KENDEU 24

Isaac Nau

1Abraham cu au cing süt di, nah Rampaube pa ma keheibe tei kecu gade pecu samlam beu. 2Pa pe kila cingtu be, pe mabam pelane kwa kelabe dade rang eh, “A mnie kena kak gage n ba kailü#24:2. A mnie... kailü: Ainzwa kecu gade samkak de teili gailak zing kecu tei lula. reset gailo. 3I ncu peu tinggim nah kideu Rampaube Tinggwang zi teu reset gai neu la, nang a na nau aika Canaanme dade kedet laklie kecu. 4Nang a nna nam ga mie delü a kibaume kak gade a na Isaac nau pei maisia,” dedi.

5Dede kilabe keteu eh “Releipui pe kibaume de püt ti eh aipau deu ga acu ngngwa gwang rau di cai dainzwa lai? I n na ze langpwa nang kegwangbe deu gage kai dai zie ni?” dedi.

6Abraham keli eh, “Nang a na ze cika ge lang gai dai lak! 7Rampaube, tinggim Tinggwang, a pei ki gade nah a kibaume deu gade acu ngngwa gwang lu, nah pa ncigi eh a leuhme ze hangdeu aide peu zie lie ada ge pe sam kai beu. Pa pe gwame ze n dwa ge lang gaizie, ciciu eh nang a na ziemne cika de henau ge ngau lu kerane. 8Releipui ncu nzang gwang rau di cai, sampet aipau kang ga nang lüt sita dizie. Dede nang keheitei de a na ze cika ngngwa caili gwang lak” debeu. 9Cine kilabe pe ba pwa Abraham, pe mpaube, mnie kena kak gage kai lu, delü Abraham keteu kecu de tei zie lie reset gai.

10Kilabe, Abraham mabam reu kenkieng keteube, pe mpaupei gu ut 10 teu eh Nahor kelungh Mesopotamia tingpeule kebam namdi ga miedi. 11Pa gwang cang luge namdi gole bie tekwa gega peu ut dung de kokdung lu. Cide tinghegi, mipui dui twak tingdau. 12Pa kie eh cu, “Rampaubo, a mpaupei Abraham Tinggwang, henai acu peu teidau lulo nah a mpaube dage n sampet de kaizeu lulo. 13I tekwa aika namdi ga releime dui twak kera gwang kera ga bam. 14I penui hang ge dade, ‘Keherei de n duibung pwa henahmie gai eh acu peu sak lo’ de eh rang zie. Pa magade, ‘Sak lu, nah I n ut dung ziemne de dui twak pwagwang beuzie’ de di cai peu cipau pui ze nang n kilabe Isaac ziemne kedetkelube pui lulo. Aiciu lu cai, nang a mpaube dade n sambe tei kebeu I ci luzie” dedi.

15Pa kie püt ti kecu dwa, Rebecca duibung ge pe hekeutu gage pwa lü gwang. Pa Abraham sinabe Nahor nah pe nau Milcah napei Bethuel napui. 16Pa au relei hezuyi telü nah leitinle ge. Pa tekwa ga hungh eh pe duibung twak puih lu, delü caili gwang la. 17Kilabe pakpet pecu redau lü cu, “Keherei de acu peu n duibung gade sak lo” dedi.

18Pa cu, “Sak lu, kedihbo” degai eh pe duibung pe hekeutu gade pwa henah zette gaibeu nah pwa ndwa beu eh peu pecu sak. 19Pa sak luge, releipui rang eh, “I n ut dung ziemne de dui pwa gwang si beuzie delü peu penui de sak leeu lu” debeu. 20Pa pe duibung makaune duisakkwak gage rui kelwa gaidi eh tekwa ga pak mie dui pwa gwang si beu, pe ut dung de peu sak ciak lu kemaktane. 21Minabe nlei mene pecu kwa bam, Rampaube pecu peu teidau kelu tei lu demi de kecu pie eh.

