మార్కుర్ ఆచ్ ఖబర్ 4

1ఊ సమ్దరేర్ కనారే కన ఫేర్ ఉపదేశ్ కరేన సరూకీదో జనా వార్సేక్ జన్ఓర్ ఢైఁ గోళావేన్ ఆయేజనా ఊ సమ్దరేమా ఏక్ దోని చడన్ బేస్గో. జన్ సే సమ్దరేర్ కనారె కన జమ్మీపర ర.

2ఊ ఉపమానేర్నాయిఁ ఘణ్ వాతే ఉందేన బోధా కర్తో, ఓర్ బోధా మా హనూకో.

3సామ్ళో; బీజ్ బోయేవాళో బీజ్ నాకేన గో.

4ఊ నాక్రోజనా, థోడ్సేక్ బీజ్ వాటేర్ బగల్ పడ్గే. పంకేరు ఆన్ ఓ దాణాన ఖాగే.

5థోడ్సేక్ బీజ్ ధూడ్ ఘణ్ ఛెనిజే భాటావాళ్ జమ్మిమా పడ్గే ఒత్త ధూడ్ ఊండో ఛేని, జేతీ ఓ జన్నాజ్ ఊగ్యాయె.

6పణ్ దాడొ నికళ్తేఖమ్ ఓ బళన్, జడ్ ఛేని జేతి సుకాగే.

7థోడ్సేక్ దాణా కాంటేర్ ఝాడేమా పడ్గే; కాంటేర్ ఝాడ్ వదన్ ఉందేన దాబ్ దీనె, జేతీ ఓ ఫళ్ దీనెకొని.

8థోడ్సేక్ దాణా ఆచ్ జమ్మీమా పడ్గే ఓ ఊగన్ పాచన్ తీస్ హాఁసా, సాట్ హాఁసాన్ సో హాఁసా పాచో.

9–సామ్ళేన తమార్ కాన్ రతో సామ్ళేజా కన్ యేసు కో.

10ఊ ఏక్లో రజనా బార చేలావుతీ సదా ఓన ఘేరన్ వెత్తేజకో, ఓ ఉపమానేర్ బారేమా ఓన పూచె.

11జనా ఊ - దేవేర్ రాజేర్ భేద్ మాలమ్ కర్లేన తమేన వకత్ ఛ.

12పణ్, బార రేవాళ్ ఏకాద్ వళా దేవేసామ్ ఫరన్ పాప్ మాప్ కర్లియకన్ దేకేర్ దేకన్ నదీటెజుఁ, సామ్ళేర్ సామ్ళ పణ్ మాలమ్ నకర్లజుఁ ఉపమానేర్నాఁయిఁ ఉందేన బోధా కరేర్ వచ కన్ ఊ ఉందేన కో.

13ఉజ్జీ, ఈ ఉపమాన్ తమేన మాలమ్ హుయి కోనిక ? హనూవతో ఉపమానే సే తమేన కూఁ మాలమ్ వచ కన్ కో.

14బీజ్ బోయేవాళో దేవేరి వాతే బోరోచ,

15వాటేర్ బగల్ రజకో కూణ్ కతో, వాత్ ఉందేమా బోయేపణ్ ఓ సామళ్తేఖమ్ సైతాన్ ఆన్ ఉందేమా ఘాలే జకోవాత్ పాల్డేన్ డగర్జా.

16హనూజ్, భాటావాళ్ జమ్మీపర బోయేజకో కూణ్ కతో ఓ వాతే సామ్ళన్ ఖుషీతీ ఓన లేలేవాళ్.

17పణ్ ఉందేమా జడ్ ఛేని, జేతి థోడా దాడ్ ఓ హూబ్రేన్ రపణ్, వాతేర్వడి అలా ఝేలా ఆవ్తేఖమ్ హోటో డగర్-జా.

18దూసర్ కాంటేర్ ఝాడేమా పడ్గె జకో,

19ఏ వాతే సామ్ళే, పణ్ ఏ జగేర్ హాయి, ధనేర్ ఢోకో, ఉజీ దూసర్ ఆసా, మాఁయిజాన్ వాతేన దాబ్ద, జేతీ ఊ ఫళ్ దేనీ

20ఆచ్ జమ్మీమా బోయేజకో కూణ్ కతో, వాతే సామ్ళన్ ఓన లేలేన్ తీస్ హంసా సాట్ హంసాన్ సో హంసా పాచెవాళ్ కన్ కో.

21ఫేర్ ఊ ఉందేన హనూకో –దీవొ దీయెర్ పీడాపర మేలేనజ్ పణ్ పాలీ హేటక పలంగేర్ హేట మేలేన లాయెనీ.

