Luke 14

1సబ్బాత్ దాడేమా ఊ ఖోరకి ఖాయేన పరిసయులే వాళూర్ మోటేమా ఏకేర్ ఘర గోజనా, ఊ కాఁయిఁ కరచకో కన్ ఓ ఓన దేక్తేర.

2జనా సూజేరో రోగేవాళో ఏక్ ఓర్ ముణాంగర.

3యేసు సబ్బాత్ దాడేమా ఆచొకరేర్ ధరమ్ క కోని? కన్ ధరమ్ శాస్త్ర్ కేవాళూనన్ పరిసయులే వాళూన పూచోజనా,

4ఓ గచ్చప్ రేగే. జనా ఊ ఓన ఢైఁ లేలేన్ ఆచొకరన్ మేల్దేన్,

5తమార్మా కేరీ గద్దీక బళద్ క ఖాడేమా పడ్జావతో సబ్బాత్ దాడేమా ఓన బార కాడెనీ క? కన్ ఉందేన పూచో.

6ఏ వాతేన ఓ జవాబ్ దే సకేకొని.

7బలాయెజకో, ఖోరాకీర్ హారీమా ఊంచో పీడా కుంతేర్ దేకన్, ఉ ఉందేన ఈ ఉపమాన్ కో.

8తోన కోయితోయి వాయార్ టేళేన బలావజనా, ఠాఁస్సేరో పీడార్ ఉంపర్ బేస్ మత్, ఏకాద్ వణా తోతీ జాదా మోటేన ఊ బలామేలో వీయతో,

9తోనన్ ఓన బలాయొజకో ఆన్ - ఏన జాగ్ ద కన్ తోన కచ. జనా తూఁ లాజ్ పాన్ ఛెడార్ జాగేమా బేస్ జావస్.

10పణ్ తోన బలావజనా, తోన బలాయొజకో ఆన్- దోస్తీదార్, ఉంచేర్ జాగేన జోకన్ తోనకజుఁ తూఁ జాన్ కొసార్ జాగేమా బేస్, జనా తార్ సాత బేటేజె సేర్ ముణాంగ తోన మోట్పణ్ రచ.

11ఓర్ ఊజ్ మోట్ పణ్ కరేవాళో హర్యేక్ ఆద్మీ హాల్కో పడ్జా, ఓర్ ఊజ్ హల్కోఛుఁ కన్ కేలజకో మోట్పణ్ పాలచ కన్ కో.

12ఉజ్జీ, ఊ ఓన బలాయొజేతీ హనూకో - తూఁ దీఁయేఁర్ టేళో క, రాతేర్ టేళో కరస్ జనా, తార్ దోస్తీయూనక, తార్ భాయియూన క, తార్ పామణూనక నవతో, ధన్వాన్ ఛజకో తార్ బగల్ రజేన బలామత్. ఓ ఏకాద్వణా తోన ఫేర్ బలావచ. జేతి తోన భలాయిర్ బద్ల భలాయి కరచ.

13పణ్ తూఁ టేళో కరస్ జనా, గరీబేవున, డూండేవూన, టూంటేవూన, ఆందేవూన బలా.

14తోన ఫేర్. భలాయి కరేన ఉందేర్ కన కాఁయిఁ ఛేని. జేతి తూఁ నసీబ్దార్ వేజాయేచీ, నీయత్దార్ మర్గేజే మాఁయిఁతీ ఫేర్ ఉటజనా, తోన భలాయిర్ బద్ల భలాయి మళ్ జావచ కన్ కో.

15ఓతీ సదా భోజన్ కరేన బేటేజేమా ఏక్ ఈవాత్ సామళన్, - దేవేర్ రాజేమా ఖొరాకి ఖాయేవాళో నసీబ్దార్ కన్ ఓన కేతేఖమ్,

16ఊ ఓన హనూకో - ఏక్ ఆద్మీ మోటో దావత్ కరాన్ వార్సేక్ ఆద్మీన బలాయో.

17దావతేర్ వక్తేపర్ ఊ -అబ్బ దావత్ తయ్యార్ ఛ. ఆవోకన్ బలాయొజేన కేన ఓర్ బాఁయాఁన మేలో.

18పణ్ ఓసే ఏక్ దల్లేతీ టాళో ఖాయేన లాగ్గే. అగ్డీరో, మ ఏక్ ఖేత్ లేమేలోంచుఁ. ఓన దేకేర్ జరూర్ ఛ మన మాఫ్ కర్ కన్ తోన నోరాకర్రోంచుఁ కన్ కో.

