genesis 12
12
1యెహోవా - తూఁ ఊటన్ తార్ దేశేమాఁయితీన్, తార్ పామణె కనేతీన్ తార్ బాపేర్ ఘరేతి నిక్ళన్ మ తోన దకాళుఁ జకో దేశేన జో.
2తోన మోటో జనేర్ నాఁయి కరన్ తోన ఆశీష్ దేన్ తార్ నామేన మోటో కరియుఁ. తూఁ సేన ఆశీషేర్ నాఁయి రీస్.
3తోన ఆశీష్ దజేన మ ఆశీష్ దీయుఁ, తోన భాండ జేన మ సరాప్ దీయుఁ, ధర్తిపరేర్ వలాదే సే తార్వడీతి ఆశీష్ పాయె కన్ అబ్రామేతి కోజనా.
4యెహోవా ఓతి కోజూంజ్ అబ్రామ్ డగర్గో, లోత్ సదా ఓర్ సాత డగర్గో, అబ్రామ్ హారానేతి నిక్ళొ జెవక్తెపర ఊ పాంచ్పర సత్తర్ వర్సేరోర.
5అబ్రామ్ ఓర్ బీర్ ఛజకొ శారయినన్ ఓరొ భాయిరొ బేటా లోతూన హారానేమా ఉందూర్ ఉందూర్ ఓ కమాయె జకో సొగ్ళి ధన్ దౌలతేనన్ ఓ కమాయెజేన సేన లేన్ కనాన్ కజకొ మల్కేన జావాంకన్ నిక్ళన్ కనాన్ కజకొ దేశేన ఆయే.
6జనా అబ్రామ్ షెకేమేమా ఛజకొ ఏక్ జాగేలగు ఓ దేశేమా ఫరన్ మోరేకన ఛజకొ సిందూరేర్ ఝాడె కన పూంచ్గే, జన్నా కనానెవాళ్ ఓ దేశేమా వస్రేతే.
7యెహోవా అబ్రామేన దకాన్, తార్ వలాదేన ఏ దేశేన దీయుఁ కన్ కోజనా ఊ ఓన దకాయెుజకొ యెహోవా సారు ఏక్ భోకణేర్ పీడాన భాందో.
8ఒత్తేతి ఊ నిక్ళన్ బేతేలూర్ ఉగ్మణె సామ్ ఛజకొ గట్లాకన జాన్ అత్మణే సామ్ (దాడొ డూబ జీమ) ఛజకొ బెతేలూరన్, ఉగ్మణే సామ్ ఛజకో హాయీర్ వచ్చ డేరా మాండన్ ఒత్త యెహోవా సారు భోకణేర్ పీడా భాందన్ యెహోవార్ నామేమా అరజ్ కీదో.
9అబ్రామ్ ఉజ్జి చలొజాతొ దక్షిణే సామ్ గో.
10జనా ఓ దేశేమా కాళ్ పడ్గో - ఓ దేశేమా కాళ్ ఘణో రజేతి అబ్రామ్ ఈజిప్ట్ దేశేమా వస్ణొ కన్ ఒత్త డగర్గో.
11ఊ ఈజిప్టూమా ధర్సేన ఢఁయిఁసి గోజనా ఊ ఓర్ బీర్ ఛజకో శారయిితి హన్నుకో ఇదేక్ తూఁ ఖూబ్ సూరతేర్ ఛీ కన్ మన మాలమ్.
12ఈజిప్టేవాళ్ తోన దేకన్ ఈ ఓర్ బీర్ ఛకన్ మన మార్నాకన్ తోన బంచేదచ.
13తార్వడీతి మన మేర్వాని వజూఁన్, తార్వడీతి మ బంచూంజుఁ దయాకరన్ తూఁ మార్ భేన్ కన్ కకన్ కో.
14అబ్రామ్ ఈజిప్టూన పూంచ్గో జనా ఈజిప్టేవాళ్. ఊ బీర్ ఖూబ్ సూరతేర్ ఛకన్ దీటే.
15ఫరోకన రేవాళ్ హకమ్దార్ ఓన దేకన్ ఫరోర్ ముణాంగ ఓర్ సూరతేన ఘణొ తారీఫ్ కీదే జేతి ఓ బీరేన ఫరోర్ ఘర బలామంగాయె.
16ఊ ఓర్వడితి అబ్రామేన మేర్వాని కీదొ. జేతి ఓన గోర్లి, గావ్డి గద్ది, గద్ద, దాస్ దాసీన్, ఊంటే సే దేమేలో.
17జనా యెహోవా అబ్రామేర్ బీర్ ఛజకో శారయిర్ వడీతి ఫరోనన్ ఓర్ కట్మాళేన రోగే దర్దేతి ఘణ్ వేలా భావేటిమాఘాలో.
18జనా ఫరో అబ్రామేన బలామంగాన్ - తూఁ మన కీదోజకొ ఈ కాఁయిఁ? ఈ తార్ బీర్ ఛకన్ మన కస్నె మాలమ్ కీదో కోని?
19ఈ మార్ భేన్ ఛకన్ కస్నెకో? మ ఏన మార్ బీరేర్నాఁయిఁ కర్లేవాళొ రూఁ కాఁయిఁకో. తోయి పణ్ ఇదేక్ తార్ బీర్, ఎన లేన్ డగర్జో కన్ కో.
20ఉజ్జి ఫరో అబ్రామేర్ వడీతి ఓర్ జనూన హకమ్ దీనోజేతి ఓ అబ్రామేన ఓర్ బీరేనన్ ఓన ఛజకో సొగ్ళీన మేల్దీనే.
Currently Selected:
genesis 12: Lambadi
Highlight
Share
Copy
Want to have your highlights saved across all your devices? Sign up or sign in
© 2025, The Bible Society of India
All rights reserved
