genesis 16
16
1అబ్రామేర్ బీర్ శారయి ఓన ఛుచాబరేన జణికోని. ఓన హాగర్ కజకో ఈజిప్టేర్ దాసి ర.
2జనా శారయి ఇదేక్ యెహోవా మన ఛుచాబర్ న జణజుఁ కర్నాకోచ, తుఁ దయాకరన్ మార్ దాసీతి జో. ఏక్ వకత్ ఓర్వడీతి మన ఛుచార్ వచ కాఁయిఁకో కన్ అబ్రామేతి కీ. జనా అబ్రామ్ శారయిర్ వాత్ మానో.
3జేతి అబ్రామ్ కనాన్ దేశేమా దస్ వరస్ ఠకాణో కరన్ రీదో జేర్పచ్చ. అబ్రామేర్ బీర్ శారయి ఓర్ దాసి హాగర్ కజకో ఈజిప్టేవాళీన లేన్ ఓర్ ఘరేవాళొ ఛజకో అబ్రామేన, ఓర్ గోణ్ణీర్ నైఁ రేన ఓన దేదీని.
4ఊ, హాగరేతి భళోజనా ఓర్ పేట్ వేగో. ఊ, ఓర్ పేట్ వేగోచకన్ మాలం కర్లీది జనా, ఓర్ మాల్కణ్, ఓర్ నంజ్రేమా హల్కి దకాయి.
5జనా శారయి మార్ ఉస్రు తోన లాగియే. మజ్ మార్ దాసీన తార్ గోదేమా దీని జేర్పచ్చ, ఊ పేటేతి వేగీచ కన్ మాలం కర్లీది జనా మ ఓర్ నంజ్రేమా హల్కి దకాగీంచుఁ, మనన్ తోన దేవజ్ నేవో కరియె కన్ అబ్రామేతి కి.
6జేతి అబ్రామ్ - ఇదేక్ తార్ దాసి తార్ హాతేమా ఛ; తూఁ తార్ ఖాతరావజుఁ ఓన కరేవాసకన్ శారయినకో. శారయి ఓన భారి వేలా పాడి జేతి ఊ ఓర్కనేతి ధాంస్గి.
7జనా యెహోవార్ సోజా ఆడ్బీమా పాణీర్ ఊటాకన కతో షూరు కజే వాటెకనేర్ పాణీర్ ఊటా కన ఓన దేకన్.
8శారయిర్ దాసి ఛీజకొ హాగర్, కత్తేతి ఆయిచీన్, కత్త జారిచి కన్ పూచో జనా, ఊ - మ మార్ మాల్కణ్ ఛజకో శారయి కనేతి ధాంస్ జారీచుఁ కన్ కి.
9జనా యెహోవార్ సోజా - తూఁ తార్ మాల్కణే కన ఫరన్ జాన్ ఓర్ హాతె హేట నవన్ ర కన్ ఓన కో.
10ఉజ్జి, యెహోవార్ సోజా - తార్ వలాదేన మ తప్పనజుఁ ఫ్యాలజుఁ కరియుఁ; ఊ గణ్ సకే జాయేని జత్రా జాదావేన్ రీయ కన్ ఓనకో.
11ఉజ్జి యెహోవార్ సోజా - ఇదేక్ యెహోవా తార్ అర్జి సామ్ళోచ. తూఁ పేటేతి ఛీ. తూఁ బేటాన జణన్ ఓర్ నామ్ ఇష్మాయేల్ కన్ పాడీస్;
12ఊ జంగలేరొ గద్దాసరీకొ మన్క్యా; ఓర్ హాత్ సేనన్, సేర్ హాత్ ఓన దుష్మణ్ వేన్ రీయె. ఊ ఓర్ భాయియూఁర్ సేర్ సమ్నక్ వాసొ వసియె, కన్ ఓన కో జనా.
13ఓన దేకేవాళొ దేవ్ తూంజ్ కజకో నామ్ ఓతి వాతె కరెవాళో యెహోవాన పాడి, కస్నెకతో మన దీటో జేన మ అత్త దీటించుఁ కాఁయిఁ కన్ కేల్ది.
14జేర్ వాస ఓ పాణీర్ ఊటాన బేయేర్ లహాయిరోయి కన్ నామ్ ఆయెు. ఊ కాదేశేరన్, బెరేదూర్ వచ్చ ఛ.
15పచ్చ హాగర్ అబ్రామేన బెటాన జణి. అబ్రామ్, హాగర్ జణి జకో ఓర్ బేటాన ఇష్మాయేల్ కన్ నామ్ పాడో.
16హాగర్ అబ్రామేసారు ఇష్మాయేలేన జణి జనా అబ్రామేన ఛో పర అస్సి వరస్ ర.
Currently Selected:
genesis 16: Lambadi
Highlight
Share
Copy
Want to have your highlights saved across all your devices? Sign up or sign in
© 2025, The Bible Society of India
All rights reserved