22గోకాన్ ఛజకో కుణ్సితీ బార నపడజుఁరేని; బారపడెనజ్ పణ్ కుణ్సితీ గోకాన్ రేని.

23సామ్ళేన కేనీ కాన్ రతో ఊ సామ్ళియె కన్ కో.

24ఫేర్ ఊ తమ్ కాఁయిఁ సామళ్రెచోకో జతనేతి దేక్లో. తమ్ కేతీ మోజొచొకో ఓతీజ్ తమేన మోజావచ, ఉజీ జాదా తమేన దచ.

25ఛజేన దేజావ, ఛేనిజేర్కనేతి ఓర్ ఢైఁ ఛజకో సదా ఓర్ ఢైఁతీ కాణ్ణాకచ కన్ ఉందేన కో.

26ఫేర్ ఊ - ఏక్ ఆద్మీ జమ్మీమా బీజ్ బోన్,

27రాతన్ దీఁయె సోవ్తోన్ ఊట్తో రజనా, ఓన మాలమ్ నవజూంజ్ ఊ బీజ్ ఊగన్ వద జూంజ్ దేవేర్ రాజ్ ఛ.

28జమ్మీ ఆగ్డీ మోడెన, పచ్చ సఱ్ఱాన, ఓర్ పచ్చ సఱ్ఱామా కాటో పక్డాయేర్ దాణాన, ఓర్ ఊజ్ పేద కరచ.

29పంటా పాచజనా, కాటేర్ దాడో ఆన్పడోకన్ ఖేత్ కరేవాళో జన్నాజ్ దాత్లా ఘాలన్ కాట్యే కన్ కో.

30ఫేర్ ఊ హనూ కో –దేవేర్ రాజ్ కేర్సరీకో ఛకన్ కియాఁ? కూణ్సే ఉపమానేతి ఓన కేర్ సరీకొ ఛకన్ కీయాఁ ?

31ఊ రాఁయీర్ దాణా సరికో ఛ. రాఁయిఁ జమ్మీమా నాక జనా, జమ్మీపర్ రజకో సే దాణాతీ నాన్క్యాజ్

32పణ్ నాకజేర్ పచ్చ ఊ హూగన్, వదన్ భాజీర్ ఝాడూమా సేతీ మోటోవేన్ మోట్ డోళా వదచ, జేతి అస్మానేర్ పంకేరు ఓర్ ఛేండీమా వసచ కన్ కో.

33ఓ సామళ్ సకజేన పక్డన్ అస్ ఘణీ ఉపమానే కేన్ ఊ ఉందేన వాతే బోధా కిదో,

34ఉపమాన్ ఛెనిజుఁ ఉందేన బోధా కీదొకొని పణ్, ఏక్లో రజనా ఓర్ చేలావున సే వాతేర్ అదోడ్ కో.

35ఒదాడజ్ సాంజ్ పడ్గీజనా, ఊ - పర్లేవ్డీ జావాఁ కన్ ఉందేన కేతేఖమ్,

36ఓ జనూన మేల్దేన్, ఓన నాన్కి దోనిమా లేన్ డగర్-గే. ఓర్ లార ఉజీ థోడ్సేకి దోని ఆయి.

37జనా మోట్ ఆందీ ఆన్ హలోళో ఊ రజకో దోనీర్ ఉంపర్ మారే, జేతి దోని పాణీతీ భరాగి

38ఊ దోనిమా లారేర్వడి సరాణియాపర్, మాతో మేలన్ నీంద్ లేరో, ఓ ఓన వటాడన్, బోధా కరేవాళో, హమ్ మరీజారెంచాఁ; తోన హాయి ఛేనికాయి? కన్ ఓనకే.

39జేతీ, ఊ ఊటన్ ఆందీన దల్కారన్ – శాంత్ వేన్ గచ్చప్ రకన్ సమ్దరేన కేతేఖం, ఆందీ థమ్జాన్ అస్మాన్ శాంత్ వేగీ,

40జనా ఊ - తమ్ కసెన చమక్రేచో తమ్ ఉజీ విశ్వాస్ ఛెనిజుఁ ఛోకాఁయిఁ ? కన్ ఉందేన కో.

41ఓ ఘణ్ చమ్కన్ - ఈ కుణ్కొ; ఆందీన్ సమ్దర్ ఓర్ వాత్ మాన్రేకన్ ఏకేన ఏక్ కేల్‌దే

Currently Selected:

మార్కుర్ ఆచ్ ఖబర్ 4: Lambadi

Highlight

Copy

Compare

Want to have your highlights saved across all your devices? Sign up or sign in

Learn More About పవిత్తర్ బైబిల్ (బంజారా/లంబాడి/గోర్బోలి)