మత్తయీర్ ఆచ్ ఖబర్ 28

1సబ్బాత్ దాడో వేగో జేర్పచ్చ దిత్వారేర్ దాడ సవారో వేరో జనా, మగ్దలేనే మరియాన్, ఉజ్జేక్ మరియా మసాణేన దేకేన ఆయి.

2ఇదేక్, ప్రభూర్ సోజా స్వర్గ్ లోకేతీ ఉతరన్ ఆన్ భాటాన వత్ళాదేన్ ఓర్ ఉంపర్ బేటో; జనా, ధర్తి జోర్తీ ధూజీ.

3ఓ సోజార్ సూరత్ విజ్ళీర్ నైఁ ర, ఓర్ కప్డా ఓసే అత్రా ధ్వాళోర.

4నిగ్రానివాళ్ ధూజన్ మర్గేజేర్ నైఁ పడే ర.

5సోజా ఓ బీరేవున దేకన్ - తమ్ చమ్కోమత్, సిల్వా మారేజే యేసూన తమ్ ఢూండ్రేచో కన్ మన మాలమ్;

6ఊ అత్త ఛేని - ఊ కోజూంజ్ ఊ ఉట్గోచ, ఆవో, ప్రభూ సుతోజే జాగేన దేకన్

7జల్దీజాన్, ఊ మర్గేజే మాఁయితీ ఊట్గోచ కన్ ఓర్ చేలావున మాలమ్ కర్దో; ఇదేక్ ఊ గలిలయామాఁయి తమార్ ఆంగ జారోచ, తమ్ ఓన ఒత్త దేకోచో; ఇదేక్ తమేన కోంచుఁకన్ కో.

8ఓ ధాకేతీన్ ఆస్మాన్ ఆనందేతీ మసాణే కన్నెతీ జల్ది జాన్ ఓర్ చేలావున ఊ ఖబర్ మాలమ్ కరేన ధాఁస్తీ రజనా,

9యేసు ఉందేర్ సమ్నక్ ఆన్ - తమేన ఖొసళ్ వేజాయ కన్ కో. ఓ ఓర్ కన ఆన్ ఓర్ టాంగె ఝలన్ ఓన ధోక్దేతేఖమ్

10యేసు -చమ్కోమత్, తమ్ జాన్ మార్ భాయిఁవున గలిలయాన జావ్ణో కనన్, ఓ ఒత్త మన దేకచ కన్ ఉందేన మాలమ్ కరో కన్ కో.

11ఓ జావ్తే రజనా కావ్లి వాళూమా థోడ్సేక్ శారేమా ఆన్, చాలి జకో వాతే సే ప్రధాన్ యాజకేవున కె.

12జేర్వాస ఓ మోటేఁవుఁతీ భళన్ ఆన్, మత్రోకరన్ ఓ సిపాయిన ఆస్మాన్ ధన్ దేన్

13-హమ్ నీంద్ లేరే జనా ఓర్ చేలా రాత్వణా ఆన్ ఓన పాల్డేన్ డగర్గే కన్ తమ్ కో;

14ఈ గవర్నరేర్ కానేమా పడతో హమ్ ఓన సమ్జాన్ తమేన కాఁయిఁ తక్లీబ్ నరజుఁ కరాంచాఁకన్ కే.

15జనా ఓ ఉ, ధన్ లేలేన్ ఉందేన సికాయెజుఁ కీదే. ఈ వాత్ యూదులేమా ఫేలన్ ఆజేలగు సేన మాలమ్ ఛ.

16గ్యార చేలా యేసు ఉందేన నియమ్ కీదోజుఁ గలిలయార్ గట్లాన గె.

17ఓ ఓన దేకన్ ఓన ధోక్దీనె, పణ్ థోడ్సేక్ అన్మాన్ కీదె.

18పణ్ యేసు ఉందేర్ కన్నె ఆన్ - స్వర్గ్ లోకేమాన్ ధర్తీ ఉంపర మన సే హక్ దీనొచ.

19జేర్వాస తమ్ జాన్ సోగ్ళి జనూన చేలార్నాఁయిఁ కరో; బాపేరన్ బేటారన్ పవిత్తర్ ఆత్మార్ నామేమా ఉందేన బాప్తీసమ్ దేతే,

20మ తమేన కాఁయిఁ కాఁయిఁ వాతే హకమ్ దీనోకో, ఓ సేర్ నైఁ చాల్ణో, కన్ ఉందేన బోధా కరో. ఇదేక్ జగేర్ ఆఖర్ దాడేతాణి హర్ఘడి మ తమార్ సాత ఛూఁకన్ ఉందేన కో.

Currently Selected:

మత్తయీర్ ఆచ్ ఖబర్ 28: Lambadi

Highlight

Copy

Compare

Want to have your highlights saved across all your devices? Sign up or sign in