mina 400 gede ngngwa la” debeu. 7Jakob ngngi nah pe lung keherei di. Pa mina pecu ngngwa kelame ze zina tei lu, nah pe meurün, hemeu, ketum, nah ut dung dede. 8Pa cet kecu, “Esau gwang eh maa keraibe de ketang de, kedabe be mbaih di lubui” dedi.

9Pecai Jakob kekie tei, “A pao Abraham Tinggwang nah a pei Isaac Tinggwang, a koa kingnei gailo! Nang acu rang beu, Rampaubo, a deu ga nah a kibaume da caili gwang lulo eh, nah nang a ziemne ma pelane tei myi beuzie lie eh. 10Nang n kilabe acu liah kebeu n zai keyi nah n masang aidung pelane I ngau lu bui melie. I Jordan reuki de a tuitieh gwale magede teu mene kah lu, nah cu au I maa kena aide de nzang caili gwang zeu. 11Acu a swacingbe Esau dade keli beu lo eh I kiela. I ngngi dida pa anui ze ketang eh anui pelane ze nkap di lai eh gwang kela hing dida, mipui dung nah hename ze kecang de. 12#Ken. 22:17.Nang ma pelane keyibe tei eh ada gwang lu zie lie nah migede peeikap gai kelak a leuhme, dui kedi kuung ga heciang dung kieege peu zie lie n sam kaikebeu de nsung lulo” dedi.

13-15Cipau ziu cika bam kelu cai, Jakob pe kaune maa gade pe swacingbe Esau ze mta peu kera kedet lu: hemeupui 200 nah hemeuseu 20, meurünpui 200 nah peseu 20, petung tui tyei kebam ut 30 nah pena dung si, ketumpui 40 nah ketumseu 10, gada pui 20 nah peseu 10. 16Pa pemaa ketsamtsam mzi lu delü pe kilame hang gede peu maa gege eh pielu. Pa penui dade, “A dwa nswa gwang cu, nah maa ge nah pecaibe maa kak ga heni nsak eh nzang gwang lu” debeu. 17Pa kila keraibe ze aja kai eh, “A swacingbe Esau nnui ze redau lü nnui dade ‘Nnui mpaube cau no? Nnui daiga gwang launo? Nnui dwa ga makaune aidung de cau gu no?’ de keteu cai, 18nnui ‘Cidung de n kilabe Jakob gu. Pa cidung de pe mpaube Esau ze peu kera lang gai. Jakob de anui cai na ga gwang lada’ delu” lo beu. 19Pa cinzwa maa kenabe, kecumbe, nah pie rengei kela keda pelane dage rang: “Nnui Esau ze redau lude ainzwa rang lu maisia. 20Nnui rang maisia, ‘Yeo, n kilabe Jakob anui tai na ga lada’ de rang lulo” debeu. Jakob kecet, “I mapeuh aidung pwa pesui yi tei luzie, nah I pecu redau lude, pa a mau gi beuzie ha” de mning kedine. 21Pa mta mapeuh aidung de pedwa lang nswa gai eh cipau ziu ramzeuki ga bam di.

Jakob Peniel gade Hepoa Kepwa

22Cipau ziu Jakob cuh lu, pe nau kena, pe nauseupui kena, nah pena 11 ze ngngwa lü Jabbok Reuki de kah lu. 23Pa penui ze lang kah di, nah pe ma dung de pelane lang kah gaidi, 24#Hos. 12:3-4.dede pa rünne cika bam si di.

Ge mige gwang tingba ra kecang pecu ngngwa hepoa pwa. 25Minabe pa kerenia kecu gade yi gai kelak ci luge pa Jakob keling kepoi gai, ge cide pesie gade mpet ti. 26Minabe cu, “Acu peu tetti lulo; tingba gwang di zeu delu” dedi.

Jakob keli eh, “Nang acu samlam beu maige lak” dedi.

27Minabe keteu eh, “N zi cau no?” dedi.

Pa keli eh, “Jakob” debeu.

28 # Ken. 35:10. Minabe cu, “N zi Jakob lie qu si lakta. Nang Tinggwang nah mina dung ze ngngwa renia dida, nah nang nkieng luda; cine n zi Israel di zieda” dedi.#32:28 Israel: Aipau zi de Ibri gade “pa Tinggwang ze ngngwa renia” mede “Tinggwang herei.”

29 # Tut. 13:17-18. Jakob cu, “Cu ada ge n zi ranglia culo” dedi.

Dede pa keli eh, “Nang daitei a zi ci neu lano?” dedi. Pecai pa Jakob ze samlam beu.

30Jakob cu, “I Tinggwang ze kejungau da, nah I cude ring bam” dedi; cine pa heni be zi Peniel qulu.#32:30 Peniel: Aipau zi de Ibri gade “Tinggwang zu.” 31Jakob Peniel gade tet kegai dau tingnaimik pet ti, nah pe nkwa lih kedine telwa di. 32Henai kecang de Israel leuhme makaune nkwa tyei de tyei lama, kedanemene aipau teih gage Jakob ze kepeu kedine.

Currently Selected:

KENDEU 32: ZemeNB

Highlight

Copy