Exodus 13
13
1ఉజ్జి యెహోవా మోషేతి హన్నుకో
2ఇశ్రాయేలెవాళూమా మాన్క్యార్ వతోయిక, ఢోరూర్ వతోయి, ధరగ్డి వజకో, కతో, హర్యేక్ ప్యాలోటీర్ వజకో మన ప్రతిష్ట కర్ద. ఊ మారోజ్ కన్ కో.
3మోషే జనూతి హన్నుకో, - తమ్ దాస్ వేన్ రోజకొ ఘర్ ఛజకొ ఈజిప్టేతి నిక్ళన్ ఆయెజకొ దాడేన హర్దె లాలో. యెహోవా ఓర్ హాతేర్ బళేతి ఓ మాఁయితి తమేన లాయెుచ, ఖాటో ఛజకొ కాఁయిఁ వతోయి న ఖావ్ణో.
4అబీబ్ కజకొ మీనామా ఈ దాడోజ్ తమ్ నిక్ళన్ ఆయె కోనిక.
5యెహోవా - తోన దూంకన్, తార్ బాప్ దాదావుఁతి సోగన్ ఖాన్, కోజకొ, కనానె వాళేఁవుర్, హిత్తీవాళేఁవుర్ ఆమోరే వాళేఁవుఁర్, హివ్వీ వాళేఁవురన్, యెబూసీ వాళేఁవుర్, వస్రే జకొ జాగ్ దూదన్ మంగాళేరి ధారె వ్యావజకొ దేశేన తోన చలాఁవుఁ జేర్పచ్చ తూఁ ఏ రివాజేన ఏ మీనామాజ్ మనావ్ణో.
6సాత్ దాడ్ తూఁ ఖాటొ ఛేనిజకో బాటీవున ఖావ్ణో; సాత్మెు దాడేన యెహోవార్ తేవార్ మనావ్ణో.
7ఖాటొ ఛెనిజేనజ్, సాత్ దాడ్ ఖావ్ణో, ఖాటొ ఛజకొ తార్కన నదకావ్ణో, తూఁరేర్ జాగేమాసేమా ఉప్ణజకొ కుణ్సీ చీజ్ న దకావ్ణో.
8ఉజ్జి ఓ దాడ తూఁ - మ ఈజిప్టేతి ఆయెుజనా, యెహోవా మన కాఁయిఁ కీదోకో, ఓర్ సారు ఉప్ణేని జకొ బాటీవున ఖారోంచుఁకన్, తార్ బేటాన కేణో.
9యెహోవార్ ధరమ్ శాస్త్ర తార్ మూండేమా రజుఁ, బళేదార్ హాతేతి యెహోవా ఈజిప్టే మాఁయిఁతి తోన బార లాయెుచకన్ కేన, ఏ రివాజేన తార్ హాతెపర తోన నిశానేర్ నాఁయిఁన్, తార్ ఆంకీవుఁర్ వచ్చ హర్దెరేజావజుఁ రీయె.
10జేర్ కార్ణె, హర్ వరస్, ఏ హకమేన ఓర్ నియమేర్ వక్తేపర మనావ్ణో.
11యెహోవా తాతీన్, తార్ బాప్ దాదాతి సోగన్, ఖాదొజుఁ ఊ కనానె వాళూఁర్ దేశేమా తోన పూంచాడన్, ఓన తోన దజేర్ పచ్చ.
12హర్యేక్ ప్యాలోటీర్ వజకోన్, తోన ఛజకొ గావ్డి ఢోరూన వజకొ హర్యేక్ ఫ్యాలోటీర్ పీలాన యెహోవాన అర్పణ్ కర్ణో. ఉందూమా మరద్ (బచ్చా) ఛజకొ యెహోవార్ వేజావచ.
13హర్యేక్ గద్దీర్ ప్యాలోటీర్ పీలాన మోల్ దేన్ ఛోడాన్, ఓర్ బద్లె గోర్లీర్ పీలాన అర్పణ్ కర్ణో. హన్ను ఓన నఛోడా సకతో, ఓర్ నళ్ళీన భాంజ్ నాక్ణో. తార్ బేటావుఁమా ప్యాలోటీర్ వజకొ హర్యేక్ (మరద్) బేటాన మోల్ దేన్ ఛోడాలేణో.
