KENDEU 15

Tinggwang Abram ze Samkakkelu

1Aipau cai Abram marengei ge ngau nah Rampaube peda ge kerang koa siu, “Abram ngngi so. I kengngi gade ncu suhng luzie nah ncu ziehi kedi ge peu zie” debeu. 2Dede Abram pe sam keli eh cu, “Dihtube Rampaubo, ziehi nang daipai keyi pwa acu peu lubui no? I a na gah. A mapwa Damascusme Eliezer rünne.#15:2. A... Damascusme; 3Nang acu hena peu ma nah a kilame hang gene a ma gum zie.” 4Ge pa Rampaube peda ge marang dai kecu koa siu: “Kila Eliezer aipau de n ma gum lak; nkatei n na ne mapwabe tei zie” debeu. 5#Rom. 4:18; Ibr. 11:12. Rampaube pecu hegole ngngwa mpet lü cu, “Tinggim ga pie gailo delü heghi dung pei pielo; n leuhme cii kieege zie” debeu. 6#Rom. 4:3; Gal. 3:6; Jak. 2:23.Abram Rampaube ze nlum lu nah ai ziemne Rampaube pecu pesui lü masang lie luu lu.

7Pecai Rampaube peda ge rang, “I Rampaube, kideu aide peu gum zie lie ncu Babylon ga Ur gade nzang mpet kelube.”

8Dede Abram keteu eh cu, “Dihtube Rampaubo, dainzwa I cide a gu zie lie kecu ci lu laino?” dedi.

9Pa keli eh, “Acu ketumlei ge, hemeupui ge, nah hemeuseu ge, mmi kecumcum ciak eh nah tamhau ge nah ruipuine ge teugwang beu lo” dedi. 10Abram makaune dung Tinggwang da teugwang lu, cidung de dum zi na tei lu delü ket pempie gege eh lam na tei eh kai lu; dede pa nruine kena dum tüt ma. 11Herarui dung hekaune dung tei tai ga hungh, dede Abram cidung de gwa di.

12 # Job. 4:13,14. Tingnaimik nlüt di kezeu dau, Abram zip zing miedi, ge kengngi nah kehing le pe lung puih di. 13#Tet. 1:1-14; Bat. 7:6.Ge Rampaube peda ge, “N leuhme sangme deu ga ci kemakme tei eh lungh zie; cika penui hebaangme tei zie nah mmi 400 penui ze tei herei süt zie. 14#Tet. 12:40-41; Bat. 7:7.Dede I heleuh, penui ze teu hebaang keteime ze saja peu zie, nah penui sangme deu cide gikah mpet de penui mahei kedi teu eh tet zie. 15Nang de lungh tie süt zie, n lung nciep eh tsai zie, nah kung dizie. 16N leuhme aika gwang dai kecu dwa ceheu mdai zie, kedanemene I Amoriteme nlien ham eh penui ze saja peu maisia di kemaktane penui ze gwagi di laklu” debeu.

17Tingnaimik nlüt di eh tingmui dige mika lige penai miheu kebaa ge kelwa gwang eh makaune teih dung kak ga tet kah gwang. 18#Bat. 7:5.Ciciu ge cika de Rampaube Abram ze ngngwa samkak keluge tei lu. Pa rang eh, “I kideu aide pelane Egypt deurai gade Euphrate Reuki kecang n leuhme ze peu kera sampet gaila, 19Keniteme deu, Kenizziteme deu, Kadmoniteme deu, 20Hittime deu, Perizziteme deu, Raphaimme deu, 21Amoriteme deu, Canaanme deu, Girgashiteme deu, nah Jebusiteme deu dung de” debeu.

Currently Selected:

KENDEU 15: ZemeNB

Highlight

Copy