Numbers 23

1జనా బిలామ్ - అత్త మ బలీర్ అర్పణ్ కరేన, సాత్ భోక్ణేర్ పీడాఁవున భందాన్, అత్త సాత్ కేల్డాఁవునన్, సాత్ గోర్లాఁవున తయార్ కర్కన్ బాలాకేతి కో.

2బిలామ్ కో జూంజ్ బాలాక్ కీదో జనా, బాలాకన్ బిలామ్ హర్యేక్ భోక్ణేర్ పీడాపర ఏక్ కేల్డానన్, ఏక్ గోర్లాన జళాయేర్ భోక్ణేర్ నాఁయి అర్పణ్ దీనే.

3ఉజ్జి బిలామ్ బాలాకేతి, - భోక్ణేర్ పీడాపర ఛజకొ తార్ జళాయేర్ భోకణ్ దజత్త హాూబ్రేన్ ర, మ జాఁవుచుఁ; ఏక్ వకత్ యెహోవా మన భళేన ఆవచ కాఁయిఁ కొ. ఊ మన దకాళ జకొ మ తోన మాలమ్ కర్దూంచుకన్ కేన్, ఝాడ్ ఛేనిజకొ ఏక్ గట్లీన చడో.

4దేవ్ బిలామేన దర్శణ్ దీనో జనా ఊ, - మ సాత్ భోక్ణేర్ పీడాఁవున తయ్యార్ కరన్, హర్యేకెపర ఏక్ కేల్డానన్ ఏక్ గోర్లాన - అర్పణ్ దీనోంచు కన్ దేవేతి కో జనా.

5యెహోవా ఏక్ వాత్ బిలామేర్ మూండేమా రకాడన్, తూఁ బాలాకెకన ఫరన్ జాన్, హన్ను క కన్ కో.

6ఊ బాలాకేకన ఫరన్ గో జనా ఊ మోయాబేర్ హకమ్ దారేఁవుతి సేతి ఓర్ జళాయేర్ భోక్ణేకన హాూబ్రేన్ ర.

7జనా బిలామ్ మర్మేర్ వాతేన హన్ను సమ్ళాయెు - ఆరామేతి బాలాక్. ఉగ్మణేర్ గట్లాఁవుమాఁయితి మోయాబేర్ రాజ్ మన బలామంగాన్, - ఆజొ; మార్ సారు యాకోబేన సరాప్ ద. ఆజో; ఇశ్రాయేలేన చమ్కావ్ణో కన్ కో.

8కాఁయిఁ కన్ సరాప్ దూఁ? దేవ్ సరాప్ దీనో కోని కాఁయిఁ, కాఁయిఁ కన్ చమ్కాఁవు? దేవ్ చమ్కాయెుకోని కాఁయిఁ?

9గట్లీర్ ఫూంగెపరేతి ఓన దేక్రోంచుఁ. గట్లాఁవు మాఁయితి ఓన దేక్లీ దోంచుఁ ఇదేక్ ఓ జన్ అలగ్ వేన్ రచ జనూర్మా గణాయెని.

10యాకోబేర్ రేతూన కూణ్ గణ్ సక్యె? ఇశ్రాయేలేర్ చార్మెు భాగేన కూణ్ గణ్ సకచ? నీయత్ దారేర్ మోతె సరీక్ మోత్ మన మళ్జాయె. మార్ అంతేర్ ఘడి ఉందూర్ అంతేర్ ఘడీర్ నాఁయి వేజాయె!, కన్ కో.

11జనా బాలాక్, బిలామేతి, తూఁ మన కాఁయిఁ కీదో? మార్ వ్యారీఁవున సరాప్ దేణోకన్ మ తోన బలామంగాయెు, పణ్ తూఁ పూరొ ఉందూనజ్ ఆశీష్ దేదీనో కన్ కో.

12జనా ఊ - యెహోవా మార్ మూండేమా రకాడొ జేన మ ధ్యానేతి కేణో నక? కన్ జవాబ్ దీనో.

13జనా బాలాక్ - దయాకరన్ ఉజ్జేక్ జాగ మార్ సాత్ ఆజొ. ఒత్తేతి ఉందూన దేకెవాస. ఉందూమా ఛేడాపర ఛజకొ థోడ్సేకజ్ దకావచ పణ్ ఓసే తోన దకాయేని. ఒత్తేతి మార్ సారు ఉందూన సరాప్ దేణో కన్ ఓతి కేన్.

14సోఫిమ్ కజకొ కావ్లివాళేర్ మైదానేమా పిస్గార్ ఫూంగెపర ఓన లేజాన్, సాత్ భోక్ణేర్ పీడాఁవున భందాన్, హర్యేక్ భోక్ణేర్ పీడాపర ఏక్ కేల్డానన్, ఏక్ గోర్లాన అర్పణ్ దీనో.

