genesis 25
25
1అబ్రహామ్ ఫరన్ ఏక్ బీరేన వాయా కర్లీదో, ఓర్ నామ్ కెతూరా.
2ఊ ఓన జిమ్రాన్, యెుక్షాన్, మెదాన్, మిద్యాన్, ఇష్బాకన్, షూవహాు కజేవున జణి.
3యెుక్షానేన షేబానన్, దెదాన్ హాుయె. అష్షూరేవాళ్, లెతూషీయులన్, లెయుమీయుల్ కజకొ ఓ దెదానేర్ వలాదెవాళ్.
4ఏయిఫా, ఏఫేర్, హానోక్, అబీదాన్ ఎల్దాయా కజకో ఓ మిద్యానేర్ సంతానెవాళ్ ఏసే కెతూరార్ సంతానె వాళ్.
5అబ్రహామ్ ఓన రజకొ సొగ్ళిన ఇస్సాకేన దేదీనో.
6అబ్రహామ్ ఊ రకాడ్మేలొ జేర్ బేటాఁవున ఇనామె దేన్, ఊ బంచన్ రజనాజ్ ఓరొ బేటా ఇస్సాకెకనేతి ఉగ్మణె సామ్, ఉగ్మణ్ దేశేన ఉందూన మేల్దీనో.
7అబ్రహామ్ బంచొ జకొ వరస్, ఏక్ సో పాంచ్ పర్ సత్తర్ వరస్.
8అబ్రహామ్ భర్పూర్ బుడాపేమా ఆయెుజనా, ఆచొ బూడ్ పణెమా దమ్ ఛోడ్దేన్ మర్జాన్ ఓర్ వడ్బూడేవుఁమా భళ్గో.
9హిత్తీవాళొ ఛజకొ, సాహోరేర్ బేటా ఎఫ్రోనేర్ ఖేతె మాఁయిఁర్ మక్పేలాకజకొ ఖోళా మా ఓర్ బేటా ఇస్సాకన్, ఇష్మాయేల్ ఓన గత్ భాంత్ కీదె; ఊ మమ్రేర్ సమ్నక్ ఛ.
10అబ్రహామ్ హేతూర్. బేటాఁవుఁకన లీదోజకో ఖేతెమాజ్ అబ్రహామేనన్, ఓర్ బీర్ శారాన గత్ భాంత్ కీదే.
11అబ్రహామ్ మర్గోజేర్పచ్చదేవ్ ఓర్ బేటా ఇస్సాకేన అశీష్ దీనో; జనా ఇస్సాక్ బేయేర్ లహాయిరోయి కన వస్రోతో.
12ఈజిప్టేవాళన్ శారార్ దాసి ఛజకో హాగర్ అబ్రహామేన జణీజకో అబ్రహామేర్ బేటా ఇష్మాయేలేర్ వలాద్ ఈజ్.
13ఇష్మాయేలేరొ ప్యాలొ బేటా నెబాయోత్, కేదార్, అద్బయేలన్ మిబ్షామ్
14మిష్మా, దూమాన మశ్శా.
15హాదర్, తేమా, యెతూర్, నాపీషన్ కేదేమా.
16ఏ ఉందూర్ ఉందూర్ వలాదేవుఁన పక్డన్, ఉందూర్ ఉందూర్ నామేవున పక్డన్ ఇష్మాయేలేర్ బేటాఁవూర్ నామ్. ఉందూర్ ఉందూర్ గామేవుమాన్, ఉందూర్ హవేలీవుమా ఇష్మాయేలేర్ బేటా ఏజ్. ఉందూర్ నామ్ ఏజ్. ఉందూర్ ఉందూర్ జనూన పక్డన్ ఓ బార జణా రాజ్ హాుయె,
17ఇష్మాయేల్ బంచోజకొ వరస్ ఏక్సో తీసన్ సాత్. జనా ఊ దమ్ ఛోడ్దేన్ మర్జాన్, ఓర్ వడ్ బూడేవు మా భళ్ గో.
18ఓ అష్షూరేన జాయేర్ వాటేమా హవీలాతి సరువేన్ ఈజిప్టేర్ సమ్నక్ ఛజకో షూరు లగు వస్రేతే. ఊ ఓర్ భాయివూఁర్ సేర్ సమ్నక్ ఠకాణొ వసాలీదో.
19అబ్రహామేర్ బేటా ఇస్సాకేర్ వలాద్ ఈజ్. అబ్రహామెన ఇస్సాక్ హాువొ.
