Acts 8

1ఓ దాడూమా యెరూషలేమేమా రజకో సంఘేన ఘణో భావేటి ఆయి. జేతీ అపొస్తల్ తపన్ సే యూదయ సమరయ మల్కేమా భడక్ గే.

2భక్తిదార్ ఆద్మీ. స్తెఫేనేన గత్ భాంత్ కర్నాకన్ ఓర్ వాస వలారా కర్తే రోయె.

3పణ్ సౌల్ ఘర్-ఘర్ జాన్ మాటీవునన్ బీరేవున ఖీంచ్లేజాన్ జేలేమా ఘలాన్ సంఘేన నాశ్ కర్తో ర.

4జేతీ ఛీంట్ ఛాంట్ వేగే జకో ఆచ్ ఖబరేన ప్రకట్ కర్తే ఫరూకీదే.

5జనా ఫిలిప్ సమరయ శారేలగు జాన్ క్రీస్తూర్ వాతే ఉందేన ప్రచార కర్తో ర.

6జనూర్ మళావొ సామ్ళన్ ఫిలిప్ కీదొజకో అచంకళార్ కామేన దీటె. జేతీ ఊ కోజకో వాతే ఏక్ మనేతి ధ్యాన్ కీదె.

7ఘణ్ ఆద్మీన లాగీజకో భూత్డీ జోర్తీ కల్కారి మారన్ ఉందేన ఛోడన్ డగర్గీ. పక్షవాతమెర్ రోగేతి పాక్తి సుకారే జకోన్ టూంటేన్ వార్సేక్ జన్ ఆచ్ వేగె.

8జేతీ ఓ శారేమా ఘణ్ ఖుషి వేగీ.

9సీమోన్ కజకో ఏక్ ఆద్మీ ఓర్ ఆంగ ఓ శారేమా జాదు కర్తో, ఊ కుణీకో ఏక్ మోటొ ఆద్మీ కన్ కేతో, సమరయవాళూన అచామో ఖావజుఁ కర్తోర.

10నాన్క్యాతీ మోటేలగు సే దేవేర్ మోటో జోర్ కన్ కేలాయొజకో ఈజ్ కన్ కేలేన్ ఓర్పర ధ్యాన్ రకాడె.

11ఊ ఘణ్ దాడ్ జాదుకర్తో ఉందేన అచామో ఖావజూఁ కీదో జేతీ, ఓ ఓన మాన్ దీనే.

12పణ్ ఫిలిప్ దేవేర్ రాజేర్ కార్ణే యేసుక్రీస్తూర్ నామేర్ బారేమా ఆచ్ ఖబర్ కేతో రజనా ఓ ఓన విశ్వాస్ కరన్, మాటీన్ బీరే బాప్తీసమ్ లేల్దే

13జనా సీమోన్ సదా విశ్వాస్ కరన్ బాప్తీసమ్ లేలేన్ ఫిలిప్పేన ఛోడనజుఁ రేన్, నిశానేన్, మోట్ అచమ్కళార్ కామ్ వేర్ దేకన్ అప్సోస్ వేగో.

14సమరయావాళ్ దేవేర్ వాతేన మాన్లీదెకన్ యెరూషలేమేమాఁయిఁర్ అపొస్తల్ సామ్ళన్ పేత్రూనన్ యోహానేన ఉందేర్ ఢైఁ మేలె.

15ఏ ఆన్ పవిత్తర్ ఆత్మాన పాలేణొకన్ ఉందేర్ వాసు అరజ్ కీదె.

16ఓర్ ఆంగ ఉందేమా కేరీ ఉంపర్ ఊ ఉత్రోకొని. ఓ ప్రభు ఛజకో యేసూర్ నామేమా బాప్మీసమ్ పణ్ లేమేలేతే.

17జనా పేత్రు యోహాన్ ఉందేర్ ఉంపర్ హాత్ మేల్తేఖమ్, ఓ పవిత్తర్ ఆత్మాన పాల్దే.

18అపోస్తల్ హాత్ మేల్తేఖమ్ పవిత్తర్ ఆత్మా ఉత్రోకన్ సీమోన్ దేకన్.

19ఉందేర్ ముణాంగ పిసామేలన్ -మ కేర్ ఉంపర్ హాత్ మేలుఁచుఁకో ఉందేర్ ఉంపర్ పవిత్తర్ ఆత్మా ఉత్రన్ ఆవజుఁ ఈ హక్ మన దోకన్ ఉందేన పూచో.

20జేతి పేత్రు-తూఁ పిసాదేన్ దేవేర్ వరమేన కమాలుఁ కన్ కేల్దో, జేతీ తార్ రూపో తాతీసదా నాశ్ వేజాయ.

21తార్ దల్ దేవెర్ ముణాంగ ఆచో ఛేని జేతీ ఏ కామేమా తోన హాఁసో కాఁయిఁఛేని

22జేతి తార్ ఈ ఖరాప్ గొణ్ ఛోడ్దేన్ దల్ బద్లా లేన్ ప్రభూన అరజ్ కర్, ఏకాద్ వళా, తార్ దల్లేమాఁయిర్ సోంచ్ దేవ్ మాఫ్ కర్ సకియె కాఁయిఁ కో.