14అబ్బేతి, తార్బేటా, - ఈ కాఁయిఁ కన్ తోన పూచ జనా, తూఁ ఓన దేకన్, - హాతేర్ బళేతి, యెహోవా ఈజిప్టే మా దాస్ వేన్ రాఁజకొ ఘరే మాఁయిఁతి, అప్ణేన బార లాయెుచ.
15ఫరో అప్ణేన జాయెద నజుఁ ఓర్ దలేన కఠిన్ కర్లీదొజనా, యెహోవా మన్క్యార్ ఫ్యాలోటీర్ హాుయెజేన కాఁయిఁ, జివ్రాసేమా ప్యాలోటీర్ హాుయెజేన కాఁయిఁ ఈజిప్ట్ దేశేమా ప్యాలోటీర్ హాుయెజేన సేన మార్నాకో. ఏ కార్ణేతి, మ, మరద్ వజకొ ప్యాలోటీర్ పీలాఁవున యెహోవాన బలీర్ అర్పణ్ దూఁచుఁ పణ్ మార్ బేటావుఁమా హర్యేక్ ప్యాలోటీర్ వజేన మోల్ దేన్ ఛోడాఁవుఁచుఁకన్ కేదో.
16యెహోవార్ హాతేర్ బళేతి, అప్ణేన ఈజిప్టే మాఁయిఁతి. బార లాయెుజేతి,ఈ ఖబర్ తార్ హాతెపర నిశానేర్ నాఁయిఁన్ తార్ ఆంకీఁవుర్ వచ్చ టీకీర్ నాఁయిఁ రేణో కన్ కో.
17ఉజ్జి ఫరో జనూన జాయేన హకమ్ దీనోజనా, దేవ్, - ఏ జన్ వ్యార్ మారజకొ దేకజనా, ఓ ఉందూర్ మనేన బద్లాలేన్, ఈజిప్టేన ఫరన్ డగర్జావచ కాఁయిఁ కో కన్ కేలేన్, ఫిలిష్తీ వాళేఁవుర్ దేశ్ ఢాఁయిఁసి రతోయి పణ్, ఓ వాటేమా ఉందూన చలాయెు కోని.
18పణ్ దేవ్, జనూన ఘేరన్ ఫర్తె జాయేర్ వాట్ ఛజకో రాత్డొ సమ్దరేర్ జంగ లేర్ వాటే మాఁయిఁతి ఉందూన చలాయెు. ఇశ్రాయేలెవాళ్, వ్యార్ మారేన తయార్ వేన్, ఈజిప్టె మాఁయిఁతి ఆయె.
19ఉజ్జి మోషే యోసేపేర్ హడ్కావునలేన్ ఆయెు, ఊ - దేవ్ జరూర్ తమేన దర్శణ్ దీయె. జనా తమ్ మార్ హడ్కావున అత్తేతి లేన్ జావ్ణొ కన్ ఇశ్రాయేలెవాళేఁవుతి కాటొ సోగన్ ఖొరామేలోతో.
20ఓ సుక్కోతేతి రవాణావేన్ జాన్, జంగలేర్ ఢఁయిఁ ఛజకొ ఏతామేమా ఉత్రే.
21ఓ దీఁయేఁన్, రాత్ జావజుఁ యెహోవా వాటెపర ఉందూన చలాయె సారు, దీఁయేఁర్ వక్తేపర వాదళేర్ ఖంబేమాన్, రాత్ వణా ఉందూన వజాళొ దేసారు అంగారేర్ ఖంబేమా రేన్, ఉందేర్ ఆంగచాల్తొ ఆయెు.
22ఊ దీఁయేఁర్ వక్తేపర వాదళేర్ ఖంబేనక, రాతేర్ వణా అంగారేర్ ఖంబాన జనూర్ సమ్నకేతి హటాయొకోని.
Currently Selected:
Exodus 13: Lambadi
Highlight
Copy
Compare
Share
Want to have your highlights saved across all your devices? Sign up or sign in
© 2025, The Bible Society of India
All rights reserved
