genesis 50
50
1యోసేప్ ఓర్ బాపేర్ మూండేపర పడన్ రోన్, ఓన చూమ్లీదో.
2పచ్చ యోసేప్ ఓర్ బాపేరొ మర్దా జీవ్డాన సువాస్ దజకో చీజేవుఁతి తయార్ కర్ణోకన్, ఓర్ దాస్ ఛజకొ డాక్టరేవుఁన హకమ్ దీనో జేతి ఓ డాక్టర్ ఇశ్రాయేలేన సువాసేర్ చీజేవుఁతి తయార్ కర్నాకే.
3సుంగంధేర్ చీజేవుఁతి మర్దా జీవ్డాన తయార్ కరేన చాళిస్ దాడ్ లాగచ. ఓన హన్ను కరేర్ దాడ్ పూర్ వేగే. ఉజ్జి ఓర్వడీతి ఈజిప్టేవాళ్ సత్తర్ దాడ్ వలారా కర్ కరన్ రోయె.
4ఓర్ కార్ణె వలారాకరన్ రోయేర్ దాడ్ వేగె జేర్ పచ్చ, యోసేప్ ఫరోర్ ఘరేవాళేఁవుతి వాతే కరన్ - తమార్ మేర్వాని మార్పర వీయతో ఈ మార్ వినతీన ఫరోన హన్ను సమ్ళాదో.
5మారొ బాప్ మార్ హాత్ సోగన్ ఖొరాన్, - ఇదేక్ మ మరీజారోంచుఁ, కనానే మా మార్ సారు (సమాధి) ఖాడ్ ఖొదాలీ దొంచు. ఒత్త తూఁ మన ఓమా గత్ భాంత్ కర్ణో కన్ కోచ జేతి, మ ఒత్త జాన్ మార్ బాపేన గత్ భాంత్ కర్దేన్ ఫరన్ ఆవూఁచుఁ కన్ కేదో కన్ కో.
6జేతి ఫరో - ఊ తార్ హాత్ సోగన్ ఖొరాయెు జేర్ కార్ణే, తూఁ జాన్ తార్ బాపేన గత్ భాంత్ కర్ద కన్ హకమ్ దీనో.
7జేతి యోసేప్, ఓర్ బాపేన గత్ భాంత్ కరేన గో, ఓర్ సాత, ఫరోర్ ఘరేర్ మోటే, ఛజకొ ఓర్ సేవక్ సేన్, ఈజిప్ట్ దేశేర్ మోటే సే.
8ఓర్ బాపేర్ ఘరేవాళ్ సేగే. ఓ ఉందూర్ గోర్లీర్ డారేఁవునన్ ఉందూర్ గావ్డి ఢోరేవున గోషేన్ దేశేమాజ్ రకాడ్ దీనే.
9ఉజ్జి రథేన్, సవారి కరేవాళ్ ఓర్ సాత్ గేజేతి ఊ భీడ్, (మళావొ) ఘణ్ జాదార.
10యోర్దానేర్ పర్లేవ్డి ఛజకొ అఠదు కజకొ ఖళేకన పూంచ్గె జనా ఓత్త భారి వలారా కర్కరన్ రోయె. ఊ ఓర్ బాపేర్ సారు సాత్ దాడ్ రోవాపీటి కీదో.
11ఓ దేశేమా వస్రేజకో కనానేవాళ్ అఠద్ కజకొ ఖళేకన రోవాఫీటి కర్రేజకొ దేకన్, - ఈజిప్టువాళేన ఈ కేజాయేని జత్రా రోయేరొకేల్దె జేతి ఓన ఆబెల్ మిశ్రాయీమ్ కన్ నామ్ దీనే. ఊ యోర్దానేర్ పర్లేవ్డి ఛ.
12ఓర్ బేటా ఓర్వడీతి ఊ ఉందూన హకమ్ దీనో జూఁజ్ కీదే.
13ఓర్ బేటా ఓర్ మర్దాజీవ్డాన కనాన్ దేశేన లేజాన్ మక్పేలా కజకొ ఖేతేమా ఛజకొ ఖోళామా గత్ భాంత్ కీదే, ఓనన్, ఓ ఖేతేన అబ్రహామ్ ఓర్ సారు మసాణేర్ జమ్మి,ఖాస్ హక్ రజు మమ్రేర్ సమ్నక్ హిత్తీయావాళొ ఛజకొ ఎఫ్రోనెకన మోల్ లీదో.