22Pa teicang dige, minabe kechak ringgoi pemi kewhung keu mpet lü cide pwa pe nkie gage kai beu nah kechak tah kedi kena pwa pe ba kena gage kai beu. 23Pa rang eh, “Keherei de n pei cau bi acu ranglia lo. Heziu n ki ga zeu kera a mina dung nah a ziemne heni bam mi?” dedi.

24Pa keli eh, “A pei au Nahor penai Milcah napei Bethuel lie. 25Anui ki ga reigau nah ketum tak kiee süt bam, nah nnui bam lu kebui heni de bam” debeu.

26Pecai minabe kokdung mie Rampaube ze reca. 27Pa cu, “Rampaube ze twa lu, a mpaube Abraham Tinggwang, pa a mpaube dage sam kaikebeu de masang eh tei beu da. Rampaube a mpaube kibaume da acu ngngwa gwang beu da” dedi. 28Releipui be pe pui ki ga pak gwang maha pelane pau beu. 29Rebecca pe heipei Laban bam lage, pa Abraham kilabe kebam tekwa de ga pak mie. 30Laban nkie ringgoi nah hetah kena pe tipui ba ga kebam ngau lu nah minabe peda ge rang kebeu sam pa siu lu. Pa Abraham kilabe da mie ge; pa tekwa tai pe ut dung tai ga sap 31ge pa cu, “Acu ngngwa kilung gwang lu. Nang mina Rampaube ncu samlam kebeume ge da. Daitei nang aika sap bam no? I a ki ga n ziemne heni ge ntei luda, nah n ut dung ziemne heni bam” dedi.

32Cine minabe kilung ga lüt lu, ge Laban ut dung püt lwak di eh penui ze reigau nah taktyei dung peu. Pecai pa Abraham kilabe, nah pe mina dung ziemne penui pi hui kera dui pwa gwang beu. 33Taktyei pwa gwang luge minabe cu, “I rang lai eh kelabe rang di kemaktane I matyei lak” delu.

Laban cu, “Rang gai cu” dedi.

34Pa cu, “I Abraham kilabe 35Rampaube a mpaupei ze samlam süt beu eh pecu keheime ge tei beu. Pa pecu meurün nah hemeu hau, ketum hau, rangkanggeu, kechak, hebaang mipui mipei, ut, nah gada dung peu. 36Sarah, a mpaupei nau, pa cing kedi caine pecu mipeina ge nna beu, nah a mpaupei pecu pe ma pelane peu dida. 37A mpaupei acu peu pe sam mzai kera reset. Pa cu, ‘A na ziemne Canaan ga releime kak ze henau peei so. 38Dede a kibaume a pei leuhme da mie delü pe ziemne henau ge peei lu’ dedi. 39Nah I a mpaube dade, ‘Releipui acu ngngwa gwang rau di cai dainzwa lai?’ de keteu. 40Ge pa keli eh, ‘Rampaube, I pe sam mzai muih la kelabe, ncu si eh tinggimgwabe ze lang gaizie, nah nang ngau dau luzie. Nang a kibaume, a pei kelak gade a na nau peei luzie. 41N reset gade nang nli lu kera lampui ket gwale gah: nang a kibaume da mie eh penui ncu mlai di cai, ciciu cai nang caili lubui’ dedi.

