genesis 39

1యోసేపేన ఈజిప్టూన లేన్ ఆయెజనా, ఫరోర్ కామెవాళోన్, రాజేర్ రక్షణ్ కరేవాళొఛజకొ సేనార్ హకమ్దార్ పోతీఫర్ కజకొ ఏక్ ఈజిప్టేవాళొ ఒత్తె ఓన లేన్ ఆయెజకొ ఇష్మాయేలెవాళుఁ కన మోల్ లీదో.

2యెహోవా యోసేపేర్ సాత్ రజేతి ఊ బడ్తొ ఓర్ మాలీక్ ఛజకొ ఓ ఈజిప్టువాళేర్ ఘరేమా ర.

3యెహోవా ఓర్ సాతఛకనన్, ఊ కరజకొ సొగ్ళీన ఓర్ హాతేమా యెహోవా సఫల్ కీదోచకన్ ఓర్ మాలీక్ దీటో జనా.

4యోసేపేపర ఓన మేర్ ఛూటో జేతి ఓర్కన కామ్ (పరిచార్) కరేన రకాళ్ళీదో. ఉజ్జి ఊ ఓర్ ఘరేన దేక్ భాల్ కరేన ఓన నియమ్ కరన్ ఓన ఛజకొ సొగ్ళీన ఓర్ హాతేమా హవాలె కర్దీనో.

5ఊ ఓర్ ఘరేపరన్, ఓన ఛజకొ సొగ్ళీ పర దేక్భాల్ కరేన నియమ్ కీదోజకొ దాడేతి యెహోవా యోసేపే సారు ఓ ఈజిప్టేవాళేర్ ఘరేన ఆశీష్ దీనో. యెహోవార్ ఆశీష్ ఘరేమా కాఁయిఁన్, ఖేతే వాడీమా కాఁయిఁ ఓన ఛజకొ సొగ్ళి పర ర.

6ఊ ఓన ఛజకొ సొగ్ళీన యోసేపేర్ హాతేమా హవాలె కర్దేన్, ఊ ఖొరాకి ఖాయేరొ తపన్ ఓన కాఁయిఁఛకో కాయిఁ ఛేనికో విచార్ కరన్ మాలమ్ కర్లేతోతో కోని. యోసేప్ ఖూబ్ సూరతే రోన్, దేకేన భారి ఆచొర.

7ఓర్పచ్చ ఓర్ మాలీకేర్ బీరేరి ఆంకి యోసేపేపర పడీ. జేతి ఓర్కన సోకన్ కీ.

8పణ్ ఊ మానొకోని - మార్ మాలీక్, ఓన ఛజకొ సొగ్ళీన మార్ హాతేమా హవాలె కర్దీనొ కోనికె. మార్ వడీతి ఓర్ ఘరేమా కాఁయిఁ ఛకో ఓన మాలమ్ ఛేని; ఏ ఘరేమా మాతి మోటో కుణీఛేని.

9తూఁ ఓర్ బీర్ ఛీజేతి తోన తపన్ ఉజ్జి కుణ్సీని సదా మన హవాలె నకరజుఁ రీదోకోని. జేతి కూఁకన్ అత్రా భయానక్ ఖరాప్ కామ్ కరన్ దేవేర్ విరోధేర్ పాప్ భాంద్లు కన్ ఓర్ మాలి కేర్ బీరేతి కో.

10దాడి దాడి ఊ యోసేపేతి వాతె కర్తిర, పణ్ ఓతి సోయెనక; ఓర్కన రేనక మానొకోని.

11హన్నురజనా ఏక్ దాడ ఊ ఓర్ కామె సారు ఘరెమాయి గోజనా ఘరేర్ ఆద్మియూఁ మా కుణీ సదా ఒత్త రకోని.

12జనా ఊ ఓర్ కప్డాన పకళ్ళేన్, ఓతి సోకన్ కీజనా ఊ ఓర్ కప్డాన ఓర్ హాతేమా ఛోడ్దేన్, తపాలేన్ బార ధాఁస్గో.

13ఊ ఓర్ కప్డాన ఓర్ హాతేమా ఛోడ్దేన్, తపాలేన్ డగర్గో కజకొ దీటి జనా.

14ఓర్ ఘరేర్ మన్క్యావున బలాన్, - దేకో, ఊ అప్ణేన ఠట్టా కరేన ఏక్ హెబ్రీవాళేన అపణ్ కన లాయెుచ, మార్కన సో కన్ మార్కన ఆయెుజనా మ జోర్తి బర్కాయి.

15మ జోర్తి బర్కాయి జకొ ఊ సామ్ళన్ మార్కన ఓర్ కప్డాన ఛోడ్దేన్, తపాలేన్ బార ధాఁస్గోకన్ ఉందేతి కేన్.

16ఓర్ మాలీక్ ఘర ఆవజేలగు ఓర్ కప్డా ఓర్ కన రకాళ్ళీదీ.

17జనా ఊ ఓర్ ఘరేవాళేతి ఏ వాతేర్ నాఁయిఁ హన్నుకీ - తూఁ అపణ్ కన లాయెుజకో ఊ హేబ్రీవాళొ దాస్ మన ఠట్టా కరేన మార్కన ఆయెు.

18మజోర్తి బర్కాయిజనా ఊ ఓర్ కప్డాన మార్కన ఛోడ్ దేన్ తపాలేన్ బార ధాఁస్గో.

19జేతి ఓర్ మాలీక్ - హన్ను తార్ దాస్ మన కీదో కన్, ఓర్ బీర్ ఓతి కీజకో వాతే సామ్ళోజనా రీసేతి అంఘార్ వేన్.

20ఓన పకళ్ళేన్ రాజేర్ ఖైదీయూన భాందన్ రకాడ జకో జేలేమా ఘలాదీనో. ఊ ఒత్త జేలేమ రీదో.

21పణ్ యెహోవా యోసేపేర్. సాతరేన్, ఓర్పర దయాదకాళన్ ఓర్పర ఓ జేలే పరేర్ హకమ్ దారేన మేర్ ఛూట జుఁ కీదో.

22ఓ జేలే పరేరొ, హకమ్ దార్ ఓ జేలేమా రజకొ ఖైదీయూఁన సేన యోసేపేర్ హాతేమా హవాలె కర్దీనో, ఓ ఒత్త కాఁయిఁ కరకో ఊసే ఊజ్ కరాయెవాళో.

23యెహోవా ఓర్ సాత్ రీదో జేతి ఓ జేలేర్ హకమ్దార్, ఓర్ హాతేమా హవాలె కర్దీనో జకో కుణ్సీ వడీతి సదా వచార్ నకరజుఁ ర. ఊ కరజకొ సొగ్ళీన యెహోవా భర్పూర్ సఫల్ వజుఁ కీదో.

Currently Selected:

genesis 39: Lambadi

Highlight

Copy

Compare