19ఉజ్జేక్ - మ పాంచ్ జోడీ బళదేవున మోల్ లీదో. ఉందేన పర్చో కరేన జారోంచుఁ. మన మాఫ్ కరోకన్ నోరాకర్రోఁచుఁ కన్ కో.

20ఉజ్జేక్-మ ఏక్ బీరేన వాయా కర్లిదో, జేతి మ ఆసకూనీ కన్ కో.

21జనా ఊ బాఁయాఁ హాటో ఆన్ ఏవాతే ఓర్ మాలకేన మాలమ్ కర్తేఖమ్ ఓ ఘరేర్ మాలక్ రీస్ కరన్- తుఁ జల్దీ శారేర్ బజారేఁవు మాఁయిఁన్, గల్లీఁవూ మాఁయిఁ జాన్ గరీబేవూన, డూండేవూన, టూంటేవూనన్, కాణేవూన అత్త బలాలేన్ ఆ కన్ బాఁయాఁన కో.

22అత్రామా బాఁయాఁ- ప్రభూ తూఁ హకమ్ దీనోజుఁ మ కీదో పణ్ ఉజ్జి జాగ్ ఛ కన్ కో.

23జేతి మాలక్ - మార్ ఘర్ భరాజావజుఁ తూఁ రాజ్ బజారుఁ కనన్ శారేఁవుర్ గాల్లీఁవుమా జాన్, మాఁయిఁ ఆయెన ఒత్తరజే ఆద్మీన జోర్బారీకర్.

24కసనకతో బలాయెజే ఓ ఆద్మీఁవుమా ఏక్ సదా మార్ దావత్ చాకేనీ కన్ తమేన కేరోఁచుఁ కన్ కో.

25-26ఘణ్ జనూర్ మళావో ఓర్ లార జారే జనా, ఊ ఉందేర్ సామ్ ఫరన్ - కుణీ వతొయీ మార్ ఢైఁ ఆన్, ఓర్ యాడీన బాపేన గోణ్ణీన చచ్యాబరూన భాయి భీయాన భ్యాన్ బాయినన్ ఓర్ జానేన సదా న-ఛోడతో ఊ, మార్ చేలా వేసకెని.

27ఉజ్జీ కొయితొయీ ఓర్ సిల్వా పాల్డేన్ మార్ లార, న ఆవతో ఊ, మార్ చేలా వేసకెనీ.

28తమార్మా కుణీతోయీ ఏక్ గడ్ భందాయెన కూంతతో ఓన పూరో కరేన చావజకో ఓర్ ఢైఁ ఛకో ఛేనికో కన్ బేసన్, ఓన లాగజకో ఆగ్డీ లేకో దేకేనీ క?

29న దేక్లతో ఊ ఓర్ బునాది ఘాలన్ ఏకాద్ వళా ఓన పూరో నకరతో

30-ఈ ఆద్మీ భాందేన సరూకీదో పణ్, పూర్ కరేన వంగాయి కొని కన్ కేన్ ఓన దేకన్ ఠట్టా కరేన, సరూ కరచ.

31ఉజ్జీ కొయీ రాజ్ ఉజ్జేక్ రాజేతీ వ్యార్ మారేన జావజనా, ఓర్ ఉంపర్ వీస్ హజార్ ఆద్మీతీ ఆవజేన దస్ హజారేతీ వ్యార్ మారేన జోర్ ఓన ఛక ఛెనికో కన్ బేసన్ అగ్డీ సోంచ్ కరెనీ క?

32జోర్ న రతో ఊ ఉజ్జీ ఘణ్మ రజనాజ్, ఆద్మీన మేలన్ శాంతి కరేన దేకచ కొని క?

33హన్నూజ్ తమార్మా ఓర్ రజకోసే ఛోడేనీజకో మార్ చేలావేసకేనీ.

34నూణ్ ఆచోజ్ పణ్, నూణ్ ఖారోనవతో కేతీ ఓన ఖారో ఆవ?

35ఊ జమ్మీనక, ఏరూనక కామ్దేనీ. జేతి ఓన బార బగాదచ. సామ్ళేన కాన్ రజకో సామ్ళేజా కన్ ఉందేన కో.

Currently Selected:

Luke 14: Lambadi

Highlight

Copy

Compare