20ఇస్సాక్ పద్దన రామేమా వస్రోజకొ సిరియావాళొ ఛజకొ బెతూయేలేర్ బేటీన సిరియావాళొఛజకో లాబానూర్ భేన్ రిబ్కాన వాయా కర్లీదొజనా చాళిస్ వర్సేర్ ఉమ్మరేరొ ర.
21ఇస్సాకేర్ బీర్ వాంజ్డి వేన్ రజేతి ఊ ఓర్ కార్ణె యెహోవాన అరజ్ కీదో. యెహోవా ఓర్ అర్జీన సామ్ళొ జేతి, ఓర్ బీర్ పేటేతి వేగి.
22ఓర్ పేటే మాఁయీర్ బాళక్ (ఛుచార్) ఏకేతి ఏక్ లడేన లాగ్గే జేతి ఊ - హన్నువతో మ బంచేరొ కస్నెకన్ కేలేన్ ఏర్ కార్ణె యెహోవాన పూచేన గీజనా యెహోవా ఓతి హన్నుకో -
23దీ జన్ తార్ పేటే మా ఛ - దీ రాజ్యేర్ జన్ తార్ పేటే మాఁయిఁతి ఆన్ నాళి నాళి వేన్ రీయె. ఏక్ జనేతి ఉజ్జేకొ జన్ బల్వాణ్ రీయె. మోటో నాన్క్యాన దాస్ వేన్ రీయె కన్కో.
24ఓన ఛుచార్ జణేర్ దాడ్ భరాగె జనా ఓర్ పేటేమా బేళేర్ ఛుచార్ ర.
25అగ్డీరొ రాత్డొ వేన్ రజకొ బార ఆయెు. ఓర్ జీవ్డా సారి రూఁవార్ కప్డార్ నాఁయిఁ ర జేతి ఓర్ నామ్ ఏశావ్ (రాత్డొ) కన్ పాడె.
26ఓర్పచ్చ ఓర్ భాయి బార ఆయెుజనా ఓర్ హాత్ ఏశావూర్ ఏడీన పకళ్ళేన్ ర. జేతి ఓన యాకోబ్ కన్ నామ్ (దగల్బాజికన్) పాడె. ఊ ఉందేన జణిజనా ఇస్సాక్ సాట్ వర్సేరొర.
27ఓ ఛోరా మోట్ వేగె జనా ఏశావ్ జంగ్లేమారేన్ శికార్ కరేమ భాద్దర్ వేన్ ర;
28యాకోబ్ సీదా సాదా వేన్ డేరావుఁమా రేతోతో, ఇస్సాక్ ఏశావ్ లావజకొ శీకారేరిబోటి - ఖావ్తోతో జేతి ఓన ప్రేమ్ కీదో; రిబ్కా యాకోబేన ప్రేమ్ కీదీ.
29ఏక్ దాడ యాకోబ్ తర్కారీర్ ఖాణో పకారొ జనా ఏశావ్ హారొతాకొ వేన్ జంగలేమాఁయితి ఆన్,
30మ హారొతాకొచూఁ ఊ రాత్డొ రాత్డొ ఛజె మాఁయిఁతి దయాకరన్ థోడ్సేకొ మన ఘాల్ కన్ మాంగో. జేర్ ఘాలి ఓర్ నామ్ ఎదోమ్ (రాత్డొ) కన్ కెరాయెు.
31జనా యాకోబ్ - తార్ పేలొటీర్ హక్ ఆజ్ మన దేదకన్ కోజనా.
32యేశావ్ - దేక్, మతొ మరేన వేరోఁచుఁ ప్యాలోటీరొ హక్ రేన్ మన కాఁయిఁ కర కన్ కో.
33యాకోబ్ - ఆజ్ మాతి సోగన్ ఖోకన్ కో, ఊయాకోబేతి సోగన్ ఖాన్ ఓన ప్యాలోటీర్ హకేన వేచ్ దీనొ జనా.
34యాకోబ్, ఖోరాకీనన్, పకాయెు జకో వాలోళిరొ లొగాణ్ ఏశావున ఘాలో; ఊ ఖాలె పీలేన్ ఊటన్ డగర్గో, హన్ను ఏశావ్ ఓర్ ప్యాలోటీర్ హకేన హాతేతి ఖోల్దో.
Currently Selected:
genesis 25: Lambadi
Highlight
Share
Copy
Want to have your highlights saved across all your devices? Sign up or sign in
© 2025, The Bible Society of India
All rights reserved