23తూఁఘణ్ ఖరాప్ గొణేతీన్ పాపేర్ సాంక్ళీయూఁతి భందన్ ఛీజుఁ మన దకారోచీ కన్ కో.

24జేతీ సీమోన్- తమ్ కేజేమా కుణ్సీ మార్ ఉంపర్ న ఆవజుఁ, తమజ్ మార్ వాసు ప్రభూన అరజ్ కరో కన్ కో.

25జేర్పచ్చ ఓ గవాయి దేతే ప్రభూర్ వాత్ బోధా కరన్ యెరూషలేమేన ఫేర్ జావ్తే సమరయార్ ఘణ్ గామూమా ఆచ్ ఖబర్ ప్రచార కర్తే ఆయె.

26ప్రభూర్ సోజా ఫిలిప్పేతి - తూఁ ఊటన్ దక్షిణే సామన్ యెరూషలేమేతీ గాజాన జావజకో జంగలేర్ వాటేన భళ్జో కన్ ఫిలిప్పేన కో. జనా ఊ ఊటన్ గో.

27జనా ఇతియోఫియార్ రాణిఛజకో కందాకెర్ హేట మంత్రివేన్, ఓర్ ధనేర్ ఉంపర్ రజకో ఇతియోఫియావాళో ఛజకో బాయెలా ఆరాధనా కరేన యెరూషలేమేన ఆయో

28ఊ ఫరన్ జావ్తో ఓర్ రథేర్ ఉంపర్ బేసన్ యెషయార్ గ్రంథ్ వాంచ్రో తో.

29జనా ఆత్మా ఫిలిప్పేతి- తూఁ ఓ రథేకన జాన్ ఓన భళ్ కన్ కో.

30ఫిలిప్ ధాఁసన్ ఢైఁ జాన్ ఊ ప్రవక్తా ఛజకో యెషయార్ గ్రంథ్ వాంచ్రో జనా సామ్ళన్ - తూఁ వాంచ్రో జకో మాలమ్ కర్లేరోచీ క కన్ ఓన పూచ్తేఖమ్,

31ఊ - కుణీ ఏక్ మన వాట్ నదకాళతో కూఁ మాలమ్ కర్సకుఁ? కన్ కేన్ రథ్ చడన్ బేస్ కన్ ఫిలిప్పేన నోరాకీదో.

32ఊ గ్రంథేమా వాంచ్రో జకో భాగ్ కాఁయిఁకతో- ఓన గోర్లీర్ ర్నాఁయిఁ కటేన లాయె, లట్టా కత్ర జేర్ ముణాంగ గోర్లీర్ పిలా కూఁ గచ్చప్ రచకో, హన్నూజ్ ఊ మూండొ నఫాడజుఁ రో.

33ఊ నవణేతి రో జేతీ ఓన న్యాయేర్ నేవొ మళోకొని ఓర్ వలాదేన కూణ్ ఖోలన్ కే సక్యే ?. ఓర్ జీవ్ ధర్తీ ఉంపర్ నరజూఁ, కాణ్ణాకె.

34జనా బాయెలా - ప్రవక్తా కేర్ బారేమా హనూకేరోచ? ఓర్ కార్ణేక, ఉజ్జేకేర్ కార్ణే? మార్ ఉంపర్ దయాకరన్ మన కకన్ ఫిలిప్పేన పూచో.

35జేతీ ఫిలిప్, మూండో ఫాడన్ ఊ లక్మేలె జేన పక్డన్ ఓన యేసూర్వడీర్ ఆచ్ ఖబర్ బోధా కీదో.

36ఓ వాటేపర్ జావ్తే రజనా, పాణీ రజకొ ఏక్ జాగ్ ఆయి. జనా బాయెలా - ఇదేక్ పాణీ, మన బాప్తీసమ్ దేన అడ్మే కాఁయిఁఛ కన్ పూచన్, రథేన థామ్ కన్ హకమ్ దీనొ.

37జనా ఫిలిప్-తూఁ తార్ పూరో దల్లేతీ విశ్వాస్ కరస్తో, తూఁ బాప్తీసమ్ లేవాస కన్ ఓన జవాబ్ దీనో. జనా ఊ -యేసు క్రీస్తు దేవేర్ బేటాకన్ విశ్వాస్ కర్రోంచుఁ కన్ జవాబ్ దీనొ.

38ఫిలిప్పూన్ బాయెలా, దోయీ పాణీమా ఉత్రే. జనా ఫిలిప్ ఓన బాప్తీసమ్ దీనో.

39ఓ పాణీ మాఁయిఁతీ బార ఆయెజనా ప్రభూర్ ఆత్మా ఫిలిప్పేన లేన్ డగర్గో. బాయెలా ఖుషీతి ఓర్ వాటేన డగర్గో. ఊ ఫిలిప్పేన ఫేర్ కన్నాఁయీజ్ దీటో కొని.

40పణ్ ఫిలిప్ అజోతేమా దకాయో. ఒత్తేతీ కైసరయాన ఆవజేలగు ఊ సే శారేమా సంచార్ కార్తో, ఆచ్ ఖబర్ ప్రచార కర్తో ఆయొ.

Currently Selected:

Acts 8: Lambadi

Highlight

Copy