genesis 8

1దేవ్ నోవాన ఓర్ సాత్ ఝాజేమా రజకో సొగ్ళి జీవ్రాసేవునన్ గావ్డి ఢోరూన సేనహార్దెలాల్దొ. దేవ్ ధర్తిపర వాళ్ మారజుఁ కీదొ జేతి పాణి కమ్ వేగో.

2ఊండో పాణీర్ ఊటాన్, ఆస్మానేరి ఖిట్కిసదా బురాగే; ఆస్మానేతి పడ్రోజకో మోటొ పాణి థమ్ గో.

3జనా జమ్మిపరేతి పాణి ఢీలో ఢీలో కమ్ వేతొగో ఏక్సో పచాస్ దాడేర్ పచ్చ పాణి కమ్ వేగో.

4జనా సాత్మో మీనా సత్రమెు దాడేన ఝాజ్ అరారాత్ గట్లాపర థమ్ గో.

5దస్మో మీనాలగు పాణి ఢీలొ ఢీలో కమ్ వేతోగో. దస్మో మీనా అగ్డీర్ దాడ గట్లావూర్ ఫూంగే దకాయె.

6చాళీస్ దాడ్ వేగే జేర్ పచ్చ నోవా ఊ కీదోజకో ఝాజేర్ ఖిట్కి కాడన్;

7ఏక్ కాగ్లాన బార ఛోడో, ఊ బార జాన్ జమ్మి పరేరో పాణీ సఁస్ జావ జేలగు ఓవ్డి ఏవ్డి ఫరూకీదొ.

8ఉజ్జి ధర్తిపరేరొ పాణి కమ్ వేగోచకొ కోనికో దేకే సారు ఊ ఓర్ కనేతి ఏక్. కబూతరేన బార ఛోడో.

9పాణి జమ్మిపర సే ఫ్యాలన్ రజేతి ఓర్ పగ్ మేలేన సదా ఓన జాగ్ మళికోని జేతి ఝాజేమా ఛజకొ ఓర్ కన ఫరన్ ఆయి. జనా ఊ (నోవా) హాత్ లాంబొ కరన్ ఓన పకల్డేన్, ఝాజేమా లేల్దో.

10ఊ ఉజ్జి సాత్ దాడ్ థమన్ ఫరన్ ఓ కబూతరేన ఝాజేమాఁయిఁఁతి బార ఛోడో.

11సాంజేర్ వళ ఊ నోవాకన ఆయిజనా తోడన్ రజకో ఓలీవార్ ఝాడేర్ పాన్ ఓర్ మూండేమా రజేతి జమ్మి పరేతి పాణి కమ్ వేగోచకన్ నోవాన మాలంవేగి.

12ఊ ఉజ్జి సాత్ దాడ్ థమన్ ఓ కబూతరేన బార ఛోడో, ఓర్ పచ్చ ఊ ఓర్ కన ఫరన్ ఆయికోని.

13ఉజ్జి ఛోసేఏక్ వరస్ అగ్డీరొ మీనామా అగ్డీరొ దాడొ ధర్తిపరేతి పాణి సంస్ గో, నోవా ఝాజేర్ ఢాంక్ణో కాడన్ దీటొ జనా, జమ్మి ఫర్కాన్ ర.

14దీమెు మీనా వీసన్ సాత్మెు దాడేమా జమ్మి సుకాన్ ర.

15జనా దేవ్ నోవాతి కో.

16తూన్, తార్ సాత్ తార్ బీరన్ తార్ బేటాన్, తార్ బోడియె ఝాజేమాఁయిఁతి బార ఆవొ.

17పంకేరు, గావ్డి ఢోరన్, జమ్మి పర సర్కన్ చాలజకొ సే జాతేర్ కీడాన్ అసే తార్కనేర్ జీవ్రాసేన సేన తార్ సాతలేన్ బార ఆవ్ణో. ఓ జమ్మి పర ఘణ్ జాదావేన్ ఫ్యాలన్ బడ్తేరేణో కన్ నోవానకో.

18జేతి నోవాన్, ఓర్ సాత ఓర్ బేటా, ఓర్ బీరన్ ఓరి బోడియెసె బార ఆయె.

19హర్యేక్ జీవ్రాసన్ సర్కన్ చాలజకొ (తరజకొ) హర్యేక్ కీడా హర్యేక్ పంకేరూన్ జమ్మి పర సంచార్ కరజకో (ఫరజకో), సొగ్ళి ఉందేర్ ఉందేర్ జాతేన పక్డన్ ఛజకొసె ఓ ఝాజేమాఁయిఁతి బార ఆయె.

20జనా నోవా యెహోవాన భోకణ్ చడాయేర్ పీడా భాందన్, పవిత్తర్ ఛజకో ఢోరే మాఁయితీన్ పవిత్తర్ పంకేరూమా. సే మాఁయితి థోడ్సేకేవున లేన్ ఓ భోకణేర్ పీడాపర జళాయేర్ భోకణ్ దీనో.

21జనా యెహోవా ఓర్ ఖాతరేర్ సువాస్ లేన్ అబ్బేతి నరేర్ కార్ణె. ధర్తీన ఫరన్ సరాప్ దూని, కస్నెకతొ నరేవూఁర్ దలేర్ సోంచ్ ఉందేర్ బాళ్పణేతీజ్ ఖరాబ్. మ ఆబ్బకీదోజుఁ ఉజ్జి కన్నాఁయి జీవన్ ఛజేన సేన నాష్ కరూఁని.

22జమ్మి ఠేరన్ రజేలగు, బీజ్ బోయెరోన్, పీక్ కాటేర్, సీళోన్ తాతొ, సిఁయాళోన్, ఉందాళొ, రాతన్, దీఁయెఁ థమనజుఁ చాలు కరియెకన్ ఓర్ దలేమా కేల్దో.

Currently Selected:

genesis 8: Lambadi

Highlight

Copy