42“I henai tekwa ga gwang luge, I kekie tei eh cu, ‘Rampaubo, a mpaupei Abraham Tinggwang, keherei de I tei zie lie kela de teidau lu kera tei beu lo. 43I aika tekwa ga bam. Releime ge dui twak kera gwang de, I pe duibung gade acu peu dui sak lo kie zie. 44Pa samdau lu cai nah a ut dung ziemne de dui pwa gwang beu cai, cide de peu nang ne kedetkelu a mpaupei na nau lulo.’ 45I nlei mene kekie cide kie cang gailak kezeu ne, Rebecca pe duibung pe hekeutu gage pwa lü tekwa ga dui twak kera gwang. I peda ze, ‘Keherei de acu dui sak kera peu lo’ degai. 46Ge pa zette pe hekeutu gade pe duibung pwa henahmie nah rang eh, ‘Sak lu, nah I n ut dung dede dui peu zie’ dedi. Cine I sak lu, nah pa ut dung de peu dui sak lu. 47I pecu keteu, ‘N pei cau no?’ degai. Ge pa keli eh, ‘A pei au Bethuel, Nahor penai Milcah napei lie’ dedi. Pecai I ringgoi be pwa pe nkie gage kai nah hetah kena pwa pe ba gage kai. 48I kokdung mie Rampaube ze reca. I Rampaube, nah a mpaube Abraham Tinggwang, pa a mpaupei kibaume dage acu nzang gwang kebeube, nah I cika de pe napui a mpaupei na nau ngau kelube, de twa gai. 49Cine, nang a mpaupei dage n bata be tei gaizie cai nah peda de yi neu cai, keherei de ada ge rang gailo; melie de rang gailo, ciciu de I daipai tei zie bi kedet luzie” dedi.

50Laban penai Bethuel keli eh, “Makieh aide Rampaube dade gwang kecune, cide anai katei kedet gailak. 51Rebecca aika bam; pecu nzang gwang lu. Rampaube ne rang kebeu nzwa pecu peu n mpaupei na nau tei lucu” debeu. 52Abraham kilabe aide siu luge, pa keumie Rampaube ze reca. 53Pecai pa pai nah rangkang goi nah kechak le ketei net dung lih mpet lu, delü cidung pwa Rebecca ze peu. Pa mapeuh dung ma pemi kewhung pwa pe heibe nah pe pui ze peu gai.

54Pecai Abraham kilabe nah pecu ngngwa kelame matyei nah sak lu, delü cipau ziu cika bam lu. Penui tingcang cuh luge pa cu “Acu peu a mpaupei da caili gwang culo” dedi.

55Dede Rebecca heibe penai pe pui cu, “Peu releipui ze anui ze mtakkak ge mede ziangrei ge ngngwa bam gailu relo, delü pa tet lubui” dedi.

56Dede pa cu, “Peu anui ze bam di helo. Rampaube a beu teidau beu da; acu peu a mpaupei da caili gwang lu” dedi.

57Penai keli eh, “Anui releipui ze qu lü pa dai rang zie bi kingnei go” dedi. 58Cine penui Rebecca ze qu lü keteu, “Nang mina aipau dede nzang tet neu ni?” dedi. Pa keli eh, “Yeo” dedi.

59Cine penui Rebecca ze nah penui kelak kila kecingbe ze peu Abraham kilabe nah pe mina dung ze nzang gwang di. 60Nah penui samkie aidung de teu Rebecca ze penui samlam beu:

“Nang, a tipoe, mina nya nya pui tei lu!

N leuhme ze peu penui ngauraume nam dung gwakelube tei lulo!”

61Pecai Rebecca nah releime ntei lü Abraham kilabe ze nzang tet kera ut dung reu ngkei lu, delü penui pelane tet cuh gai.

62Isaac “Ring kela Acu Ngau kelabe Tekwa” renaamkang#24:62. Paopai rangswa kela renaamkang gega; Ibri gwang kela gade. ga gwanglü Canaan tingpile bie lungh bam. 63Pa luh ga terwa zie lie tinghegi kalia tetpet ge ut dung gwang kela ngau lu. 64Rebecca Isaac ze ngau luge, pa pe ut gade nghungh lu 65delü Abraham kilabe dade keteu eh, “Mina lude luh ga anui tailam tet gwang kelabe de cau no?” dedi.

Kilabe keli eh, “Pa au a mpaube” debeu. Cine pa pe gongbiet pai keu pe zu gum di.

66Kilabe Isaac dage pa tei kedibe ma pelane pau beu. 67Ciciu eh Isaac au Rebecca ze ngngwa pe pui Sarah kelungh paiki de ga nlüt lu, ciciu eh pa pe nau di. Isaac Rebecca ze qu, nah cine pe pui gah kedi de pe lung tei nciep lu.

Currently Selected:

KENDEU 24: ZemeNB

Highlight

Copy