MATTHEW 16

Pharisees Aru Sadducees Khan Pora Sign Mangise

1Tetiya Pharisees aru Sadducees khan ahhise, aru Tar ke porikhya kori kene, sorgot pora ekta sign dekhai dibi eneka hudise. 2Tar he tarkhan ke uttar dise, “Ketiya sham hoi jai, tumikhan pora koi, ‘Ahha kali tu bhall din hobo; kilemane akash tu lal ase.’ 3Aru phujor te koi, ‘Eitu tofan ahha din hobo, kilemane akash tu besi lal aru kala hoi kene ase.’ Tumikhan pora akash laga niyom keneka ase eitu kobole pare, kintu etiya homoi laga sign tu bujibo napare. 4Beya aru paapi jugh pora sign sabole bisari ase, kintu taikhan nimit te Jonah laga sign pora dusera aru eku bhi nadibo.” Eitu karne taikhan ke shari kene Tar eitu jaga pora jai jaise.

Pharisees Aru Sadducees Laga Khomir

5Ketiya chella khan pora dusera samundor kinar phale pongchise, taikhan pora roti anibole pahorise. 6Jisu he tarkhan ke koise, “Hushier koribi aru Pharisees aru Sadducees khan laga khomir karne hushier kori lobi.” 7Aru taikhan majot te alusona kori kene koise, “Amikhan pora roti ana nai.” 8Kintu Jisu he, eitu jani kene koise, “Hei biswas te komzur manuh khan, kile tumikhan majot te roti nathaka karne alusona kori ase? 9Tumikhan etiya tak bujibole napare neki? Pansta roti pans hazar nimit te chola tu tumikhan pora yaad nakore neki, aru kiman tukuri tumikhan pora jama korise? 10Nahole satta roti pora char hazar, aru kiman tukura tumikhan pora jama korise? 11Moi roti laga kotha kua nahoi eneka tumikhan pora kile bujibo napare? Pharisees aru Sadducees khan laga khomir karne hushier kori lobi.” 12Tetiya he tarkhan pora Jisu he roti te khomir thaka laga kotha kua nahoi, kintu Pharisees aru Sadducees khan pora sikhai diya kotha nimite he koi ase eneka bujise.

Peter Pora Jisu Ke Khrista Eneka Shikar Kora

13Eitu homoi, ketiya Jisu he Caesarea Philippi jila te ahhise, Tar he nijor chella khan logot te hudise, “Manuh laga Putro tu kon ase eneka manuh khan pora koi?” 14Aru tarkhan pora koise, “Konuba pora baptisma diya John eneka, dusera pora koi, Elijah, aru dusera konuba pora Jeremiah nahole bhavobadi ekta eneka koi.” 15Tar pora tarkhan ke koise, “Kintu Moi kon ase eneka tumikhan pora bhi koi?” 16Simon Peter he jawab di koise, “Apuni Khrista ase, Jivit Isor laga Putro.” 17Aru Jisu he tar ke uttar di koise, “Jonah laga putro Simon, tumi ashish ase! Kilemane gau mangso aru khoon darai eitu tumi ke janai diya nai, kintu sorgo te thaka Moi laga Pitri pora he janai dise. 18Aru Moi tumi ke koi ase, tumi Peter, aru eitu laga pathor upor te Moi laga mondoli bonabo, aru hades laga shakti pora eitu najitibo. 19Moi tumikhan ke sorgo rajyo laga chabi dibo, aru ki ki prithibi te tumikhan pora bond koribo eitu sorgo te bhi bond hobo, aru ki ki prithibi te tumikhan khuli dibo eitu sorgo te bhi khuli dibo.” 20Tetiya Tar pora chella khan ke hukum di kene koise, Tar tu Khrista ase eneka dusera kon ke bhi nakobi.

Jisu He Nijor Moribole Aru Ponuruthan Laga Kotha Kua

21Eitu homoi pora Jisu he chella khan logot te koise, Tar Jerusalem te jabo lagibo, tate bridho khan, prodhan puruhit khan aru pondit khan pora dukh kosto besi pai kene Tar ke morai dibo, aru tin din pasot te mora pora jinda uthi jabo. 22Aru Peter pora Tar ke loi jai kene gali dibole shuru hoise, “Isor he maaf koribi, Prabhu! Eitu apuni logot te ketiya bhi hobole nadibo.” 23Kintu Jisu he wapas Peter ke koise, “Moi laga piche te jabi, saitan! Tumi Moi karne badha ase; kilemane tumi Isor laga itcha phale nahoi, kintu manuh laga itcha phale ase.”

Nijor Kros Uthai Kene Jisu Piche Jabi

24Tetiya Jisu he nijor chella khan ke koise, “Jodi konuba manuh he Moi laga piche te ahhibole monn ase, nijor ke tiyag kori lobi aru nijor kros bukhi kene Moi laga piche piche ahhibi. 25Kilemane kon pora nijor jivon bachai rakhe, eitu harai jabo, aru kon pora Moi laga nam nimit te nijor jivon harabole dise, taikhan pora jivon tu pabo. 26Kilemane manuh ekjon pora prithibi sob tu palebhi nijor jivon tu harale, ki lab ase? Nahole nijor jivon laga bodli ki dibo paribo? 27Kilemane Manuh laga Putro, Tar nijor laga dut khan logot te Pitri laga mahima te ahhi jabo, aru eitu pasote manuh khan sob logote, nijor pora ki kam korise eitu hisap te ghurai dibo. 28Moi hosa kotha tumikhan ke koi ase, iyate khara kori thaka majote konuba pora Manuh laga Putro tu nijor laga rajyo te ahha nadekha tak namoribo.”

Currently Selected:

MATTHEW 16: NagaMe

Highlight

Copy