15ఊ, - తూఁ అత్త, తార్ జళాయేర్ భోక్ణె కన హాూబ్రేన్ ర. మ ఒత్త యెహోవాన భళేన జావుఁచుఁకన్ బాలాకేతి కో జనా.

16యెహోవా బిలామేన భళన్, ఏక్ వాత్ ఓర్ మూండేమా రకాడన్, - తూఁ బాలాకె కన ఫరన్ జాన్, హన్ను క కన్ కో.

17ఊ బాలాకె కన గో జనా, ఊ ఓర్ జళాయేర్ భోక్ణేకన హాూబ్రేన్ ర. మోయాబేర్ హకమ్దార్ ఓర్కన హాూబ్రేన్ ర. బాలాక్ - యెహోవా కాఁయిఁ కో కన్ పూచొ జనా.

18బిలామ్, మర్మేర్ (ఠాఁసేర్) వాతేన సాకీర్ నాఁయిఁ హన్ను కో - బాలాక్, ఊటన్ సామళ్. సిప్పోరూర్ బేటా, కాన్ దేన్ మార్వాత్ సామళ్.

19దేవ్ లబారి కరేన, ఊ నర్ కోని. మన్ బద్లాలేన ఊ నరేర్ బేటా కోని. ఊ, కేతాణి కరనజుఁ రచక? ఊ వాత్ దేన్ పూరొ నకరజుఁ రీయెక?

20ఇదేక్, ఆశీష్ దకన్ మన హకమ్ దీనో. ఊ ఆశీష్ దేదీనో, మ ఓన బద్లా సకూని.

21ఊ యాకోబేమా కుణ్సీ దోషేన దీటోకోని, ఇశ్రాయేలేమా కుణ్సీ వళ్ వాంక్ దీటోకోని, ఓర్ దేవ్ ఛజకొ యెహోవా ఓర్ సాత్ ఛ.

22రాజేర్ జీతేర్ అవాజ్ ఉందూర్మాఛ. దేవ్ ఈజిప్టే మాఁయితి ఉందూన బలామంగాయెు, గురుపోత్ కజకొ ధాఁసజుఁ ధాఁసేర్ జోర్ ఉందూన ఛ.

23సాసీజ్ యాకోబేమా మంత్ర్ తంత్ర్ ఛేని. ఇశ్రాయేలేమా జాదు ఛేని. ఏకేక్ వక్తే పర దేవేర్ కావతె, యాకోబేర్ వలాదెవాళ్ ఛజకొ ఇశ్రాయేలెవాళేన మాలమ్ కర్దే జాయె.

24ఇదేక్ ఓ జన్ సింకోషణేర్ నాఁయిఁ ఊటి యె. ఊ సింకోసేర్ నాఁయి సలంగ్ హాూబ్రియె. ఊ షికార్ కీదోజేన ఖాలేన్, మరన్ ఛజేర్ లోయిన పీయజేలగు సోయెని.

25జనా బాలాక్ - తూఁ అస్సలజ్ ఉందూన సరాపేయిదమత్ క, ఆశీష్ సదా దమత్ కన్ బిలామేతి కో జనా.

26బిలామ్ - యెహోవా కజకొ సొగ్ళీన మ కర్ణో కన్ మ తోన కో కోనిక? కన్ బాలాకేన జవాబ్ దీనో జనా.

27బాలాక్, - తూఁ దయాకరన్ ఆజో. మ ఉజ్జేక్ జాగ తోన లేజాఁవుచుఁ. ఒత్తేతి తూఁ మార్ సారు ఉందూన సరాప్ దేర్ దేవేర్ నంజ్రేమా సొమోర్ రచ కాఁయిఁ కో కన్ బిలామేతి కో.

28బాలాక్ ఝాడి ఛేని జకొ జాగేర్ (ఎడారీర్) సమ్నక్ ఛజకొ పేయోర్ గట్లార్ ఫూంగెపర బిలామేన బలాలేన్ గో జేర్పచ్చ.

29బిలామ్, - అత్త మార్ సారు, సాత్ భోక్ణేర్ పీడాఁవున భందాన్, అత్త సాత్ కేల్డాఁవునన్, సాత్ గోర్లాఁవున తయార్ కర్ కన్ బాలాకేతికో.

30బిలామ్ కో జూంజ్, బాలాక్ కరన్, హర్యేక్ భోక్ణేర్ పీడాపర ఏక్ కేల్డానన్, ఏక్ గోర్లాన అర్పణ్ కీదో.

Currently Selected:

Numbers 23: Lambadi

Highlight

Copy

Compare