14యోసేప్ ఓర్ బాపేన గత్ భాంత్ కర్దీనె జేర్పచ్చ ఊన్, ఓర్ భాయి, ఓర్బాపేన గత్ భాంత్ కరేన గే జకొసే ఫరన్ ఈ జప్టేన డిగ్రి ఆయె.
15యోసేపేర్ భాయి ఉందూర్ బాప్ మర్గో జకొ దేకన్ - ఏక్ వకత్ యోసేప్ అపణ్ పర రీస్ ఘాల్లేన్. అపణ్ ఓన కీదేజకొ దుష్మణేన పక్డన్ తప్పనజుఁ అపణ్ పర రీస్ ఫేళ్ళియె కన్ కేలేన్.
16యోసేపేన హన్ను కేమేలే - తారొ బాప్ ఊ మరోకోని జేరాంగ హకమ్ దీనోజకొ కాఁయిఁ కతో.
17తమ్ యోసేపేతి - తార్ భాయి తాతి దుష్మణ్ కీదేచ, జేతి దయాకరన్, ఉందూర్ అపరాధేనన్ ఉందూర్ పాపేన మాఫ్ కర్ కన్ కేదోకన్ కోచ జేతి. దయాకరన్ తార్ బాపేర్ దేవేర్ దాసేవుఁర్ అపరాధేన మాఫ్ కర్ కన్ కే. ఓ యోసేపేతి హన్ను వాతె కర్రేజనా ఊ రోల్దో.
18ఉజ్జి ఓర్ భాయిసె జాన్, ఓర్ సమ్నక్ ఊందె పడన్ - ఇదేక్ హమ్ తార్ దాస్ ఛాఁ కన్ కేజనా.
19యోసేప్ - చమ్కో మత్, మ దేవేర్ జాగే పర ఛూఁ క?
20తమ్ మన కీడ్ కరాఁకన్ సోఁచ్ కీదేపణ్, ఆజేర్దాడో హన్ను చాల్రోజుఁ, కతో, ఘణే జనూన బంచాడజుఁ దేవ్ ఆచ్చె వాస్తజ్ కీదో.
21జేతి చమ్కోమత్, మ తమేనన్ తమార్ బాల్ బచ్చావున పోసియుఁకన్ కేన్, ఉందూన సమ్జాన్, ఉందూతి ప్రేమేతి వాతే కీదో.
22జేతి హన్ను యోసేపన్, ఓర్ బాపేర్ కట్మాళేవాళ్, ఈజిప్టుమా వసే. యోసేప్ ఏక్సోదస్ వరస్ బంచో.
23యోసేప్ ఎఫ్రాయిమేర్ తీన్ పీడీర్ ఛూచారెలగు దీటో; ఉజ్జి మనష్షేర్ బేటా మాకీరేన ఛూచాబర్ హాుయెజనా యోసేపేర్ గోదేమా మెలాయె.
24యోసేప్ ఓర్ భాయివుఁన దేకన్, మ మరీజారోఁచుఁ దేవ్ తప్పనజుఁ తమేన దేకేన ఆన్, ఏ దేశే మాఁయిఁతి ఊ అబ్రహామ్, ఇస్సాకన్ యాకోబేఁతి సోగన్ ఖాన్ దీనోజకొ దేశేన తమేన లేన్ జాయె కన్ కో.
25ఉజ్జి యోసేప్, దేవ్ తప్పనజుఁ తమేన దేకేన ఆవచ; జన్నా తమ్ మార్ హడ్కావున అత్తేతిలేన్ జావ్ణో కన్ కేన్ ఇశ్రాయేలేర్ బేటావుఁతి సోగన్ ఖొరాలీదో.
26యోసేపేన ఏక్సోదస్ వరస్ రజనా ఊ మర్గో. ఓ సుగంధేర్ చీజేవుతి ఓర్ మర్దాజీవ్డాన తయార్ కరన్ ఈజిప్ట్ దేశేమా ఏక్ ఖాటేర్ సందూకేమా రకాడే.
Currently Selected:
genesis 50: Lambadi
Highlight
Copy
Compare
Share
Want to have your highlights saved across all your devices? Sign up or sign in
© 2025, The Bible Society of India
All rights reserved
