MATTHEW 8

Jisu Pora Kuntho-rugi Ekjon Safa Kora

1Ketiya Jisu pahar pora nami ahhise, besi manuh khan Tar piche te ahhise; 2aru sabi, kuntho-rugi bemar ekjon Tar usor te ahhise aru Tar aage te athukarhi kene koise, “Prabhu, jodi apuni itcha hole, apuni moi ke safa kori dibo pare.” 3Aru Jisu he nijor haat uthai kene tar logote chui kene koise, “Moi bhi itcha ase; Safa hoi jabi!” Aru loge loge kuntho-rugi manuh tu safa hoi jaise. 4Aru Jisu he tar ke koise, “Sabi tumi kon ke bhi eku nakobi; kintu jabi, puruhit logote nijor he dekhai dibi, aru ki upohar dibole Moses laga hukum te koi ase, eitu sakhi ekta hobo nimite taikhan aage te di dibi.”

Senapoti Ekjon Laga Biswas

5Jisu Capernaum te ahha homoi, senapoti ekjon Tar logote ahhi kene onurudh kori kene koise, 6“Prabhu, moi laga nokor ekjon jothor-rugi bemar hoi kene besi dukh te ghor te ghumai kene ase.” 7Aru Jisu he tar ke koise, “Moi ahhi kene tar hustho kori dibo.” 8Senapoti he uttar dise, “Prabhu, moi laga ghor chatai niche te apuni ahhibole moi jugyo nahoi; kintu ene kotha pora he koi dibi, aru moi laga nokor tu hustho hoi jabo. 9Kilemane moi bhi ekjon khyomota thaka manuh ase, moi laga hukum te sepahi khan cholai ase; aru moi ekjon ke kobo, ‘Jabi,’ aru tar jai jai, aru dusera ekjon ke kobo, ‘Ahhibi,’ aru tar ahhi jai, aru moi laga nokor ke, ‘Eitu koribi,’ aru nokor pora eitu kore.” 10Ketiya Jisu he tar kotha tu hunise, Tar asorit lagise aru Tar pichete ahha manuh khan logote koise, “Moi hosa tumikhan ke koi ase, Israel te eneka biswas thaka kon bhi Moi dekha nai. 11Moi tumi ke koi ase, purab aru pachim phale pora besi manuh khan ahhi kene Abraham, Isaac aru Jacob logot sorgo rajyo laga mez te bohibo, 12kintu asol rajyo manuh khan tu bahar andhera jaga te phelai dibo, kon jagate kanda aru dant korse kene dukh pai thakibo.” 13Aru Jisu he heitu senapoti ke koise, “Jabi; tumar biswas kora nisna eneka he hobole dibi.” Aru thik eitu homoi te tar laga nokor tu bhall hoise.

Jisu He Besi Manuh Hustho Kora

14Aru ketiya Jisu he Peter laga ghor te jaise, Peter laga sasuri bukhar uthi kene bisona te bemar hoi kene ghumai thaka dekhise; 15Tar pora tai haat te chuise, aru jor bemar pora tai ke shari dise, aru tai uthi kene Jisu ke seva koribole shuru hoise. 16Eitu din sham phale manuh khan pora bhut pora dhori thaka manuh khan besi Tar usorte anise; aru khali ekta kotha pora ohusi atma ke khedai dise, aru nana kisim bemari khan hustho kori dise. 17Eitu bhavobadi Isaiah pora ki koi rakhise eitu khan hidho hobo nimite hoise, “Tar he amikhan laga bemar uthai loise aru amar bemar khan bukhi loise.”

Jisu Piche Jabo Laga Dam

18Ei homoi te ketiya Jisu he besi manuh Tar usorte jama kora dekhise, dusera jaga phale jabole Tar he hukum dise. 19Aru pondit ekjon ahhi kene Tar ke koise, “Guruji, Apuni kot te jai, moi bhi apunar pichete jabo.” 20Aru Jisu he tar ke koise, “Shiyal khan nijor gant ase, aru akash chiriya khan bhi nijor bah ase; kintu Manuh laga Putro nijor matha rakhibole jaga nai.” 21Chella khan majote aru dusera ekjon he koise, “Prabhu, pahila moi nijor laga baba ke moidam di kene ahhibo.” 22Kintu Jisu he tar ke uttar dise, “Moi laga pichete ahhibi, aru mora manuh khan nijor mora khan pora he moidam dibole dibi.”

Jisu He Tofan Rukhai Diya

23Aru ketiya tar ekta nao te bohise, Tar laga chella khan bhi pichete ahhise. 24Aru sabi, dangor tofan ekta samundor te uthise, iman dangor tofan mara karne nao tu dhou-paani pora dhaka mari loi jaise; kintu Jisu bhall pora ghumai thakise. 25Aru taikhan jaise aru Tar ke ghumai thaka pora uthai di kene, koise, “Prabhu, amikhan ke bachai lobi! Amikhan tu harai jabole ase!” 26Aru Tar he taikhan ke koise, “Oh! biswas te komzur khan, kile tumikhan bhoi korise?” Tetiya Tar uthise aru hava aru samundor ke gali dise; tetiya shanti hoi jaise. 27Aru manuh khan pora asorit lagise, aru koise, “Hava aru samundor pora bhi Tar laga kotha manibole eitu keneka manuh ase?”

Ohusi Atma Pora Dhori Thaka Duijon Jisu He Hustho Kora

28Aru ketiya Tar dusera jaga te ahhise, Gadarene khan laga nagor phale pongchi jaise, aru ohusi atma pora dhori thaka duijon manuh koborsthan pora ulai ahhi kene log korise. Tarkhan tu iman khatra hua karne kon pora bhi eitu raasta phale jabole para nai. 29Aru sabi, taikhan pora jur pora hala kori kene koise, “Apuni amikhan logote ki koribole ase, Isor laga Putro? Homoi napongcha aage te amikhan ke tarona dibole iyate ahhise neki?” 30Eitu homoi te tate pora olop dur jai kene gahuri besi palli thakise. 31Aru ohusi atma pora Tar ke onurudh korise, “Jodi apuni amikhan ke khedai dile, heitu gahuri khan logote jabole dibi.” 32Aru Jisu he taikhan ke koise, “Jabi!” Tetiya taikhan ulaise aru gahuri khan logote humai jaise; aru sabi, gahuri khan sob tu rangkhang phale polai jai kene samundor te girise aru paani te dhubi kene mori jaise. 33Gahuri pala manuh khan polai jaise, aru nagor te pongchi ahha homoi te, taikhan pora ohusi atma pora dhori thaka khan logote ki hoise khisa sob tu koise. 34Aru sabi, nagor te thaka manuh khan sob Jisu ke log koribole ahhise; aru ketiya taikhan pora Jisu ke dekhise, taikhan laga desh pora jai jabole onurudh korise.

Currently Selected:

MATTHEW 8: NagaMe

Highlight

Copy